الْيَوْم بَسّ الْيَوْم يَعْنِيْ فِقَدْتوه
وْهُوْ لِهْ سِنِهْ مِنْ يَوْم مَا اقْفَتْ رِكَابِهْ
لو كان فِيْكُمْ خَيْر.. كِنْتُوْ ذِكَرْتُوْه
قَبْل الزِّمَنْ يَسْرِقْ مَلامِحْ شِبَابِهْ
يَعْنِيْ عَشَانِهْ مَا اشْتِكَى.. مَا سِمَعْتُوْه
هذا الخطا اللَّي مَا حِسَبْتُوْا حِسَابِهْ
مَا قِدْ عَرَضْ شَكْوَاهْ حَتَّى عَلَى اخُوْه
وِشْلون أجَلْ يَشْكِيْ عَلَيْكُمْ صِوَابِهْ؟!
طَبْعه يموت وْلاَ الْحَقْ الْغَيْم مَشْرُوْه
عِزَّةْ ظِمَا.. وْ لاَ مِذَلَّةْ سِحَابِهْ؟
أقْفَى.. عَسَاهْ مْجَارْ مِنْ كِلّ مَكْرُوْه
رَاسِهْ عِزِيْز.. وْرَاسْ مَالِهْ ثِيَابِهْ
وْعِفَّةْ يِدَيْه اللَّي خَذَاهَا مِنْ ابُوْه
وْصَبْره عَلَى وَقْتِهْ وْقِلَّةْ زِهَابِهْ
خَلِّهْ يِتُوْه بْكَيْفِهْ.. أحْسَنْ.. وْ لاَ يْتُوْه
بِيْدَيْن نَاسٍ شَرْعَهَا شَرْع غَابِهْ
العرض العادي
