رواية العم احمد الفصل الثامن

رواية العم احمد الفصل الثامن

بسم الله الرحمن الرحيم
وبه نستعين
رواية العم احمد
الفصل الثامن
مرت الايام والشهور والعم احمد فى سعادة مع الخالة سعيدة وابنهم واقترب العام من نهايته وخلاص تحدد مواعيد زواج حليمة فى اجازة المدارس من ابن جارهم طارق ود الفادني المدرس وبشير تم قبوله فى الكلية الحربية وهو الان آخر دراسة وتدريب والصغيرة علوية عملت ليها صحبات فى المدرسة وكمان فى الحي اما عثمان كما هو معروف عنه مشاغب وما بخاف الا من العم احمد آخر سينمات وسهر مع اصحابو ولكنه كويس فى الدراسة وكمان لاعب كورة كويس حريف اعضاء ادارة نادي الحي جاوا الى الحاج سعد طالبين منه الموافقة على تسجيله فى فريق الحي وطبعاً الحاج سعد رفض وكتب الى ولده العم احمد عشان يتكلم مع اخوه ؟ وقام العم احمد بتهديت والده ووعده بان يكتب لعثمان ويسمع رايه وفعلاً ارسل العم احمد جواب لاخوه عثمان طالب منه الانتباه للدراسة اولاً ثم بعدين الكورة وعشان الوالد ما يزعل منه وهو عارف بانه كويس بس رغبة الوالد ووعده بان يتكلم مع الوالد براحه حتى يرضى له بالتسجيل فى النادي ونفذ عثمان كلام اخوه العم احمد وترك حتى الذهاب لتمرين ؟ سالوهو مالك ما بتجي التمرين ان شاء الله خير ؟ قال لهم اخوى الكبير قال انتبه للدراسة وبعدين الكورة وطبعاً انا ما بقدر اخالف كلامه ؟ وهنا طلبت منه ادارة النادي عنوان اخوه فى الفاشر وكان احد اعضاء مجلس الادارة اخوه ضابط يعمل فى القيادة الغربية ارسل له جواب وطلب منه بان يراضي العم احمد بخصوص السماح لاخوه بلعب فى فريق الحي لانه لاعب حريف وفلته زمانه وهم فى مجلس الادارة مسؤلين عن نشاطه الدراسي مثل الاهتمام بنشاطه الرياضى وفعلاً سال الضابط عن العم احمد زميله الضابط قائد العم احمد وعرف منه انه انسان طيب وخلوق ومسؤول فى عمله ؟ وطلب منه بان ياخذه الى منزل العم احمد وشرح له السبب ؟ وفى اليوم التالي وفى المساء جاء ضابطه وزميله الى منزل العم احمد بعربية الجيش وخرج العم احمد واستقبلهم وهو شايل ابنه ياسر واجلسهم فى الراكوبة وهي معمولة باحكام كانها غرفة وجاء العم احمد بعصير الليمون ؟ وقال له الضابط اسمع يا اخ احمد انا من اولاد الحي معكم بس ما تلاقينا قبل كدا وانا بعرف اخوك الصغير عثمان وكم مرة اتمرنت معاهو فى الاجازات البمشيها وهو ما شاء الله لاعب حريف وعنده مستقبل كبير فى الكورة وانا اخوي عضو فى ادارة النادي كتب لى جواب قال اكلمك عشان تخلى عثمان يرجع يلعب مع الفريق لانه رفض وقال انت قلت ما يلعب كورة تاني وكمان اعضاء ادارة النادي وفيهم عمك حاج محجوب انت بتعرفو قالوا هم مسؤلين عن تعليمه اها تاني فى حاجة يا احمد ؟ وقال ليهم العم احمد خلاص مافى حاجة الاهم التعليم وانا بكرة برسل تلغراف للوالد بان يقول ليهو انا راضي عنك امشى العب كورتك واراد الضباط القيام ؟ وحلف العم احمد لازم يشربو الشاى وكمان من حظهم الخالة سعيدة عاملة لقيمات حارة وقال ليهم والله لو ما بخاف انكم تقول مشغولين كان حلفت تتعشوا معنا ؟ وضحك الجميع ؟ ونادت الخالة سعيدة العم احمد هوى ابو ياسر تعال شيل الشاي وبعد شراب الشاى غادر الضباط منزل العم احمد ؟ جاء زملاء العم احمد خير يااحمد مالوا ناس جنابو جوك وشرح لهم العم احمد القصة كلها وهنو العم احمد وكل واحد فى نفسو يقول ياريت كان يكون عندي اخو زى اخو احمد ؟ وفى صباح اليوم التاني ذهب العم احمد للبوستة وارسل برقية للوالد الحاج سعد بان يسمح لعثمان بذهاب للنادي وطوالى كتب جواب شرح للوالد الامور وعادت المياة لمجاريها ورجع عثمان للكورة معشوقته الاولي واصبح ملتزم بعدم التاخير خارج البيت وكمان حاج محجوب جاره طوالى مع حاج سعد واول باول بيوريه اخبار عثمان وان شاء الله لو كان فى العمر بقية نكمل

الموضوع الأصلي: رواية العم احمد الفصل الثامن || الكاتب: ابو الملكات || المصدر: مجتمع غلاك

ما نتميز به

تصميم،شروحات،دروس،فنون،دورات،شعر،خواطر،افكار،غلاك،استايلات،مسابقات

---

v,hdm hgul hpl] hgtwg hgehlk hg/g hgtwg hdgd