رسائلي لصاحب الظل الطويل ♥️..!

. "الرسالة الثانية و الأربعون" 2 Apr 2021 11:11 pm Fri

طقاقة أم عنبر ,عبير ,زهرآء و 4 آخرون معجبون بهذا

متأمل ,خفايآ روح~•• ,رايــق ,رآنيا

. "الرسالة الثالثة و الأربعون" 5 Aug 2021 3:55 pm Thu عزيزي يا صاحب الظل الطويل إن وصلتك هذه الرسالة إعلم يقيناً أنك داخل قلبي وعقلي .. كم أشتقتك .. واشتقت للكتابة إليك منذ مدة تراودني فكرة الارسال لك من جديد .. وتعبئة تلك الرسائل الفارغة القديمة .. لكن ... يبدو أن لكسلي دوراً كبيراً في ذلك.! حسناً ,, هلّا أخبرتني عن أخبارك قليلاً.؟ أين أنت الآن.؟ وكيف هي صحتك.؟ يبدوا أن أحاديثنا بحاجة لكوبِ ساخن من القهوة المُرّة .. ونتأمل العابرين أمامنا .. اتساءل .. كم من الوقت سنمضي بعذ ذاك الغياب الطويل.؟ محدثتك التي اشتاقت لك بصدق // شيم.!

طقاقة أم عنبر ,رآنيا ,عبير و 5 آخرون معجبون بهذا

خفايآ روح~•• ,رايــق ,إمبراطورة البحر ,This Aziz ,متأمل

. "الرسالة الثالثة و الأربعون" 8 Aug 2021 9:25 pm Sun عزيزي يا صاحب الظل الطويل ... أشعر بأني لستُ بأكمل م أنا عليه من مشاعر مُبهجة.. كلها تطايرت فجأة .. أحسست بداية النهار بطاقة جميلة .. واستطعت أن أفرغ طاقتي بشكل جيد .. لكن م بالي الآن .؟ لا أعلم أردت الكتابة لك حتى أفرغ مابي من مشاعر دفينة لكن حتى عندما بدأت الكتابة ترددت يداي في كتابة مابي بوصف دقيق .. واكتفيت بخلاصة الكلام ..! حسناً .. لا أحب كتابة أشياء أندم فيما بعد عليها ليس لأنها أُرسلت إليك.. بل لأني أؤمن بتأثيرها على واقعي.! نعم ياصديقي , أردت كتابة رسالة لطيفة لك هذا اليوم والسبب هو .. لاشي مُطلقاً غير أن الرقم 8 تكرر عليّ مراراً نعم نعم رأيت ردة فعلك .. سوف أسامحك هذه المرة فلا طاقة لي للجدال الآن .! لقد أنجاك ربي مني :) حسناً هُنا لا مزيد من الأحرف .. أغمرني بدعواتك فقط محدثتك المُنهكة // شيم.!

ابن الهيثم ,إمبراطورة البحر ,طقاقة أم عنبر و 5 آخرون معجبون بهذا

‏مُجـآزِفَ ! ,رآنيا ,عبير ,متأمل ,خفايآ روح~••

. "الرسالة الرابعة و الأربعون" 8 Aug 2023 3:23 pm Tue عزيزي يا صاحب الظل الطويل السلام عليك ورحمة الله وبركاته والله ماهي صدفة ولا هي تخطيط مني يا صديقي كنت أبحث عن عُزلتي بين الصفحات وجدت "سمو المجد" 8-8-2021 يا الله كم لبثنا .؟ سأخبرك أمرًا ولا بد أنك تعلم مازلت مستمرة في كتابة رسائلي لك حتى الآن لكن ليس هنا إنما في ملاحظات جوالي لكن أقسم لك أن الكتابة هنا لها مذاقها الخاص أشعر بمشاعر لطيفة جدًا الآن اشتقت للمكان واشتقت للرفقة للأرواح الي أحبها حتى وهي بعيدة عني فرق شتاااااان جدًا بين آخر رسالة كتبتها لك والتي صادفت حقيقة نفس اليوم 8-8 وبين رسالتي هذه تصدق أشعر بإنجاز كنت وما زلت مؤمنة فيني حققت الكثير وبقي أمامي الكثير لا مشكلة لديّ أصبحت أحب وحدتي أكثر وأصبح لدي صُحبة لطيفة أيضاً إطلاعات أكثر لم أخبرك أني تعمقت في مجال القهوة حتى النخاع امزح امزح لم أصل للنخاع بعد لكن حقيقة وجدت شغفي فيه وكل يوم أتعلم شي جديد فيه بدون ملل وبدون ماشعر بالضجر ولا أحس بالوقت وبإذن الله بتعمق للنخاع كما قلت ف بداية حديثي محدثتك الصغيرة أصبحت باريستا أشعر أن هنالك الكثييير لأقوله لك لكن متى وماهو الذي سأبوح به لك لا أعلم أبداً .. أحبك ياصديق روحي محدثتك الأكبر سنًا مما مضى // شيم.!

ابن الهيثم ,رغد ,محال و 3 آخرون معجبون بهذا

الجوهرة ,إمبراطورة البحر ,طقاقة أم عنبر

. "الرسالة الرابعة و الأربعون" 14Sep 2023 Thu كل اليوم مافي وقت محدد عزيزي يا صاحب الظل الطويل السلام عليك ورحمة الله وبركاته شعرت برغبة مُلحة بالكتابة الآن رغم أن النوم يسيطر ع أجفاني .. لكن سأكتب واقرأني متى شئت اليوم يوم جميل جميل جميل جدًا ولله الحمد رغم انه تخللته بعض الاخبار التي لاتسر الخاطر ولكن وراء كل أمر محير خير عظيم… طيب دحين بحكيك حاجة << حاجات تخيل مساء الثلاثاء كنت في يوم عطلتي وحصل موقف هو اني كلمت رآنيا بعد قطعة طوووويلة جدًا عنها وعن الموقع بس قاعده احاول اتواجد هنا فدر المستطاع المهم الي حصل اني فجأة قلتلها اسمعي شكلك حتجيني اول شي الكافي وبعدين انا اجيكِ وكنت اقولها مزح فعلًا ماتوقعت ولا اي حاجة جاني ردها قالت انها بعد بكرا جاية ان شاءالله ولو مداها بتقابلني بس فين؟ قلت مافي غير الكوفي عندي هههههههههه والله نسية الولاء عالية ماشاءالله المهم الي حصل قالت تأكدلي وتردلي خبر هنا انا فكرت بخطة جديدة لو حصل هالشي وأكدتلي انتقل لخطة ب لي اسبوعين كل يوم الصباح أرسل للنور اقلها بجيكِ البنك عشان كم حاجة عندي عالقة ف الحسااب وكل يوم ترد علي وتقلي تعالي لكن بحكم ان دوامي قلب مساء للاسف اني انام ومقدر اروح انتظرت رد رانيا وقلتلها لو اكدتيلي بروح للنوري واكلمها يسير تجيني الكوفي هنا كمان وبعدها اروح معاها ع البنك <<< ماشاءالله عليكِ استاذة شيم المهم وجاني التأكيد من مديرتنا الكبيرة رحت للنور نوري كيفك ؟ اقلك بما اني لي فترة اقلك بجيكِ واسحب وانام ، شرايك تجيني الكوفي قبل دوامك واقهويكِ ونجلس شوية وبعدين اروح معاكِ البنك.؟ قالت والله العرض مغري خلاص ان شاءالله الصباح انا عندك دا الكلام يوم الاربعاء تقريبًا وبلغت رانيا وسرنا انا ورانيا نعرف بس النوري لا بلغت المنجر عندي ف المحل انو بكرا ان شاءالله "الخميس" بجي افتح المحل 7:30 بدل 8 الى ان يجي الي ماسك الشفت واخرج قال ماعندك مشكلة رجعت من دوامي 1 ونمت 1:30 والغريب جدًا اني صحيت بدري 5:45 تقريبًا بدون منبه وكنت جدًا نشيطة ماشاءالله كلمتني نوري انها وصلت قلتلها دام الوقت بدري تعالي نروح مع بعض المحل بس افتح 7:45 افضل وحصل دخلنا المحل لكن الغريب ماشاءالله انو جات حركة غريبة وقتها وكل دا قبل م تسير الساعه 8 .!! البارت الي هنا احس هو الي خلا نوري تقفطني هههههههههههههههههههه لاني كنت اعمل قهوة واقلها نوري متى دوامك؟ تقول 9 ، اقلها م يمدي تتاخري شوي؟ اشوفها تطالع مستغربة تقول يعني كم ؟ قلت بس نص او ربع ساعه يعني كل دا لان بالي مع رانيا كلمتني انها عالقة ف الزحمة وتشرح لي هي فين لكن للاسف فاشلة ف الجغرافيا رانيا حبيبي اديني وقت بس مو مكان المهم نوري هنا شافتني ارسل كل شويةواطالع واسألها متى لازم تخرج ولا عادي تطول يعني أثرت شبهه آخر شي قلتلها اسمعي : فيه وحدة جاية وتبا تشوفك قالت احبها؟؟ قلت ف خاطري شالوهقه دي.! ورديت / ماعرف انتِ تعرفي كده كم دقيقة جلسنا ورسلت رانيا انها وصلت خرجت من المحل ياااه ي صديق روحي ورب البيت ورب البيت مشاعر اللقاء الأول مررررة مرة مرة جميلة ماشاءالله وماتتنسى احس معرف اش السر او السبب بس فعليًا كأننا كنا ف حلم ماتوقعت هالموقف يحصل وفي المكان الي كنت اتمنى ف الفترة الاخيرة انو يحصل فيه ربما كانت مجرد دقائق حرفيًا بس ماعرف اوصف جمالها لدرجة حتى النور قالت // نفسي اسحب دحين ع الدوام << معليش صديقاتي نشرت غسيلكم تحملوا وصلت لمرحلة فهاوة عجيبة اليوم حصل موقف واحنا ف السيارة اول شي اخدت نوري الفاتورة وقلتلها السواق متنح ليه م يمشي ادتني نظرة مصدومة قالت انتِ الي متنحة الطلب م اخدناه وتبينا نمشي ههههههههههههههههههه ولمن كنا ف المحل برضو نوري قالت متاخرة 10 دقايق يعني الساعه 9:10 قلتلها الله وناسه كفو والله عشرة م تضر ع اساس انو لسه بتجلس عشرة دقايق بعد طلعت فاهمه غلط اليوم مليان لطافة ومشاعر حلوة ممتنة للقاء المشاعري دا حقيقة ولأرواح الصُحبة الحلوة اايييووا صصحح ي صديقي رحت البنك عند نوري وانجزت حمدلله واصدرت لي بطاقتين "شخصية وبزنس" ادعيلي ي صديق روحي انا ممتنة إني أقدر أكتبلك دايم بس انا كسولة أحبك ياصديق روحي محدثتك الي تباك تفكرها تحط الصور ف وقت ما // شيم.!

ابن الهيثم ,رغد ,أم عنبـر ..~ و 2 آخرون معجبون بهذا

الجوهرة ,محال

. "الرسالة السادسة و الأربعون" . صديقي ي صاحب الظل الطويل .. السلام عليك ورحمة الله وبركاته 15 Sep 2023 Fri 4:30 pm جاي ف خاطري احكيك موقف .. قبل شهرين يعني شهر 7 ميلادي ، جاني عرض وظيفي لمقهى تجاري ، زي بارنز وبون والاماكن الشهيرة دي .. المهم م جذبني بس قلت اش خسرانة روحي المقابلة عادي صح خسرت فلوس ف المشاوير لين قلت آمين بس رحت اماكن جديدة او اماكن نفسي اروحها من فترة طويلة .. اول يوم قالت لي الصباح الساعه 10 تعالي .. كلمت الاداري يغطي عني فترة دوامي ساعه ورحت كان المشوار بعيد حول عشرين دقيقة .. بعد المقابلة معاها أثنت علي وانها اول م شافتني توقعت عكس الي ظهر مني << طيحت الميانه من اول لحظة وزدت ع رقم الراتب الي اخدو مبلغ بسيط << كانت نصيحة من اخوية وقلت ليه لا.! جربي المهم قالت بتكلم المدير وانو فيه مقابلة تانية بكرا قلت ف نفسي: ي ليل .! رجعت المحل الظهر وكملت الى 4 ينتهي دوامي بس كنت اجلس الى 5 او 6 عشان الشمس تهدا والجو يعني فترة صيف << ارجع مشي المهم الساعه 4:35 اشوف الي عملت معي المقابلة متصلة عليا تقلي تعالي دحين .! قلت هاه.!! قالت اسرع م عندك . قلت فين؟ قالت الحمراء قلت استهدي بالله اش يجيبني بسرعه لعندك المشوار خط سفر بالنسبة لي قريب 45 دقيقة .. قالت انتِ حاولي عشان الاونر بيسافر وبيعمل المقابلة دحين عشان لو تمام نرسلك العقد وما الى ذلك قلت طيب بحاول ان شاءالله << وانا في داخلي جدًا بايعتها المهم خرجت من المحل ورجعت البيت مشي وطلبت سيارتي وهي كل شوية تدق وانا اقلها ف الطريق وانا باقي ف البيت والله داك اليوم اش شعوري مدري بس حلو ياخي المهم لمن قربت اوصل بعد ساعه اتصلت عليها وانا مركزة ع الشارع لانها توصف لي المبنى .. الي حصل للاسف الشديد اني م ركزت معاها وسلكت لها وقفلت .. لاني ركزت ع حاجتين اول شي شفت محل دانكن وانا كان خاطري ف دونات وبلاك حقهم .. وشفت قدام دانكن بقطعة شارعين فيه بحر ..! المهم درست الطريق نظريًا ورجعت دقيت عليها تعدلي الوصف << فعليًا صدق هالكلام والله المهم دخلت المبنى "القصر" عفوًا ماشاءالله تبارك الله دخلت قصر صغير من برا بس كبير من جوا غريب جدًا وقابلتها نفسها ، ادتني كم نصيحة كده بالهمس بخصوص المقابلة قلت اوك .. دخلت المقابلة وهي جنبي والمدير جالس مقابلي فيني برود العالمين لفتني من الاسئلة لمن قال لي : انتِ باين عليك هادية وباردة ، والعمل دا فيه ضغط شغل او زحام احسك مابتنجزي مع برودك << حرفيًا قلتلو المظاهر تخدع لان الحقيقة اني امسك شفت كامل لحالي تحت الضغط واختبر نفسي بمدة وجودة انتاجي الحمدلله ممتازة .. قال حلو وبعد اسئلة أخرى خلصنا وقال للي جنبي خلاص بس باقي المقابلة الميدانية يعني اروح البار ف الكوفي حقهم ويشوفوا شغلي ومستوى خبرتي وبناء عليها لو اوك كملت واذا احتجت تدريب دربوني .. قالتلي بعد م خلصنا انو بكرا الميداني ف مول << هنا انا بداخلي قلت يلا مع نفسكم . ورديت عليها : ان شاءالله . بعد م خرجت هنا بدت متعتي والله احلل فلوس المشاوير الي جلدوني فيها رحت لفيت ورا المبنى الي هم فيه وكان فيه دانكن وتوقيتي حلو كان توو فاتح .. المهم اخدت طلبي ورحت قطعت الشارع للبحر يااااه رغم الزحمة الي كانت هناك بس حرفيًا حرفيًا حرفيًا كنت ف انفصال تااام عن الي حولي المنظر آسرني ومن كتر م اسرني ماحسيت بالوقت ولا بعدد الصور الي لقطتها منظر السما وقت الغروب يختلف كل دقيقة .. سبحان الله بس دي كمية اللقطات الي لقطتها وفيه مجموعه صور بضيفها يمكن ف موضوع منفصل ✅ صديقتك الجميلة جدًا // شيم.!

ابن الهيثم ,رغد ,أم عنبـر ..~ و 3 آخرون معجبون بهذا

صمتّ ,محال ,الجوهرة