مجتمع غلاك - الحرّ حرّ ويجذبه طيب مجناه

مجتمع غلاك (https://g-lk.com/vb/index.php)

- القسم الأدبي العام (https://g-lk.com/vb/forumdisplay.php?f=17)

- - الحرّ حرّ ويجذبه طيب مجناه (https://g-lk.com/vb/showthread.php?t=1655)

الحرّ حرّ ويجذبه طيب مجناه

,/

القلب خاويته على كل مشهاه
طاوعت شوره بين هاته وودّه

يامـا تحمّلته على كثر مـاجاه
ويامـا تحمّل ميلة الوقت ضدّه

والهاجس اللي حـدّ قلبي على اقصاه
ما فكني والقلب ما باح سـدّه

اسايره عن هرجة الناس وادراه
واكافحه مابين حـدّه وردّه

والموقف اللي راح ماوالله انساه
حتى ولو طوّل مع الوقت مـدّه

كلمة خبيث وناقل ٍ داه برداه
ويلفها مابين مزحه وجـدّه

الهمهمه والنمنمه والمحاباه
طبع الضعيف وسلم خاله وجـدّه

يبا المراجل مـير ماهي بوياه
لو لبسوه ثياب ماهي بقـدّه

يابعدها عن ميّت النار بعداه
ماهي بحول مكبرين المخـدّه

[...الحرّ حرّ ويجذبه طيب مجناه
وينومسه فعله على كلّ هـدّه

والنذل تعرف مرّته من مخاواه
في (مـرحـبا) ودّه ولا هو بودّه

محد ٍ تخيّرله رجال ٍ منقّاه
لاشك لاشفت أبيض الوجه بدّه

تحدّك الخوّه على اللي تحاشاه
وعزّي لمن سود الليالي تحدّه

ماينكر المعروف والطيب والجاه
الاّ الردي وأهل السلوم المصدّه

لو كلّ من دوّر على شي يلقاه
ماكان يوصل فايض الشوق حـدّه

والصاحب اللي لامشى يحسب اخطاه
اللي يبادلني شعور المـودّه

ثبّت غلاه وثبّت القلب مبناه
ومشاعري في شوفته مستعدّه

ياجعلني ماذوق حزنه وفرقاه
وياليتني مابين رمشه وخـدّه

يسوى عيوني والمعاليق تفداه
ومن لامني في غلاه الله يلـدّه

هذاك ماغيره خفوقي تمنّاه
والقلب بين ايديه هـاتـه وودّه