|
رد: حكــاية قصيــرة ❥
امي من اكثر الناس اللي معارضه اني اسوق..
تقولي انتي تنامين في السيارة كيف بتسوقين خخخ ضحكتني و الله قلت الحين و انا اسوق ما راح يجيني النوم :ff1g (12): بيكون تركيزي الف قالت لااا و اذا دختي طيب و انتي تسوقين،،!! امي تركز على اشياء انا ما اركز عليها،، يعني انا ما اتوقع و انا تعبانه بطلع اسوق.. ماني مجنونه لذي الدرجه،، و غالباً وقت الصباح اسوق و انا بقمة نشاطي،، اليوم جربت اطلع لحالي مشوار بسيط الصباح.. في الحي ما بعدت رحت لبنده و رجعت،، و انا طالعه قلت لأبوي و طلعت،، ابوي يحمسني و يشجعني اكثر من امي.. امي جايبه فيني العيد بدعاويها خخ بقولكم سر،، امي دعت علي ما انجح في اختبار القيادة و لا نجحت :ff1g (12): بس رحت و رجعت و اختار الطرق اللي ما فيها سيارات كثير عشان ما انربش:ff1 (46): للامانه كان داخلي خوف كبير،، متخيلين ساعتين و انا افكر اطلع و البس عبايتي و انزلها خخ الحمدلله عدت بسلام.. |
رد: حكــاية قصيــرة ❥
امي قالت لي ان الناموس ما يحب البخور و يهرب منه،،
انا حبيت اجرب هالتجربه،، لاني من الناس اللي احب اجلس في الهواء الطلق،، و النامس يضيق صدري :ff1 (169): صرت كل ما اطلع السطح احط عندي بخور،، و فعلا ما يجيني الا بنسبه بسييييطه جدا،، اتوقع اللي ماخذين لقاح البخور خخخ و الله و صرت استمتع بالجلسة في السطح،، ريحه حلوة و ما فيه شي ينكد عليك.. سالفه للبيع بس ما علينا خخخ صباحكم جميل :11: https://j.top4top.io/p_1821z2dc00.jpg |
رد: حكــاية قصيــرة ❥
^
^ الموضوع حقيقي توني صدقت ميه بالمية،، لما شفت الناموس يموت قدامي من البخور تموت و تجف كأنها محروقه ابي اعرف السر :130: |
رد: حكــاية قصيــرة ❥
الحمدلله،
اليوم اخر يوم دوام و اخذت اجازة اعتبرها استثنائيه.. نهايه سنه مع بداية سنة جديدة.. من زمان في بالي و الحمدلله تسهلت لي،، اجازة براجع فيها احداث ٢٠٢٠،، نشوف وش حققت من اهداف، وش اجلت من اهداف.. اراجع فيها نفسي و اعدل الاخطاء اللي صارت.. و اصحح من نفسي،، نبدأ نحط اهداف ٢٠٢١،، و اللي اتوقع انها سنه لطيفة نزداد فيها بهجه و حب، السنه راح تكون قويه بتأثيرها الجميل،، و يارب سنه خير ع الجميع :510: |
رد: حكــاية قصيــرة ❥
امنيتي اعيش في منطقة باردة :118:
بس للاسف استقراري في منطقة ساحلية و حارة يجينا نسمة هوا باردة شهر في السنه و الباقي حر.. اللي اقدر عليه اني استمتع بالجو الحلو قد ما اقدر.. بس تضل امنيه :ff1 (104): صباحكم اماني حلوة :510: |
رد: حكــاية قصيــرة ❥
https://a.top4top.io/p_1824l18270.jpg
من الاشياء اللي احبها هي التدوين، سواء هنا او في الاجندة،، بديت استخدم الاجندة من 2016 شفت الاجندة مع اختي و حبيت الشغله و قلت اجرب،، في البدايه كنت ما اعرف وش اكتب،، شوي شوي تعلمت عليها و صرت ما استغنى عنها كل سنه لازم اجيب لي وحدة.. في بداياتي كانت تهمني التفاصيل فيها.. تجيك صفحات تلوين و صفحات للرياضه و الغذاء و صفحات للماليه،، بس هالسنه بغيت الاجندة تكون بسيطه مرره مرره و لا اشغل بالي بالتفاصيل الكثير،، حتى الاهداف بقللها شوي و بتركيز اكثر.. أخذتها من جرير.. من جوا نفس التقسيم بس يختلف الغلاف من برا.. و شي ثاني احبه من زمان و للحين،، احب الاستكرات لازم كل طلعه للمكتبه اشتري مجموعه:67: احسها تفتح نفسي للتدوين بجد الاجندة تنظم لك ايامك،، اتمنى لي و لكم ايام سعيدة جميلة :ff1 (104): |
رد: حكــاية قصيــرة ❥
يسعد صباحكم،،
بشتري لخالي هديه،، و ابي افكاركم :ff1 (104): خالي كبير مو صغير.. بس لسى روحه شباب :ff1 (104): بس جنتل مررره يخجلك بذوقه و لطفه من الناس اللي ما تحب تجلس بدون انجاز بدون علاقات اجتماعيه.. و انا صغيرة له مواقف مرره لطيفه معنا،، و لما كبرنا جمايله علينا كثير حبيت اهديه شي فخم،، و ابي آرائكم :510: |
رد: حكــاية قصيــرة ❥
:542:
الحمدلله، بعد جهد جهيد استلمت الرخصة اليوم :11: بعد اخفاقي المرة الاولى نصحوني اني ما اتكلم و لا اقول على وقت اختباري الثاني و بالفعل.. طلعت سكيتي من البيت و محد عارف اني رايحه اختبر.. و الحمدلله اجتزت هذي المرره شكرا لله اولا.. ثم لنفسي المثابرة و الاشخاص اللي يحمسوني دايم :ff1 (104): حتى الاشخاص اللي ما يتمنون اخذ الرخصة اشكرهم خخ:ff1 (104): و كذا ختمت 2020 ب اجمل انجاز :ff1 (104): |
رد: حكــاية قصيــرة ❥
ابشري قروشه،،
بس تشوفين وحده جايتك طايرة و الرخصه مطلعتها من القزاز اعرفي ان هذي انا اطلعي على طول :ff1 (104): وين تبين بس تدللي :ff1 (61): |
رد: حكــاية قصيــرة ❥
2020 ,,
انا لا انتظر ، انا استحق كانت سنه محملة بكل شيء سواء كان سعيد ام حزين ، جيد ام سيء .. نظرتنا للامور ترسم لنا نهاية السنه هل احنا استمتعنا او لا ، هل انجزنا او لا ،، من بداية السنه كنت متفائلة فيها و لا زلت حتى نهاية السنه مهما صار من احداث ،، صار اسمي بين صديقاتي مرتبط بـ 2020 .. كل ما صار شي رجعو يسألوني اذا كنت لازلت عند كلامي و كنت اجاوبهم و اكثر ،، الاحداث اللي كانت تصير لي شخصياً كانت مبهرة ،، كل شي كنت افكر فيه و اخطط كان يصير ،، حتى لو اشياء بسيطة مرره ،، اذكر من هذي الاشياء في بداية السنة كان اختباري للشهادة المهنيه ،، في بداية السنه ما كان محدد التاريخ ،، لكن انا جذبته بطريقة تفكيري فيه ،، اختباري كان يوم 30 يناير ،، يوم خميس ،، و انا من بداية الاسبوع كنت اجهز له و انا مو عارفة اصلاً متى تبدآ الاختبارات كنت اول دفعة تختبر ،، يعني قبلها ب اسبوع كنت اجهز ، الخميس اتصلو علي قالوا اختبارك الخميس الجاي قد ما كنت متحمسة كان فيه رهبة و فرحة بنفس الوقت ، كيف افكاري كانت تجذب شي انا اجهز له انا كنت متجهزة قبلها ب اسبوع ،، و قبلها بيوم قلت لصديقاتي انا بجيب درجة فوق 85 و رحت اختبر و نجحت و درجتي كانت 86 صح الواحد يطمح بدرجه اعلى من كذا لكن انا كنت مبسوطة مرره لان قوة افكاري و تركيزي جاب نتيجة طبعاً كل اللي قاعد يصير بتوفيق من الله ، و انا مؤمنه ان كل شي قاعد يصير لي بإرادة الله ،، طبعاً اجمل شيء صار لي انتقالي لفرع جميل ، يستاهلني و استاهله ،، و كانت مديرته من اعز صديقاتي ، و لكم انت تتخيلون قد ايش كانت الايام و الصباحات جميلة متخيلين انك تبدأ يومك مع شخص تحبه و تعزه ، و سواليف و ايجابية الى بداية الدوام ، بصراحة كانت ايام سعيدة مررره نهاية الشهر الاول حدث لي موقف مرره حزين ،،لكن بفضل الله كانت الاحداث من حولي ما تخليني ازعل و كنت اقول في نفسي هذي خيرة من الله ،، عشان انتبه و ارجع افوق ، و عشان سنتي تكون حلوة حاولت اتناسى ، ابدأ اخلق اشياء جميلة في حياتي عشان افرح و ما يأثر علي الموقف بشكل سلبي كنت بهذا التناسي الى هذي اللحظة ، و مخططة لـ 2021 التناسي يكون نسيان شهر فبراير ، قررت اسوق و اخذ الرخصة ، ودفعت رسومها ،، لكن ما فيه مواعيد و على مارس سجلت في دروس سباحه اخذت كلاسين و جات بعدها. كورونا و خربت علينا كل مخططاتنا بس كانت الفضاوة حلوه صراحة ، و فتره بالنسبه لي جميله جداً ،، اول شي تعلمته في هذي الفتره هو الطبخ ، عرفت اطبخ صح ، عرفت اسوي كوكيز و هي امنية حياتي اضبطه ، تعرفت على نفسي اكثر ، بفتره الهدوء ، صحيح الاجواء حولك كلها خوف و قلق و ابتعدنا عن اعز الناس لنا ، حتى العيد كان طعمه غير ، بس اهلي ،، مافي زيارات و لا شي ناسبني كثير هذا الجو ، و صارت اجتماعاتنا اكثر في نفس البيت ، و كان نظامنا واحد ، اجوائي كلها هدوء و تصالح مع النفس ، من شهر ثمانية الى الان ، كانت النفسية شوي مضطربة نقلت مرتين ، و واجهت ناس توجههم عكس توجهتي تماماً انا ما عندي مشكلة مع ذولا الناس ، لكن الاحتكاك فيهم يرهق روحي ، .. كملت معهم كأن شي لم يكن اجواء المشاحنات و الكره ما تناسبني تماما ،، لكن لازم نتقبل و نتعايش مع الاوضاع ، و فضلت اخذ اجازه هالوقت عشان اعيد توازن روحي ، اجلس مع نفسي شوي ارتب افكاري و خططي ، و هذي الايام اخذت الرخصه ، يوم 30\12\2020 كانت خاتمه جميلة لذي السنه ، صحيح اني تعثرت شوي ، و كان الكلام حولي لا تكملين ما تقدرين لكن كملت و ثابرت و حسيت كل شي حولي مرتب لي بالدقه ، مرتب بشكل ما تتخيلونه ، تفاصيل صارت غريبة لكن في صالحي سنه حبيتها بكل تفاصيلها ، سنه تقولنا ترا الله موجود ، و قادر على تغيير الاحوال ، قادر على خلق البهجه في عز الحزن قادر على تغيير روتين حياتنا ، و برمجة نظامنا ، كأن هذي السنه كانت رحمة من الله ، لطف من الله ، سنه تخليك ترتب اولوياتك ، ترتب حياتك و اهدافك صح ، تعرف من لازم يجلس في حياتك و مين يطلع و تخليك تعرف ان اللي يروح من يدك ما هو لك اصلا ، و اللي لك بيبقى لك لو في اصعب الظروف احاول اصيغ مشاعري لكم بكلام واضح و سلس ، و ان شاءالله يوصل لقلوبكم ، و نستقبل 2021 بكل الحب ، زي ما نعطيها حب و امل راح تعطينا اكثر ، اول الاهداف هذي السنه : زيادة طاقة الحب في روحي و للناس و الاشياء اللي حولي ، قد ما تعطي حب راح تاخذ حب ،، الحب ، يلطف من روحك و الاجواء حولك ،، يخليك رقيق و لطيف و جميل حب نفسك ، و حب اللي حولك ، حب الناس و العالم حب كل الاشياء حولك ، هذا كان مبدأي هالسنه و السنه الجايه و كل سنه بأذن الله 2021 لكي تبحر في النور ، عليك اولاً مقاومة الظلام :510: |
رد: حكــاية قصيــرة ❥
حب لكم ، و لكلامكم اللطيف ،
جميل ان تكون مؤثر بشكل جميل و ايجابي ، مثابرتك لتعديل نفسك و انك تتصالح معها ، راح تبين في يوم من الايام ، انا ما اعتبر نفسي كامله و لا مرره واو ، لكن راضيه عن نفسي بشكل كبير ،، وصلت لمرحله من عمري لازم اكون كذا ، و عيب علي ما اكون كذا ، الصغار الان محظوظين ، الصغار من سن ال 18 وفوق ، محظوظين كيف ، لان الاهتمام بالجانب النفسي و التطويري صار واضح و منتشر بكثره تفتح اي مكان تلقى الناس تتكلم عن الجانب الايجابي و الصحه النفسية و غيرها من الامور التطويريه ، على عكس فترتنا ايام الصغر ، صح اهلنا ربونا احسن تربيه بس الجانب النفسي مهملينه تماماً ما بالك طفل تربى ع الكبت النفسي ، ما يعرف يعبر عن مشاعره زين ، امه و ابوه ما يحضونه <- الحضن مسبب ازمه خخ في سالفه حكيتها مره عن الحضن لو جا مجال ذكرتها لانه مو محور حديثنا ،، انا عايشه ضمن عائلة مستقره احبهم و يحبوني من صغري لكن في جوانب في نفسك لازم تتغذى و تتطور ، لازم احد يراعيها و تراعيها في نفسك اني اكون ايجابيه و احب الحياة و احب نفسي ما جا من فراغ ، تعبت على نفسي زمان ما تلقى احد قدامك يتكلم كلام ايجابي ، و يقومك و يرشد روحك و نفسك الان المجال مفتوح قدامك ، في كل مواقع التواصل الاجتماعي الناس تتكلم عن الصحة النفسية و كيف تطور من نفسك يعني النت في جوالك ، انت ماسك جوالك و تتلقى ، تتلقى الشين و الزين و انت في يدك الاختيار اول كان النت بالنادر ندخله و ان دخلناه كان للتسليه ، اكيد فيه اشياء تطويريه بس محد يفتح عيونك عليها انت صغير ما تعرف شي ، لازم احد يرشدك ، بس كان الوعي شوي قليل و الان الوضع يختلف ، الوعي زاد و اطفالنا صرنا نربيهم علي الحب و على اللطف و الكلام الايجابي ، و اكون صريحه معكم انا الى سن ال 35 ما كنت مستقرة نفسياً ، كنت ايجابيه من صغري ، لكن الاستقرار النفسي لا ، بس من قبل هذا العمر كنت احاول اقوم نفسي و نفسيتي يعني بعد الثلاثين تبدأ توعى و تفكر في نفسك ، انت ايش قاعد تسوي ، و الحمدلله وصلت لمرحلة ، اقدر اقول عن نفسي قويه و صلبة مهما واجهت من صعوبات اقدر اتجاوزها و اعديها بسرعه ، علاقاتي صارت اكثر ، الناس اللي تحبني اكثر نقطه مهمة الناس ما راح تحبك و انت ما تحب نفسك ،، ما تقدرها ارجع و اقول انتم الاصغر سناً ، محظوظين ، بس ما تترك نفسك كذا ، اقرا طور من نفسك ، خالط ناس ايجابيه حب نفسك و انا قررت اني انشر الحب و الطاقة الايجابية حولي حب لنفسي ، و لكم جميعاً و للناس اللي دايم تحمسني و تدعمني و تحسسني اني جالسه أثر بشكل جميل حب للصباح اللي يعطيني طاقة تخليني اتكلم بشكل حلو و ايجابي ، و ان شاءالله يوصل لقلوبكم صباحكم سعادة <- من امس مدري شفيها كلامها كثير خخ :67: |
رد: حكــاية قصيــرة ❥
يسعد صباح الاحبه،
اليوم جميل كجمال الايام السابقه.. نشارككم بصباح اليوم اللطيف.. https://a.top4top.io/p_1841t20ef0.jpeg https://l.top4top.io/p_1841i28420.jpeg https://e.top4top.io/p_1841khehe0.jpeg |
رد: حكــاية قصيــرة ❥
https://c.top4top.io/p_18502kzmg0.jpg
كنجمة في السماء تضيء على استحياء لا تعلم كم من شخص ينظر لها ببهاء تضيء و تُسعد ثم تختفي |
رد: حكــاية قصيــرة ❥
https://b.top4top.io/p_18619d0h90.jpg
للطفاء، الذين يجيدون قرآءتنا بين تلك السطور.. للأرواح التي تعيش حولنا نشعر بها دون ان نلمسها، فخورة اني عرفت انسانة مثلك :67: |
رد: حكــاية قصيــرة ❥
لا تحسب اعمارنا بالمسافات، بالسنين التي انقضت..
و لا كم قطعنا من مشاوير الحياة تحسب ب تلك المشاعر التي شعرنا بها في كل لحظة بالحب، بالامل، بالسعادة بعدد الارواح التي سكنتنا صباحكم حب :ff1 (104): |
رد: حكــاية قصيــرة ❥
https://l.top4top.io/p_1862r9dnp0.jpg
الجو جميل، بارد بس برودته غير مزعجه،، و رشة مطر خفيفه.. الى هذا الوقت الشمس ما طلعت،، من الساعه سبعه و انا ما قدرت ادخل جوا البيت،، احس اني انتمي لذا الجو و هو جزء مني مو قادرة اتخلى عنه احسه يطبطب على روحي و يغسلها من هموم الحياة و كدرها،، حب للاجواء الجميلة.. :ff1 (104): |
رد: حكــاية قصيــرة ❥
صباحكم حب و امتنان،،
صباحكم جميل و هادي،، :ff1 (104): |
رد: حكــاية قصيــرة ❥
يالله نعيد الحكاية،
و نغيّر نهايتها، لبداية، نحذف فصول الحزن، و نكرر لحظات الفرح، نكتب على غلافها "حلم" و نكتب نهايتها " أمل" |
رد: حكــاية قصيــرة ❥
كنت على امل القى جواب اليوم..
بس لعله خير،، :ff1 (104): |
رد: حكــاية قصيــرة ❥
اكثر ما يحسن مزاجي هالفترة هو المشي،،
صح اني ما اطول مره.. بس نص ساعة.. بس بعدها اكون هاديه و رايقه،،.. كل ما اتخاذل عنه.. اتذكر نفسيتي بعدها كيف تكون،، و اقوم اتحرك،، نص ساعه تمحي كل جهد اليوم و التعب، و مع توكلنا صار ينبح صوتي اكثر الله يرزقني على كثر ما اتكلم خخخ،، لو الحروف تتبدل بفلوس ي سلام <- تفكيرك بس خخ المهم،، اي شي يعدل مزاجكم،، سووه بسرعه و لا تكسلون فيه :ff1 (104): |
رد: حكــاية قصيــرة ❥
تغيير روتين حياتك ،، ما يصير بين يوم و ليلة ،
انت لازم تستمر ، تكرر العادات و الافعال اللي جالس تسويها ،، دوّر عن الاشياء اللي تسعدك و تدخل البهجه في حياتك ، و ابدأ حطها في جدولك اليومي ،، و اجمل شيء ممكن تضيفه ليومك ، انك تصحى من بدري ،، قبل خروجك للدوام بساعتين او ثلاث ، تفطر بهدوء ، تجلس جلسة روقان لحالك بذهن صافي ، تسوي اشياء تحبها ، و تستفيد منها على الصعيد النفسي و الشخصي ،، لانه صباحك هو بوابة يومك ، لو بديتها بحب و هدوء هذا راح ينعكس على يومك كله ،، يعني انا اصحى من خمسه ، اسوي فطوري و اجهز طلبية الكوكيز لو عندي طلب <- للان الطلبيات بس من صديقاتي :67::ff1 (104): افطر ، اصور ، اقرأ ، اتجهز للدوام ،، لما استمر على هذا الروتين كم يوم القى روحي تستأنس فيه ،، و اتشوق كل يوم لهذا الوقت من اليوم ،، :ff1 (104): بس حبيت اسولف معكم شوي ،، و صباحكم سعيد :510: |
رد: حكــاية قصيــرة ❥
يومكم سعيد ، و صباحكم جميل ،،
تعقيباً على كلامي اللي فوق ،، ترا مستحيل تصحى من بدري و انت ما تنام زين ،، جسمك لازم يتعود على النوم بدري ،، يعني اقصى شي الى الساعه ١٢ ،، بعدها شوي شوي جسمك راح يتعود على النوم بدري و القومه بدري ،، ،، بنتكلم اليوم عن عبارة " ما عندي وقت " سنه من السنوات ، كنت مع مجموعه جميلة ،، بس دايم يكررون ما عندنا وقت كل ما اقولهم شي ،، قالوا ما عندنا وقت ..! انا اعذرهم ،، دوامنا طوييل و عندهم اطفال و مسؤليات ،، كنت اقولهم لازم تلقين الوقت ،، حتى لو ما عندك وقت فعلاً ،، انتي لا تكررين على نفسك هذي العباره عشان انتي ما تصدقينها و يصير فعلاً ما عندك وقت ،، و حقيقي انا منهم تطلع مني هالكلمة بس نادراً ،، و احاول اسحبها بسرعه و ارجع اقول لنفسي عندي وقت عشان بس نفسي ما تصدقها و ابدأ اتأقلم عليها ،، بس انا لازم استحي على وجهي لا شغله و لا مشغلة خخ بس لازم تعرف تقسم وقتك ،، و تحط الاولويات ،، بس بدون ما تثقل على نفسك ، لانك لو ضغطت نفسك بتمل و تتضايق و ترجع تقول ما عندي وقت ،، يعني لا تقول انا ما عندي وقت حتى لو ما عندك وقت ،، لا تنطقها حتى ما يصدقها عقلك الباطن و يبدأ يخليك تصدق و تقتنع ان ما عندك وقت فعلاً ،، بين فترة و فتره انا ابدأ اقسم يوم و اراجعه و اشوف وقتي وين يروح ،، من الاشياء اللي ممكن تنظم وقتك ،، اذا عندك كذا شغله في البيت ،، ممكن تحط لكل شغله وقت و تستخدم المؤقت بس يخلص وقتها يا انك تكون انتهيت منها او تخليها لبكره ،، و للامانه يجيني ايام ،، انا ماودي اسوي شي ،، اجلس طول الوقت ع جوال او اتفرج افلام بس يعني هي الحياة كذا تشد و ترخي ،، انا اتكلم من تجربه شخصية و ظروف شخصية ،، اكيد ظروفنا و مشاغلنا مو زي بعض ،، حياتنا و الاشخاص اللي عايشين معنا مو نفس الشي ،، لذلك كل واحد ادرى بحياته و وقته كيف يقسمه ،، و الله يكتب لكم الايام الجميله ،، و الاحداث السعيدة و يبارك لكم في ايامكم ،، يومين جالسه اصحى بدري بدري ،، عشان كذا مروقه للسوالف ،، راح احاول اعد لكم برنامج صباحي <- صدقت نفسها ترا :ff1 (46): مدري وش اسميه ،، بس الله يستر من السحبات خخخ يالله اقترحوا علي اسماء لبرنامجي عشان اتحمس :ff1 (104): يالله انطلقو في الحياة :510: |
رد: حكــاية قصيــرة ❥
اهلاً ، صباحكم سعيد ،،
اشكر الجميع ، و كل الشكر لمن اقترح اسم برنامجي :67: بس ابي شي اكثر لطافه و يدخل روحي <- بدينا هلوسه و ننتظر اقتراحاتكم بعد :ff1 (104): اليوم كلامنا عن " الكسل " كم منا عنده افكار و مشاريع ،، بس اوقات الكسل يأخره كم خطوه لورا في وقت ما الناس نشيطه و متقدمه و كم من فكره سرقت من عقولنا و احنا ما حرنا ساكن و نقول يمدينا يمدينا ،، اتكلم لكم عن نفسي قبل كل شي ،، انا وحدة كسوله مرره مرره :ff1 (201): حتى لو سويت الشغله اسويها بشويش ،، الناس تخلص و انا توني خخ بس بحكم شغلي بديت اخرج من دائره الكسل القوي ،، الى الخفيف نوعاً ما ،، حالياً اي فكره تدور ببالي انفذها حالاً لو هي بسيطه و تافهه ،، زمان كنت اقول لنفسي ،، ليه اسوي كذا محد بيستمتع او مافي احد بتعجبه الفكره و اكنسل الفكره ،، اتحجج بأنها ما تعجب احد و لا احد يتحمس معها بدافع الكسل اللي فيني في الوقت الحالي تركت الكسل شوي ، و اي شي يطري ف بالي فعلياً اسويه على طول بدون تفكير ،، لانه لو دخلنا التفكير في الموضوع راح يخرب السالفه خخ اقرب مثال ،، انا احب اعدل على الصور اللي اصورها بجوالي بالتطبيقات اللي موجوده عندي و تطلع الصوره احلى من اول و اجمل ،، صرت اصور خطوات التعديل ع الصوره بالفيديو و انشرها سناب ،، استغربت من القبول و المدح اللي جاني حقيقي ،، :67: كنت احسب فانزاتي مو يم هالاشياء خخخ .. بس حبيت ردت الفعل ،، و لازلت في حرب مع الكسل :67: هذي الصورة اللي صورتها و اشتغلت عليها https://a.top4top.io/p_1876f062o1.jpg و هذا التعديل :ff1 (104): https://b.top4top.io/p_1876g7yeq2.jpg فيديو التعديل .. <- تراني عليميه باليوتيوب :67: لحد يدقق https://www.youtube.com/watch?v=WUepHCJuuxw&t=3s و بس هذا موضوعنا لليوم .. ان شالله استفدتوا و استمتعتوا ،، و لنا لقاءات صباحيه مع نوره شو <- لا امزح خخخ يومكم سعيد :ff1 (104): |
رد: حكــاية قصيــرة ❥
قبل يومين ،، كنت اشوف زوار في مدونتي يكثرون و اقول في نفسي غريبه
كيف كذا يكثر العدد و المدونات خاصه محد يشوفها الا الاعضاء ،، حقيقي كنت انبسط انها خاصه و ان كلامي ملك للاعضاء بس و محد يشوفه من خارج المنتدى كنت احس اني فخمه خخخ <-ما عليكم من الاحساس :67: قلت يا بنت سجلي خروج من المنتدى و طلي على مدونتك :130: يمكن فيه شباك او باب مفتوح يدخل منه الهوا :ff1 (46): الا و صرت اشوف كلامي :ff1 (104): قلت في نفسي خساره ما صار كلامي ملك للمنتدى :r-q-7: و صارو الزوار يشوفوني ،، لذلك لازم اتأنق زياده و اكشخ خخخ هي حركه حلوه و مي حلوه بنفس الوقت ،، بس اللي تشوفه الاداره و تشوفه رانيا احنا لازم يعجبنا و نصير نحبه بدون شعور ،، |
رد: حكــاية قصيــرة ❥
لي سنه بفتح لابتوبي..<- كناية عن طول المدة..
مرره يجيب لي المرض،، يعني اكون مستعدة و عندي كلام ابي اكتبه.. و هو يعاند و يمشي بشويش،، :ff1 (169): ياربي متى يجي شهر خمسه و اشتري لابتوب جديد :67: يالله مو مشكلة بصبر عليه... و من متى ما اصبر و اطول بالي!! صباحكم حلطمة صغيرة :67::ff1 (46): |
رد: حكــاية قصيــرة ❥
https://i.top4top.io/p_1877xcrnc1.jpg
^ احبه و احب آكل الحروف خخخ تأخرنا عليكم في البرنامج لحاجة روحي انها تمشي في الهواء الطلق ،، طلعت انا و غادة نمشي ،، و مرينا البقاله و قضينا شبسات و حركات :67: و نرجع لكم بالبرنامج اليومي اللي مدري وش اسمه للحين <- اقلقتينا خخ موضوعنا اليوم .. " التسامح " ليست دعوة بأن تترك حقك ، و تظهر ضعفك ،، انك تسامح ابد ما هو ضعف ،، صفه لابد تكون فيك ،، مهما واجهنا في الحياه راح نقابل ناس عسكنا تماماً ،، ناس ممكن يغلطون بحقك سوا كان بقصد او دون قصد ،، انا هنا ما اقولك سامحهم و عدي السالفه .. لا ،، الموضوع اكبر من كذا ،، لنفترض ان الغلط صار ،، و جرحك في مشاعرك و احاسيسك و روحك ،، انت رديت و اخذت حقك و عدت الايام ،، لكن الندبه اللي صارت لا يمكن تنمحي و تتجدد عليك كل ما تذكرت الموقف او الشخص ،، و ما تتهنى بحياتك ،، الحل انك تسامحه .. سامح الظروف اللي مريت فيها و اللي مر فيها ،، سامح بكل صدق ،، يعني مو كلمه و تنطقها و بس ،، اجلس مع نفسك و تكلم معها ،، و اعطي الاعذار لنفسك و للاشخاص ،، و ان الغلط ما نقص من قدرك قدام نفسك بشيء ،، لازلت عايش بنعمه و بخير ،، ما زلت تقدر تضحك و تسولف و تاكل و تشرب ،، هذي نعمة عظيمه ،، بعد ما تسامح ركز على نفسك و على روحك ،، انتبه لها و لا تدخلها في مواقف ممكن تزعلها عيش بحب و سلام :ff1 (104): :510: |
رد: حكــاية قصيــرة ❥
لابد ان تهدأ روحك،،
كلما شعرت بالثقل، حاول ان تبتعد عن كل شعور لا يستحقك ،، الايام جميلة و الاوقات سعيدة، استمتع باللحظه، عيشها بكل تفاصيلها، |
رد: حكــاية قصيــرة ❥
يسعدك صباحكم ،
احساس جميل لما تحس ان فيه احد يتفاعل معك ، لو بكلمه ، بفكره ، برسالة ، بتشجيع ،، كل هذا الاشياء تخلي الواحد يتحمس و يكتب و يفكر ،، هالايام انا مركزه ع الكتابه منها اطور كتاباتي و اطور افكاري ، و الاجمل من هذا كله ،، انها وقت الصباح ،، " بعضٌ من نور " اخترته لإسم مدونتي https://alnoor.blog/ مدونتي قديمه يمكن من ٢٠١٢ بديت فيها و كنت اهملها كثير ،، لكن الان حاولت اطورها ،، و اهتم فيها اكثر ،، ممكن يصير هذا اسم برنامج ،، و يمكن اسميه" قبْس من نور " الدعوه كلها نور ،، و يا عيني ع النرجسيه خخ شكرا لمن جالس يساعدني ،، و الهمني اني اوريكم المدونه حقتي ،، لكن اذا فيها مخالفه لقوانين المنتدى مسموحين بحذفها ،، و لا ودي اخالفكم ايش رايك نسميه قبس من نور ! حلو صح .. يالله توكلنا على الله بس باقي اسوي له شعار ،، ،، ثانياً اشكر الوفاء ، على اطرائها الجميل ،، انا فضلت تكون المواضيع هنا في مدونتي هذي بالخصوص ،، لان هذا المنتدى رايق و هادي و يشجعني اني اسولف سوالف ايجابيه ، و اطرح مواضيع عده انا استفدت منها في حياتي و اللي يخليني اقتصر على مدونتي و ما افتح فيها مواضيع ،، لانها تعتبر اضاءات على الحياه <- شرايكم في هالاسم خخخ ياربي هلوست :ff1 (46): يعني اضاءات بسيطه من مر من هنا بيستفيد ، و ثانيا لاني اخاف من السحبات ،، ف اذا واصلت فيه جهزت فكره الموضوع و نزلته مستقل ،، بس هنا في المدونه بكل اريحيه اجلس اسولف و اطرح المواضيع :ff1 (104): كذا يكون راح الوقت وانا ما كتبت عن الفكره اليوم ،، بس افكر اخصص يومين ف الاسبوع نتكلم عن مواضيع تطورنا بس حبيت اشكركم ،، حقيقي انا ممتنه لكل شخص اعطاني من وقته و شاركني افكاري :ff1 (104): يومكم سعيد :ff1 (61): |
رد: حكــاية قصيــرة ❥
" قَبْسٌ مِن نُور "
برنامج صباحي راح ينوركم كل اثنين و خميس ،، بفكره ، سالفه ، تجارب ، اي شي اثر بحياتي راح انقله لكم اتمنى يكون برنامج خفيف عليكم ، و اسأل الله التوفيق و الثبات <- الثبات اهم نقطه :ff1 (222): و اتمنى تتقبلوني ، و تقدروا هفواتي و عدم ترابط الافكار اوقات ،، لاني راح اكتب بكل عفويه ،، و ابد ما فيه كلام ارتبه قبل ،، الا اني امسك الكيبورد و اطير لكم :ff1 (93): مع صادق حبي :510: إن لم يبدأ صباحنا معكم ، فسيكون بدون روح ،، ربي يسعد صباحكم ، و ينور ايامكم ، و يشرح صدوركم بكل خير ،، مشكلة تؤرقنا جميعنا ،، يمكن تاخذ نص يومك ، تأدي شغلك بدون استمتاع ،، الا و هو " التفكير " ،، يمكن انا اكثر وحده تفكر بالحياه ، عقلي دايم شغال ع الفاضي و المليان اللي يفيد و الا ما يفيد ،، كل شي يمر قدامي انا. كنت اهلوس فيه ،، بس صراحه كان يرهقني اكثر من انه يفيدني ،، حضرت مره دوره اون لاين ،، كان اسمها الاستحقاق ،، للاستاذ " عبدالله القاسم" كان من ضمن الدوره تكلم عن قانون اسمه " قانون التفكير" و كيف ان التفكير ممن ياخذ وقتك كله بدون فايدة ،، و لا بد تحدد تفكيرك و تتوقف عن التفكير الوقت اللي تحدده ،، و هو اللي يخليك تتحكم بنفسك و كيف تديرها ،، كان يقول " ما اقدر اوقف عقلي عن التفكير ، لكن اقدر اوقف عن الاسترسال بالفكره " فعلاً ما تقدر توقف نفسك عن التفكير بشغله معينه ،، بس تحسك مع الوقت و الاسترسال في هذه الفكره تحس روحك تتعب منها ،، و ممكن يصيبك حزن لو الفكره محزنه و ممكن تبكي عليها و انا كنت من الناس اللي اسوي افلام بعقلي و اصيح و حالتي حاله ،، الى ما عرفت كيف. اتعامل مع تفكيري ،، الشغله ما هي بين يوم و ليلة ،، سنين طويله ،، بس المهم ان يكون عندك اصرار على هذا القانون ،، و اصرار انك توقف تفكيرك في شغلات ما تفيدك ممكن على سبيل المثال .. تحدد لهذ الفكره وقت ،، عادي افكر و اعيش بالفكره ،، بس اقول اكثر من ساعه ما راح افكر فيها ،، و عيش بالفكره حلل و سو اللي تبي بس بعد الساعه يكون انتهي و قتها ،، و اشغل نفسك عنها بكذا يكون انت فكرت فيها و اشبعت غرور عقلك ، و بعدين تحكمت فيها و شلتها من بالك الان ما تاخذ معي الافكار وقت انا بكيفي افكر و بكيفي اشيلها من بالي ،، حتى اوقات انتبه لها يوم تجي و اقول ما هو وقتك و اشيلها من بالي بسرعه ،، و اشغل بالي و نفسي ب افكار. حلوه و تفيدني :ff1 (104): احنا نتكلم عن الافكار السلبيه اللي ما تفيد ، و الافكار في الماضي اللي راح ما نتكلم عن الافكار الحاليه الحلوه و اللي تفيدك بحياتك ،، الوقت الشهير اللي افكار الدنيا تجي فيه قبل النوم :ff1 (201): اول حاجه تعدلها في نفسك حتى تتلافى التفكير قبل النوم انك ما تروح لفراشك الا تكون تبي تنام فعلاً ،، يعني خلاص ميت نوم ،، اما انك تروح و انت نص و نص ،، هنا الافكار تستانس و تقول يالله العب فيه ،، ممكن تقرا ، تتفرج في فلم ، تستغفر ، تدعي الين ما يجيك النوم ،، حاول انك ما تترك للفكره السلبيه باب تدخل منه و الشيء المهم ،، تعدل نومك ،، تنام في وقت محدد و تصحى في وقت محدد نومة العصريه هذي ما تجيب الا ضيقة الخلق و التفكير السلبي ،، ،، و مع الاصرار ، و حبك لتغيير نفسك ،، بتلقى نفسك تعرف تتعامل مع تفكيرك ،، و تمر الفكره السلبيه على عقلك مرور الكرام ،، لا تفيد و لا تضر ارجع و اقول الموضوع ترا مو بين يوم و ليلة يتكون عندك ،، يومكم سعيد :ff1 (61): |
رد: حكــاية قصيــرة ❥
" قَبْسٌ مِن نُور "
:225: السعداء ، هم الذين يعرفون كيف يحبون ، صباح الحب ، صباح اللطف ، صباح كل شيء جميل نعود اليكم بكل حب ، و اسقيكم من نبع الحب ، :1115: موضوعنا اليوم حساس جداً ، و مفهومه في الحياة مضطرب شوي ،، الا المن يفهمه بكل صدق و وضوح ،، لمن يعرف يتعامل معه و يمارسه " الحب " قبل سنه بالضبط ، كنت اكلم وحده من صديقاتي ، و كانت مكالمه ع السريع اسألها عن شي في اجراءات الشغل ، فجأة فآجتني بسؤلها ؛ نورة ايش سويتي في حياتك و خلاك تتغيرين بهذا الشكل ؟ شفتو صدمة السؤال السريع اللي تدور له اجابة و تحتار فيه ،، لكن انا جاوبتها بسرعة و اعطيتها الجواب المختصر قلت لها انا حبيت ،، انا عايشه بحب حب لكل شي ،، حب للاشخاص من حولي ،، حب للاحداث ، حب للظروف ، حب للتفاصيل البسيطة ،، حب للاشياء الحقيقة الموضوع كان السهل الممتنع ، بس يمكن انا قدرت عليه بسرعه لاني فيني طبع ما اكره ،، مستحيل اقول انا اكره هالشخص او اكره هالشيء ، هذا الشي ساعدني في اني اقطع نص المسافه بسرعه ،، بدايتي كانت نهاية 2019 وقتها عزمت اني اعيش بحب ،، بس حقيقي في البداية تستحي تظهر هذي المشاعر لانه غيرك يمكن يفهمها بطريقة ثانيه ، بديت تدريجياً انشر الحب حولي ،، سواء بكتابات ،، تصوير ، التعامل بلطف و حب ،، بدية 2020 .. و انا متفائله بحب ،، و كنت مرره سعيدة بكل شي حولي ،، حرفياً كنت محلقة لأسباب عدة ،، نهاية اول شهر فيها حدث لي ظرف مرره مو حلو ، حزين جداً ،، لكن شعوري بالحب و اني هادية و مطمئنة ساعدني كثير ان اتجاوز هذا الظرف بسرعه مذهلة كل ما افكر بشعور الألم ،، يجي الحب و يطبطب علي ،، يجي الحب و يذكرني بالاشياء الحلوه اللي عندي و بعدها جات كورونا ،، و حورت الظروف كلها بشكل يساعد على التطوير ، اشتغلت على نفسي اكبر بدافع حبي لنفسي ،، و تقريباً لي سنه و كم شهر و انا مطمئنه بالحب ،، لان الحب اساس كل شيء ، ان ما حبينا ما نقدر نعيش صح ، ان ما حبينا ما نقدر نعطي صح ، ان ما حبينا ما نقدر نواجه الحياة ب ابتسامة رغم كل شيء ممكن الحب يتراجع شوي في مواقف صعيبة ، بس انه يصمد اعرف نفسك قوي بالحب ،، ،، من الامثلة للحب ،، امس في الدوام كانت نفسياتنا مضطربه شوي ،، كل وحده فينا كان لها سبب ، و كنا كل ما جلسنا جلسه وحده كلنا نبدأ نتحلطم ،، كل وحده فينا على الشي اللي مضايقها ،، و حطينا حرتنا في الحلويات و الشوكلاتات خخ ،، فيي نص الكلام ،، قلت خلاص ي بنات بكره يوم سعيد و كلنا بنفرح فيه و نطير من الفرحه ، على طول الاسئلة تجيني انتي وش دراك خخ ،، قلت لهم انا اقولكم بكره يوم سعيد جدا اول ما صحيت الصباح ، رحت سويت لهم كوكيز ،، لان الكوكيز حبي ، انا قررت اسوي شي احبه ،، يعني باختصار اعطي الحب بحب ، اعطي الحب لكل شي كل شخص تواجه ،، انك تبتسم بوجهه بابتسامة رضا و حب ،، هذا يكفي انك تنشر الحب انك تعطي ، بحب ، و ما تنتظر مقابل ، تعطي لله ، لان حياتنا ما تمشي و تزين الا بأمر الله ،، و هذا موضوعنا لليوم ،، كنت محتارة بين موضوعين قبل انام ، و اول ما صحيت قررت اتكلم عن الحب ،، الحب اللي غيّر حياتي ، خلا لها لون و طعم ،، خلاني ما ازعل على اي شي يروح من يدي لان اللي في يدي اجمل و افضل لي ،، و ان شاءالله لامس قلوبكم بحب ،، :ff1 (195): يومكم سعيد :ff1 (37)::ff1 (206): |
رد: حكــاية قصيــرة ❥
|
رد: حكــاية قصيــرة ❥
اليوم تكلمت عن الحب و اهميته في حياتي و كيف صرت مطمئنه فيه،
حدث لي موقف الصباح،، اول ما وصلت الدوام جلست نص ساعه انتظر الحارس.. بس شفته جاي من بعيد بسرعه نزلت و خليت اختي تمشي لان وراها دوام.. و صدمني لما قالي الحارس انه ضيع مفتاح الفرع،، كيف كذا!! اول شي سويته دقيت على المديرة ابيها تجي عشان معها مفتاح ثاني.. و ما ردت علي،، و ارسلت لها برضو ما ردت علي.. انا كنت وقتها مشبعه بالحب و بالطاقه الجميلة، تقبلت الموضوع بصدر رحب و قلت للمراسله حقتنا يالله خلينا نمشي الين تجي المديرة،، مافي حل ثاني الا اني اتقبل و احور الموضوع لصالحي،، جلست امشي انا و البنت تقريبا نص ساعه.. نمشي و نسولف.. فجأة قلت لها انا عطشانه ابي مويه،، قالت في بقالة قريب قلت يالله نروح للبقالة و نشتري مويه و شويه مفرحات.. https://a.top4top.io/p_1882jw1ga0.jpg زمان كان موقف زي كذا ممكن يقلب مزاجي،، بس الحين لا،، عرفت كيف اتعامل مع الظروف و كيف اخليها تصير لصالحي و كيف انبسط فيها.. استمتعت اليوم.. بداية من موضوعي عن الحب و كيف انتهى يومي،، و الاجمل من هذا كله صار اللي ابيه و صار لي مفتاح للفرع خاص فيني يعني لو اجي قبل الحارس افتح الباب و ادخل :ff1 (104): رجعت البيت و طلعت امشي ساعة.. قطعت فيها ٤ كيلو يعني المزاج عال العال، و الحين انام و احلم احلام سعيدة.. :ff1 (104): تصبحون على يوم جميل،، |
رد: حكــاية قصيــرة ❥
يسعد صباحكم ،
الصباح لا يكون مختلف الا اذا قررت ذلك ، كل يوم هو هديه من الله ، نشكر الله عليها كيف يخلق من روحنا الميته روح تنتعش و تحب الحياه من جديد ،، مهما نمت متأخر ، ساعتي البيولوجيه تصحيني من بدري ،، بين اني احاول انام ، او اطلع امشي كنت مرره محتاره جسمي يقولي انتي تعبانه و سهرانه ارجعي نامي ، و عقلي يقولي الجو زين اطلعي امشي و استمتعي ساعة و نص و جسمي و عقلي يتهاوشون ،، في الاخير فاز عقلي و طلعت امشي ،، صراحة مشي الصباح مختلف ، و تقطع نفس المسافة بس جسمك متقبلها و ما يتعب قد التعب اللي اتعبه بالمشي العصر بعد الدوام ،، الشي اللي خلاني اتحمس للمشي لمسافات طويله ، صرت بدال ما اسمع اغاني اسمع بودكاست من ساوندكلاود ، لناس ملهمه تقول اللي نفسك تقوله و تعزز افكارك ،، و لا يخلو الامر من التقاط بعض الصور :ff1 (104): و حبيت اشارككم فيها ،، https://g.top4top.io/p_1884zub551.jpg https://h.top4top.io/p_1884fck4y2.jpg https://i.top4top.io/p_1884vtu8p3.jpg و بس هذا صباحي :ff1 (104): |
رد: حكــاية قصيــرة ❥
فيني هدوء لدرجه مابي اداوم :ff1g (12):
بس ما اقول الله يجعله يوم هادي و رايق لي و لكم :ff1 (104): و صباحكم خير :النور: |
رد: حكــاية قصيــرة ❥
^
داومنا و كان يوم هادي زي ما تمنينا و حبينا " قَبْسٌ مِن نُور " اليوم بنتكلم عن التركيز ،، التركيز شيء مهم و ممكن ان يرسم يومك على اساس ما ركزت عليه ،، مو شرط في يوم ،، ممكن في نفسك و صحتك ،، يعني انت بين ركز و لا تركز <- كيف ي حلوه :ff1g (12): اقرب مثال الحين ، انا مصدعه :r-q-7: ولو جلست اركز على الصداع ،، بحس انه قاعد يزيد و بيزعجني هالشعور اكيد و كان ممكن اني ما اكتب موضوع اليوم بسبب الصداع ،، متخيلين نايمه مصدعه و صاحية مصدعه ،، اكيد انه شعور مزعج ،، بعدين الصداع عندي شر لابد منه اللي يصير ، انا ما اجلس اعطي نفسي اشارات و كلام يحسسها اني متضايقه من هذا الصداع ، اتجاهله زي ما اتجاهل اي شي مزعج في حياتي ،، بتقولون لي كيف نتجاهله و هو شي فيك في راسك ،، المه واضح ،، الطريقه بإختصار لا تفكر فيه ،، لا تركز عليه ،، صحيح الموضوع مو سهل مره ،، و يبيلك تحاول ،، ممكن تجلس تكلم نفسك بصوت ،، تقول انا مو مصدع ،، تقول انا اقدر اتجاوز هذا الصداع ،، و انت تعطي نفسك هالايحاءات و هالكلام اجلس راقب نفسك ،، و بتشوف كيف تحس بالصداع من بعيد ،، اي شي في الحياة مزعج لنا ، ممكن بهذي الطريقه انت تتجاوزه ،، و لا تفكر انه بيروح على طول ،، لان لو فكرت هذا التفكير انت خربت على نفسك و رجعت لنقطة الصفر ،، و شوفوني تجاهلت الصداع ، و طلعت منه فكره اكتبها ،، و الا انا كنت ناويه اتكلم عن موضوع ثاني ،، و لان الموضوع الثاني يحتاج مني طاقه اكبر و هي ما هي موجوده الان لاني منشغله اني ابعد الصداع :ff1g (12): و لو انسقت ورا الصداع ،، ما تكلمت خير شر ،، و بالمقابل العكس ،، ممكن اي طبع جميل او عادة سعيدة ودك تكون فيك انت تركز عليها تعطيها اهتمامك ،، و تفكر فيها باستمرار ،، راح تكون موجودة فيك ممكن في البدايه تتقمص الدور و تمثلها حتى تتعود عليها و تكون طبع لك و اسلوب حياتك على فكره صحيت الصباح و نزلت اجهز فطوري ،، و اقول في نفسي اليوم الاثنين ،، لازم اكتب عن موضوع و كيف اكتب و انا مصدعه بهذا الشكر ،، شكلي اعتذر منهم اليوم ،، بعدها طرا لي اتكلم عن التركيز ،، و كيف انت تقدر انك ما تركز على الصداع حتى لا يكبر راسه :ff1 (46): و فعلا انا ما احس بالصداع الحين قد ما حسيت فيه اول ما صحيت من النوم ،، من اول ما بديت اكتب و انا استجمع افكار و اركز ع الفكره الين ما بديت ما احس في الصداع لكن هو موجود ترا ،، صباحكم جميل ، بعيد عن كل ما يزعجكم ،، صباحكم سعيد :ff1 (104): |
رد: حكــاية قصيــرة ❥
عشان تعرفون ان التركيز مهم ف حياتنا، و انك تجذب الامور حسب تركيزك و تفكيرك فيها..
انا في فرع نادراً تجيني عميلة تعرضت للاحتيال،،. جاتني عميلة،، تعرضت لموضوع زي كذا.. و طبعاً هي مو فاهمه او تستهبل مدري وش سالفتها،، و انا اتكلم معها في داخلي جالسه اتحلطم.. انه العميلة مو فاهمه شي،، جالسه تقول اشياء ما تدخل العقل.. انا كان كل تركيزي معها و كيف افهمها و كيف احل المشكلة.. ما كان عاجبني الوضع للامانه و كان احساسي تجاهها سلبي،، قامت من هنا،، و جلست وراها وحده نفس الشي،، :ff1 (46): قلت يادين الله انا ما راح انتهي منهم خخخ المشكلة لو هم فاهمين يختصرون علي المشوار بس هم مو فاهمين و انا اجلس اشرح لهم و اوعيهم هنا تركيزي كان سلبي بالتالي نكبني ما فادني خخخ يعني ي طلابي الاعزاء فكرو و ركزو بشكل ايجابي اعطيكم الدرس و اعطيكم النتيجه بنفس الوقت :ff1 (46): |
رد: حكــاية قصيــرة ❥
يسعد صباح الاحبه :ff1 (104):
الان كان مفروض اتكلم عن موضوعي،، لكن جلست اقرا ردودكم في موضوع الزوجه الثانيه و استثار القريحه.. بس اليوم ادور لك مساحة من وقتي و اجي اسولف عليكم :67: لان الموضوع جاهز في عقلي بس يبيله جلسه رايقه و سوالف.. لكن ما اقول الا يومكم سعيد :ff1 (104): |
رد: حكــاية قصيــرة ❥
" قَبْسٌ مِن نُور "
صارت الحكايات هنا ، كلها قبس من نور و كأنني اختزلت طاقتي الايجابيه لروح غلاكم ، " كيف تكون سعيداً " من اصعب الاشياء اللي ممكن تتصورها عن السعاده , انها تكون مرتبطه ب اشياء ب اشخاص ،، السعاده ابد ما ترتبط بشخص او شي نفعله او يُفعل من اجلنا ، السعادة تنبع من داخلك ،، " السعادة قرار " عباره كنت اسمعها و ما كنت افهمها الى ان وصلت المرحله اللي انتهت كل مسببات السعاده و بقيت انا وحدي بدون اي عمل او شخص يبث السعاده في داخلي ،، بعدها فهمت ان سعادتي قراري الاهم و الاوحد اللي ممكن يغير حياتي و يحسنها و يحسن مزاجي ،، كونك قررت تكون سعيد انت رضيت رضا تام بنفسك ، بشخصيتك ، و بالمجتمع حولك ،، بعد الرضا التام ، بعد الهدوء النفسي اللي استقر بروحك بعد هالقرار ،، و هالرضا و الهدوء النفسي ما يمنع انك تطور من نفسك من شخصيتك ،، من انك تركض ورا احلامك و اهدافك ، و كل هذي وسائل انها تعزز الرضا و السعاده في داخلك بعدها تحس ان هذي السعادة جزء لا يتجزء منك ، و ان خلافها ما هو الا عارض سينتهي يوما ما ،، لما تشعر انك سعيد رغم كل شيء ، و تسمع من شخص انه سعيد تحس تلقائي ان سعادتك تتضاعف هذا يعني بعد ما قررت تكون سعيد ، انت حسيت ان هالسعادة جزء منك و ان اي شخص سعيد مرتبط فيك برابط هالسعادة ، وانها جالسه تتشعب فينا و تنتشر ما تتخيلون فرحتي لما يقولي احد انا سعيد ، او اقرا من احد كاتب انا سعيد انا لا شعوريا افرح فرحة ما تتخيلونها و كأن الشخص هذا جزء مني ، قطعه من قلبي السعيد لما تقرر تكون سعيد ، ترا الاشياء التعيسه تبدأ تختفي من حياتك شوي شوي ،، كلامي ممكن يكون صعب على الناس اللي تواجه في حياتها مشاكل مستعصيه ،، تواجه ظروف صعبه ، يحسون اني من اعلى برجي العاجي اتكلم ، و اني ما احس باللي يعانونه ،، هذول الاشخاص السعادة راح تعتبر تحدي بالنسبة لهم ، تعتبر الحرب اللي راح يدخلونها و لا راح يكسبونها الا لما يتسلحون بالرضا ، كلام الله ، الادعيه ، الاذكار ،، كلها طريق الى السعادة بعدها راح يقررون يصبحون سعداء ، و ينجحون ،، لكم كل الحب و ممكن يكون برنامجي كل يوم جمعه ، لان وسط الاسبوع احس ان احد يطاردني و اجلس اراقب الوقت و صباحكم سعيد:67: |
رد: حكــاية قصيــرة ❥
هل نحن متشابهون !
ام نسعى لتقليد بعضنا و اخفاء الميزه الفريدة التي نتميز بها ،، قد سألتو نفسكم انا في ايش اتميز عن غيري ؟ ايش الشي الفريد اللي راح يترك اثر في نفوس من تأثرو بنا ،، كلنا نركض في هذي الحياة بإتجاهات مختلفه ، نلتقي في عدة طرق ، و نفارق بعضنا في طرق اخرى ، لذلك نرانا نتشابه في بعض الامور و نختلف في بعضها ،، هنا يكمن التشابه و الاختلاف ، |
رد: حكــاية قصيــرة ❥
من الاشياء اللي تطلع روحي و صابره عليه.. لابتوبي،،
شي محبط للافكار،، لما اجي اكتب او في بالي فكرة بنفذها في الفوتوشوب تطير من بالي بسبب بطئه.. يعني لي نص ساعه فاتحته بسوي شي قبل اتجهز للدوام.. وما سويت الاشياء اللي ف بالي حتى اني اكتب في المدونه جالسه الان اكتب من الجوال،، :ff1 (169): في القريب راح اططلقه و ارتاح :ff1 (46): لا يخلو الامر من الحلطمه خخخ صباحكم عكس ذلك :ff1 (104): |
| الساعة الآن 02:20 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2026 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~