مجتمع غلاك - هاجسي

بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته

،

في حضرة الشك يا مضيافة الارتياب
أجلس مع الياس واتلقى الخيانه هبه

مدلولها ورد شائك بعد طول الغياب
حطه بيد(ن) من التصفيق له متعبه

وانا تقمصت حسن الضن قبل العتاب
امسك على الشوك خوفي منه لا ينتبه

واقول ماضنتي يقصد رفيع الجناب
معقول يجرح رفيق العمر و يعذبه

ومعقول ريح التواصل الي تدف السحاب
ساقته للغير واحنا أرضنا مجدبه

ومعقول بحر الصداقه في الحقيقة سراب
تفرح به العين و العطشان ما يشربه

عجزت القى لتفسير المسائل جواب
اخلق مسائل إذا فتشت في الاجوبه

خلوني اسج ساعه في فضاء الاغتراب
واهرب شوي من دوي افكاري المرعبه

يمكن الاقي مع هاجسي بعض الصواب
وتحصل النفس في وصفته ما ترغبه

حملتها فوق ضهر الي يشيل الصعاب
الي مع الليل ودروب السهر اصحبه

يرقى سماء لاعزيته مايدوس التراب
القاع من زحمة الأقدام ماتعجبه

يثلج فوادي ويفتح للأفق الف باب
وينفض عن اليأس بالحكمة دنس الاتربه

هو صاحبي كل ما شدوا متاع الذهاب
وهو خطي الي قراني قبل لا اكتبه

للشاعر/ محسن سالم بن سليم

.

للعابرين من هنا ودي وتقديري