مجتمع غلاك - درب تجيه اليوم لا تزرعه شوك …

مجتمع غلاك (https://g-lk.com/vb/index.php)

- أدبيات وجماليات اللغة العربية (https://g-lk.com/vb/forumdisplay.php?f=17)

- - درب تجيه اليوم لا تزرعه شوك … (https://g-lk.com/vb/showthread.php?t=18123)

درب تجيه اليوم لا تزرعه شوك …

ً
ً

لا ضــاقت الدنــيــا والأصحـــاب خَــلّــوك
سِج القِدَم في واسعـــات الفيـافــي

وْلا جيت لك شِعبٍ من السيــل مــدكــوك
تضرب على جاله هبوب السوافـي

فاجمع حطبك وْشِب ضوّك وأنـا أخــوك
وإرك الدِلال وجعلهــا لك عــوافــي

وزْرار ثـــوبــك لــو تخلّيــه مـفــكــوك
أخير لك من صكّتِــه يـــا السنـــافي

يــومٍ تضاَيــق فيــه ماهــوب مــبروك
سيّر وتلقى لك ربـــــوع وْمـــلافــي

إضحك وباب الرِزق ماهوب مصكوك
رزقٍ قِسَمـــه الله بــيــاتـيـــك وافــي

ولا تهوجس في مشــاريـــع وبْـنــوك
وسَهم العقاريــة وسهــم المصـــافي

مـافــات راح وْما بقى منك مــتــروك
لا تحسب إن جَوّك على طول صافي

العـمــر مـــرّة ما بهـا ظـن وشكــوك
وإليا إنتهى مافيه شَـــوطٍ إضــافــي

مــادامـت الدنيـــا لحِكّـــام ومــلـــوك
أقفت بهم شِهب السنين العجــافــي

لا تجازي المخطين بالمِثل لا أوذوك
أبعـد بخير وسِتر الأجواد ضـافـــي

دربٍ تجيه اليوم لا تزرعـه شـــوك
يمكن تجي لــه بعـــد يومين حافــي

فهد بن إبراهيم المفرج

ِ

رد: درب تجيه اليوم لا تزرعه شوك …

احسنت الاختيار
صح لسان شاعرها وناقلها

~

رد: درب تجيه اليوم لا تزرعه شوك …

ً
ً
جبرتوا بخاطــري :1112:
قاعد اقول ما يحبون القصايد المنقوله
او ما ينتبهون لذا القسم :)

سلمتم وسلم مروركم

تقديري

ِ

رد: درب تجيه اليوم لا تزرعه شوك …

“ دربٍ تجيه اليوم لا تزرعـه شوك
يمكن تجي له بعد يومين حافي “

اختيار موفق متأمل
بانتظار جديدك

رد: درب تجيه اليوم لا تزرعه شوك …

قصيدة جميلة 👌🏻✨
حلو اختيارك وعجبتني الكلمات 👍🏻

يعطيك العافية