القلوب اسرار
 

دليل المحبة شوف عيني عليك تغار
ولاودي الحاسد عيونك يطالعها

مع إنك رحلت بعيد لكن بقى التذكار
ليا شافته عيني تسابق مدامعها

دفنت الغرام بخافقي والقلوب أسرار
مشاعر هقيت إن الليالي تضيعها

فرحت برجوعك ما طلبت لخطاك اعذار
ونفسي تناست ما جرى من تواضعها

تهادت مشاعر خاطري لك بلا معيار
تجاهلتها لوكنت خابر دوافعها

يقولون جنّب درب مالك معه معبار
يلومون نفسٍ بعد الاحباب موجعها

يقولونها قبلي يخون البحر بحّار
والأمواج لاهاجت خذت ماتبي معها

تكاثرت منك الصد وأثر العلوم كبار
لقيتك على نفسي تقلّب مواجعها

اقوله وانا اللي شفت ذاك الغلا ينهار
يشوف الندم رجّال نفسه يطاوعها

مثل ما ضرب جّوٍ خلا غاديٍ محتار
يدوّج ورجله ما درى وين موقعها

تعرض سموم القيض والدار ما من دار
هليك وشعر بالموت روحه ينازعها

جحدت الغلا لين امتلى بالخفوق وثار
قصايد عساها اليوم تطرق مسامعها

غرامك مثل نارٍ حطبها الغلا والنار
تموت وغلاك اللي بقلبي يولعها

غلاك بضميري واضحٍ ما عليه غبار
تشيل الغلا نفسي وانا عاجز امنعها

يقولون ما ودعّك: قلت الفراق وصار
والإنسان روحه تنسلب ما يودعها

هذيك الليالي وين؟ أثر الزمن دوار
خذاها ولا ظني زماني يرجّعها

طوتها السنين ولا بقى لي سوى التذكار
ليا شافته عيني تسابق مدامعها

.

لـ متعب التركي

رد: القلوب اسرار
 

سلمت الأيادي ..
ويعطيك العافية لـ جمال الآنتقاء ..
وكل الشكر لسموك ..
-

رد: القلوب اسرار
 

منقول رائع
الله يقويك ويعطيك العافية يارب

~