ألفترة اللي مضت قليل مسكت فيها الجوال بسبب ضعف الاتصال وكان شي طيب حسيت بفارق في النفسية والمزاج تمشينا وتونسنا مرينا أراضي وجبال اللي يشوفها كنها تحضن بعض منظر يبعث ع الراحة مديت يدي ابغى اصور ولكن للأسف تذكرت الكاميرا اختربت هي والكشاف بعد حبيبة القلب ❤️ماحطته بالغسالة قبل نسافر وشرب مويه لين جته شرقه / سمعت صوت قربعه سألتها وش ذا قالت جوالك من صدقك لحقته وهو يحتضر >يطفي نشفته سريع وحطيته بكيس الرز يقولوا يسحب الرطوبه بعد نص ساعة شغلته اشتغل بس راحت الكاميرا والكشاف
نرجع لـ سالفة الجبال قلت وش رايكم نشتري واحد نطل منه في ليالي القمر على أضواء القرى قاطعتني قالت وش رايك نطلع قلت تم طلعنا شي خيال أراضي ممتدة ومزارع تسر العين شوفتها بقينا لين قبل المغرب وقبل ننزل
استقر الرأي نشتري ابرعه على عددنا هههه <طلب الحبيبة ❤️
وش بقى
مبارك عليكم الشهر
وتقبل الله منا ومنكم صالح الاعمال
وليلة سعيدة عامرة بالذكر والطاعة..
السلام عليكم
استدعاءلـ المدونة والا الكلام ماعدت احسنه
حتى الضجيج والازعاج باللايكات اللي كنت أحدثه
لاخبركم انني موجود شبه عاجز عنه
سافرنا مع بداية الاجازة جينا في بلاد الغبار راكد في السماء مثل الضباب ولكم ان تتخيلوا العيشة في مثل هذي الأجواء اسأل الله ان يغيثنا بالمطر
قلت لهم نرجع مصرين يحضرون كل المناسبات كلهم من القرابه ولهم سابق فضل ويد نتمنى لهم الحياة الطيبة الكريمة ..
قبل اسبوع حضرت حفل زواج قريب لي ومعي بعض الأقارب أصغر مني ولكن أكبر مني في الجسوم حتى مع التكميم اللي صار هبه قبل ندخل قالوا لي ترى ناصبين مكرفون بعد باب الدخول في الساحة وانت أكبرنا تكلم غفلت عن هذا الشي ومامعي تفكير وترتيب للكلمة اللي لازم تكون مرتجله حاولت واحد منهم يتكلم ابوا استعنت بالله دخلنا صفوا وانا اتقدم على الميكرفون نقرته نقرتين اتأكد انه شغال بعد السلام
دعيتنا يـ بو عبدالرحمن معزه وتقدير وجيت انا والنماره اللي ترون ملبين الدعوة جت ببالي كلمة نماره من النمر العربي) ومعنا مبلغ بسيط والا لو كانت المكانة بـ العطايا لعجز الناس عن الأداء هذا ما جرنا والباقي سلامتكم رد كبيرهم بكلام ابلغ واقوى
ارحبوا ارحبوا عدد ما سارت خطاكم بغوا يرافقونا لين مكان جلوسنا طلبتهم يرتاحون لان باقي كثير الوفود مقبله
قبل الدخول لمكان الجلوس طاولات ممتده عليها
أصناف من الطعام والسمن والعسل والمباشرين بـ الدلال اكلنا وحمدنا الله واخذنا طريقنا لمكان الجلوس قهوونا مرة ثانية وقدموا لنا التمر والحلويات
وانا اكلم رفيقي اللي معي بالسيارة الباقين تفرقوا اقول برد واطالع في السقف الا مسارب التكييف فوقنا قمنا قال ايوه هنا البراد اخف
على يسار شايب يخط البلاط بخيزرانة ثلاث كراسي فاضية سلمنا على راسه تقدير وجلسنا التفت على رفيقي يسأل اولاد مين وعلمه مدح فينا وفي ربعنا وحن نقول ما عليكم زود هههههه طالني طرف من الحديث استمرينا نسولف كان شخص ذو تجربة غنية في الحياة اكتسب منها الحكمة سمعه ضعيف لازم أقرب واميل حتى يسمعني رفيقي يقول ترى الطب تقدم خذ سماعات قال ما قصروا أولادي ودوني وفصلوا لي سماعات اهي تسمعكم في البيت يعني تركها في البيت هههههه نادوا للعشا وكان ودنا لو طال الحديث كانت ليلة طيبة التقينا فيها وجددنا العهد بـ الكثيرين اللي باعدت بيننا وبينهم مشاغل الحياة الله لايشغلنا الا في طاعته
وصباحكم زواري الكرام باهي مشرق مليء بالذكر والطاعة..
العرض المتطور
