مجتمع غلاك - خلك عُمر ، لا تصير فترة وتمر..

تايهٍ فوق صدره ضمّ كلتَا يديه
‏بارْ فيه الكرى لين احتواه السهاد

‏يصبح الكون عنده كبر حجم الجنيه
‏كل ما هب من ماضيه ريحة قناد

‏ما لقى من رغيف الحكي ما يشتهيه
‏فَضّل الصّمتْ واختار الحياد الحياد

‏مستحيل يتقمص طبع ما هوب فيه
‏ألا ضحكه وضحكه ما عليه اعتماد

‏غربة الروح روحٍ عافت اللي تبيه
‏تشعر بحزنها بين الأهل والبلاد

‏دام الأيام سر ودام الأحلام تيه
‏القناعة عتَـاد اللي يبـي له عتَـاد

‏ضاع عمري وأنا مابين مدري وليه
‏أتحرّى السعادة لين بانت سُعاد

‏قالت الجرح عاده نيّ، قلت أنجحيه
‏أصلًا الجرح فوق الجرح مثل الضماد

‏قالت الشعر ثوب حداد، قلت ألبسيه
‏لا أنعكس نور وجهك في حروفي سواد

‏أنتِ آخر خطأ وأول صواب أهتديه
‏والخطأ والصواب أول دروب الرشاد

‏أشعر إني معَك عودٍ مقامه نزيـه
‏وأشعر إني معك طفلٍ حبيس المهاد

‏احفظي وجهي اللي ما يعبد الوجيه
‏واستري قلبي اللي كان قبلك جماد

‏كان مالي عذر يقنع خطاك الوجيه
‏يسقط الظّن في وجه الكلام الوكاد

‏وش عليّ لو يموت الحُب وأبكي عليه؟
‏الغصـون الوريـقـة تاليتهـا رمــاد

‏والغـلا محدٍ يبيـعه ولا يشتريـه
‏لمـحـةٍ فالعيـون وبذرةٍ فالفـؤاد

‏أحسبن المشاعر ما تـخـون النّبِيـه
‏إثر حتى المشاعر صار فيها فساد