رجيم قاسي
 

السلام عليكم ورحمة الله وبركاته

نفسي اسوي رجيم قاسي الفطور بيضه وحده والغدا سلطه والعشاء شوربه لكن خايفه

مااتحمل الجوع بعدها اخبص بالأكل

لان اخوي يجهز شقته احتمال يخطب وانا ابي اخلص بسرعه كان ١١٠.٦ الان ١٠٤.٠
ابي أنجز خلال شهرين بس

وامشي نص ساعه كل يوم واشرب ٨ اكواب ماي

ممكن تساعدوني على قراري
والا قراري غلط

انا متحمسه وعندي الاراده لكن خايفه
لكن مصره اجرب

وانشالله انجح

رد: رجيم قاسي
 

الهدف من وزن من ١١٠.٦ إلى ٦٠ كيلو غرام

رد: رجيم قاسي
 

-

و عليكم السلام ورحمة الله و بركاته

خطوه جداً ممتازه عيوني
.
بس غيري عادات الاكل افضل
وقطعي السكريات بشكل كامل وخفيفي النشويات وقطعي المعجنات
بتشوفي وزنش ينزل بتدريج او اعملي حمية كيتوه
..
هذا النظامش الغدائي مايكفي حاجت الجسم للبروتين،
الجسم يحتاج للبروتين 70غرام فاليوم
بكون عندش نقص فيتامينات و معادن
والرجيم لي يعتمد عل الحرمان يرجع فيه الوزن بسرعه

.
والي يعمل رجيم قاسي فتره طويله ويحرم جسمه من البروتين يساعد عل
تكوين حصوات فالمراره
فالافضل تنزلي وزنك بتدريج..
..
فٌ بقول لك تجربتي:-

بدون خجل عندي زيادة وزن بكم كيلو>بدون دكر الوزن
طبعا عندي السكر التراكمي مرتفع يعني شوي ويجيني السكر هنا
عزمت انزل الوزن
ونزلته بتدريج اعتمدت عل البروتين + السلطات + احتياجي للماء
ونزل وزني 6 كيلو :11:
حرمت نفسي من الاشياء الي ذكرتها وبذات السكر طبعاً
السكر من تركته جاني تعب ودوخه ، بعدين راح هذ الشي
السبب الانه جسمي متعود عل السكريات …
بس الحمدلله تخطيت ،،
و الاهم الخرابيط مثل الشبسات
وكيكات و الجلي و البسكويات تبتعدي عنها
و الحلويات بكل انواعها
الشاي و القهوه بدون سكر
….
واهم شي مثل م ذكرتي الرياضه تمشي نص ساعه
وان شاء الله امورك بتكون تمام
وبتقولي قالت زهوره
وزنك بينزل بتدريج
اهم شي الاصرار و العزيمه حبيبتي:1201:
،،
وان شاء الله قدرت افيدك:1201:

رد: رجيم قاسي
 

يعطيك العافيه ماقصرتي

لكني متحمسه للي قلته انا

نفسي اجرب
وانشاالله مايرجع بسرعه

رد: رجيم قاسي
 

أحس إنه خاطرك أحد يشجعك :d، بس لا
النقصان الكبير دفعة وحدة ما مفيد
ويرجع الوزن مثل ما هو وربما زيادة
لذلك كما قالت لك زهراء على مهل وتجنبي الأشياء اللي ما منها فايدة
+ افحصي الغدة الدرقية وفيتامين د، لأنها أحيانا تسبب زيادة وزن بدون إرادتك
ومعالجتها قد تنقص الوزن وتُحسّن النفسية :288:
لا تستعجلي وتحرمي نفسك وربما تسببي لها ضرر!

الله يقويك :10:

رد: رجيم قاسي
 

السلام عليكمم

ما شاء الله عليك
اول شيي احيي فيك ارادتك وعزيمتك
وان شاء الله انتي قادرة تحققي هدفك

بقولها لك بصراحه
تنزلي من 110 الى 60 خلال شهرين ماتقدري
الوزن بينزل بس يحتاج صبر وثبات وعزيمه واستمرارية

البنات م قصرو اعطوك نصائحهم وتجاربهم
وانا بعطيك شوي من خبرتي بس بالنهاية
كل جسم يحتلف عن الثاني ونسبة الحرب بكل جسم مختلفه عن الاخر :198:

المهم
اول شي لازم تفحصين وتشوفين اسباب السمنه مع نسبة احتياجك من المعادن وكميتها بجسم
اذ بامكانك تشتركين بجيم واخصائية غذائية يكون ممتاز
اذ مو بامكانك ف انا نصيحتي لك :
لا تحرمي حالك من شي ابدا بس خففي خففي خففي
لحدما يتعود جسمك خففي بالتدريج
اعتمدي ع الاكل الصحين الغني بالبروتين والمعادن اللي محتاجها جسمك
الرياضة مارسي الرياضة وتحركي وامشي اقل شي 40 دقيقة يوميا
اعملي الصيام المتقطع وفي شروحات كثيرة عنه وبامكانك التدرج فيه
الحرمان ماراح يعطيك نتيجة ابدا
والمهم والاهم الرز والمعجنات ابتعدي عنهم قدر الامكان
واذا اشتهيتي خذي شي بسيط وكثري سلطات
اشربي ماء اقل شي 2 لتر
اشربي شاي اخضر 3 اكواب باليوم
اشربي قرفه مع كل وجبة
ابدي صباحك بعصير ليمون وكركم ، بس اذا حسيتي بحموضة المعدة توقفي عنه
ولا تنصين الصوم له فوائد بالتخسيس اتبعيها
ثم الدعاء لرب العالمين


:229:

رد: رجيم قاسي
 

ربي يعطيكم العافيه ماقصرتو

رد: رجيم قاسي
 

انا محتاره بين الرجيم القاسي وبين اني اضل على اكلي نفسه ثلاث وجبات
العشا يوم فيه يوم مافيه واجمع مبلغ واشتري سير كهربائي وامشي عليه

شرايكم

رد: رجيم قاسي
 

رد: رجيم قاسي
 

.


مساء الخير ع الجميع
اخت ميرو
راح اختصر عليك كل شي وركزي معاي
أولاً : بدون تغذية سليمه وبدون رياضه ماراح ينزل وزنك
ثانيا: بدون إراده قوية وعزيمه دائمه راح يجيك إحباط
ثالثا: يجب عدم استعجال النتائج [خلي رؤيتك لمدى بعيد]
رابعا: اعتمدي نظام السعرات الحراريه وأخذي ثلثين احتياجك اليومي
خامساً: السكر الأبيض الشوكلاته المشروبات الغازيه ممنوع
سادسا: تأخير الوجبه الأولى مهم والوجبه الأخيره بدري و تكون خفيفه مره
سابعاً : كل خمسة أيام اليوم السادس زيدي الأكل شوي عن المعتاد وكرريها

عن تجربه اقطعي الخبز بجميع أنواعه وراح تلاحظين فرق كبير خلال اسبوعين واستمري لأطول فتره ممكنه
راح يتحسن الهضم وراح تتعدد خياراتك ف الأكل الصحي
أمر مهم لاتقطعين الكربوهيدرات نهائي لكن خليها قليله
ابتعدي عن الزيوت النباتية والمهدرجه وابتعدي قدر المستطاع عن الزيوت
واذا لابد خففي مره ويكون زيت زيتون او زيت حيواني
في كل بداية لابد من صعوبات لكن لازم نواجهها وماننهزم من بدري
ممكن يكون آلام في المفاصل واسفل الظهر وإرهاق لكن مع الوقت تنتهي
الرياضه ساعه ف اليوم قليل اذا تبين نزولك سريع شوي
اعتمدي رياضة المشي فقط خصوصا اول ٣ شهور
وخلي نومك ف الليل والنهار تكفيك ساعه ترتاحين فيها (غفوه)
امشي الفجر ساعه والعصر ساعه وخلي عشاك بين المغرب والعشاء
اعتمدي السلطات مع الوجبات وبين وجبة الإفطار والغداء
اعتمدي ٣ حبات تمر سناك ويوازن لك معدل الأنسولين
واكثري من شرب الماء بما لايقل عن ٣ لتر يومياً
انا اتكلم بناء على تجربتي مع الدايت الغير ممل
والنزول البطيء والمفيد والمستمر ومازلت مستمر ف الرياضه
ومهما انا راضي كثير عن نجاحي ماراح اترك رياضة المشي

اتمنى لك التوفيق والنجاح واعتذر عن الاطاله
تحياتي

رد: رجيم قاسي
 

بصراحه مصممه على الرجيم القاسي
الفطور بيضه
الغداء سلطه
العشا شوربه

وانشاءالله ينزل واحافظ عليه

ادعوا لي
ربي يعطيكم العافيه تعبتكم معي

رد: رجيم قاسي
 

هذا مايتجاوز ٣٠٠ سعره
ويصلح وجبه واحده مو ثلاث وجبات
واعتقد كذا بيتعكر مزاجك وممكن يطيح شعرك خلال أيام
وان شاءالله اكون غلطان

عموماً الله يكتب لك اللي فيه الخير
ويارب نتائج هالشي تعجبك وتفيدك وماتسبب أي ضرر
وبالتوفيق لك .. تحياتي وفي أمان الله

رد: رجيم قاسي
 

طيب خلاص بعتمد من وجبتين إلى ثلاث وجبات باليوم وامشي نص ار ساعتين

رد: رجيم قاسي
 

الله يوفقك
في حال قررت تغيرين هذا النظام
اخوي محال ماقصر امشي على خطته


من الجيد دايما يكون عندنا خطط بديلة
هذا مايعني ان عزيمتنا اقل ..لا ابدا

تتغيير خططنا يعني ان الخطة الاولى انتهت فترتها
ولابد ان نستحدث خطة جديدة لفترة جديدة ومختلفة


وكلما كنا اكثر مرونة في تحسين الخطط وتغييرها
وصلنا لهدفنا بسهولة اكبر وكان التزامنا اكبر


مرة اخرى بالتوفيق

رد: رجيم قاسي
 

اخت ميرو
انا مو أخصائي تغذيه
لكني متعمق كثير في هالموضوع
مطّلع بشكل ماتتخيلينه ولي خبره وتجربه
الرياضه مهمه لكن التغذية اهم بكثير
التقليل بكمية كبيره يسبب فتور وتعب وارهاق وضعف مناعه
التزمي بالخطه اللي قلتها لك وصدقيني بتمشي امورك بالسليم
وكل شي بالتدريج مو من البدايه تطبقين كل شي بالضبط
المشي ف الصباح مثلا ف البدايه نص ساعه والعصر ربع ساعه
بعد اسبوع نزيد ربع ساعه صباحا ومساءّ وبتلاحظين طاقتك تزيد
فالك التوفيق وصدقيني الأمر سهل لكن يحتاج اصرار واستمرار
اهم شي عدم استعجال النتائج
وراح نكون معك اول بأول في هالموضوع
واي استشاره حاضرين وبخدمتك اختي
تحياتي

رد: رجيم قاسي
 

يعافيك ربي اخوي محال
بصراحه الدايت اللي سويته اول مره قللت اكلي كثير ومشيت كثير كنت متحمسه وفيني اراده ودي بالصحه وودي ينزل وزني واكون رشيقه
ويوم رجع رجع بزياده ١٥ كيلو ١١٠.٦ صار بعدها كل ماحاولت امشي مااشتهي احس مهدود حيلي واحس بارهاق وتعب وخمول ودايم احاتي النتيجه متى بخلص كم بينزل شلون بينزل دايم بالي مشغول كأن ماعندي شي الا وزني
كنت اكل على الغدا ثلاث ملاعق بس كان من ٥ سنوات يمكن او اكثر والمشي يمكن ٨ ساعات
كان
٩٥ نزلته الى ٧٠ كيلو
غلطتي يوم وصلت لل ٧٠ رجعت اكل بزياده دون وعي ماادري ماكنت فاهمه شي ماحافظت عليه حسيت تعب ٨ ساعات راحت على الفاضي

تاريخ ٦ - ٢ - ١٤٤٥
كان عندي موعد في مستشفى الصحة النفسية بالأحساء انا اعاني من مرض نفسي واخذ ادويه ذهان واكتئاب وابره كل شهر
والحمدلله اموري متحسنه لكن عيب الادويه تزيد الوزن
وتفتح الشهيه

طلبت من الدكتور يحولني على مكتب التثقيف الصحي هذا مكتب في دكتوره رحت لها سألتني عن صحتي النفسيه وهل انا مهتمه بنظافتي وعن وزني ورتبت اكلي قالت لاتاكلين مقالي ولا شبسات ولا كيك
والوجبات السريعه خليها مره بالأسبوع

والماي ٨ اكواب يوميا
والمشي ٣٠ دقيقه

عندي موعد معها في شهر ٧

لكن المشكله فيني احس اني مضايقه وتعبانه ومكسله

مو متحمسه ودي احيان امشي لكن فيني إرهاق

تقدر تساعدني كبدايه

سامحني واعذرني اذا طولت عليك
لكن ابي احل مشكلتي
اختي تقول غصبي نفسك اسبوع كامل
مع الايام اذا نزل وزنك تتحمسين وتتشجعين
انت شرايك؟

رد: رجيم قاسي
 

.

الصعوبة تكمن ف البدايات
الفيتامينات بحد ذاتها تفتح الشهيه
لكن لابد تكون عندك عزيمة في مقاومة الأكل
استمري في علاجك ومراجعة الاخصائي
وصدقيني الرياضه بتحسن مزاجك كثير وتطرد الأفكار السلبيه
انتي مازاد وزنك بين يوم وليله لذلك لاتستعجلين ف النزول
لما تكون وجبتك الاخيره خفيفه وتصحين الفجر
يكون سكر الدم في أقل حالاته وهذا يخلي جسمك يعتمد ع جسمك
يعني طاقتك تكون من دهون الجسم الثلاثيه والحشويه مما يساعد نزول وزنك بشكل طبيعي وسليم
ايضاً معلومه مهمه خروج الدهون يكون أثناء التنفس لذلك نوم الليل ضروري
ركزي في جانب النوم والرياضه والاكل الطبيعي وعدم الجوع
وابتعدي عن السكر الأبيض والمشروبات الغازيه والشوكولاته والخبز
الخبز للرياضه ولصحة الهضم اتركيه فتره وشوفي النتيجه كيف تكون
ابتدي من اليوم وبعد اسبوعين عطيني نتيجة التجربه وراح نستمر حبه حبه
وبإذن الله راح تستمرين وتكون الرياضه نمط حياة ويكون الأكل منتظم ومفيد
والله يكتب لك اللي فيه الخير.

رد: رجيم قاسي
 

سامحني تعبتك معي بجرب القاسي

فطور بيضه الغداء سلطه العشا شوربه
لمده شهرين أو شهر ونص واشوف ايش يطلع معي

رد: رجيم قاسي
 

والا اقولك ببدا اليوم انشاالله نص ساعه العصر امشي
واشوف وزني بعد اسبوع

بقلل السكر
واكلي وجبتين او ثلاث على حسب الموجود بالبيت

اخاف مااقدر على القاسي
لو جات علي نفسي اسويه قاسي لكن اخاف مااقدر

رد: رجيم قاسي
 

.

شدعوه لاتعب ولا شي وانا احب سوالف الدايت :ff1 (42):
ترى كل شي بالتدريج يكون سهل وغير ممل
اخذي الرياضه من باب الاستمتاع
الأكل استمتعي فيه واكلي بهدوء تام
والبرنامج اللي يناسبك اعتمديه حبه حبه وراح تتطورين
اهم شي الاريحيه والشي اللي تتأقلمين عليه ويكون مفيد
والله يقويك وان شاءالله توصلين لمبتغاك وانتي مرتاحه
وموفقه يارب

رد: رجيم قاسي
 

حتى لو اعتمدت الرجيم القاسي عادي؟

في احد يسوي رجيم قاسي والا مافي كذا؟

رد: رجيم قاسي
 

.

فيه لكن اضراره كثيره جداً
الرجيم القاسي اول ضرر افتقاد الجسم للفيتامين الطبيعي
اللي موجود فالاكل فممكن يصير نقص مناعه
مجرد نقص الحديد يسبب تساقط شعر
النقص السريع ف الوزن يسبب ترهلات كثيره
ايضاً خمول الجسم وضعف الطاقه وممكن يؤدي لإكتئاب حاد
وايضاً عودة الوزن للإرتفاع بشكل كبير خلال فتره بسيطة

لازم الإنسان يطّلع ويعرف كيف ينظم نفسه
انا يومياً اكل كبسه ومع هذا وزني في نزول
الوجبه الأولى بروتين الغداء كبسه العشاء مرات كبسه مرات خفيف
أمارس رياضة المشي فقط ومريح نفسي ع الآخر
نوعية الأكل هي اللي تفرق كثرة الزيوت الوجبات السريعة المقليات
السكريات الشوكلت المشروبات الغازية اتجنبها
سكر احتاج احصله ف التمر ومعه معادن والياف طبيعيه
احصل ف الفواكه سكر طبيعي وفيتامينات
الكبسه مفيده جداً وتعطي طاقه لكن اكل بملعقة
بيبسي كود رد اشرب لكن دايت بدون سعرات
وقت الاكل اتجنب اتابع اي شي اكل بهدوء واستمتع
لما امشي ع نظام وبالتدريج راح ارتاح له واستمر
لكن كل شي مره وحده ممكن يسبب ملل وعدم استمرار
لذلك اخذي خطواتك حبه حبه واتركي عنك الرجيم القاسي

حطي في بالك هدف مثلا بالشهر ٢ كيلو فكري خلال سنتين
وقتها راح ينزل ٤٨ كيلو هالأمر جداً انجاز حلوووو

لاتستعجلين وفكري لبعيد وأهم شي الاستمرار وعدم استعجال النتائج

وصدقيني بتتغير معك أمور كثيره حتى في طاقتك الايجابيه وتفكيرك وحالة مزاجك

لكن اخذي الخطوة بدون تردد واترك عنك المحبطين واشتغلي ع نفسك
لاتهتمين وش ينقال عنك وعن وزنك وعن ممارساتك اليوميه
وقت فراغك تابعي برامج الرياضه المحفزه شوفي الناس قبل وبعد الرياضه
كلها راح تعطيك حافز تستمرين وراح تظهر لك نتائج افضل من اللي تطمحين له بإذن الله

رد: رجيم قاسي
 

طيب خلاص بشوف

ربي يعطيك العافيه

رد: رجيم قاسي
 

.


الله يعافيك وموفقه يارب.

رد: رجيم قاسي
 

الاخت ميرو
انا مثل حالتك في الدايت
واذا حبيتِ تقرأين وتعرفين أكثر
تعالي شوفي بنفس القسم شنو كتبت :) موضوع :261:

اتمنى لك الصحه والسعاده

رد: رجيم قاسي
 

هلا حبيبتي هو يبيله فتره علشان ينزل
بديت السبت مع بدايه شهر ٣
من وزن ١٠٣ امشي نص او ساعه او ساعتين على حسب قدرتي
وقللت اكلي اللي اكل منه بالبيت وقللت السكر