مجتمع غلاك - هذا الزمن لاعاد تشره على الناس

مجتمع غلاك (https://www.g-lk.com/vb/index.php)

- القسم الأدبي العام (https://www.g-lk.com/vb/forumdisplay.php?f=17)

- - هذا الزمن لاعاد تشره على الناس (https://www.g-lk.com/vb/showthread.php?t=14600)

هذا الزمن لاعاد تشره على الناس

هذا الزمن لا عاد تشره على الناس
ولا تعاتب كل ما شفت زله
كثر التشره والعتب يوجع الراس
من جاز لك جز له ومن شان خله
من تابع الزلات لابد يحتاس
وتجرعه بقعا ثمانين عله
وان زاد همك وابتلا الصدر هوجاس
سج القدم وابعد عن الحي كله
واختر رفيق ٍنادر ماله اجناس
صميدعٍ من رافقه ما يمله
راع الفعول الوافيه طيب الساس
يهوى المراجل والوفا عادةٍ له
يشوم عن درب الرذاله والادناس
ويشهر على حد النجوم المطله
ولا اخذت لك مع ذرب الافعال مرواس
في خايعٍ دهم السحايب تعله
تنسى سوالف كل باير وبلاس
وينزاح عنك الهم دقه وجله
البعد زين وعزة النفس نوماس
اخير لك من ربع قلي وقله
مالك مع نقالة الهرج مجلاس
احشم جنابك عن مكان المذله
من جالس اهل القيل يبشر بالافلاس
لو كان ريس دولةٍ مستقله

م ن