رد: حكــاية قصيــرة ❥
 

بفضل الله و كرمه ,
تم اطلاق متجري للكوكيز اليوم , رابط المتجر تلقونه ف تويتر :507:


توثيق اللحظه :lo2:

رد: حكــاية قصيــرة ❥
 

يقولون ان بكره وراي دوام , و يقولون اني ما ودي اداوم ,
نسيت الاشخاص اللي ف الشغل و نسيت المعلومات و نسيت كل شي :ff1 (198):

الاجازه هذي كانت من اجمل ما يكون , حسيتها طويله مرررره من كثر الاشياء اللي سويتها ..
اكثر شي حبيته اني ساعدت امي كثييير و ادري ما اوفيها حقها , بس كنت فاضيه لها ..
و طلعت مشاوير انا من زمان ابيها ’ و هجولت انا و اختي كثيييير كثييير :507:

تعرفون احلى شي صار في الحياة , اننا صارت لنا الفرصه و صرنا نسوق ,
حرفياً راحة ما بعدها راحة , اي مشوار ابيه اقول لأختي يلا و ما تقصر ..
صرنا نلفلف في كل مكان ودنا فيه , و احلى شي طلعاتنا كانت الصباح :lo2:

فعلياً هالاجازة استغليتها قد ما اقدر , و فكرت في الاستقاله اكثر من مره يوم شفت نفسي فاضيه و كل شي ابيها اقدر اسويه ,, لان الدوامات تقيدك ,
لكن فكره الاستقاله مأجلتها اربع سنين قدام و اشوف وش ربي يكتب لي ,

الحمدلله اننا في نعمة نعجز عن شكرها ,
في كل لحظه انا اقول الحمدلله , في كل دقيقة ,
و هذا من اسباب توفيق الله لي و انها تفرج امامي كثير ,
الحمدلله دائماً و ابدا :lo2:


كذا لازم اروح انام و اهيئ نفسي لبكره :ff1 (101):

تصبحون على ما تحبون:507:

رد: حكــاية قصيــرة ❥
 

احاول اهرب من سوالف غاده و اني ابي اكتب في المدونه , لكن هي مصره تسولف , و انا لازم اسمعها حتى لو حاولت اطنشها :ff1 (198):

سوالفها طالت و نسيت سالفتي الاساسيه اللي بسولف عنها ,, اخيرا قلتها لك يالله بروح اقرا لقاء رانيا ,
قالت اقريه و انا اسولف خخخ و راحت لما اندمجت في القرايه <- ام شريرة :ff1 (198):





ما احب فكرة اني كامله و لا يمكن اخطيء ,
كان حديثي اليوم مع وحده و اقولها كلنا خطاؤن
و هي مصره انه لا , اخطي في كل شي الا العمل , لازم كل شي يكون بيرفكت
هي فهمت اني اقولها اننا كلنا خطاؤن , و اخطي و اخطي و لا اتعلم و لا اتوب
بالعكس قلت لها انا اخطيء و اتعلم و اتوب و ما اكرر الخطأ ,
بس ما ازعل من نفسي بدرجه كبيرة و اعتبر انها نهاية العالم , ما انكد على نفسي و الله مدبر امري
و اقولها انا ممكن اكثر وحده تشيل هم الناس , و اني اغلط معهم او اخطيء في حقهم
بس لازم اتعامل مع هذي المشاعر , و كيف ما تأثر على حياتي
يعني زعلت و عطيت الزعل حقه , و سلمت امري لله هو لك حق العقاب او التوبه علينا
و ادعي ان الله يكفيني شر نفسي اول شي و شر اعمالي , و شر الناس
و الله يعطيني من خير نفسي و خير اعمالي و خير الناس ,

و ربي الوحيد اللي عالم ايش حقيقتنا دون تصنع و مثالية امام الناس
هذا بحد ذاته اطمئنان :lo2:


من زمان عن المدونه و حبيت اسولف لكم شوي , :507:
و اتمنى لكم ايام سعيده :lo2:

رد: حكــاية قصيــرة ❥
 

بعض الصدف غريبه , بشكل يخلي ابتسامتك تتسع , و قلبك يُزهر ,
هي اشياء بسيطه و تخلق وراها اشياء عظيمه ربي يسوقها لك :lo2:

نشرت اعلان المتجر في مكان ما و صادفت احد راح يساعدني في موضوع متأزم معنا و مو فاهمينه و لاني لاقيه اللي يفهمني ,

كنت متردده اني اعلن هناك بس غاده شجعتني :lo2:

انا للحين مبهورة في الصدفه :507:


اشياء ما خططنا لها , لكن صفا نيتك , و الدافع اللي جواك , و دعاء الناس لك ,
تترتب امورك بشكل لا يصدق

الحمدلله :507::lo2:

رد: حكــاية قصيــرة ❥
 

في قلبي حكايات , اعجز عن ذكرها , لا تقال ..!
و لكن شعورها اضعاف اضعاف الكلام اللطيف ,,

رد: حكــاية قصيــرة ❥
 

تساؤلات لو تعمقت بها , غرقت ,,
لانك لن تجد لها اجابات شافيه مقنعة ,
لذلك اي تساؤل يرهق عقلك بالتفكير , دون ان تصل الى نتيجة ,,
ضعه في مهملات عقلك ,


بالعربي : ما عندي وقت افكر في اشياء ما تفيد :ff1 (101):

رد: حكــاية قصيــرة ❥
 

قد مال بي الطريق، و هزمت..!
لم يكن قلبي حينها، إلا كهشاش، يتحطم من لمسه،
هزمت، و لم اجد في ذاك الطريق ما يعينني،
كنت اتخبط وحيدة، في ظلامٍ دامس،
و انا عمياء البصيرةَ و الروح،
بدأت ازحف، و اتبع النور البعيد،
قدماي لا تقوى على الوقوف،
و قلبٌ ضامر، امنيات تبددت..
اختنق،،،
و لم اعد قادرة على سحب الاكسجين الى رئتي،


لكن النور البعيد، كان يغريني،
و صوت يهمس لي،، ستعودين،، نوراً يُشع

رد: حكــاية قصيــرة ❥
 

لي ايام , و انا افتقد حس الاسترسال في الكتابة , و كأن طاقتي للحديث تقلصت ,
ام اني لا اجد ما اتكلم عنه , ام الاحداث حولي فوق قدرتي على التعبير ,



و يمكن رمضان يجيب الهدوء , و تخف السوالف فيه :ff1 (101):
و يمكن كل ما كثرت الاشغال , قل الكلام :ff1 (101):

مدري بس اني احاول اسولف خخ


يالله عندي موضوع اجهزه , و بروح اكمله :507:

رد: حكــاية قصيــرة ❥
 

شيء حلو لما يقولك احد يالله حكينا ,
و تكون عندك احداث كثيرة و مشاعر كثيرة , تحاول تتشعب فيها
بس انت مجبر تكون داخل نطاق معين ,
انت جالس تتكلم عن سبع سنين , بكل ما تحمله ايامها من اسى , ضعف , تحدي
لكن وصلت لمرحلة انت اقوى من كل شي , بأمر الله و فضله و كرمه عليك ,
اليوم بس اكتشفت مع الحكاوي اني اخر سنتين فعلياً كنت افضل من السنوات الخمس اللي قبلها
انا طبعي ما اتكلم كثير , بس لو احد قالي كلمينا و كان مستعد يسمع و ينصت بكل حواسه اصير ثرثارة :ff1 (198): بس ثرثارة صغيرة :ff1 (101):

شكراً يالله على كل حدث اثر بحياتي و جعلني افضل و اقوى

رد: حكــاية قصيــرة ❥
 

ما لي شغل عادي اليوم ازعجكم بالسوالف و الصور ..
لي كم يوم و انا اجهز و ارتب و اصور , عشان تنزل اليوم ,,
و ما احكيكم كانت يدي تحكني خخ اني اخرب على نفسي <- عوايدها :ff1 (198):

و طبعاً سويت فلم مع الورد .. دخلت على اهلي و معي الباقه و اقولهم في احد اهداني باقة في يوم ميلادي :ff1 (133):
و عايشه الجو و مصدقه نفسي و كاتبه رساله لي و حركات ,,
و ضحكو علي عشاني مرسله لنفسي ورد خخخ
بس عادي اهم شي افرح نفسي , :lo2::ff1 (101):

لو انت ما رفعت بنفسك و اعطيتها اكثر مما تستحق , محد بيسويلك كذا :150:
لذلك اسعدو انفسكم ب انفسكم ,, لو ب ابسط الاشياء


هذي باقتي و رسالتي


http://g-lk.com/up/do.php?img=5998



http://g-lk.com/up/do.php?img=5999



:ff1 (133)::507:

رد: حكــاية قصيــرة ❥
 

عندما انتهينا،،
اخذت عهداً على نفسي ألا اعود،
روحي حلقت بعد أن اطلقتها للغيم،
لن تعود، هي هناك مستقرة
حتى و ان حاولت اعادتها،،


عندما انتهينا،
بدلت العبوس بالضحكات،
و رسمت على وجه الحياة
ورداً لا يذبل،


عندما انتهينا.
وجدت في كل الطرقات
خيراً يجذبني،
و ابصرت عيني النور،

رد: حكــاية قصيــرة ❥
 

اليوم عندي موعد، اشعه رنين مغناطيسي،،
و طلبو مني اكون صايمه قبلها بخمس ساعات..
المشكله مو بالصوم،، المشكلة ان الموعد ١١ الليل :ff1 (198):
كذا راح اكون صايمه الى الساعه ١١. :65:

يوم استثنائي :ff1 (198):

الله يعدي هذا اليوم على خير :ff1 (198):

رد: حكــاية قصيــرة ❥
 

ها هي الايام تمر سريعاً، و نحن لم نلتقى،
خطفت منّا اجمل الاوقات و ولت هاربة،
و لم نستطع حتى اللحاق بها،
وقفنا على قارعة الحُلم،
و بأيدينا تلك الامنيات الهشه،
و لم نكن قادرين على تقويتها لمواجهة سرعة الايام،
سقطت و تحطمت، من هول هشاشتها،
و نحن ننظر لها بذهول،،

رد: حكــاية قصيــرة ❥
 

https://l.top4top.io/p_1958p4f2c0.png

ممتنه انا للاقدار التي ساقتني الى هنا،،
و عرفت هالمكان الجميل و نخبه رائعه من الاصدقاء
سعيدة فيكم و بمعرفتكم..
و عسا الله يديم افراحكم و اعيادكم..
و عيدكم مبارك..

:lo2:

رد: حكــاية قصيــرة ❥
 

صباحكم لطيف،
صباح العودة، لكل شي، :162:

رد: حكــاية قصيــرة ❥
 

انا في حالة حب مع الحلم :lo2:

رد: حكــاية قصيــرة ❥
 

صباحكم هادي و رايق،
اليوم رسمياً بدأت الايام تعود لما كانت عليه،،

لما اصحى سبعه بدون منبه و لا شيء اعرف اني رجعت نوره اللي اعرفها :507:
السهر و لخبطة الايام ما تناسبني ابد، بس شيء لا بد منه..
لولا تقلبات الحياة ما انجزنا و لا تطورنا،،
من بعد رمضان و الدنيا حايسه،، سبحان الله شهر تسعه بس يقسم السنه نصين متساووين..

،،

امس نامت عندنا خالتي و بناتها.. كان من اسعد الايام،،
قلت مالها الا اسوي لهم فطور مرتب،، طبعاً فطور متأخر..
و هذا ساعدني اني اجهزه بكل روقان..


https://a.top4top.io/p_1968l6x4q0.jpg


كنت سعيدة للغايه فيهم :507:



حبينا نسجل حضور،، كالسابق :150:

رد: حكــاية قصيــرة ❥
 

تدفقي في مسارات الحياة و انطلقي،
فالله خلق لنا روح تحب الحياة
كوني لذاتك كل شيء، قدريها و اعطيها ما تستحق،

اختي الصغيرة، ابنتي الروحية، شيم، سمو المجد
كل عام و انتي جميلة و منطلقه، كل عام و روحك تعانق السحاب
كل عام و انتي بخير و في خير :507:

رد: حكــاية قصيــرة ❥
 

محتاره اجلس اصمم و الا انام :ff1 (198):
فيني نوم و فيني افكار تصميم ,, و اخاف لو فتحت الفوتوشوب اني ابتّل و لا انام :ff1 (69):
بس و الله شكله النوم يفوز :507:

رد: حكــاية قصيــرة ❥
 

الحمدلله على كل شيء جميل قاعد يصير لي،،
من المهم،، تكون نظرتك تفاؤلية للحياة و الاحداث القادمه..
حتى يرتب لك الله اقدار و احداث اجمل،،
حتى و ان صار شي ما يعجبك اعتبرها عقبه و راح تعدي..
و اعتبره اختبار من الله يقيس فيها صبرك و رضاك،،


بقولكم الشيء السعيد اللي سويته،،
فتحت حساب في البنك بتاريخ ميلادي :507:
<- موظفة بنك ع الفاضي :54:

الحساب اللي فتحته مهم بالنسبه لي و كنت ابيه رقم مميز..
و اعطتني وحده من صديقاتي فكرة انه يكون بتاريخ ميلادي :507:
و الاجمل من كذا انه جا موعد فتح الحساب،، في شهر خمسه

قلتها من اول انا اتفائل بهذا الشهر،، كل الاحداث السعيدة تصير لي فيه :lo2:
الحمدلله
:lo2::10ل0:

رد: حكــاية قصيــرة ❥
 

مُتعِبه تلك التفاصيل الصغيرة التي تعيش داخلي،،
تحمل خوف كبير اكبر منها، كوحش كاسر ينقض عليها كلما حاولت الخروج،
يجبرني دائماً على التراجع، يمنع عني ما تهواه نفسي،

و انا اقف خلفه احتمي به و اخافه،

رد: حكــاية قصيــرة ❥
 

لا تتوقف عن اي فعل يسعدك..
الحياة ابسط مما تتخييل، مليئة بالفرح و السعادة..
فقط كن سعيد، و شارك سعادتك مغ غيرك تزدهر :507:


صباحكم فرح
:507:

رد: حكــاية قصيــرة ❥
 

الايام المتعبه و اللي فيها مشاوير كثير ، هي اكثر الايام سعادة ترا..
تصحى الصباح اليوم الثاني و انت مرتاح من التعب و فيك نشوه الحب و الفرح
و ما بالك اذا اليوم اللي بعده هي بدايه شهر جديد.. بدايه تحديد اهداف جديده
بداية انجازات، بداية كل خير،،

امس كان جميل، و اليوم أجمل 🌺💕

و صباحكم جميل :507:

رد: حكــاية قصيــرة ❥
 

اوقات تحتاج ناس اصغر منك جريئة و متحمسة للحياة تاخذ بيدك،،
مو عيب انهم يساعدونا على كسر حاجز معين.. و مو غلط اذا الاشياء اللي يساعدونك فيها..
ما تخالف الدين و لا العرف و التقاليد،،


هذي حالتي مع بنت خالتي،، بنت صغيرة مقدمه على الحياة بشغف
قلت لها اي شي تبين تسوينه انا معك،، منها اهلها متطمنين ان معها احد كبير
و منها انا اجرب شعورها و احساسها،، و منها تكسر عندي حاجز خوف من شي معين،،
البنت في الثانوي،، لذلك هي مقدمه على الحياة بقوة و حب..
بيني و بينكم متحمسه غادة تصير في الثانوي :507:.. بس مشكلة بنتي خوافه و مو جريئه مثلي :ff1 (198):

يوم ما راح نتكلم عن مشكلة الخوف بتوسع :ff1 (219):

حالياً انا اشتغل على نقطة الخوف، ابي انزعه من صدري للابد :lo2:
لذلك عادي استعين بناس صغيرة و جريئة :507:

و بس :507:


صباحكم اطمئنان، و لُطف من الله :lo2:

رد: حكــاية قصيــرة ❥
 

الايام لا تأتي على ما نهوى و نحب ,,
الرضا و الثقه بالله هي من تمهد لنا الطريق ,
تزرع الورد في طريقنا ..

ابدأ يومك ب ابتسامة , بقلب راضي متوكل على الله
كل ما مضى و اساء لك لا يستحقك , و لا يستحق من وقتك و جهدك عناء التفكير ,
و من يقدم لك الفائدة و السعادة كن ممتن له , اشكره , و قدم له مثل ما قدم لك و اكثر ,

حب الحياة تحبك , و يعطيك الله :lo2:


صباحكم عطاء ,



اليوم خميس و لا بد نكون بهذا الروقان :ff1 (198):
يومكم سعيد :lo2::10ل0:

رد: حكــاية قصيــرة ❥
 

بحكيكم حكاية،، على الناس كيف تذلك و تمسك عليك اشياء كنت تقولها و تشيد فيها،،

انا تصوير جوالي خربان،، الكاميرا ما ادري شفيها تصور مغبش..
لازم اتحايل و اسوي حركات فيها عشان تطلع الصورة حلوة
راسلت كذا شخص القطعه مو متوفره،، بصبر شهر لو ما توفرت شريت جديد..
مستخسرة اشتري و الله.. جوالي لازال فيه روح بس مشكلة التصوير
و هذي المشكلة تسبب ازمه نفسيه عندي،،

الحكايه مو هنا،،

السالفه كل ما اشتكي لأحد من اهلي يقول هذا هواوي اللي كنتي طايرة فيه
يذلوني ذل ما تتخيلونه <- تتعرض للتعنيف اللفظي :ff1 (198):

بس انا اكابر و اقولهم لو بشتري جوال جديد بشتري هواوي بعد :ff1 (198):
المشكله مكابر و عناد على شركة ما درت عني و عن حبي
هذا لا قالو لك حب من طرف واحد خخخ


بس اقولكم لا تتخلون عن شي تحبونه، و حاربوا عشانه،، :507:

رد: حكــاية قصيــرة ❥
 

علموني كيف ارد الجميل للناس اللطيفه؟ :507:
انا مغمورة بحبهم و لطفهم :11:

رد: حكــاية قصيــرة ❥
 

يسعد صباح الناس الجميلة،،
تعرفون شعور الانتماء!
انا انتمي لهذا المكان،،

من كل شخص فيه شي يشبهني،،
روح المكان تطابق روحي،،


:507:

رد: حكــاية قصيــرة ❥
 

هناك من يدخل لحياتك , ليغير مكان الاشياء , و ينسف ماضيك المُنير , ليستبدله ببشاعة الحضور ,
تتخبط في ظلام دامس , و هو لا يحرك ساكن لينتشلك , لينقذك , فقط يقف كالمتفرج على مسرحية مضحكة
تنتهي المسرحية و تنتهي معها ضحكاته , ليبحث عن مسرحيه آخرى ,



و هناك من يمسك بيدك , يرشدك و يتأمل لمعان عيناك , و فرحتك ,
يشاركك السقوط و يشاركك لتعانق الغيم , لترسم حلمك و تحققه ,
يُلمّع نجمك لتضيء و تزهر روحك :lo2:



و لك انت ان تختار بين النور و الظلام ,
و بكل يقين ستختار النور

رد: حكــاية قصيــرة ❥
 

لما تنشر الحب، و تحب رغم كل شي
تناضل في سبيل هذا الحب و تبين للي حولك حبك و اهتمامك

بعد ثمانية شهور من الحب المتواصل و عدم الانقطاع عن التعبير عن مشاعرك بكل الوسائل،
بدأو يظهرون لك حبهم المكبوت،، و تبان مشاعرهم الرقيقه

هكذا ينتصر الحب،، :507:

حبو بكل ما اوتيتم من حياة



و صباحكم حب :lo2:

رد: حكــاية قصيــرة ❥
 

https://l.top4top.io/p_19861tkk80.jpg



ذكرى هذي الصورة مؤلم جداً.. ذكرى التخبط و الترنح،،
كنت بالقوة اقدر اكتب في الجوال،، و احارب حتى اوقف او امشي زي الناس
و واضح اني ابي اكتب كلام بس مو قادرة،،
ظهرت لي في صور الذكريات في الانستقرام
و تذكرت الحاله اللي كنت انا فيها.. و لا كنت اعرف وش فيني،،
غير اني كنت احاول اتقبلني و مو قادرة،، احاول اصمد و انا احس بتشتت
ايام انا عمري ما انساها،، شهرين على هالحاله و انا ما اعرف وش فيني،،

صعب جداً،، تحس ب الم و ما تعرف وشو.. و لا احد عارف وش فيك..
ما تشوف الا نظرات الشفقه و الاستغراب،،
ايام غريبه بس الحمدلله بفضله و كرمه عدت على خير و صرت على بينه
حقيقي اثرت فيني الصورة.. و حسيت بقوتي و صمودي :507:


نشارككم الاحساس :ff1 (101):

رد: حكــاية قصيــرة ❥
 

بعض المواعيد سعادة،، :507:
بكرة موعدي مع بنت خالتي،، و اول مغامرة :97:
متحمسه و خايفه بنفس الوقت 🤭

رد: حكــاية قصيــرة ❥
 

https://e.top4top.io/p_1989rrvtr0.jpg


حتى انا متحمسه احكيكم.. بس خلوها تعدي على سلام :ff1 (198):
جالسه اراقب الساعه متى يحين الوقت:507:



و يسعد صباحك :ff1 (38):

رد: حكــاية قصيــرة ❥
 

اهلاً ,, كيفكم ؟! ..
من زمان ما سولفت هنا و نسيت كيف السوالف :ff1 (198):

https://k.top4top.io/p_19897sy5d0.jpeg

اعرف نفسي لما اتشتت مره وش السبب بس ما اتوب و ارجع اكرر و اتشتت ..
قررت اليوم ارجع اكتب اهدافي الاسبوعيه و الشهريه .. لان فيه اشياء في بالي و لو ما كتبت ما انجزها ..



خلصت منها و احس ودي احكيكم عن تجربه اليوم .. قبل لا انام
اليوم مغامرتي مع بنت خالتي ,, رحنا نغوص ,,


ما جا في بالي و لا واحد في الميه اني ممكن اجرب هالتجربه و اغوص ,,
لكن لما قالت لي بنت خالتي ,, قلت خليني اجرب و نوسع منطقة الراحه
او ما يطلق عليه Comfort Zone


بعيداً عن اني ما احب البحر و لا اسبح فيه و اقرف من الاشياء الهلاميه و الشعب المرجانيه
,, بس كانت التجربه فوق الرائعه
اول كان حدنا بحر مافيه امواج كثير ,, بس اللي واجهته اليوم جداً مرعب بالنسبه لي ,,
كان الموج مررره قوي ,, و لا تقدر تتوازن و اللي سباحتهم اي كلام مثلي ما يقدر يصمد
بس لولا المدربه انا ما تجرأت و نزلت تحت .. لانه لما وصلنا مكان خلاص ننزل وقتها قلت لها لا رجعيني
كان فيه رعب غير طبيعي , غير انه ما تحملت الهواء اللي من الاسطوانه ودي افكه عني ابي اتنفس هواء طبيعي ..
و كان فيه صوت داخلي يقولي خلاص انتي وصلتي كملي ,, على انه فكرة التردد جاتني ثلاث مرات اليوم
نزلنا تحت ,, في البدايه كنت خايفه و شوي شوي بدا الخوف يروح مني لما شفت البحر من تحت و الاسماك اشكال و الوان ,,
ودك تمسكها بس ما تقدر .. اخر شي فليتها معها و جلست اتصور و نسيت خوفي ,,
كان الخوف اني اتنفس من خشمي ,, لو تنفست من خشمي شفطت المويه
بس خليت تركيزي على التنفس من الفم ,,
نزلنا لعمق مو كثير .. كنت ارفع راسي و اشوف سطح البحر


صحيح التجربه رائعه جداً .. و عمري ما تخيلت اسويها ,, بس الان ما افكر اعيد التجربه ,, ممكن اعيدها في المستقبل مدري !
و احس خلاص حسيت ب احساسها و اكتفيت منها لانها مو مودي ابد
غير كذا فيها خطوره مره كبيرة .. حتى الغواصين المحترفين ما سلمو منها ..


https://d.top4top.io/p_1989eg9c01.jpg

تجيني قشعريره من هذا المنظر ,, و اليوم كنت اواجهه بس احاول ما اقرب منه :ff1 (101):


بس كانت هذي تجربه اليوم ,,
تستحق صراحه :507:

رد: حكــاية قصيــرة ❥
 

صباح الامتنان لكل شي جميل يحدث في حياتي،
صباح الحب للاشخاص، اللذين يحيطون روحي ب اهتمامهم،،


اليوم عندي شعور الامتنان عالي حبتين :ff1 (101):
ممتنه لنفسي، و جهدي اللي ابذله، و تعبي اللي اثمر فرح،،
ممتنه لوجود عائلتي بجانبي، يتحملوني و يدلعوني :ff1 (101):
ممتنه لوجود الاشخاص الجميلة في حياتي،،


اوقات تتعب على نفسك، و فجأة يتدفق الخير عليك من كل جانب..
نشكر الله كثيرا و نحمده،، و فوق كذا تحس انك عاجز عن شكره
ودك تقول كلام اكبر و اكثر من اللي قلته،،
بس سبحانه يعلم ما في قلوبنا :lo2:
و هذا اللي يطمنك..


افرحو و شاركو الناس سعادتكم :lo2::10ل0:

صباحكم سعاده :507:

رد: حكــاية قصيــرة ❥
 

https://e.top4top.io/p_1992t3soj0.jpg


بملئ يدي المفتوحتين لك،
بقلبي الذي يستقبلك، عندما تُعرض الحياة عنك،،
تعالي، و اسكني، اعماقي،، بددي خوفي،
و اوعدك، سننطلق سوياً و لن اخذلك..

:507:




^

حتى في اعماق البحار ما اخلي حركاتي،،
الف مره جلست الاحق السمك،، و ابيها تلقط لي صورة حلوة
كانت فيه حركات احلى من كذا بس ما صورت الا ذي

تدرون يوم شفت السمك مستانسين في البحر، حزنت اننا ناكلهم :ff1 (198):
قلت الحين هم عايشين ف امان الله، و في مكان ساحر و مختلف
و فجأة نجي نصيدهم



يالله هذي الحياة،،

رد: حكــاية قصيــرة ❥
 

حلو الواحد يعبر عن سعادته بكل الطرق اللي يقدر عليها،،
بصورة بكلمة حلوه او وردة،، اي شي تقدر عليه،، المهم تعبر،،
و حلو شعور الامتنان لاشخاص صنعو هذي السعادة لك،،
هذا الشيء بينعكس على نفسيتك و اسلوب حياتك،،
بعد نفسية الشخص اللي قدامك،،

تقدير بسيط من مديرة منطقتنا بسبب فوزنا بالمركز الاول لصوت العميل
انعكس علينا كلنا صرنا زي الفراشات،، زرعت بداخلنا فرحه مو طبيعيه

https://f.top4top.io/p_19945km0c0.jpg




https://g.top4top.io/p_1994zycuf0.jpg


هالورد بيرافقني في حلي و ترحالي الين يذبل :ff1 (101):



غير التقدير المادي من الادارة،، بس عن نفسي افضل التقدير المعنوي و كنا على اختلاف انا و بعض البنات على هذي النقطه..
صحيح التقدير المادي حلو،، واكيد انا راح انبسط فيه

لكن بالنسبه لي التقدير المعنوي يسعدني بشكل خيالي،،

عندي قناعه ان الفلوس تجي بشكل او ب آخر،، لكن صعب تزرع سعادة حقيقيه في قلب انسان،، و تحافظ على هذي السعادة لأطول فترة ممكنة..
و ممكن هالسعادة تحقق لك اشياء ما تتخيلها،،


الحمدلله على كل شيء
و صباحكم سعادة :lo2:

رد: حكــاية قصيــرة ❥
 

https://l.top4top.io/p_1995rklc20.jpg


واضح اني مستانسه مرره :ff1 (198):
كل الصور تلعلع بالاصفر،، :507:


و صباحكم سعاده :lo2:

رد: حكــاية قصيــرة ❥
 

لما تفهم نفسك و تفهم شعورك , بس مو قادر تساعد نفسك !
انا واصله لمرحلة اللاشيء , و اعرف الاسباب , بس مو قادرة احركها ,
او بالاصح انا اقدر بس مابي ,

هذي المرحله من اصعب المراحل اللي ممكن تمر فيها بحياتك ,,
اقدر و اعرف , بس مابي
و تحس انك جالس تدور على نفسك :ff1 (198):

<- ذات حلطمة :ff1 (198):






احتاج لحظة تأمل

رد: حكــاية قصيــرة ❥
 

قبل لا اروح الدوام تذكرت سالفه مرتبطه فيه ,,و ابتسمت ابتسامة رضا على التغيرات اللي صارت فيني ,,
اتذكر 2009 كنت اتهزء على التأخير <- ايوه كنت اتأخر عن الدوام :ff1 (198):
هذا و بيتي كان يبعد عن الفرع بالضبط خمس دقايق ,,
اتذكر من العباطه اللي في راسي لما كانت المديرة تسألني عن سبب التأخير اقولها ببساطه نمت !
تقولي النوم مو عذر .. و انا اعابطها و اقول الا عذر :ff1 (198): <- مو حلو مديرتك تكون صديقتك خخ

و لما كانت تحاول تقنعني : تقولي تخيلي سويتي مشروعك .. و كان عندك موظفات و وحده تتأخر
بترضين لما تقولك انها نامت ! .. و مابي اكمل لكم وش كنت ارد لان كنت اعاند و بقوه خخخ :ff1 (101):

سبحان الله كيف دارت الايام و تغيرت و صرت اجي بدري للدوام ,, اوقات اجي قبل ما يبدأ الدوام بساعه او ساعتين ,,
و لما اتذكر ذيك الايام احس بضيقه .. كيف كنت اصحى و بسرعه بسرعه اتجهز :ff1 (198):
و اقول ياربي ايش كنت اسوي بنفسي ليه معذبتها كذا ,,


و اشياء كثيرة تغيرت فيني ,, و صرت اهدأ داخلياً و خارجياً ..
و من اجمل الاشياء اللي تقدمها لروحك و توازن نفسك


انك داخلياً و خارجياً نفس الشيء ,




الله يجعلنا بهذا الرضا و اكثر :507:



و صباحكم رضا :lo2::10ل0: