مجتمع غلاك - سلاف الروح

السلام عليكم
أسعد الله أوقاتكم بكل خير

،

سُلاف الروح ، مربكني غيابك و أبتديت أخاف
على صفحات شوقي جيت لك سيراً على حرفي

نطرتك و السنين تمرّ وسنين الحنين عجاف
ياليتك كنت مسقيني "أحبك" قبل ما تقفي

حبيبي ما بعد صدرك ملاذ و ضحكتك ميلاف
جعل درب أشتياقي ما يوّردني على حتفي

أسيل الخد ، مهضوم الحشى ، متمايل الأعطاف
على الملهوف في برد الليالي ضمتك تدفي

رحلت و كانت الغربة بحر مترامي الأطراف
ويا ثقل الظواري في حقيبة رحلة المنفي

ومن عهد النوايب ما تدور إلا على الأشراف
عبستي يالوجيه و يالزمان أبديت ما تخفي

عسى في زيارة البيت العتيق و دعوة الطوّاف
نهاية لإكتئابي و الجروح الغايرة تشفي

أنا ما أحتاج بيئة داعمة بحثاً عن الإنصاف
فضاي الأفق و تمر السحايب من تحت سقفي

كتبت من القصيد اللي يجيب الغانيات أكتاف
يا كم ناهد جديل شعورها مُلقى على كتفي

ترا بعض التواضع فيه ضعف و نوع من الإجحاف
و ترا ما كل مبدع لو يغيب بغيبته مكفّي

يا حلوك قبل يغريك الترف يا مترف الأوضاف
عزفتك في مقامات الشعر لين أنفرد عزفي

سمحت من الهوى و أنت الهوى وياك؟ ما ينعاف
عزوفي كان عزلة عن دروب أستنزفت عطفي

لو أن قلبك مثل ذاك القميص الأبيض الشفاف
تجلت ريبتي و أمدى كدر ماء خاطري يصفي

أحس إن كل لحظاتي بدونك فالحياه إسراف
‏أبي لي عمر ثاني ، عمر واحد معك ما يكفي

‏على الشوق الملامه لا عليك ولا عليّ خلاف
‏جماهير الجفا ما همّها الجافي من المجفي

‏وداعي معذره يالراحلين ولـ الوداع أعراف
‏أعرف أشتاق ما أعرف أتمسّك في يد المقفي

.

لـ سعود بن مهدي
لكل العابرين من هنا🌹