مجتمع غلاك - ركون الشعر

بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته

،

قصيدة يا ركون الشعر

ياركون الشعر يا سادته ثابت عموم
المدح لا ترغمونه على غير أهله

المدح تتويج للي عسى عزه يدوم
حاتميً شب ناره .. وشرع منزله

الكرم على عيوب الرجل سيلً دموم
والبخل : مثل ما قالوا عدو المرجله

القوافل ماشيه كل ليل وكل يوم
ما تراجع من محاذيفها قيد أنمله

حط شرهاتك على الجدي من بين النجوم
وأحتزم للمعضلة وأخذ يومك بأوله

من عرف حر الرماضي عرف لفح السموم
ومن بنى ماضي وحاضر بنى مستقبله

القلوب تعاف وتملّ والأنفس تشوم
والهواء قتال ... وأخر مراحله الوله

المبادئ ثابته والعوائد والسلوم
والردى ما نعرفه والوفاء ما نجهله

يا مقيم سيرة الناس وعلومك علوم
البشر كلً محاسب على قد أعمله

الظليمه منك ماهي علينا باللزوم
الله اللي يمهل الشخص ولا يهمله

أنت ماعندك مشاكل ولا عندك هموم
أنت مشكلتك مع نفسك أكبر مشكله..!

.

علي بن مغيب الاكلبي