رد: حكــاية قصيــرة ❥
 

فيني سالفة،، بس بخليها لبكره الصباح..

و اذا نسيت ذكروني :460:

رد: حكــاية قصيــرة ❥
 

^

متذكرة السالفه بس مالي خلق لها ,


صحيت بثقل عجيب في عقلي و جسمي :ff1 (143):

رد: حكــاية قصيــرة ❥
 

بكره عندي موعد تجديد بطاقة الاحوال ..
و ما طلعت حبة في وجهي الا اليوم ,, و في مكان عجيب ..
يارب تختفي بكره :497:

المشكلة الثانيه ان خواتي جددو بطاقتهم قلبي .. و طلعت اشكالهم في الصورة غريبه
هي عاجبتهم بس انا اشوفهم بشكل غريب ,, الله يستر من صورتي كيف تطلع
كأني اول مرره اصور خخ .. و للامانه هي مرتين و بكره الثالثه
اول بطاقه كانت مررره حلو .. من الاصدار القديم لو تتذكرونهم و مقهوره انهم اخذوها مني
كنت حابه اني احتفظ فيها كان عمري وقتها 26 سنه

ثاني وحده كانت حلوة و حبيتها ,, ما اعرف ليه الناس ما تحب شكلها في الهويه ..
لكن انا تعجبني ,, اهم شي الروح <- اي روح يختي خخخ


متحمسه لبكره .. و لازم نلقى طريقه نخفي الحبه :491:

رد: حكــاية قصيــرة ❥
 

الجو محتاج اغنية

:scorn:

احاول اطلع من حالة الرتابة , و اعيد الشغف اللي فقدته :ff1 (134):

رد: حكــاية قصيــرة ❥
 

https://g-lk.com/up/do.php?imgf=166211586967011.png



من الضروري ان تطبق على نفسك ما تقوله ,
و من الجميل ان تشارك , حتى تلتزم , و المشاركة تدفعنا للامام ..

قاعدة 21\90 لإكتساب العادات الجيدة


اليوم بداية التغيير لاننا قررنا ذلك ,,
الايام اللي فاتت انسقنا مع ظروف الحياة , لانها كانت تريد ذلك ,,
كنا نعيش حياتنا و حياة غيرنا , صبرنا و ربي اعطانا و فرجت ب امره ,,



اليوم قررت بداية جديدة , و تغيير النصف الاخير من سنه 2022 ,,
و استخدمت الجدول اللي صممته لاكتساب العادات ,

كتبت لي ثلاث اشياء و راح التزم فيها ان شاء الله
الاولى : دينية = صلاة الوتر
الثانيه : اهتمام بالبشرة = استخدام منتجات للعنابة بالبشرة
الثالثه : اهتمام بالصحه = عدم الاكل بعد الساعة 8


ما حبيت اكثر علي ,, ثلاثه تكفيني حتى 90 يوم ان شاءالله ,,


و بس :167:

رد: حكــاية قصيــرة ❥
 

كل يوم اقف في الجانب الآخر من الحياة،

لأنتظر من لا يأتي، اتتبع الاثر علني اجد ما يطمئن قلبي به..
و لا اجد...!

انتظر لأخبرهم ، انني على موعد مع البكاء.. و لا ابكي..!



هي الروح، عندما تكون صماء، بكماء،... و معزولة عن العالم

رد: حكــاية قصيــرة ❥
 

الاحداث تحدث لنا كما نفكر،، لذلك فكرو بطريقه جميلة



ذكروني اكلمكم عن سالفه لحديث النفس :ff1 (207):

رد: حكــاية قصيــرة ❥
 

كل يوم في الحياة هو هدية من الله , تخيل الله سبحانه و تعالى يهديك
و ايش يهديك , يوم ..! و انت تعتقد ان هذا اليوم من حقك ..

و الا هو حق لله تعالي , ممكن قبل هذا اليوم تقبض روحك ..


استشعر قلباً و قالباً بهذه الهدية .. و عيشها صح
قدرها لانها من الله تعالي :ff1 (35):


:164:



صباحكم سعيد :261:

رد: حكــاية قصيــرة ❥
 

بعض الاحداث تخلق بداخلك شخص لا مبالي،،

و بعضها، تزرع الورد في قلبك و في طريقك،،



صرت لا اعلم اي الاشخاص انا،، هل هي الاحداث من تشكلني..!

ام صرت بوجوه عدة..!!





ما اعلمه اني احب النسخه الجديدة مني،،

التي تستطيع ان تعيش حتى في اصعب الظروف

تعرف متى تكون اجتماعيه و متى تكون منعزله عن العالم اجمع





:177:

رد: حكــاية قصيــرة ❥
 

اليوم كنت انسانه مختلفه..

فرعي عارفني بالبنت الطيبه الهاديه الكيوت اللطيفه،،



بس وصل صوتي لآخر الشارع من كثر ما لعلعت،،

لدرجه يطلعون من المكتب يتحققون مين اللي يلعلع برا



للاسف في اشياء تطلع المارد اللي ف داخلي و ماعاد يسكت
و يضل معصب طول اليوم ياكل الاخضر و اليابس
الى الان جسمي يرجف من عصبيه الصباح


من زمان انا ما عصبت،
و يارب اخر مره

رد: حكــاية قصيــرة ❥
 

يوماً ما كانت الاغاني , تعتبر تعبير عن شعور , تسلية , و رفيقة الصباح ,
لكن مؤخراً , تخلت عني , تخليت عنها و لا ادري من تنصل عن المسؤولية اولاً ..
ممكن رتم الحياة السريع , هو من اجبرنا على ذلك , او ممكن اكتشفنا اشياء جديدة افضل من الاغاني
او ممكن مشاعرنا اصبحت مختلفة و مافي شي يعبر عنها ,,
او ممكن هو الشعور الغريب داخلي اللي اعجز عن التعبير عنه ,,


او ممكن اني بالغت في حب نفسي ...!


مدري و الله ,, بس انا فيني شي متغير مدري وشو ..!



فيه اشياء بسيطه احتاج اقولها لأحد , بس مو لاقيه الشخص المناسب


يعني مثلاً ودي اقول :


اني امس طالعت في وجهي في المرايه لقيت شخص ما اعرفه
صدمني المنظر اللي شفته لدرجه البكاء ..!
كيف انا ما عرفت اللي في المرايه قدامي و هو انا ..!
ليه انا انصدمت و شعرت برغبه في البكاء

و اول شي سويته الصباح اني رحت لنفس المرايه و ادوّر الشخص اللي شفته
بس شفتني انا , بوجهي اللي اعرفه ب ابتسامتي اللي اعرفها ..



بس , جزء من سوالف الصباح



:362:

رد: حكــاية قصيــرة ❥
 

على كثر المهام , و كثر التعب الا اني مع مجموعه بنات يردون الروح ..
و اليوم حمسوني ارجع لمشروعي و ارجع اسوي كوكيز ..

لان فترة تعب اختي وقفت مرررره و خف عندي الحماس .
على قد ما احاول ارجع فيه شي يشدني لتحت .. و احتاج احد يدفني
و يرجع يدخلني في المود ..

الحمدلله على الايام الجميله :55:


:362:

رد: حكــاية قصيــرة ❥
 

مُتعَبة، بالحد الذي لا يمكنني ان اشتكي،

لاني بكل بساطة لم استطيع تحديد الالم...!

رد: حكــاية قصيــرة ❥
 

انا و بنت خالتي اليوم مجهزين احتفال بسيط ,, هي تبي تحتفل بتخرج اختي , و عيد ميلاد بناتها ..
شاورتني في اشكال كيكات تبي تطلبها ,, قلت ليه تطلبين و انا اعرف اسوي كيك ..
منها اسوي لكم و منها اجرب اللي تعلمته .. و اخبص فيكم .
بنت خالتي هذي كل تجاربي الاولى في مشروعي تكون فيها ..
اول ما بديت اسوي توصيل كوكيز خليتها تطلب مني اكثر من مره الين تعلمت ..
و الان قلت لها خليني اتعلم فيه اسوي الكيك ,,


صح النتيجه ما كانت مذهله ,
بس انا اعجبتني مررره ك اول مره ازين كيك ,,



https://g-lk.com/up/do.php?imgf=166514787082162.jpg


هذي مره حبيتها ,, انا كتبت و غاده اللي رسمت ..
صح انا تهاوشنا و احنا نسويها <- شي لابد منه اذا اجتمعت انا و غاده خخخ
ما عليكم من الخط المعوق , بس عنادي خلاني انا اللي اكتب
و الا غاده تبرعت تكتب بس قلت لها ما تعرفين خخخ


بس الحمده وصلنا لنتيجه ترضينا ..:234:



https://g-lk.com/up/do.php?imgf=166514787081211.jpg

الكيكه الثانيه قالت انه عيد ميلاد اختها و تبي تحتفل فيها ,,
قلت يالله زين اجرب فيكم الحشوات حقت الكيك ..


الان الشكل مرضي لكن الطعم مدري خخخ الله يستر ..


انا احب اسوي حفلات و اتحمس معها ,, بس مؤخراً هديت مرررره
الظروف اللي صارت , و صحتي مو زي اول بس لازلت احارب ..
لازلت ادور الفرصه عشان انتعش من جديد ,,


متحمسه للحفله و متحمسه لكيكاتي :ff1 (227):

رد: حكــاية قصيــرة ❥
 

الحمدلله كيكاتي اعجبتهم ..
و كل ما سكتو قلت هاه شرايكم في الكيك خخخ
<- ياخي تحب المدح :222:

رد: حكــاية قصيــرة ❥
 

-





https://g-lk.com/up/do.php?img=12637


تم اختيار مدونتك كمدونة ملكية لهذا الاسبوع


يوم 8 أكتوبر 2022


إدارة مجتمع غلاك


~

رد: حكــاية قصيــرة ❥
 

اهلا اهلا ..
ايش المساء الجميل هذا ، و الأخبار اللطيف ..
يسعدكم ربي ، و الله يقدرنا على تقديم الجميل لكم ..

شكرا شكرا ..

رد: حكــاية قصيــرة ❥
 

بمناسبة المدونه الملكيه بعطيكم سالفه لطيفة ،،

اليوم كان فيه نقاش حاد بيني و بين غاده ..
قالت يا ماما عندي اختبار انقليزي و لها فترة تذاكر ..
قلت طيب يا ماما اختبري ،،

فجأة نادتني قالت الاختبار لازم ادفع عليه فلوس ،،
قلت طيب بس فهميني هو على ايش و الا انا ما عندي مشكلة ادفع ..
قالت هذا اختبار لمؤسسة مسك و الاختبار احتاجه عشان ابتعاث ..

انا هنا قلت وقفي شوي ،، احنا اتفقنا ما في بعثة بعد الثانوي ..
أن شاءالله بعد الجامعه خير ،، اكون وقتها متفرغه لك تماماً

المهم صياح و دموع و دراما ،، قلت انا واضحة من البداية ..
طلعت من عندي زعلانه و تروح تشتكي لصديقاتها و تسوي دراما ..



فجأة روقت و قالت شكرا يا ماما انك رفضتي !!!
و صار عندي محتوى اتكلم فيه خخخ

يعني راحت و سوت لها قصة و سالفه و محتوى تتحلطم عليه
قلت كويس طلعنا بنتيجه خخ

رد: حكــاية قصيــرة ❥
 

اهلاً , و صباحكم سعيد ..




في الآونه الاخيرة كانت كل الاخبار و الاحداث سعيدة ..
و كأنها تعويض من الله على اللي مرينا في خلال الشهور اللي راحت ,,
ليخبرنا الله انها لا تضيق الا لتفرج ..

و كل الاشياء حولي تجبرني ارجع .. و برجع ان شاءالله بس بستريح شويا :ff1 (53):




بتكلم عن موضوع انا الاحظه في حياتي .. هو اولاً توفيق من الله و ثانياً اصرار و ايمان ..
انا نقلت لفرعي الجديد تقريباً لي ثلاث او اربعه شهور ,,
و من يوم جيتهم و انا منبهره بكمية اللطافه اللي عندهم ..
و احترام و تقدير ..يعني انا مهما اتكلم عن البنات انا ما اعرف كيف اوصفهم ,,
مو وحده و الا ثنتين بدون مبالغة كلهم مشاءالله ,, <- الله يديمها عليهم و علي :397:


المهم انا شفت فيهم هذا اللطف ,, و قلت الفرع هذا يستاهل يفوز ب رضا العميل لو شهر من الشهور ..
و كنت اقولهم هذا الكلام ,, انتو تستاهلون بس ركزو على الخدمة و كيف تقدمينها و كيف تنهينها ..
انا افحط شاده حيلي معهم ,, لاني جربت الفوز ب رضا العميل لمدة ثلاث شهور
و اعرف كيف الفرحه و شعور الانجاز ,, و كيف ان اللي تقدمه ما يضيع امام الله قبل خلقه ..


مررره و انا اتصفح النت لقيت موقع يبيع مرايات بشكل مررره مميز و ينكتب الاسم عليها ,,
و كان نفسي اجيبها هدايا للبنات .. بس يالله ما عندي مناسبة !!
لازم مناسبة , و مناسبة سعيده ..

حطيت ف راسي لازم نفوز برضا العميل
بدايه شهر تسعه قلت لنفسي هذا الشهر راح نفوز برضا العميل ..
على انه خلال الشهر واجهتني صعوبات مرره كثير ,, و منها نص الشهر المديرة طلعت اجازة
و انا مسكت ادارة الفرع ,, يعني كل المشاكل فوق راسي و لازم احلها
مشاكل مع عميلات , و مشاكل مع ادارة ,, يعني اشياء كثير
بس الحمدلله عدا بسلام و رجعت المديرة و تنفست الصعداء


انتهى الشهر و انا في بالي نسبة رضا العميل ,,
كنت على قناعة تامه ان فرعنا راح يفوز

و فعلاً فزنا فيه ,, :ff1 (127):


الحمدلله كله بفضل الله اولاً ,, ثم بروعة البنات و جمالهم و اخلاقهم الحلوة ..
و انا بعد :397:


و بجيب المرايات للبنات اخيراً خخخ



ووو بس :244:

رد: حكــاية قصيــرة ❥
 

عندي فكره قناة في التلقرام ,,
و اخترت الاسم , و اخترت توجه القناة ,,


:22:


تتوقعوني اكمل و الا اكسل ..
لانه تمر على ايام صمت مافيها كلام و لا افكار :ff1 (175):


على العموم جالسه ارتبها في عقلي , و لو نجحت مبدئياً راح انشرها

:ff1 (207):

رد: حكــاية قصيــرة ❥
 

احس عندي سالفه ثالثه ,, بس كني طولتها خخخ
<- السوالف اليوم مثل المطر ,,


مدري هي فرحه برجعة المنتدى و الا ايش !!:ff1 (49):

رد: حكــاية قصيــرة ❥
 

مررره جالسين انا و امي نسولف ..
و تحكيني حكايه ,, و انه بيصير و بيصير .. و هو اصلا لسى ما صار ,, بس ان شاءالله يصير ..
يوووه ما احكيكم عن كمية المشاعر اللي وصلتني من السالفه ..

و على هذي السالفه سويت افلام ,, و خيالات تخص هالسالفه
يعني تخيل شي تنتظره من زمان و قريب يصير ..
و الشي مو بس انا انتظره ,, تخيلو عايلة كاملة تنتظره و بنفس الحب و الشغف

بس جزء من السالفه كان يخصني شخصياً .. يالله قد ايش مت عليه :70:
الله قادر انه يحقق احلامنا و تكون واقع نعيشه ,,


برجع احكيكم على الشيء بعد سنه و شوي لو صار :ff1 (104):



عندي سوالف واجد بس استحيت منكم خخخ

رد: حكــاية قصيــرة ❥
 

عندما اخبركم , بأني استطيع التجاوز و الانتقال للطرف الاخر ,,
لم يكن التجاوز بهذه السهولة , ف الطريق مهلك , و السقطات متكررة ..
و عند الوصول , احتاج لنفس الوقت حتى استطيع التنفس بشكل اقرب الى الطبيعي ,

باختصار , احب النسخة الجديدة من كل شيء ,





صباحكم النسخة الاجمل من ارواحكم :ff1 (113):

رد: حكــاية قصيــرة ❥
 

في هذه اللحظه انا حزينه للغاية ..
ما توقعت ابد هذا الحزن و هذي الدموع
بالعادة انا ما ابكي على لحظات الوداع .. و دايم اقول لخواتي لا تتعلقون ف احد و يروح و يخليكم ..

و يجون خواتي و يروحون مابكيت عليهم الا هالمره ..
رجعت البيت مالقيت اختي و عيالها ..
اختي الحمدلله صارت احسن بعد فترات التعب الطويلة ،
و الحين سافرت و رجعت بيتها ..
لكن انا منهارة على روحتهم .. و حزينه مررره
جلست عندنا سته شهور .. و كانت دايم تطول عندنا و تروح و ما ابكي
لكن انا الان بموت من الصياح عليهم ..
اعرف اني بتجاوز ،، بس شعوري لازم اعبر عنه

وحشوني والله

رد: حكــاية قصيــرة ❥
 

شعرت بالاختناق لعدة شهور , نفسياً و اجتماعياً و مالياً , و جميع اوجه الحياة ,
و كنت اعرف لو انفرجت جهة وحده من تلك الجهات ,, ستنفرج البقية واحدة تلو الاخرى ..
لان النفس لو ضاقت تضيق جميع المسارات امامها ,,
و لو انفرجت تفرج جميعها مرره واحده

و كنت افكر لأيام طويلة كيف ممكن احل هذا اللغز ..
قلت هو الحب اللي راح يفتح لي كل الابواب ,, لازم اعيش الحب و انشر الحب ..

الاحد و الاثنين , كنت في قمة السعادة عشت الحب بشكله و احساسه الجميل ,,
امس الاثنين قلت لصديقتي ,, انا عشت الحب يومين ,, بكره وش اخترع بحياتي عشان يستمر هذا الحب ,, اللي هو اليوم ..
هذي البنت رفيقتي في كل شي , انا و ياها حرفياً ما نسكت ,, نشبه بعض باختصار
قالت لي بكره الراتب ,, بس للامانه ما حسيته الحب اللي ادور عليه ,,
و اليوم كانت طاقتي شوي منخفضه عن الايام اللي راحت .. و وهذا شي طبيعي
بس قلت مستحيل ينتهي اليوم بدون اطلع بفكره انتعش فيها


اشتغل و انا افكر بالفكرة الخطيرة اللي تغير لي ايامي ,,
في نهاية الدوام لقيت الفكره و بدأت في تنفيذها ,,
و لو صار زي ما تخيلت و خططت ,, راح يفرج لي جانب من جوانب حياتي ..
اللي راح يفتح الابواب للجوانب الاخرى ..



الله يجعل الايام القادمة كلها خير علي و عليكم

رد: حكــاية قصيــرة ❥
 

انتهى الحُلم , بطريقة مبهمة ,

رد: حكــاية قصيــرة ❥
 

هو الحنين , من يغير مجريات المشاعر ,,
حياتك كما هي , احداث يومك كما هي , متاعبك التي لا تنتهي ..

يباغتك من اضعف نقطة فيك ..
تنام تلك الليلة بشعورك المضطرب ,
بالكبرياء الذي لا يجعلك تتقدم ,
بدموعك التي تنساب دون ان تشعر ,,
باللاشعور بالاشياء المحسوسة ,,

فقط تريد ان ينتهي هذا الشعور , و تعود للجبروت ,,




صباحكم حياة بعد موت :ff1 (147):

رد: حكــاية قصيــرة ❥
 

فجأة يوم رجعت الحياة , اكتشفت اني فاقدة اشياء عيني غفلت عنها هالفتره ..
احس بقهر .. و فجأه يتغير الشعور الى اللامبالة <- عنها لخبطه في الاعدادات خخخ ..
و شوي اقول " جات عليها يعني " ..



صباح التقبل :189:

رد: حكــاية قصيــرة ❥
 

كل مره احس ان حياتي في الدوام ترتبت , ترجع تتلخبط من جديد ..
و ارجع اخذ وقتي في الترتيب , حرفياً الوقت اللي اجلسه في البيت 4 ساعات من غير النوم طبعاً
ساعه احاول استوعب وجودي في البيت , و ساعة اكل فيها , و ساعه اتجهز للدوام
و الساعه الرابعه الحين ,, اقرأ جزء من كتاب , او اتصفح المنتدى

من اطول الاسابيع اللي مرت علي
اليوم اخر يوم للحوسه ان شاءالله , و ارجع ارتب وقتي من جديد

رد: حكــاية قصيــرة ❥
 

انطربوا معي
https://youtu.be/gEQDUc7qjIA

* انا خاطري قد له قريب الشهر حساس




على فكره اول مره اسمعها كامله ,,
ادمان التيك توك يخلي الاغاني تعلق بمخك خخ

رد: حكــاية قصيــرة ❥
 

و بدأ العد التنازلي ..
40 يوم تفصلنا عن الفرح :51:

رد: حكــاية قصيــرة ❥
 

:210:


انا ام قرون وقت الحماس :86:

رد: حكــاية قصيــرة ❥
 

كثير اشياء لازم ارجع اتدرب عليها ..
من زمان ما حضرت زواجات ,, و نسيت البروتوكولات اللي تصير فيها

كيف ارقص , و كيف امشي بالكعب ..!! كيف اتكلم مع الطق و الناس تفهمني ,,
وش بعد علموني نسيت خخخ

حرفياً احسني مرتبكه خخخ لازم اسوي لي جدول للمهام
حياتي صارت مهام و جداول و طلبات و متى انجزها ,,

لازم اسوي استعادة ضبط المصنع :ff1 (45):


:179:<- بروفه خخخ

رد: حكــاية قصيــرة ❥
 

لما تكون هذي حياتك ، و الأشياء الأساسية فيها ما تتغير
تقبلها و حبها بكل تفاصيلها ..حاول خلق أحداث جميلة

الأهم طريقة نظرتك لحياتك ، هي تحدد كيف تكون ..
أن نظرت لها بطريقه جميلة بتكون جميلة ...

صباحكم جمال ..

رد: حكــاية قصيــرة ❥
 

تجلس تقلب في حساباتك القديمه ., و الصور القديمة و الكلام القديم ..
تلقى اشياء ترجعك لذات الشعور .. تتأمل نفسك هناك و الاجواء المحيطه بك
انسقت لها لفتره من الزمن .. و الحمدلله اني التقيت مع ذاتي الحقيقيه


لكل انسان في الحياة ,, ايام تكون سيئة .. حتى الاجواء اللي حوله كانت تسحبه لذاك السوء
صورك و كلامك وقتها ,, يشرح حالتك بالضبط .. وقتها ما كنت متخيل انك راح تنجو
و سبحان اللي ينجيك و يهديك حياه ب اجمل صورها و اجمل ناسها




https://live.staticflickr.com/1001/1...94d613f8_z.jpg



بـإنتظـار الـذبـول .,؛
تحيط بنا رماديات الايام ..

تسعى لأن تجذبنا نحوها

تبذل قصارى جهدها

كي تجبرنا على الذبول

نـُسلم امرنا لها ..

ونبقى بإنتظار الذبول .,؛




من المفترض انها تكون ايام حلوه , او كما صورو لي حولي انها حلوه
بس انا كنت فعلاً ضايعه .. كنت حاسه اني امشي في طريق ما هو طريقي
شفت لما تكون مو فاهم نفسك , و ليه انت في المكان هذا و ليه تسوي كذا ,,
كان عقلي بسيط بدرجه كبيرة جدا , و لا كان فيه شي حولي جالس يوعيني ..
انا جالسه الان اكلمكم من ذيك الحقبة الزمنيه , و قلبي حزين على ذيك الانسانه
بنفس الوقت سعيدة جداً بالشي اللي وصلت له ..

من 2006 الى الان .. المشوار كان طويل و العقبات كثير , و الدروس اكثر
من ذاك الوقت الى الان كان المشوار حافل جداً

الحمدلله على وجودي بهذي النسخه ..

الاشياء القديمه تبدأ تثير بداخلي حكايات عجيبة

رد: حكــاية قصيــرة ❥
 

شعور الفقد مؤلم جداً ..
لما اشوف خالي و احس ب انكساره , بفقد شريكة حياته
رغم انه , يحاول يتجاهل هذا الشعور .. لكنه يوصلني
و اي مواقف سعيدة , ما اقدر اعبر عنها بكل وضوح قدامه ,,


الله يجبر كسر قلبه , و يرحم زوجته و يغفر لها و يجمعهم في جنات النعيم



بنته الصغيره , تحبني كثيييير و انا احبها
و طلبت منه انها تسافر معي و وافق ..

و كنت قبل مسولفه معها و اقولها تروحين معي بس لا تفتحين الموضوع مع ابوك الا الين اكلمه
كلمته و وافق بس ما قال لها الا اليوم , و كنت منبهه عليها اذا قالك ابوك شي سوي نفسك متفاجاه ..
صارت المصارحه قدامي اليوم ,, اقسم بالله تفشلت من نفسي اننا مخططين من بدري
و هي ي عمري عليها سوت زي ما قلنا لها


الله يسعدها و يعوضها عن حنان امها , بحنان ابوها

رد: حكــاية قصيــرة ❥
 

و كان الحديث عنك ، مجرد رواية خالية من التفاصيل السعيدة ..
كل سطر فيها يحكي مأساة الفراق المميتة ،
إحدى الصفحات ملوث بدم الحلم المقتول مع سابق الاصرار و الترصد
هي تبكي في آخر السطور ، كما كانت ضحكاته تتعالى في اولها ..
الخاتمة مليئة بتلك الآمال المستحيلة التحقيق،
كروايه خيالية ، عجزت الكاتبة عن حياكة النهاية ..
بسبب عودتها الى الواقع سريعاً ..
و تركت تلك الرواية بدون نهاية ...!

رد: حكــاية قصيــرة ❥
 

نصيحة اقدمها للي احبهم و لكم بالذات ,,
استمتعو بالحياة , لا تركزون على اشياء تكدر خواطرهم .. سوو لها سكيب على طول ..
اسمعو و اقرو كلام ايجابي و لا تتناقلون السلبي ..

انبسكو بالشي اللي في يديتكم , و لا تتحسرون على شي راح منكم


الشي اللي تحبونهم شاركوه مع احبابكم ,, و انقلو لهم تفاصيلكم الجميلة ..
كونو قريبين من الله .. ينور بصيرتكم ,


يومكم جميل و سعيد بجمال الايام اللي راحت ..

رد: حكــاية قصيــرة ❥
 

من مدونه الجوهرة




و انا

لو كنت .. سأكون !!

لو كنت شهراً سأكون : نوفمبر
لو كنت ساعة سأكون : 5:00 فجراً
لو كنت لونًا سأكون : اخضر
لو كنت لغة سأكون : العربية
لو كنت شعوراً سأكون : الحب
لو كنت أغنية سأكون :سوالف الشوق
لو كنت فصلاً سأكون : الشتاء
لو كنت طقس سأكون : ممطر
لو كنت هواية سأكون : الرسم
لو كنت شيء من السماء سأكون : غيمة
لو كنت شخصاً سأكون : نوره

رد: حكــاية قصيــرة ❥
 

في حقيقة الامر , اني اريد العودة ..
لكن ,, كالحجر يثقل خطوتي ,, و على قلبي