مجتمع غلاك - قصيدة حب

قصيدة الغمام، قصيدة حب متأخرة.

يا شمس عمري وذاكرتي غشاك الغمام
ما عاد عيني تشوفك لو تشوفينها

لو جيتي من آخر الدنيا بحب وهيام
وأحزان ما كنت أضن أنك تعانينها

مع خالص الود والتقدير والإحترام
آسف على كل دمعة ما تخشينها

من وين جيتي بهذا الشوق والإنهزام
الحب كلمة ولا يمدي تقولينها

ما تفهمين الشعر لو تفهمين الكلام
وما تعرفين المشاعر لو تجارينها

ما عاد أنا العاشق المستنزف المستهام
وما عاد عندي قصيدة حب تقرينها

من يوم ودّعتك وطال الجفا والخصام
صالحت نفسي مع الأيام وسنينها

كبرت حتي تغيرّت وعشقت السلام
وحبيّت روحي وصرت أوفى محبينها

وما عاد يغري مشاويري شعور الغرام
ولا أغنيات الحنين اللي تغنينها

اختاري الصمت ماودّي يطول الملام
وان قلتي اعذار، حطي عيني بعينها

انتي تشوفين نور فآخرة هالظلام
أما أنا أشوف حاجة ما تشوفينها

يوم الزهور الندّية ما لقت الإهتمام
ماتت، وجيتي بعد ماتت بتسقينها؟

ما فيه داعي نجرّح بعضنا بالكلام
السالفة من بدايتها تعرفينها...

.

للشاعر المبدع/ صلاح العرجاني :181: