مجتمع غلاك - مشاركتي بفعالية الأبعاد الخمسة ... رحلة صيد الأسد (تصوير )

https://g-lk.com/up/do.php?imgf=173671308553451.gif

السلام عليكم ✋

وشلونكم يالربع اجلسوا اجلسوا حلفت محد يقوم من مكانه ماغير مار اسلم
واعطيكم علومي ووش صار معي ووش ماصار يوم قل تواجدي بينكم ذا
الفتره المهم انا يوم سمعت ان خويي مشاري مسوي فعاليه قلت ياولد
مهي بلحيتي الناس يتفازعون منا ومنا وكلن يشيل ويحط مع خويك وانت
ماغير مِلبِدْ ولا تحرك ساكن وش عذرك من خويك يامال الشحم :182:
واقعد اقلبها في راسي وش يجملك ياولد مع خويك وش يجملك ؟؟..
قلت مايجملني معه الا اروح اصيد له اسد واجي اطرحه قدامه بالمنتدى
المهم عزّمت وجهزت عمري وخذيت عدتي وعتادي زي ما تشوفون 👇

https://g-lk.com/up/do.php?imgf=173672512324361.jpg

وتوكلت على الله يوم الجمعه لمحمية طويق ووصلت بعد العصر بحفظ الله
ورعايته وجلست اتجول واصور لكم الصور اللي شفتوها فوق
واغني وارفع الصوت واتحرى ذا الاسد … يمكن تاخذه الشجاعه ويطلع
يواجهني وانا اتمشى في دياره يمكن يستحي من ربعه الحيوانات اللي
قاعد يمارس عليهم الشجاعه والحكم الملكي لكن ماش ماله شوفه ويوم قربت
تغيب الشمس والا ذاك الضب في وجهي وعيونه طايره فيني ومخترش
وركبه تصافق قال تكفى يالفارس ادخل على الله ثم عليك لاتذبحني قلت له
افاااا وانا اخووو فلانه اخوها ارفع علومك ياضبيّب انا من راس قوم
وفارس ما استقوي على الضعوف انا جاي امردغ الأسد ادوره وناويه
بسدحه سدحة خروف يوم العيد .. قال دام ذي علومك يا لفارس وعلى انه
الاسد محرص علينا يوم جاه طرف علم انك ناويه راح تغبى الذروق
وقال للحيوانات كل بوهم اذا جاكم احد غريب يسأل عني قولوا له
اني معزوم في محمية الوعول واحتمال اني اعرس هناك واقعد عند نسايبي
ولا عادني براجع .. صراحه بعد ذا الكلام
طاح الاسد من عيني وقلت لضبيِّب تدري .. بلغه سلامي وقله يقول
نايف كان يحسب انك شجيع وقد المواجه يوم تعنى لك لمكانك بس للاسف
طلعت رخمه وتراه مايتعنى للرخوم مرتين خلاص من طاح من عينه طاح
….. وسلامتكم :d

وبالمره قلت اعوضكم واعوض خويي مشاري بمجموعة الصور
اللي صورتهم وعلى ماقالوا العوض ولا القطيعه 😔

https://g-lk.com/up/do.php?imgf=173671308560543.gif