حكــاية قصيــرة ❥

[‏آلنـور]

دائماً لنا نظرتنا الخاصة لنا احكامنا الخاصة , اللي ممكن في اوقات كثيرة ما نشاركها احد
هذي النظره و الاحكام هي اللي ممكن تأثر على قرارات معينه , و ممكن تكون مصيريه في بعض الاحيان .
و ممكن تكون ماهي مبنيه على اساس صحيح , و يتأثر بمشاعرنا بشكل كبير ..
تكون انت تايه و ندمان على هذا القرار او التصرف ..

لما تحس بشعور التضارب داخلك , و تبدأ تغلط نفسك على اشياء هي من حقك اساساً

هنا لازم تلجأ لشخص مختص ,, و احط تحت مختص الف خط
مو اي احد تقدر تستشيره و يعطيك الراي الصائب ..
ممكن لو استشرت شخص يحبك راح ينحاز لك طبيعي


تجربتي لما رحت لمدربه مختصه في التنميه البشريه و لها باع طويل في هذا المجال
و منصبها اللي وصلت له ما وصلت له من فراغ ..
انا اخترتها بعنايه جداً و ما رحت لها الا لما كلمتها و تعرفت عليها
و عرفت شخصيتها , كانت تجيني في الدوام لما كنت ماسكه ادارة الفرع
كانت تعطيني ملاحظاتها على البنات و كيف انا اتعامل معهم ..
طبقت نصايحها و ضبط معي ..

اخيرا قررت اروح لها و اتكلم معها ..
و كان اللقاء حبي ,, بدون ما ادفع لها مبلغ للاستشاره ..
كرماً منها و لذوقها و لطفها .. و حبها لي ,,

المهم جلسنا مع بعض ما يقارب الثلاث ساعات .. و المفترض هي ما تاخذ هذا الوقت في الاستشاره مع اي احد..
لكن اعطتني من وقتها و انا ممتنه لها كثييير
و بيني و بينكم انا ذا اليوم عاملتها معامله الدكتوره النفسيه

قبل لا اجيها كانت طالبه مني اكتب لها نقاط القوه و نقاط الضعف ..
بس هي طلعت فيني نقاط ضعف ما كنت مركزه او منتبهه لها
او اني امارسها بدون وعي مني ,, بسبب تراكمات , ضغوطات الين تأصلت فيني ..
و قالت لي امور اعدل فيها نفسي ,, و من ضمنها سرعه الانفعال ..
من ذاك اليوم الى هذا اليوم و انا افتح دفتري و اراجع النقاط اللي قالتها لي ..
اقول في نفسي انا لازم اتغير .. لازم اتجدد ..
لازم ما اهتم لنظره الناس لي .. او حكمهم علي .. لاننا بشر و نخطيء و نصيب
لكن انا كنت اخذ الامور على محمل الجد .. و الحياة تتطلب منا مرونه ااكثر ..

من الاشياء اللي استفدتها .
اني صرت اسمع لغاده سواليفها و مشاكلها من دون اسوي لها محاضرات
من دون ما اتملل و احملها خطأ التصرف ..
فرق ان غاده صارت تسولف اكثر

انا ارتحت اكثر .. و حسيت حتى تعاملي مع الناس اللي حولي بدا يصير رايق و هادي
و لا اكبر المواضيع بداخلي ..
حتى لو مر علي تصرف ما يعجبني ابدأ احلل و افكر فيه اكثر ..


و الشيء الاهم اللي خلاني اوعى اكثر ..
لما قالت لي يانوره بطلي تشتتين نفسك و تتابعين كل الناس و كل المجالات
و لازم كل مجال تفهمينه و تدخلين فيه ,, ركزي على شي واحد
ركزي لا تشتتين نفسك ..
انا وقتها دار في عقلي كل الناس اللي كنت اتابعها و اطبق معهم اشياء بدون وعي مني
و افكر فيهم و في نفسي لاني من يوم تابعتهم و اطبق اسلوبهم
هويتي انمسحت .. ما عرفت مين انا و وش ابي ..
الغيت متابعه كل شخص يأثر فيني بشكل سلبي ..
و بديت اطبق اسلوبي انا .. سواء في قراءاتي في الاشياء اللي ابي اتعلمها و تفيديني في الحياة ..
لي اسبوع تقريباً .. عايشه نوره الحقيقيه اللي اعرفها ..

هذي الانسانه كانت المساعده و الداعمه بعد الله لي و لا يمكن انساها و لا اوفيها حقها ..
و منها عرفت ,, انه مو لازم اكون كامله و اعرف كل شي ..
الاهم اعيش نفسي انا .. اعيش نوره اللي اعرفها ..
عشت حياتي .. اخطيت كثير , طحت و قمت و لازلت عايشه و اتنفس
لذلك انا اشكر الله و احمده الف مره و لا تكفي على حياتي الناقصه ..
التي لا تكتمل الا بمعيه الله ..

الحمدلله




سولفت كثير .. بس شي في الخاطر و احتاج اكتبه
احتاج اسولف لأحد بس يسمعني ..

محال ,شذى الهلالية ,ابن الهيثم و 3 آخرون معجبون بهذا

نبض ,متأمل ,White