بسم الله الرحمن الرحيم
وبه نستعين
رواية العم احمد
الفصل السابع
نزل العم احمد العمل وكان هناك مامورية ضرورية وتحتاج لسواق ماهر عشان حيقوم براهو لهذة المامورية وكان اختيار الضابط للعم احمد وجاء المراسله ؟ قال للعم احمد احمد جنابوعاوزك فى المكتب طوالى مشى ليهو نعم جنابو ؟ ويقول الضابط اسمع يااحمد فى مدرسات ماشات اجازة ولازم بكرة يكونو فى نيالا عشان يركبو قطار الاثنين وانا اخترتك انت يلا امشى مدرسة البنات الثانوية تلقى ناظرة المدرسة وهي بتمشى معاك الى سكن المدرسات وان شاء الله الساعة اتناشر بالكتير تكون طلعت من الفاشر عشان تصل بدرى بكرة نيالا ؟ حاضر جنابو مشا العم احمد وجهز عربيتو من جاز وزيوت وماء ولستك اسبير وذهب للمدرسة وقامت الناظرة بارسال الفراش لسكن المدرسات ويقول لهن بان الناظرة والعسكري السواق جاين بعد شوية عشان يتجهزوا للسفر العربية جات جاهزة وعاد الفراش وقال هن خلاص جاهزات وتحرك العم احمد والاستاذة الناظرة لهن ومعهم الفراش والغفير حق المدرسة والجنايني وصلوا وسلم عليهم العم احمد وابتدو يرفعوا العفش وطبعاً العفش عبارة عن شطة فيها الملابس وكيس فيه الجزم ؟ ودعت الناظرة مدرساتها بالبكاء وتوصيهن بان يعملوا حسابن فى القطر ويكونن سوا وتحرك العم احمد وقال لهن بس لو سمحتوا اغشا البيت اقول لناس البيت مع سلامة اصلوا اولادي وصلوا ليهم يومين ومعهم امى وخالتي واختى الصغيرة فرحن المدرسات ومشوا البيت وكلهن نزلن وسلام وسوال عن القطر كيف السفر كان معاهن وطبعا الصغيرة علوية اخذت النصيب الاكبر من اهتمام المدرسات وبعد نص ساعة العم احمد قال لهن يلا خلاص نتوكل على الله ؟ وفى اثناء الرحلة قال العم احمد لهن اها رايكن شنو انا بسوق الليل كله وان شاء الله الصباح بدرى اكون فى نيالا ؟ كلهن قالن لا حرام ؟ قال لهم العم احمد عادي انا راجل عسكري اساهر طبيعي بس لازم نكون فى نيالا الصباح ؟ وبعدين حبا يخوفهن شوية قال لهن انا ما بضمن تنومو فى قهوة فى الطريق بعدين يجيكم ثعلب او اسد كلهن برى خلاص امشى طوالى ؟ وهنا عرف العم احمد كيف ياخذ الموافقة منهن وفعلا فى صباح يوم الاحد كان فى نيالا وكل واحدة نزلها فى بيت قرايبها على اساس بكرة يجي ياخذهن للسكة حديد حسب تعليمات ضابطه وفى اليوم التالى ذهب بهن للمحطة وكان السفر عاد العم احمد للفاشر وطبعاً جاب معه الفحم والحطب وكمان كم دجاجة اشتراهم من القهاوي الفى
الطريق وكم قزازة سمن بلدي صافى ومر شهر والعم احمد وهو يعمل داخل الفاشر وذلك كان هذا تقدير من قائده له حتى يتمكن من التواجد مع اسرته ؟ وبعد مرور الشهر ونص قررت امه السفر عشان المدرسة قربت للصغيرة علوية ارسل العم احمد تلغراف لوالده يخبره بان ناس امه خلاص قرروا السفر وا ن شاء الله يوم الاثنين القادم يكون سفرهم من نيالا ؟ ومن حظ العم احمد كانت هناك مامورية الى نيالا بعد غداً وطبعاً نسوان الاشلاق كل واحدة جابت هدية لوالدة العم احمد وخالتو ام الخالة سعيدة واشتري العم احمد لوالده مركوب فاشري والى عمه ابو الخالة سعيدة ايضاً وصديق ابوه جارهم وزميل ابوه فى الشغل وجات لحظات الوداع خلاص بكرة السفر وامتلئ البيت من نسوان الاشلاق وزملاء العم احمد فى السرية والخالة سعيدة حزينة لفراق امها وخالتها والصغيرة علوية اللى كانت ماليا البيت شقاوة الاطفال والعب مع ود اخوها الصغير ياسر ؟ وفى الصباح الباكر تحرك العم احمد الى نيالا فى مهمة عسكرية وكمان سفر اهله وفى الطريق قالت الصغيرة حبوبة علوية ما عاوزة تسافر مع ناس امها عاوزة تقرء فى الفاشر عشان تقعد مع ولد اخوها ياسر ؟ وقال ليها العم احمد خلاص انتي سافري مع ناس امي وانا اول اجازة اجي اكلم ابوي واجيبك معي تقري هنا فى الفاشر طبعاً فرحت علوية خلاص تمشي واحمد اخوها يجي فى الاجازة يجيبها عشان تعيش معه فى الفاشر طوالى العم احمد انزل ناس امه عند ابن عمه طبعاً سفر العم احمد من الفاشر كان يوم الخميس وكان الوصول صباح الجمعة وهناك ثلاثة ايام عشان الحاجة زينب واختها يشوفوا نيالا وسوقها ويشتروا باقى الحاجات طبعاً العم احمد جايب معه جواب من ضابطه قائد ثاني السرية الى اركان حرب منطقة نيالا العسكرية بسماح له ببقاء حتى سفر اسرته وتفرق العم احمد لهم وطبعا ابن عمه جهز ليهم حاجات كتيرة وكمان الى اهله ناس امه وابوه انقضت الثلاثة ايام سريعاً وجاء يوم السفر وكان الوداع العم احمد وابن عمه وزوجته وابنه سعد وطفلته الصغيرة ذات ثلاثة اعوام ؟ وهنا قلت علوية ماتنسى تكلم ابوي عشان اجي اقعد مع ياسر وضحك العم احمد واخفا الدمعة خلف الابتسامة وان شاء الله لو كان فى العمر بقية نكمل