بسم الله الرحمن الرحيم
وبه نستعين
رواية العم احمد
الفصل التاسع
مرت الشهور واجازة المدارس قربت والان الخالة سعيدة لها فى الفاشراكثر من حداشر شهر وجاء جواب من الحاج سعد الى العم احمد يساله بتين جاي الاجازة خلاص عرس اختك حليمة قرب ؟ وقال العم احمد للخالة سعيدة اها خلاص انا بكرة بقدم للاجازة عشان نسافر نحضر عرس حليمة وكمان نشوف الاهل وطبعاً فرحت الخالة سعيدة لهذة الاخبار الحلوة ؟ وتسال اها يااحمد بتين بنسافر ؟ ويرد هيا يازولة قولي بسم الله ان شاء الله فى اخر الشهر الجاي لسع اجازة المدارس باقى ليها شهر ونص وكمان ما تنسي عاوزين نشترى حاجات وطبعا لمثل هذة الظروف العم احمد دخل فى صندوق مع زملاء بخمستار جنيه وعامل حسابو ان ياخذ الصرفة الاخيرة عشان الاجازة وطبعا الخالة سعيدة عارفة الصندوق عشان العم احمد قال ليها عندك خمسة جنيه تشتري بيها الانتي دايره ؟ وقالت الخالة سعيدة للعم احمد هوي ماتنسى بكرة الصباح تجيب معاك ماء غريب لياسر ؟ ويرد طيب ان شاء الله اها تاني عاوزة حاجة لالا سلامتك وهنا صحي ياسر معلن وجوده وعاوز يرضع ؟ احمد يازوله هوي انا عاوز انوم بكرة عندي شغل مع ولدك دا ما بقدر انوم احسن انوم فى الراكوبة خلاص رضعتو اها حسع برقد نوم نومك ؟ وبعد صلاة الصبح شرب الشاي ولبس العم احمد ملابسه وكان جاره واقف فى اول الشارع منتظره وفى طابور الصباح طلب العم احمد من مسؤوله الاول ابلاغ القائد بطلب الاجازة فى نهاية الشهر الجاي حتى يتمكن حضور زواج اخته وقبل ساعة الفطور بساعة تذكرالعم احمد طلب الخالة سعيدة باحضار ماء غريب من الاجزخانة ؟ طلب العم احمد من المسؤول السماح له بالذهاب للاجزخانة ؟ وقال له المسؤل شنو ان شاء الله خير مالك يا احمد ؟ ويرد لا مافى حاجة بس عاوز اجيب ماء غريب للولد وسمح له المسؤل بالذهاب ومن حظه الكويس انه من بوابة السرية لقا عربية ماشية السوق طوالى ركب معهم وفى المساء قعد العم احمد وكتب جواب للوالد يخبره بالاجازة ويساله عن عثمان وان شاء الله يكون ماشى كويس وبسمع الكلام وكتب جواب لبشير يساله عامل كيف مع الكلية ويخبره ايضاً بالاجازة والصغير الامير ياسرعاوز يلعب فى الراديو ويغير فى الموجات على كيفو والخالة سعيدة كانت مندمجة مع الفنان عثمان حسين فى اغنيته ( عشرة الايام ) وياسر طبعاً حكمت معاهو لازم يغير المحطة وقامت الشكلة بين ياسر وامه والعم احمد مبسوط لهذة الشكلة وقام شال ياسر ؟ وطلع لجاره الذى كورك ليهو احمد تعال بالله دقيقة اصلوا كان عنده شوية شغل ومحتاج للعم احمد وكانت فرصة عشان يخلى الخالة سعيدة تستمتع باالاغنية براها وكان العم احمد كلم زميله مسافر نيالا مامورية بان يكلم ابن عمه هناك بانه طلب الاجازة عشان يجهز حاجاتو لى اهلهو وطبعاً زميله بيعرف ابن عمه كم مرة مشى ليهو فى الدكان حقو ومرت الايام سريعة وخلاص الاجازة قربت بعد يومين بيستلم العم احمد الصرفة حقتو ومع قروش الاجازة ومن غير الخمسة جنيه حقات الخالة سعيدة يكون معاهو اتنين وعشرين جنيه يعني اجازة كويسة وان شاء الله لو كان فى العمر بقية نكمل