|
رد: حكــاية قصيــرة ❥
اليوم غريب،، احس راسي فاضي..
ماني شاليه هم بكره زي كل يوم،، مافيه مشاعر،، ما احس ب اي شي،، لا خوف، لا هم و لا حزن،، و لا سعاده و فرح.. جالسه اتأمل هذا الهدوء في نفسي.. الله يديمه على خير و عافيه |
رد: حكــاية قصيــرة ❥
@رآنيا
متى نبدأ فعالية زراعه :243: انا بديت ازرع بس على خفيف ، و هذي نبتتي https://g-lk.com/up/do.php?imgf=176448085762281.jpg جالسه انتظرها تكبر.. تعلقت فيها و حبيتها :243: |
رد: حكــاية قصيــرة ❥
اقتباس:
صحيت بهدوء و روقان غريب بس الحمدلله.. هذي نعمة من الله ياربي لك الحمد |
رد: حكــاية قصيــرة ❥
https://g-lk.com/up/do.php?imgf=176456695675441.jpg
تعبت القيود ان تقيدني ، فأنا مثل طير حر، حمامة سلام إن حلت لا تضر، و إن طارت نشرت الحب و السلام.. |
رد: حكــاية قصيــرة ❥
تمشي الايام سريعاً، بل تركض و تأخذ معها وجع سنه كامله حملته على اكتافي،
و تساقط خلسة مني حين أوشكت النهاية، نحن على مشارف النهاية، و بعد أن علمنا إن كل ما مضى مات و لا رجعة له، تشبثنا ب آخر الايام لنجعلها شاهدة على ما مضى و نعقد معها هدنة آخر العام، " أن أكف عن الحزن و تكف الايام القادمة عن احِزاني، أن لا استقبل إلا الفرح، و تهديني هي افراحي" هذا اتفاقنا، و هذا هو شهر التجربة هيا يا ديسمبر كن في صفي و اقهر باقي الشهور الماضيه :698: |
رد: حكــاية قصيــرة ❥
في كل مره امشي خطوات للإمام،،
يكون ظاهرها جميل،، و لكن أعماقه مرهقه للغايه،، و اعلم يقيناً، انها أفضل ما يحدث لي،، لكن الله يدربني على الصبر،، و انا صابرة و مكمله حياتي،، عسى في الأيام المقبلة خير.. |
رد: حكــاية قصيــرة ❥
رساله الى 2026 : رفقاً بي :698:
|
رد: حكــاية قصيــرة ❥
اوقات تشوف مو مفروض تشتكي، لان شكوتك تقابل ب ردود "عادي كلنا يصير معنا كذا"
تحس انك تافهه و تكبر المواضيع.. مافي حتى مجال تقولهم "طيب اسمعوني" انا ما احتاج الا طبطبة و رفع المعنويات.. حتى الطبطبه لما تجي ماهي على مزاجك <وش تبين يعني خخ او انك ودك يتقفل الموضوع و تتمنى ما ينفتح مره ثانيه و لا احد يسألك عن شي يخصك،، و المعنويات كل مالها تنزل تحت،، تحاول ترفعها لكنها مربوطه بصخرة ما تتزحزح... يا انا يا انا في هذي الحياة.. بصبر و اشوف النهايه.. |
رد: حكــاية قصيــرة ❥
قبل امس تلقيت خبر يسد النفس،، بعدها تنكدت و قمت ألوم نفسي ليه يصير معي كذا،،
و يوم جيت انام.،، صرت اقول لنفسي،، خلاص اللي صار صار مو بيدك شي.. بس اللي عليك الحين ما تصيرين خدومه و طيبه مع ناس ما تستاهل.. نمت و انا مقرره اصير شريرة و أرفض كل طلب يجيني و استلعن شوي،، و عشاني حطيت هالنيه على طول ربي ارسل لي الاختبار عشان اثبت لنفسي هل بستلعن أو لا!! المشكله ما يطلبني الا انسانه اموت عليها و ما اقدر أرفض لها طلب،، كلمتني قالت نوره نحتاج تغطين الفرع الفلاني مديرة!!! انا امس متفقه مع نفسي اصير شريرة و أرفض كل طلب يجيني،، وقتها جتني البكية و الله،، قلت للبنت استنى شوي برجع اكلمك و افضفض لك قبل ما اقول ايه او لا قفلت منها و جلست افكر في قراري و كيف كذا بهذي السرعه ربي يختبرني.. رجعت اكلمها،، و اقولها شوفي انا من أمس مقررة اكون شريرة و تجيني بالطلب هذا و تعرفين ما أرفض لك طلب :698: انا موافقه اغطي لكم الفرع بس عندي شرط،، و قلت شرطي و تفهمتني البنت لأنها تعتبر من الناس القريبه مني.. و لبت لي طلبي و قلت ابشري.. قلت لعيونك و الله.. الشرط هذا بس رد اعتبار للنية اللي حطيتها،، اتمنى من كل قلبي تكون ٢٠٢٦ خير على و سنه حب و سلام :11: |
رد: حكــاية قصيــرة ❥
امس حلمت اني ادعي لخالتي و اقول الله يشفيها،،
جتني وحدة أو سمعت صوت يقولي لا تقولين الله يشفيها.. قولي الله يعتني فيها.. :698: صحيت من النوم و انا اقول الله يعتني فيها مافسرت الحلم، بس الدعاء ريحني وخوفني بنفس الوقت،، هل لما اقول الله يعتني فيها ماراح تشفى! و الا عشانها في العنايه انا دعيت الله انه يكون معها و يعتني فيها،، مدري،، بس الله يقومها بالسلامه و يشفيها و يعتني فيها.. و تصوم رمضان مع عيالها :698: |
رد: حكــاية قصيــرة ❥
عالم كامل، اركض و اتعثر،، اسقط و ابكي ، بل انوح،
ازعل، و الوم، و احمل الجميع ذنب ما يحدث لي.. كنت اتشبث بالقشه الى ان قصمت ظهري.. و اردد يالله كن معي، امسك بيدي، انتشلني.. و كان الله معي، في كل عثره يرسل لي النور و اقف من جديد.. و املي بالله كبير،، فقط قررت اقفل الملفات المفتوحه.. و انسى الماضي و اعيش :11: |
رد: حكــاية قصيــرة ❥
ماذا عساي أن أقول بعد ما أصبح الفؤاد فارغ..
بعد نسياني الأبجدية،، و تصفيف الحروف..! أعلم أنها سنة الحياة، و ان الموت قريب، و واقع لا محالة.. فقدت حبيبتي خالتي، في ليلة جمعة ، غيبها الموت.. و لا عزاء لنا، الا حسن خاتمتها.. و انا سأتعافى، و اعيد ترتيب الايام، و اتعلم الأبجدية من جديد و اكمل مسيرة حياتي بإذنه الله، |
رد: حكــاية قصيــرة ❥
حياتي صارت دوام مسلسلات و نوم
و ما احكيكم عن الدوام كيف صار،، استنزااااف، تعب تعب تعب،، :148: لكن أملي بالله كبير انه راح يفرجها قريب... |
رد: حكــاية قصيــرة ❥
وَقَوْلُهُ تعالى : لَا يُكَلِّفُ اللَّهُ نَفْسًا إِلَّا وُسْعَهَا [البقرة:286]
#صباح_الخير بهذي الايه الكريمه انا ببدأ يومي.. و اذكر نفسي ان الله لا يكلف احد فوق طاقته و احتماله و انا اللي جالسه يصير معي هو ضمن طاقتي و احتمالي.. ف يارب بارك لي في وقتي و يومي و جهدي و صحتي و متعني يالله بالقوه و الصبر.. بس نتذكر ان الله ربنا و مصرف امورنا يهدأ كل شي داخلنا الحمدلله دائماً وأبداً |
رد: حكــاية قصيــرة ❥
لما تعيش بشعور باهت , ما تعرف انت سعيد و الا حزين , ما تعرف وش يفرحك و وش يزعلك
انت هنا في منطقة رمادية فقدت الالوان , بعد ما كنت انسان مبتهج , مشرق , و حياتك كلها الوان الاسباب كثيره و ما اقدر القي اللوم على شي معين , و اقول هذا الموقف غيرني .. و يمكن هي فترة عمريه انتقالية , تحتاج مني شوي صبر .. و ترتيب اولويات من جديد لان اللي كان يهمني قبل ما عاد يهمني الحين .. 2024و 2025 كانت سنتين عن عشر سنوات .. فقدت فيها شيئاً من روحي و من صفاتي , و اكتسبت صفات جديدة اهملت اشياء كثير كنت احبها و اسويها .. و صرت ساده بدون هوايات بدون شي و انا الان احاول ابدأ من جديد .. اكون شخص مختلف تماماً , شخص ناسي كل شي مر فيه قررت ارمي اي شي يضايقني و الا يذكرني بذكريات حزينه و تجدد الحزن فيني .. انا الان نسخه جديده من نوره و اكون اسلوب حياه جديد , افكار جديدة , نسخه ولدت من جديد في عام 2026 ,, |
رد: حكــاية قصيــرة ❥
على نهايه ٢٠٢٥ و بداية ٢٠٢٦.. انا مرضت..
للصراحه ما كنت اعرف وش فيني.. كانت ترتفع حرارتي بطريقه غريبه و مفاجئة.. كنت اروح اخذ. خافض حرارة بالوريد و ارجع البيت.. رحت لطبيب عام و سوا لي تحاليل شامله و مابين شي الين بدت ٢٠٢٦،، و بالصبط 5 يناير.. وقتها تعبت و الحرارة هدت حيلي.. و كنت افكر وين اروح و اراقب نفسي وش الشي اللي يوجعني و اروح اكشف عليه.. و الله كنت متخبطه بشكل مخيف.. و مع ضغط الدوام زاد تخبطي.. قلت يا بنت روحي لدكتور صدريه و اكشفي على الجهاز التنفسي.. و انا احس اني اتنفس طبيعي بس ربي الهمني اروح لهذا الدكتور.. بعدين اكتشفت ان عندي التهاب رئوي و انا مو حاسه على نفسي فعليا فقدت الشعور بنفسي.. المهم اضطريت اخذ مضاد بالوريد لمدة سبعه ايام.. اللي ذكرني بالسالفه لما اطالع بيدي القى تعليمة الابره عليها عرق واحد صمد معي للنهايه و ممتنه له :503: كنت كل مره اجي اخذ ابرة المضاد تحطها في نفس العرق خمسه ايام مشاءالله و لا صار فيه كدمات.. و اليومين الباقيه كلها كدمت مكان الابره.. الا هذا العرق و الله حبيته و اشكره من كل قلبي :600: المشكله ان مكانه صعب و كل مره اقول حطو الابره في ذا العرق يتفاجأون العرق اللي يجيكم في المعصم.. في يدي اليسار في الجهه اليمين <- الله على الوصف خخخ و بس و الله.. سالفه للبيع.. من زمان مابعت سوالف :21: |
رد: حكــاية قصيــرة ❥
قررت ما اخلي الدوام يضيق خلقي و نفسيتي،،
صح الضغط مرره مرره كثييير بس الشكوى لله، هذا الحاصل.. قلت في نفسي حتى لو تعبني الدوام مو مشكله لو طلعت و تقهويت أو تعشيت في مكان برا،، و عشان دوامي قريب من محل ماتشا نحبه انا و غاده،، قلت شرايك ياغاده نتقابل في ستار افينو و نشرب ماتشا،، عاد بنتي تموت في الماتشا قالت تم و قدااام :503: طلعت بعد الدوام ع المول،، و تغدينا و شربنا ماتشا في مكاننا المفضل انا احب الماتشا باللافندر أو الورد،، و هالمره عندهم عرض ماتشا و الثانيه مجاني على أي شي لونه وردي عشان عيد الحب:503: انا اخذت ماتشا بالورد،، و غاده أخذت شي وردي بس نسيت وش اسمه :159: https://g-lk.com/up/do.php?imgf=177075322282791.jpg هذي السالفه عليها خصم 14٪ بمناسبه عيد الحب :633::730: |
رد: حكــاية قصيــرة ❥
اوقات امر بمواقف، ودي احكيها لأحد.. بس ما القا احد احكيه..
موقف يكون غريب و ممكن لو حكيته لأي احد بيفهمه غلط.. لذلك لازم انساه.. و ابطل افسره اي تفسير ممكن انه يشتتني. :148: |
رد: حكــاية قصيــرة ❥
اريد طريقاً اعبر فيه بسلام الى ذاتي الحقيقيه..
ذاتي التي اضعتها في زحام العمر، تاهت مني عندما غفلت عنها امام مرآتي اقف لأجد شخصاً لا يشبهني، ملامح شوهها الحزن.. و عينان تحمل ذاك الأمل في التعافي من حسره الايام و حيرة الاوهام.. وجعي يزداد اتساعاً، يحدث تلك الفجوة التي تبتلع كل فرحه وضحكه امر بها.. هل اعود كما كنت، ام ان الروح خُدشت، و يستحيل ترميمها.. انا انتظر، بلا امل، بلا رجاء.. |
رد: حكــاية قصيــرة ❥
عصر الجمعه و مسافره و الدعوات مستجابه..
اسأل الله العظيم رب العرش العظيم ان يرزقكم و يعطيكم و ينولكم ما تتمنون عاجلاً غير اجل.. و يرزقنا من خير الدنيا و الاخره، ويرزقنا الجنه لا نشقى بعدها ابداً امين يارب العالمين :11: |
رد: حكــاية قصيــرة ❥
https://g-lk.com/up/do.php?imgf=177231167381891.jpg
واضح اني اهوجس :698: اخذت اجازه قبل رمضان بيوم و بكره اداوم.. احس لي فتره طويله عن الدوام.. يمكن من تغير الازمان و الا الاماكن.. الحقيقه ان كل الاثنين لهم تأثير.. و انا احب هذا النوع من التأثير |
رد: حكــاية قصيــرة ❥
انظر للأمور من زاوية مختلفه،،
غيّر طريقة تفكيرك، لا تضع نفسك في قالب لا يناسبك.. و بعدها شوف الأوضاع كيف تتحسن.. |
رد: حكــاية قصيــرة ❥
https://g-lk.com/up/do.php?imgf=177231820006911.jpg
1 مارس 2026 التفت الى الوراء، الى ما قبل عام او عامين بل ثلاث اعوام.. انظر لتلك الزاويه الجميلة، لذاك الوجه المشرق.. كانت تكتب عن السعاده عن الفرح و الحب، تذكرتها، و بانت ابتسامتي من خلف العبوس، كيف لتلك العينان ان تذبل، و كيف لتلك الروح ان تموت، بخطى خفيفه مددت يدي لكتاب لم اتمم قراءته منذ ثلاثه اعوام.. و اختار اقتباس يشبه تلك الروح، هو فقط انعاش لها،، لتذكرها ان قرار السعادة يتعارض مع اي افكار سوداويه تراودنا.. لذلك ركز على ما يجعلك سعيد،:599: |
رد: حكــاية قصيــرة ❥
اقتباس:
أن الفكره أو الحدث اللي تكون مركز عليه بقوة، تصير واقعك.. التركيز ما يكون بس ب افكارك.. لازم تتحد افكارك و مشاعرك في فكرة وحدة.. و ما تصير واقع بس لما تركز افكارك و مشاعرك عليها،، لازم ما يخالط هالتركيز شك .. ما تشك ابد في قدرة الله في تحقيقها غير أن ما يخالطه شك.. لازم يكون فيه تكرار للفكره على عقلك مجرد ما تكون افكارك و مشاعرك متحده، و ما يدخل الشك في قلبك و تكرر هذا الشي على عقلك و يكون ملازمك اليوم كله.. هذا الشيء يصير،، و انا مجربه و صار لي في حياتي أحداث تثبت هذا الكلام.. صح انا مؤمنه بهذا الكلام، لكن إيماني بالله و يقيني انه لولا الله ما صار هذا الشي،، دايماً اتفكر ليه يتكلمون عن قوة العقل الباطن، و قانون الجذب و هذي الأشياء و انا اصلا احب هذا المجال و احب اتفكر فيه،، لكن دايما انا اربطه بمشيئة الله ، و مراقبة الله لنا.. اقول ليه يصير معي كذا،، و اتذكر ان الله يشوفني و يحبني.. الله يحبنا بشكل احنا ما نتخيله،، لو الحينا بالدعاء و يشوف أفكارنا كيف نكرر هذا الشي و نتمناه و ما يدخلنا شك ابد راح يعطينا و يكرمنا.. قد ايش عقل الإنسان رهيب و قوه أفكاره جباره.. لكن ما تساوي شي جنب عظمة الله اللي خلقها.. و خلق كل هالكون.. احب اتأمل و اتفكر في الإنسان و عقله و في خلق الله لهذا العقل.. و كيف هذي البشريه كل شخص له عقل غير عن الثاني و تفكير مختلف.. الحمدلله على هذي النعمة.. و تصبحون على خير وفضل من الله :11: |
رد: حكــاية قصيــرة ❥
بحثت كثيراً و طويلاً، و في كل مره كنت أسيء الاختيار..
في كل مره كنت اتعثر في امنياتي، و أسقط باكية.. لكن إصراري كان يمنعني من التوقف و الانهزام، و أكملت الطريق و البحث، رغم أنهزامي في كل المرات السابقة إلى أن وصلت إلى تلك المساحة التي ظننت فيها أنها استقراري و ملاذي الآمن.. ثلاث سنوات كانت عن عمر كامل، كنت أظنها الجنة، لكن كان في باطنها النار.. أحرقت نفسي من دون أن لا أدري واطفئت حرائقي بدمعي و نفخت في الرماد و انتشر في السماء.. اختفى كأن شيئاً لم يكن،، و عدت من هذه الحرب بلا بروح.. فقط جسد يمشي على الأرض.. انا لم افقد شخصاً بعينه، انا فقدت كل الأشياء، |
رد: حكــاية قصيــرة ❥
مسائكم خير و راحه و اطمئنان..
احسن وقت تكتسب فيه عادات دينيه هو شهر رمضان.. شهر فضيل و نكثر فيه من الطاعات و العبادات.. حدد العاده اللي تبي تكتسبها.. و كررها طوال شهر مضان.. ٣٠ يوم.. و اي عاده تكررها اكثر من ٢١ يوم.. و تستمر عليها ٩٠ يوم.. تكتسبها.. و الله يكتب لي و لكم الاجر.. |
رد: حكــاية قصيــرة ❥
احيانا في اشياء توجعك، و انت تحاول تتعايش معها و تجاهلها و تتناساها،،
لكن يجي موقف عادي يثير الشعور فيك، يخليك تسترجع كل المواقف المشابهة.. ما اعرف متى ينتهي هذا الشعور، و ما ينعاد مره ثانيه،، شعور سيء يخليك تعيش الانكسار مره ثاني، :698: |
رد: حكــاية قصيــرة ❥
ان تنظر إلى السماء بعين الاتساع.. و تغضض بصرك عن ضيق الأرض رغم اتساعها، هو أن تهب لروحك مساحة رحبة، نقية باردة..
هذه الأرض أخذت مني الكثير، سقيتها دمعي، إلى أن ازهرت ورداً لغيري و ازدانت الايام بهم، و انا اراقبهم ب ابتسامتي المعهودة كل الأحلام التي كررتها على مسامعهم ذهبت إدراج الرياح و ادعوا اللي أن يصمو عن ذكراها، و ان يدفنوها في أرض خصبة . علها تنبت بعد سنوات الجدب، ازهاراً تلون أعينهم و ينسوا أحلامي،، أحلامي التي لم تعد تناسب ايامي، تركتها للريح لتصعد للسماء، و تنتظرني.. |
رد: حكــاية قصيــرة ❥
انا حالياً في نعمه من بداية السنه و انا انتظرها و اتخيلها..
شعورها جميل، و مدري كيف اشكر الله عز و جل عليها.. راحه نفسيه.. و تحرر من حمل ثقيل و هم ثقيل.. و ربي عوضني بعد الشعور هذا بيكون عندي قبول لكل شي في الحياة الحمدلله دائماً و ابداً الحمدلله على كل حال :11: |
رد: حكــاية قصيــرة ❥
طلبت لي اغراض من موقع صيني و حطيت رقم جوالي غلط .. غلطت في الرقم الاخير ..
راسلت الموقع و قلت لهم تراني غلطت في الرقم عدلوه لي و قالو انهم ما يقدرون يعدلون .. و احاول اتواصل مع شركه الشحن .. و اليوم ما عندهم دوام .. و انا اتابع الشحنه .. طالعه للتوصيل .. :698: قلت ياربي وش اسوي !! فجأه طرت في بالي فكره ادق على نفس الرقم و اسأله انت وين موجود قلت يالله يابنت دقي وش بيصير .. شحنتك لا تضيع .. دقيت عليه طلع هندي و ما يتكلم عربي :243: المهم سألته انت وين في اي مدينه قال انه في الجبيل و شرحت له اني طلبت طلبيه و غلطت في رقم جوالي و حطيت جواله قلت بس تدق عليك شركه الشحن اعطيهم رقمي عشان يتواصلون معي .. حسيته متفهم و قالي طيب :243::599: يارب توصلني الطلبيه .. لاني انهرت عليها .. طلبت شي لي و شي لغاده .. و اعرف ان بنتي بعد بتنهار عليه :243::599: يارب يارب :599: |
رد: حكــاية قصيــرة ❥
اقتباس:
باين اني مرره نشيطه خخ.. وصلت اغراضي من اول بس عجزانه اعلمكم <- منفسه :243: صح اني تبهذلت مع شركه الشحن كل يوم يغيرون المندوب و اتورط مع الشخص اللي غلطت برقمه آخر شي اتفقت مع المندوب يوصلها لي الى بيت خالتي و ادفع له زياده و كان المندوب مره متعاون.. و بوريكم صور الأغراض :502: https://g-lk.com/up/do.php?imgf=177627340313141.jpg كوبين واحد أرض و الثاني قمر.. الأرض انا و القمر غاده... :11: و بس:762: |
رد: حكــاية قصيــرة ❥
اقتباس:
اتذكر هاليوم , و هالشعور و كيف ارتحت من حمل ثقيل حملته على اكتافي 3 اشهر .. الثلاثه اشهر من بدايه 2026 .. كانت اشهر صعبة .. فيها فقد و فيها مرض .. و فوق هذا كله الضغط اللي كان علي .. و غير القروب اللي معي , اخرج اسوء مافيني .. لكن الحمدلله ما بعد الضيقه الا فرج من رب العالمين .. و انا الان في مكان اتمناه من زمان .. بس فرحتي فيه ناقصه , و سببت في داخلي خوف و قلق من المجهول .. احاول اتعايش مع هذا القلق و الخوف و احاول انساه بس هو للان مسيطر و محيط بي من جميع الجهات .. قلق و خوف مخليني ما اعرف اتعامل مع العالم الخارجي .. و الجأ لعزلتي و ابحث عن هدوء و طمأنينة لقلبي و روحي .. صح اني القاها في عزلتي .. بس اضطراري لمواجهة العالم يسلبها مني .. و انا احاول اقاوم بالصمت و الهدوء .. و لكن هناك ما يفضح سري..!! لكن انا احاول :11: |
رد: حكــاية قصيــرة ❥
|
رد: حكــاية قصيــرة ❥
|
رد: حكــاية قصيــرة ❥
@العيوق
ياااهلا و الله،، نورتي القلب و الروح.. ياختي وينك :243: و الله لك وحشه ما تتصورينها، مكانك خالي... و تركتي خلفك بحر من التساؤلات الغير مجابه.. مدام في الروح.. روح طلي حتى لو بس نلمح اسمك،، :11: احلى من يجي و الله :11: |
رد: حكــاية قصيــرة ❥
لا مبالاتي، نظراتي الباردة، نبرة صوتي المخنوقة..
جمود مشاعري، غرابة اطواري،، لا شيء مهم..! و اختنق ب شعوري، و ازفره ك نار تحرق ما حولي.. |
رد: حكــاية قصيــرة ❥
ودي اكتب شي لكن .. مافي افكار في راسي ممكن اتكلم عنها ..
مريت في دوامه كبيييرة افقدتني جزء من كينونتي .. افقدتي الكثييير من نوره الان بس احس بديت اهدى و اروق .. لكن في داخلي خوف كبير هل هذا الروقان و الهدوء دائم ؟ صار في عدم ثقة و خوف .. من كل شي .. حتى من الاشخاص .. صرت حتى لو كنت في بيئة حلوة و آمنه نوعاً ما .. اقول بيصير شي يخرب علي !! و صرت اخاف اختلف مع الناس اللي احبهم .. لان ما عندي ثقة ببقائهم .. الايام اللي مرت صعبة .. ! بس محد يشعر بصعوبتها كثرك .. لانك كنت وسط المعمعه .. و كلنا نمر بصعوبات و كل شخص ما يقدر يحط نفسه مكان الآخر .. و كل شخص مننا يشوف صعوباته انها اقوى من غيره .. لكن في الحقيقة ان الله لا يكلف نفساً الا وسعها لذلك اللي مر علينا هو على قدر احتمالنا لو كان صعب .. هذا كان اللي يهون علي طوال هالسنتين .. اقول ربي ما راح يكلفني اكثر من طاقتي .. حتى لو اللي صار لي تعبني و امرضني .. لازلت اقدر اتحمله .. كل شي مريت فيه غيّر من شخصيتي .. طريقة تعاملي مع الاشخاص .. انبهاري و شغفي خف كثير ... احاول ارجع للاشياء اللي احبها ودي ارجع اكتب .. اعبر عن مشاعر اعبر عن مواقف .. ودي ارجع اصمم , ارسم , امارس هواياتي القديمه . بس التبلد اللي فيني يعيقني .. احس فيه شي رابطني وشو مدري .. لكن انا بعطي نفسي فرصه .. اهدأ فيها و افكر ,, اعيد ترتيب خططي و اولوياتي .. احط اهداف و اتكلم عنها و احققها .. راح ارجع حتى لو بنسخه مختلفه ..:502: |
رد: حكــاية قصيــرة ❥
حبيت ان مشاعري وصلت ..
كلنا نمر بظروف تغيرنا .. لكن رغم هذا كله احنا نبحث عن اشياء ترجعنا نعيش من جديد .. ترجعنا نحب الحياة زي ما كنا نحبها .. نرجع نندهش بالاشياء حولنا .. الحب و الدهشه , شعورين مرتبطين ببعض .. عشان اندهش لازم احب , و لما احب راح تكبر الدهشه في عيني و قلبي .. و لاني انسانه مشاعريه بدرجه كبيرة .. انا تأثرت .. و هالتأثير غيرني .. لخبط المشاعر عندي .. و صرت اخاف احب و انبهر .. و هذا اللي ولّد عندي اللامبالة .. و انا لي شهرين بديت اهدأ .. و احس الحياة صارت حلوه قدامي .. بس انا لازم ترجع نفسيتي حلوه عشان اعيش هذي التفاصيل الحلوة .. كل الاحداث جالسه اعيشها بروحي المنطفئة .. رغم ان اللي يصير حلو .. و اقول بداخلي هذي جرعة عشان ارجع اتوازن .. البدايه كانت لما رحت مكه في ذي القعده لما كان الحرم خفيف وكان الدخول للسعودين بس مسكت جدار الكعبه من كل جهه و كنت ادعي ربي يشرح صدري و يزين حياتي .. و بعدها مسكت الحجر الاسود .. يالله راحة عجيبه و شعور جميل ما انساه .. تذكرت احلامي في الحجر الاسود و صار لي الحلم بالضبط .. بعد ما سكت الحجر الاسود رحت اركض ما ادري وين اروح .. ما كنت اشوف احد حولي كأن الحرم كان فاضي بس انا ...:730: و بعدها كان صلاة العصر.. اخذت كرسي وجلت قدام الكعبه اتأملها .. دعيت الله كثير .. و حمدت الله انه سهل لي هالجلسه .. صليت العصر .. و جلست مكاني الين صلاةاالمغرب .. و الله ما انسى الاحساس . و بدت السكينة تنزل على روحي و قلبي .. و بدت الغمامه السوداء تنقشع عن عيني .. رجعت اعيش حياتي بكل هدوء و صمت .. حرفيا صرت شخص صامت مررره .. كأنه عقلي ما عاد فيه افكار تخليه يتكلم .. بس في الداوم احاول اتكلم و اندمج معهم لكن ارجع البيت ارجع لحالة الصمت .. اجلس في غرفتي كثيير اقرأ كثير .. على انه عقلي مافيه ذاك التركيز اللي يستوعب القراءة .. يعني اقرأ و انسى وش قريت .. و الا اقرأ الصفحة اكثر من مرره عشان استوعبها .. بعدها جانا ضيوف من مدينه ثانيه و ما فيه الا انا امشيهم و اطلعهم و ابسطهم و كنت اعصر مخي عشان اوريهم الاماكن الحلوه و اطلعم و امشيهم .. و الحمدلله .. سمعت انهم مبسوطين مني بعد ما راحو .. قلت هذي اول الغيث .. لازال فيني امل للحياة .. :730: راحو و رجعت لغرفتي و صمتي و كتبي :730: بديت ادقق على نفسي .. و ابي اعدل اشياء كثيرة فيني .. و مسكت الدفتر و القلم و بديت اكتب شوي شوي وش ابي اضيف في حياتي وش ابي ارجع لحياتي .. بكتب كل شي في خاطري ابيه .. و بعد ما تخلص الاجازه ابدأ ارتب الاولويات .. لان الاسبوع الجاي .. بروح للمدينه المنورة .. و هذي بتكون فترة استجمام دينيه .. لحظات صفاء .. بنظف فيها روحي بعدها ان شاء الله يبدأ الجد و التنفيذ .. انا اكتب هذا الشي لكم .. لان اللي لامسه كلامي .. و حسو انهم يمرون بنفس الظروف عشان يعرفون اننا نقدر نرجع لنسخه حلوه و جميلة مننا اذا اردنا .. مو شرط تكون نفس نسختك القديمه .. او شخصك القديم .. لانك مريت في ايام صقلتك .. غيرتك .. و اكتسبت صفات جديده لازم تكون عون لك في الايام الجايه انا شخص متفائل جداً .. و سمعت عباره ان الشخص المتفائل يقدر يبني نفسه بعد الانهيار بسهوله .. و يارب اكون زي هذي العبارة .. |
رد: حكــاية قصيــرة ❥
الأشخاص الرائعون في حياتنا هم قدر و ليس اختيار :11:
ف يارب جمل اقدارنا، بمن ينيرون لنا ظلمة الطريق.. من يزرعون في دروبنا ورداً و ياسمين.. و ينتشر عبقها في أيامنا و اعوامنا .. |
رد: حكــاية قصيــرة ❥
لماذا يهرب النوم مني..!
و انا من كنت املكه و اطوعه برمش عيني..! ربما لاني تخليت عنه لأيام طوال.! و تركته حزيناً مشغول البال،، إلى أن انشغل عني.. بالعامي علام النوم عيا لا يجيني تبعد وانتزع عني ولايا سالته قال جفنك ما يبيني مدام القلب في وسطه حكايا :243: |
| الساعة الآن 04:43 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2026 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~