|
- سواليف روح
بسم الله أخيراً قررت أسويلي مدونة من متى وأنا أفكر :d > كان بس ناقص تستخير هههه المهم حبيت تكون لي مساحة هنا أعبر فيها وأسولف وأكتب اللي فخاطري ويمكن حد يستفيد ويمكن محد يستفيد مدري بس حبيت أجرب 😊 أمممم شنو بعد تبون أعرفكم على نفسي ولا مو لازم ؟ أحس تعرفوني بس يلا .. اسمي : يبدأ بحرف الألف 😁 عمري : كل شوي يتغير على حسب الناس اللي أتعامل معاهم أحب أعطي كل حد على جووه حتى الأطفال أصير طفلة معاهم عادي يعني هواياتي واهتماماتي : أحب كل شي وأحب أجرب وأكتشف وأتعلم أي شي جديد مدونتي بتكون متنوعة لأن ما أعرف أثبت على شي محدد أحس بالملل بسرعة وبعد التنوع أحلى 😇👍🏻 وبس حياكم 🌸💕 |
سالفتي مع عالم المنتديات أول منتدى شاركت فيه كان في 2007 وما شاركت في غيره إلا لما تقفل من فترة شارك ف منتدى ثاني ف البداية تقبلته وعادي بس بعدين صرت أتضايق من بعض الناس اللي فيه وما أرتاح وأنا ما أحب أقعد ف مكان ما أكون مرتاحة فيه حتى الحين لو بس أتصفحه أتضايق وأحس بطاقة سلبية ما أعرف ليش ! يمكن لأنه ما صار يناسبني مدري !! وبعدين سجلت ف هالمنتدى عرفته بالصدفة من قوقل يعني ما وصلتني دعوة ولا شي بس أكثر منتدى حبيته وتقبلته حتى الأعضاء هنا غير وحلوين وأحس كلهم طيبين و بعد كأني أعرفهم من زمان مع أني مشاركة من فترة قصيرة =) ويمكن في ناس هنا يحسوون كأنهم يعرفوني لأني متعودة أن الناس دايماً يقولون أني أذكرهم بحد أو يشبهوني بناس يعرفونهم ف عادي ما أستغرب وأتقبل هالشي وحتى يصير عندي فضول أعرف مين اللي يشبهوني وليش وشنو اللي الرابط المشترك وهكذا وبس هذي قصتي مع المنتديات =) |
:3473749b: شكراً على التقييمات الحلوة واللايكات كله من ذوقكم ^^ منورين :525: |
تدرون لاحظت شي لما أصير هادية وكسلانة أحس كل الناس مثلي كسلانين مدري هم ينعدون مني ولا شوو السالفة :ff1 (55): ! انزين لا تقلدوني صيروا نشيطين عشان أنعدي منكم وأتنشط مثلكم :1114: أنا بقوم أمشي الحين عشان أتنشط مع أني ما أحب جهاز المشي صوته ينرفز شوي بس بقرأ قصة وأنا أمشي ترى لما أمسك الكتاب أندمج مدري كيف وما أنتبه لشي ولا أحس بالوقت ! حتى مرات لما أكون ف المكتبة نفس الشي أمسك الكتاب وأقرأ وأندمج فيه وما أحس بأي شي حولي بعدين أسمع صوت ناس يقولون لو سمحتي نبي نمر > أكون واقفة ف الطريق حضرتي :d الحمدلله أن الناس منتبهين مو مثلي مرات أمشي وأنا مغمضة لو في مجانين مثلي يمكن نصدم بعض واحنا ماشيين بعدين يصير فلم هندي ف المكتبة > الخيال بروحه يضحك 🤣 المهم خلاص بقوم أمشي وأشوفكم بعدين إن شاء الله 😇💕 |
https://g-lk.com/up/do.php?img=12412 حبيت فكرة الكروت هذي اشتريتها من المكتبة حلوة ✨👍🏻 كل يوم أختار كرت وأشوف شنو الآية وأعتبرها رسالة اليوم وطبعاً هذي كانت رسالة اليوم 😇👌🏻 |
صغرت الصورة وطلع الكلام مب واضح وإذا خليتها بدون تصغير تطلع أكبر من حياتي ليش كذا :601: المهم دخلوا راسكم ف الشاشة عشان تشوفون الكلام :d |
بما أني مهتمة بالألوان وكذا بتكلم عنها شوي في شي لاحظته يخص الألون والطاقة والنشاط أحس في ألوان تعطي طاقة وحماس وتنشط وفي ألوان العكس تجيب الكسل مثلاً ألوان استايل المنتدى إذا كانت الألوان هادية بيصيرون الأعضاء هاديين وكسلانين وتفاعلهم قليل والعكس هو حلو لما يكون الأبيض مسيطر بس لو يكون معاه ألوان مثل الأحمر والبرتقالي والأصفر هذي الألوان تنشط وتعطي طاقة بس أهم شي ما يكون الأحمر مسيطر بدون أي لون ثاني معاه لأن أحس يخلينا عاطفيين عدوانيين عنيفين حتى يقولون لا تختارون اللون الأحمر لغرف الأطفال عشان ما يكون تأثيره سلبي عليهم ويصيرون عنيفين والألوان اللي مثل الأزرق والأخضر مع الوقت يجيبون الكآبة والملل والتبلد لأنه هالألوان باردة أحسن شي للغرف الأبيض والبيج وبعدين ندخل الألوان الثانية اللي نبيها في الأثاث وكذا وكل فترة نغير الألوان على حسب المزاج والنفسية وبس تقدرون تبحثون أكثر عن موضوع الألوان يمكن تستفيدون لأن حتى في ألوان تعالج بعض الأمراض وهكذا وانتوا شو رايكم تلاحظون تأثير الألوان ولا ؟ 😊 |
أنا تعلمت أني ما أخطط لشي أحسن أسوي الأشياء بدون تخطيط وتدقيق وبعفوية قبل كم يوم كنت بكلم وحدة أول مرة أكلمها كنت متوترة مليون ألف وحتى كتبت الكلام في ورقة عشان ما أنسى شنو أبي أقول لأني أعرف بتوتر وبنسى الكلام وأختي تقولي مو لازم تكتبين الكلام عادي تكلمي بعفوية وأنا أقول لا أدري عفويتي شنو بتسوي آخر شي لما تكلمت ما أحتجت الورقة ولا شي وصار الكلام عفوي وعادي لأن هي أسلوبها كان حلو ويشجع بس آخر شي سألتني أنتِ كم عمرج ؟ قلت لها عمري قالت يحليلج بعدج صغيرة > بروح أنتحر شكلي :d الحين أنا صغيرة :98: دايماً يقولون صغيرة :94: |
|
في قصة قرأتها عجبية موجودة بكتاب حالات نادرة 5 القصة تتكلم عن التحكم العقلي يعني التحكم بالعقل الباطن والتلاعب بالواقع في بنت فجأة تتغير وتصير تتصرف عكس نفسها وعكس شخصيتها وتسوي أفعال شريرة وما تدري ليش تتصرف كذا كأنه شي يتحكم فيها وما تقدر تسيطر على نفسها بعدين راحت عند دكتور نفسي ولما قالت له كل شي قال هذي أحداث رواية قرأتها يحسبها تقلد أحداث الرواية بس طلعت أنها ما تعرف الرواية ولا تدري عنها بعدين راحت تقرأ هالرواية واكتشفت أن البنت اللي في الرواية مثلها وأن هي قاعدة تسوي مثلها وتمشي نفس أحداث الرواية والرواية نهايتها مو حلوة والبنت بتموت منتحرة راحت عند الكاتبة قالت لها غيري الأحداث وخلي النهاية سعيدة بس خلاص هي طبعت الرواية والبنت ماتت منتحرة شي عجيب |
المشكلة الحين أحسني مثلها مرة شفت كلام حسيت الكلام كأنه عني وكان هالشخصية أنا واستغربت من التشابه يعني أتخيل أكون بطلة رواية وأنا ما أدري ! شي ثاني حتى في قصة ثانية بنفس الكتاب هذا حسيت البنت اللي فيها نفسي مثل تفكيري وتحب الأشياء الغريبة ودايماً تفكر بعالم خيالي وكذا هالبنت نجحت وفتحت نافذة توصلها لعالم خيالي كان كل شي جميل من برى وهي تحمست وقررت تدخل هذا العالم بس لما دخلته طلعوا الناس اللي فيه أشرار وهجموا عليها وقطعوها وماتت بعد ما شفت النهاية قلت توبة أفكر بعالم خيالي مرة ثانية > أخاف يصير فيني مثلها بس والله شي غريب وعجيب كتاب حالات نادرة بكل أجزائه فيه قصص غريبة وبعضها ما تدرين إذا حقيقة أو خيال |
مبارك عليكم الشهر
وكل عام وأنتم بخير:526: |
https://youtu.be/-1FGLGqqce8 هالمقطع دايماً أحب أنشره لأن المعلومة مهمة ومفيدة وبتفيد الناس اللي بعدهم يدرسون طبقوا هالطريقة مع عيالكم بعد وإن شاء الله يصيرون كلهم شطار ومتفوقين 👌🏻✨ أنا من عرفت هالمعلومة صرت أطبقها لما أذاكر ولما أقرأ كتب 👍🏻 وبس إن شاء الله أنها تفيدكم 😇💕 |
تعرفون الصوت الداخلي أو الحدس ؟ هذا اللي يحذرنا من أشياء أو ينبهنا على أشياء أمس عطاني تنبيه وما سمعته تجاهلت هالصوت وندمت لأني ما سمعته كنت صاحية من وقت وأختي وبنتها موجودين ف البيت عندنا وهم يصحون من وقت ومرات أختي صعب تنتبه على بنتها بروحها وكلهم كانوا نايمين وبغرفهم وأنا صاحية وبغرفتي والصوت الداخلي يقولي قومي واطلعي من الغرفة شوفي لولو الصغيرة وانتبهي عليها يمكن أختج ما تقدر تنتبه عليها بروحها ويمكن تغفل عنها وبعدين يصير شي وأنا أسمع الصوت الداخلي وأقوله بعد شوي بقوم وبشوفها ولا بعد دقايق فقط سمعت صوت قوي وأختي تصيح بنتها طاحت على وجهها كانت راكبة على شي وطاحت منه ولما شفتها كان فمها يطلع منه دم والمنظر يروع كأنه نفس اللي بالأفلام لما يطلع من فمهم دم كثير الحمدلله أخوي كان موجود مع أنه المفروض يكون ف الدوام ومن بداية رمضان وهو محد بس طلع من الدوام من نفسه والحمدلله أخذها الطوارئ على طول وآخر شي قالوا لثتها انجرحت كثير من فوق ومن تحت لأنها طاحت على فمها وأسنانها تعورت بعد ل هالسبب كان فمها ينزف كثيير والحمدلله الباقي كله تمام بس والله خوفتنا كثير الحين لو بس أسمع اي صوت على طول أخاف وأطلع أتأكد من الصوت أهم شي من هالموقف تعلمت أني لازم ما أتجاهل الصوت الداخلي لما ينبهني ولا أتجاهل شعوري لأني أكيد ما بحس ب هالشعور بدون أي سبب و أكيد في سبب ولازم أصدق شعوري وبس والله هذي سالفتي مع الصوت الداخلي :1114: |
تخيلوا الحين أنا مهتمة في لولو الصغيرة وخايفة عليها وكل شوي أفكر فيها وآخر شي تهتم ف أختي الصغيرة أكثر مني وتروح عندها وتمسك دياتها وتمشي ولا تعبرني :60: أقولها لولو تعالي وتطنشني ولا كأني موجودة :مؤثر: أختي الصغيرة مرات تكون نايمة ولولو تدخل الغرفة وتنط عندها وتبتسم لها وتشوفها بنظرات كلها حب وأختي تنفس وتقول طلعيها برا أبي أنام ومع هذا تحبها أكثر مني وأنا اللي طيبة معها ما تبيني بس والله لو ما أهتم تنشب فيني وتفرح لما تشوفني 🙂 المهم بكيفها عادي أهم شي تكون مستانسة حتى لو ما تحبني > قلبي الطيب لا يتحمل بس والله طلعت لولو مثلي تحب النفسيات :d:ff1 (59): > لا تزعلون إذا محد يحبكم الدنيا حظوظ |
رد: - سواليف روح
|
مرات لما حد يسيء لنا ونسكت مو يعني ما عندنا كرامة أو ما نقدر نسوي شي لا بس لأنهم أصغر بكثير من أننا نسوي عشانهم ردة فعل ولا ترى نعرف نسب ونضرب وننتقم إنتقام مدمر لكن صدق ليش أضيع وقتي على ناس ما تسوى ! والله أنا لو أرد بيعرفون أني كنت ساكتة رأفة وشفقة فقط وآخر شي الدنيا دوارة أصلاً وأنا أحب أشوفها لما تدور :ff1 (171)::eq-33: |
|
https://g-lk.com/up/do.php?img=13038 والله صدق هههه المهم أبي رواية حلوة حق بعد العيد ويكون فيها شرير ماضيه حزين :ff1 (42): أحب الشريرين :356: |
https://youtu.be/_kctSyNhDS8 روعة المقطع :d |
في سالفة كل مرة أبي أكتبها بس ما أكتب شي مدري ليش ! أحسها ثقيلة على قلبي بس بنفس الوقت أحس أنها ممكن تفيد هي قصة كورية تتكلم عن مرحلة الطفولة ولما يصير شي مو زين وكيف هالشي يأثر على الشخص لما يكبر بشوف يمكن بكرة أكتبها > بحاول =) |
بكتب القصة الحين مع أني ما أحب هالنوع من القصص بس أحسها مهمة القصة عن بنت تعاني من اضطراب اسمه اضطراب الشخصية المتعددة مرات احنا لما نشوف شخص بأكثر من شخصية وبأكثر من وجه يمكن نتسرع ونحكم عليه بأنه سيء يعني ممكن نقول عنه كاذب أو متصنع أو ممثل أو مخادع وهكذا بس هالشخصية غير هي أصلاً طيبة وزينة وشخصيتها الحقيقية هادية وخجولة ومؤدبة بس هالاضطراب صار فيها بسبب شي صار بمرحلة الطفولة طبعاً هي القصة كورية مثل ما قلت لكم المهم أن هالبنت أمها كانت ترسلها ل مدرب رقص " رقص الباليه " وهذا المدرب كان خبيث ويتحرش فيها لما كلهم يروحون وكان يهددها عشان ما تقول لأحد بس بعدين في وحدة كشفته لكن هذي البنت تأثرت والموضوع سبب لها صدمة نفسية وصار عندها اضطراب ف الشخصية يعني صار عندها ثلاث شخصيات غير شخصيتها 1 - شخصية الطفلة > لما ترجع تتذكر مرحلة الطفولة 2- شخصية المرأة القوية اللي تكره الرجال وتدافع عن النساء > لأنها تعقدت من اللي صار 3- شخصية المرأة الجريئة > لأنها مرات تحتاج تكون جريئة ف تتصرف عكس شخصيتها وكل مرة تتحول لوحدة من هالشخصيات بس لما ترجع ل شخصيتها الأساسية ما تتذكر شي ولا تتذكر شنو صار ولا وين راحت ولا شنو قالت بس تشوف شكلها متغير ولبسها واستايلها متغير ف كانت تعيش في صراع مع نفسها وتبي تتخلص من هالشخصيات بس ما تعرف كيف .. كان عندها صديقة وحدة فقط تتقبلها مثل ما هي مع أنها ما كانت تعرف كيف تساعدها والباقي كانوا ما يقدرون يتحملونها لصعوبتها ويشوفونها معقدة ودايماً يبعدون عنها ويتركونها هي تحسست من هالشي وصارت من نفسها ما تتقبل أي حد حتى اللي يكونون طيبين معها لأن خلاص صارت تحسب كلهم نفس الشي وكلهم راح يتركونها وما راح يفهمونها صح بس في النهاية عرفت شخص بالصدفة و قدر يفهمها صح ويقدر يساعدها عشان ترجع لطبيعتها وطبعاً عرف قصتها وكل شي عنها وبس هذي القصة حبيت أكتبها لأن يمكن في ناس ما يعرفون عن مثل هالاضطراب وشنو سببه وبعد عشان ما نتسرع ونحكم على الناس ونحن ما نعرفهم ولا نعرفهم قصتهم والناس اللي يحسون أنه محد يفهمهم ترى عادي دايماً في حد يقدر يفهمكم صح حتى لو كنتوا معقدين بس يمكن بعدكم ما قابلتوا مثل هالشخص وبس =) |
لقيت هالمعلومات ف قوقل اقتباس:
|
يعجبني مسلسل القناص وأحب كلمات البداية وشخصية " جون " وبعد في مشهد يعجبني من الحلقة الثالثة https://youtu.be/gsX3UD6X674 هنا المشهد من الدقيقة 4:40 إلى 7:00 لما توقع أن العاصفة قادمة من لغة الطيور عجبني ذكائه :d |
https://vt.tiktok.com/ZSdmGvX6G/ والله صح كلامها كم مرة أروح محل العطور أجرب العطر ويعجبني بس لما أشتريه وأرجع البيت أجربه ما يعجبني و أحسه غير المهم أكتشفت أن أي عطر فيه ياسمين ما يناسبني ويكون قوي وما أقدر أستحمله ومرات راسي يصدع منه مدري ليش ! |
مرات أحب أشتري كتب عن علم النفس وكذا وأحب أقرأ ب هالمواضيع ومن فترة كان ودي أعرف عن العقد النفسية وشنو سببها وكيف تصير العقد النفسية لما رحت المكتبة على طول لقيت كتاب يتكلم عن العقد عنوانه " عقدك النفسية سجنك الأبدي " هالكتاب يتكلم عن 15 عقدة نفسية المعلومات اللي فيه مهمة جداً أكثر شي لفت انتباهي الكلام عن النظرة السوية للمرأة يعني ليش في ناس نظرتهم للمرأة نظرة سوية وعادية وطبيعية ! وليش في غيرهم نظرتهم دايماً تكون مو زينة ومرتبطة ف الغريزة فقط ! وهكذا الكتاب يتكلم عن مثل هالمواضيع وبعد عن مواضيع ثانية مثل عقدة الشكل وعقدة الأنوثة والرجولة و عقدة الطفل و النرجسية والخضوع والاستحقاق والتحرش وغيرها بصراحة حلو ويساعد على الفهم والتعمق أنصح فيه لأنه راح يغير نظرتكم لكثير أشياء |
في أشياء في الحياة نفس باب السيارة لما أتعامل مع باب السيارة برفق وأسكره بلطف ما يتسكر بعدين أرجع أسكره بقوة ويتسكر بس أخوي يعصب ويقول كسرتي الباب 😡 انزين شو أسوي هو مو راضي يتسكر وأنا ما عندي حل وسط إما رقيقة بزيادة أو أتعامل بقسوة ودفاشة 🙂 في البداية أكون رقيقة ولطيفة بس إذا ما نفع خلاص أتوحش وبعض الأشياء ما ينفع معها إلا القسوة والدفاشة حتى في التعامل مع الناس بعضهم ياكلوني إذا صرت طيبة ولطيفة وإذا توحشت عليهم يصيرون يحترموني على طول سبحان الله كأنه مو عاجبهم إني أحترمهم ! |
من بعد رمضان زاد عندي الأرق بشكل مو طبيعي ما أقدر أنام زين وكل شوي أصحى مع أني من النوع اللي حتى لو كنت متضايقة عادي أنام ولا يهمني ومو من عادتي إني أسهر ! ومن يومين لاحظت على شعري بدأ يتساقط أمسكه ويطيح 🥲 + تعب وإرهاق ومن هنا تذكرت فيتامين D دايماً ينقص عندي لأني ما أطلع ف الشمس خاصة فالصيف أبداً ما أطلع وعلاقتي ف الشمس مو حلوة تذكرته قبل فترة ورجعت نسيته وكل مرة يصير شي يذكرني فيه وبعدين أرجع أنسى هالمرة خلاص قررت أحطه قدامي عشان أتذكره وما أنساه وبما أني تذكرته حبيت أكتب هالرد عشان أذكركم يمكن في حد ناسي مثلي خاصة اللي عندهم أرق وفيهم كسل وكآبة ومزاجهم متقلب انتبهوا على فيتامين دال وحتى الحديد لا تنسونه وترى في ناس ياخذون فيتامين D بس تكون المشكلة من الامتصاص ف ما يستفيدون لازم ياخذونه مع دهون صحية ومع فيتامين k2 وبس إن شاء الله حد يستفيد من ردي 😊🌸 |
كل يوم قبل ما أنام لازم أقعد مع نفسي وأفكر ومرات أكتشفت أشياء وأنا أفكر اليوم قاعدة أفكر بموضوع العطور دايماً في عطور لما أجربها أتضايق من أول مرة وكنت أقول أحس كأني أشم ريحة تذكرني بال بف باف لا تضحكون بس هذا شعوري صدق :d وأفكر شو هالريحة الغريبة ! بعدين تذكرت أيام الحظر مع كورونا لما نستخدم المعقمات كان لها نفس الريحة الغريبة هذي وأذكر أن فيها كحول وبعدين استوعبت وتذكرت أن بعض العطور فيها كحول وشكله هذا الشي اللي يضايقني مو قادرة أتحمل العطور اللي فيها كحول تسبب ضيق وكتمة وصداع وعيوني تحمر منها وصرت على طول أعرفها من أول ما أشمها لأن أتضايق بسرعة الحمدلله أخيراً عرفت السبب أشكر نفسي على هذا الإكتشاف :150: وخلاص بروح أنام الحين :d |
سالفتي مع قصص الحب طول عمري وأنا أقول أكره قصص الحب وبالذات قصة قيس وليلى أكرهها وأتنرفز إذا حد تكلم عنها لأن نهايتها مو حلوة وكنت أكره هالنوع من الروايات حتى و إذا شفت ناس مثل قيس أتنرفز وأعصب بس كذا معقدة ولأن أحب النهايات السعيدة فقط وطبعاً أنا أي شي أرفضه و أكرهه لازم يطلع لي بكل مكان وصارت قصص الحب تظهر لي بكل مكان يعني هي اللي تجيني مو أنا اللي أدورها :1114: بس القصص اللي تظهر لي تكون نهايتها حلوة كأن هالقصص تبي تغير نظرتي وتقولي ترى أنتِ متشائمة :ff1 (31): وخلاص اقتنعت أنه عادي في قصص نهايتها حلوة ومو كل القصص نهايتها حزينة بس كنت متأثرة بالقصص السلبية اللي أسمعها وأشوفها وبس والله :1114: |
رواية " قهوة قاتل " لفت انتباهي عنوانها وقررت أشتريها هالرواية فيها درس مهم جداً والدرس هو أنك لا تتسرع أبداً ولا تحكم على الناس بناء على ظنون وأوهام أو أدلة يمكن ما تكون حقيقية بس عقلك هو اللي اخترعها وفكر أنها حقيقية ولا تروح تتصرف من نفسك و تقتل أي شخص أو تأذيه بدون ما تفكر لأن يمكن في أشياء ما انتبهت لها ويمكن في تفاصيل غابت عنك وما شفت الصورة كاملة هنا القاتل قتل إنسانة بريئة لأنه كان يظن أنها قاتلة وهو أصلاً إنسان زين مو قاتل بس تسرع و حكم عليها غلط وقرر يقتلها أرسل لها قاتل مأجور عشان يقتلها و في آخر لحظة اكتشف أنها بريئة وحاول ينقدها بس خلاص ماتت وطبعاً ندم لأنه تسرع وتصرف من نفسه ومشى ورى أوهام وظنون .. |
تدرون إني محتارة مدري هل أحب الناس الحلوين ولا أحب اللي شخصيتهم حلوة الاختيار صعب لأن ما تفرق عندي يعني كلهم عادي لو أنه تفرق عندي بيكون الاختيار أسهل أفكر أسوي قرعة وأختار وأشوف شنو بيطلع لي أنا مؤمنة بالرسائل الكونية يعني إذا طلع لي الحلوين بختار الحلوين وإذا طلع لي اللي شخصيتهم حلوة بختار اللي شخصيتهم حلوة خلاص ترقبوا النتيجة :d |
سويت القرعة ولما اخترت من أول مرة طلع لي اللي شخصيتهم حلوة بس لحظة أصلاً ليش أحط نفسي بين خيارين :ff1 (171):؟! بحط خيار ثالث على كيفي أحسن بختار اللي الحلوين وشخصيتهم حلوة يعني اثنين في واحد أكيد في حلوين وشخصيتهم حلوة خلاص اللي على كيفي أحلى :ff1 (171): |
من الصُدف الجميلة اللي صارت لي هالفترة كان عندي معلمة درستني رياضيات من زمان وقبل أكثر من عشر سنوات كانت طيبة معاي وتعاملني بأسلوب غير وأنا الناس اللي يعاملوني بأسلوب مُختلف ما أنساهم وكنت دايماً أتذكرها وما نسيتها ومن فترة لما رحنا نخطب لأخوي شفت معلمتي هذي هناك طلعت عمة البنت اللي كنا رايحين نشوفها سبحان الله كيف شفتها بعد كل هالسنين ! وترى بيتنا بعيد كثير عن بيتهم و من أول نظرة عرفتها مع أن شكلها تغير ولما قالت اسمها تأكدت وبس هي ما تتذكرني لكن قلت لها أنها كانت معلمتي بصراحة كثير استانست لما شفتها وحتى أهل البنت كلهم طيبين وأرتحت لهم أحب لما أفكر بناس وبعدين أشوفهم صدفة في قصة ثانية بعد حلوة يمكن بعدين أكتبها =) |
الحين الواحد لما يشتغل فمكان ويكرف ويتعب ويكون راتبه قليل وده أنهم يزيدون راتبه ويفرح إذا زادوه بس لما يروح السوق ويشوف أي سلعة زايد سعرها شوية يقلب الدنيا ويتحلطم مدري ليش ! انزين شو الفرق الحين الاثنين يبون فلوسهم تزيد ويفرحون إذا زادت محد أحسن من أحد ! أنا ضد إني أقاطع أي شي غالي إذا أقدر بشتري عادي وإذا ما أقدر خلاص أمد ريولي على قد لحافي واللي فلوسه قليلة ويروح يشتري شي غالي والله مشكلته هو ما يعرف يتصرف ولازم يغير نفسه الحين مو حرام لما الواحد يصنع منتج ويتعب عليه وآخر شي يبيعه بسعر رخيص وما يربح شي لو أي حد ف مكانه ما راح يعجبه لأن كذا مافي تقدير لمجهوده وتعبه وأصلاً هل المتحلطمين يقدرون يصنعون نفس المنتج ؟! وبعد وين اللي يحب لأخيه ما يحب لنفسه ! البخل شيييين :542: |
رد: - سواليف روح
https://g-lk.com/up/do.php?img=12637
تم اختيار مدونتك كمدونة ملكية لهذا الاسبوع يوم 3 يونيو 2022 إدارة مجتمع غلاك ~ |
قاعدة أدور على مدونتي تحت أقول وينها اختفت طلعت مثبتة فوق وحركات :d مديرتنا الجميلة رانيا شكراً على اختيار مدونتي كلج ذووق والله 🌸 ربي يسعدج 😊💕 وإن شاء الله أكتب أشياء تفيد المجتمع :356: < مدري شدخل هالفيس ههههه |
شفت آخر رد في مدونة رانيا وتذكرت شي يقولون أن الإبداع له علاقة بنوع الغذاء اللي ناكله يعني شوفوا شنو ياكلون المبدعين وبتعرفون سر إبداعهم رانيا تحب السيريه و اللحم فيه معدن الزنك ومعدن الزنك مسؤول عن الإبداع > هذي معلومة عرفتها قبل فترة وأنا لاحظت اللي يحبون اللحم والسمك كلهم مبدعين وخاصة في الكتابة عكس اللي ما ياكلون لحم وسمك كثير واللي تكون عندهم المعادن كلها متوازنة يكونون مبدعين أكثر من غيرهم يعني لازم ما يكون في نقص ولا زيادة في المعادن وبس خلاص كشفت سركم يالمبدعين :d |
كل مرة أقرأ أو أسمع سورة البقرة أشوف العجب خاصة من الناس فجأة يتغيرون ويتبدلون بدون ما أسوي شي ويظهر الوجه اللي كانوا مخبينه وأنا محسنة الظن فيهم ومتوقعة شي ثاني المهم أني بستمر عليها وأشوف شنو يصير بعد الله يستر أحسني ماشية على النية صدق وعبالي أني حذرة ومنتبهة لكل شي |
الأشياء اللي نحبها تشبهنا مثلاً أنا هادية وأعصابي باردة أغلب الوقت وأحب الهدوء والروقان والبرد والثلج والعطور الهادية و نبرة الصوت الهادية والأكل إلي ما يكون فيه فلفل بزيادة ولا يكون ساخن بزيادة ويعني مثل هالأشياء الرايقة :lo2: لو أي أحد يبي يشوفني معصبة صدق بس يسكر عني المكيف أو يحط لي فلفل الأكل أو يتكلم بصوت عالي ومزعج :583: مو بس بعصب إلا بخنقه و بنتفه تنتيف أبداً ما أقدر أستحمل :مؤثر: ما يستفاد من هالفقرة :- انتبهو تسكرون المكيف عن أي شخص يكره الحر ستندمون صدقوني :d |
| الساعة الآن 06:37 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~