حكـايا ◦● 🦋

أوقات كتيرة بفكّر في علاقة شيرين عبد الوهاب وحسام حبيب، مش من باب الفضول، لكن من باب التساؤل اللي بيدور جوانا كلنا: إزاي إنسانة بتشوف الإساءة قدام عينيها، وتسمع الكلمات الجارحة، وتحس الخذلان بكل تفاصيله… ومع ذلك تكمّل، وتغفر، وتقنع نفسها إن الغلط فيها هي، وإنها ماعرفتش تتصرف صح، أو إنها قصّرت في الحب، أو إنها ماقدّرتش اللي قدامها!
ليه بنعمل كدا؟ ليه بنحمّل نفسنا وزر علاقة مسمومة؟ بنلبس روحنا تهمة مش بتاعتنا؟ بنلوم قلبنا على طيبته؟!
الحقيقة إن اللي بيحصل مش ضعف، لكنه تشوّه في المراية اللي شايفين نفسنا فيها. بنصدّق صورة حد تاني عننا، ونسيب يقينه السلبي يكسّر يقيننا بنفسنا.
المؤلم أكتر إننا نكرر الغلط بنفس إيدينا، ونرجع للتجربة نفسها اللي وجعتنا، ونفتكر إننا المرة دي "هنعرف نصلّح". بس يا ترى مين قال إن العلاقة السامة بتتصلّح؟ مين قال إن شخص أذاك بإيده هيقدر يوم يحبك بصدق؟
المشكلة مش فينا… المشكلة في قلب صدّق، وعين تغافلت، ونفس فضّلت تحط الحب في غير مكانه.
ولو كان في درس لازم نتعلمه، فهو إننا مانلومش نفسنا على جرح اتعمل لينا، مانكسرش ثقتنا بسبب تجربة غلط، مانحكمش على نفسنا من خلال رواية حد ماعرفش قيمتنا.
لأن اللي فقدك هو الخسران، واللي كسرك ماكسرش غير صورته قدام نفسه. أما إنت… فكل مرة هتقوم أقوى، وكل مرة هتلاقي إنك تستاهل علاقة نقية، مش معركة يومية. ❤️