اكتب بيت شعر على اخر حرف قصيده الى قبلك

[علي]

هافي حشا أدعج غنج مبسمه ذوق
صافي خفا طابع هروجه لباقه

اللي مكانه داخل القلب مرموق
وحده بقلبي ما يلاقي رفاقه

افرش له بصدري مع الشيح زملوق
وأحدّد بروحي وقلبي نطاقه

دم الغلا فالقلب للروح مدفوق
والقلب زايد من عناه اشتياقه

قدره على راسي رقا وأعتلا فوق
زودٍ على حبه ملكني صداقه

والله ما غيره من الخلق مخلوق
أعشق وصاله وأرتشف من مذاقه

غيره يجي ويروح ما رف له موق
عيني لغيره لو تناظر حماقه

ما نيب ألوّح في هوى كل غرنوق
يكفي من البستان فالورد باقه

نظمت أنا ذوقي على كم طاروق
غيره فلا أبغى لو يزود احتراقه

لاتحسبني في هوى لابس الطوق
أرضى أكوّن يا رفيقي علاقه

- راكان السبيعي