رد: حكــاية قصيــرة ❥
 

عندي شعور حلو هذا الأسبوع..
وشو مدري ،، بس احسني طايرة و سعيدة..
و كل الأشياء السيئة استقبلها بهدوء و روقان و تعدي بسلام ..


شعور اتمناه في حياتي كلها و اتمناه لكم :11:

رد: حكــاية قصيــرة ❥
 

من الاشياء المهمه اللي انا مركزه عليها هذي الفترة , بشكل جدي ,
روحتي للنادي بشكل مستمر ,, الاهتمام بصحتي و جسدي ,,
اكتب في الاجندة متى رحت النادي و الايام اللي ما رحت له ليه ما رحت !!

و كم لتر شربت مويه و اسجل في الاجندة ,,
لاني احتاج استرد نشاطي و عافيتي ,, لاني ابي ارجع لمشاريعي اللي وقفتها
بسبب صحتي و قلة نشاطي :433:

و مركزه على اشياء معينه انها تتعدل ..


بديت على هذا النظام من تاريخ 28\5
تقريباً للان لي اسبوعين .. و لازم استمر عشان يصير هذا اسلوب الحياة ..




وش التغيرات الجديدة في حياتكم و تبغون انها تصير اسلوب حياة ؟

:198:

رد: حكــاية قصيــرة ❥
 

https://youtu.be/MT8mUsrShEk


رفيق الصباح , بودكاست ملهم جداً

رد: حكــاية قصيــرة ❥
 

و انا جالسه اتأمل نفسي ،، و اشوف الأشياء اللي كانت تبهرني قبل ما صارت الحين تبهرني
و بعض الأشياء اللي مهتمه فيها صارت عادي عندي ،،


مثلا كنت زمان راعية تنسيق حفلات و فعاليات ،، الحين خف هذا الحماس ..
احاول اسوي ،، بس عادي احس من الداخل مافي اهتمام ..
اللي جاب الطاري ذكروني بنات خالتي لما سويت لهم حفل تخرج و سويت زفه و حركات
و انا في هالوقت جلست اضحك على نفسي ،، بس كنت وناسه :49:



اكتشفت انه لكل مرحلة عمرية شغف و اهتمامات ..
و حالياً جالسه ابحث عن شغف هالمرحلة
و الظاهر اني لقيته :ff1 (119):
بس ابي اتأكد هو شغفها و الا لا ،، بس الواضح ما اتكلم الا عنه :427:


اللي هو الفلوس و الاستثمار
ابي اكون ثروتي :49:


تضحك علي غاده يوم اقولها ملاييني اللي بتورثينها لا تخربينها ..
اول شي ابني لي مسجد .. و استثمري الباقي ،،



عندي فضول على مرحله الخمسين و الستين وش اسوي :ff1 (87):

رد: حكــاية قصيــرة ❥
 

لما يكون عندك هدف و اصرار , و حب
يرافقها الايمان , و ثقه بالله

تكون حياتك سهلة يسيره و كلها خير ..


بودكاست رائع و ملهم , وعادي اجلس ساعتين اسمع قصص نجاح جميله


رفيق الصباح :11:


https://youtu.be/E3Q2HYOgqcA

رد: حكــاية قصيــرة ❥
 

ذكروني اهديه " تتنفسك دنياي "
و اذكرو هالتدوينه زين :11:


صباحكم مشاعر جديدة مختلفه :268:

رد: حكــاية قصيــرة ❥
 

لأول مره في حياتي يكون عندي خبر سعيد و اكون متكتمه عليه
تعرفون شعور الغيرة و التملك ,, هذي اعظم صفتين عندي و اسؤءها للاسف خخخ
ابي اعلم الناس كلها .. و في نفس الوقت ابيه لي لحالي :ff1 (113):


يارب تمم علي هذا الشعور ,و ارزقني فيه على ارض الواقع :11:

رد: حكــاية قصيــرة ❥
 

لا أدري هل هي النهايه ام البدايه ،
لكن ينتظرني شيء مختلف

رد: حكــاية قصيــرة ❥
 

شعور انك على مفترق طرق ،،
هل تتقدم و تعاند خوفك ، و ألمك و انزعاجك ..
او تعود ادراجك و تقفل الأبواب من حولك ،،

رد: حكــاية قصيــرة ❥
 

كلام الليل يمحاه النهار

عشان كذا انا احب الصباح :134: و ما احب الليل راعي الهواجيس :292:



ابشركم اني مروقه على سيد الغنادير :ff1 (127):

رد: حكــاية قصيــرة ❥
 

انا بالعادة مو راعيه افلام و مسلسلات و لا هي مودي ..
بس تجيني فترات ابي اتفرج على شي حلو و يعجبني بنفس الوقت
و صعب اطيح على فلم على جوي جداً صعب ..
هي للان ثلاث افلام بس اللي حبيتها و ما انساها ..


و منهم

The Green Mile

الفلم مرره قديم .. و اتوقع الكل شافه بس انا توني اشوفه
على انه طويل مرره ثلاث ساعات و توقعت اطفش ,, لكن ما طفشت
دليل انه دخل مزاجي ,,
الفلم فيه كمية مشاعر عجيبه , انسانيه لا متناهيه ..
لما مكانتك و شكلك يجبرونك تكون قاسي .. الا ان عطفك و انسانيتك تطغى
قلبك و حدسك هو الاساس ,, و جميع ما حولك يتبعه

اعظم شخصية " جون كوفي" تعاطفت معه مرره و بكيت عليه




https://occ-0-2827-300.1.nflxso.net/...AS192kokoG.jpg



يالله اللي ماشافه يشوفه <- ي قدمك ي شيخه :2::392:

رد: حكــاية قصيــرة ❥
 

وصلت لمرحلة استخدم الجوال بطريقه مرعبه ..
لدرجه انه تخليني ما اسوي اي شي ثاني غير اني اتنقل بين التطبيقات و العب
شي ممل مررره ,, احاول اغير من نفسي و ان شاءالله اتجاوز هالمرحلة :ff1 (179):

رد: حكــاية قصيــرة ❥
 

انا لم اعد تلك الفتاة التي تطارد الفراشات , و خيالات , و امنيات مجهولة
لن اسعى , و لن اركض , و لن ادور في مكاني ,,


هناك من مسح على قلبي و انهى كل شيء
و كانت هي اللحظات الاخيرة التي ايقنت فيها , ان لا شيء يستمر


لا يستمر الا ما كتب له الله أن يستمر :11:

رد: حكــاية قصيــرة ❥
 

مدري اسمح الهواجيس تتدخل ، و الا أمسك كتابي الين انام :ff1 (87):
و اتوقع اني بنام مابي كتابي و لا الهواجيس

رد: حكــاية قصيــرة ❥
 

فزت على الهواجيس لا بارك الله في الهواجيس :207:

متخيلين اننا في نهاية السنه الهجريه :146:
مررت كلمح البصر :ff1 (179):


الله يعطينا من خير الايام و يكفينا شرها ،
صباحكم خير :85:

رد: حكــاية قصيــرة ❥
 

دايم احلم بشخص انها يشوفني صدفه في مكان ما ،،
و انا اسوي نفسي عادي مو مرتبكه و داخلي كلام كثير ،،
الحلم يتكرر علي كثييير و نفس الشخص ..



ممكن شي ينتظرني و يبغاني ابادر ،،
و للامانه كثير اشياء تنتظرني
يارب خليني أتقدم لها :11:

رد: حكــاية قصيــرة ❥
 

اكثر يوم ابي انجز فيه اشياء هو اليوم ..
راحين لبيت اخوي و لازم ادلعهم و اسوي لهم قهوه و حلويات ..
قلت لزوجته احنا بنجيك بس لا تسووين شي ,, انا بسوي القهوه و الحلا
انتي بس اجلسي و ارتاحي :11:
<- شفتو احد يدلع زوجه الاخ زيها :158:


يمكن انتم تعرفون الشعور و تدلعونهم بس انا اول مره يصير عندي زوجه اخ :128:



المهم فيه اشغال كثير بسويها و منها ادخل المنتدى و اخذ اخباركم
و محدده لكل شغله وقت و عيني من اليوم على الساعه
احب لما انضم وقتي بالساعات و الدقايق .. احس الوقت يطول مدري ليه
اهم شي الله يفكني من الجوال و الالعاب فيه ..


و بس ,, يسعد صباحكم :ff1 (115):

رد: حكــاية قصيــرة ❥
 

من الصباح و انا اسوي الحلويات و توني اخلص و اغلفها :4:
طبعاً مع فترات راحة و انتظار لما تبرد الشكولاته و كذا < حركات محترفين :400:
ركبت القهوه و الان بضبطها


كيفني و انا سنعه :150:

رد: حكــاية قصيــرة ❥
 

ماذا يعني العام الجديد ؟ أن لم يكن هنا أهداف او تغيرات..
أن كنت تسير بنفس الوتيرة و نفس الاتجاه ، لا يعني شيئاً
فقط يكون سنه اضافيه لعمرك ..


لفل الشغف صفر حاليا ، ادعي لي يرجع :ff1 (141):

رد: حكــاية قصيــرة ❥
 

اعترف لكم اني جالسه اغصب نفسي على اشياء مفروض اسويها
و الحقيقه اني ما ابي اسويها ,,

:57:

رد: حكــاية قصيــرة ❥
 

دائما اتسائل، هل فيه احد يتعب التعب اللي اتعبه ؟ < باين من السؤال اني منهارة
بس لما اتذكر شعوري الصباح و كيف تنرد لي أجزاء من عافيتي
يهون هذا التعب و اقول بكرة ينجلي و ارتاح ..



حلم الحياة اللي احلم فيه بيتحقق يوماً ما

رد: حكــاية قصيــرة ❥
 

اعاني من شغله معينه ,, لكن رغم هذا الشعور الا اني مكمله في الاشياء اللي ابي اسويها
لو كان التقدم جداً بطيء و ممكن ياخذ مني شهور و سنوات ,, الا اني اقول بدري على الاستسلام


:244:

رد: حكــاية قصيــرة ❥
 

كنت ابي اتعافا من ادمان لعبه .. لكن للاسف خليت ثلاثه عندي في البيت يدمنون عليها
و المشكله العظمى بنات اختي كل ما تصعب عليهم مرحله العب لهم و اطلعهم منها :ff1 (171):
شرايكم اخليكم تدمنون عليها <- صديقة سوء خخخ


اسمها royal match
اللي يلعبها يقولي ادخلكم في القروب عندي <- و الله البلشه خخخخ :266:

رد: حكــاية قصيــرة ❥
 

رانيا و مشاري
تحملوني مسؤلية كبيرة..
و تخلوني استحي على وجهي عن الدلع اللي جالسه اتدلعه على نفسي


يارب اكون عند حسن توقعاتكم :11:
و اسمح لكم بتصفيقي لو تدلعت زياده <- قدها خخخ

رد: حكــاية قصيــرة ❥
 

كل اللي احبهم هنا لا تتغيرون امانه :ff1 (189):

رد: حكــاية قصيــرة ❥
 

لي فترة اكرر على نفسي الكلام السلبي و القي باللوم على اشخاص اخرين
الومهم لانهم تركو لي مشكله وش كبرها على اني كنت اقولهم يشاركوني
لكن دايم يكون الرد انه خلاص ما بقى شي ..

و دي اتجاهل او انسى هذا الشعور ,,
لكن الغبنه ما خلتني :ff1 (183):


و ودي ارجع اقول كلام حلو و ايجابي , لكن انا تحت ضغط عجيب

:ff1 (69):

رد: حكــاية قصيــرة ❥
 

طرت في بالي فكره ,, :11:
بخليها حافز لي ,, اتشجع و اواجه المشاكل
راح ارتب لها ,, ان شاءالله في اكتوبر ,,
و انسق مع بنت خالتي لانها لازم تكون معي :11:

رد: حكــاية قصيــرة ❥
 

ممتنه لأي شخص جالس يدعمني معنوياً
انا حالياً في وضع احتاج الدعم ..

شكراً سعود
شكراً مشاري



اول ماجيت الدوام رتبت أوراق المشكله و حددت ابدأ في مين
و كتبت الايميل و شرحت فيه كل شي
اتمنى تنحل المشكله هذا الأسبوع لأنها اخذت اكثر من وقتها
و اخذت مني جهد نفسي قبل لا يكون كلامي و جسدي


انا لو راحت مني هانت كل مشكله تواجهني ...

رد: حكــاية قصيــرة ❥
 

الجهد اللي ابذله سواء في الدوام أو البيت كبييير جدا
بس في المقابل جالسه اجهز لي اجازه رهيبه

الله يسهل الأمور

رد: حكــاية قصيــرة ❥
 

مشاركتي الثانيه في مسابقة الانمي ..

https://g-lk.com/vb/showpost.php?p=825233&postcount=13

رد: حكــاية قصيــرة ❥
 

لا تعيش على أمل احداث ممكن ان تحدث او لا تحدث
و لا تعول كثيرا على أشخاص تتوقع منهم الجميل و لا يحدث ..


هي خيبة امل احاول ان لا اصاب بها ،،

رد: حكــاية قصيــرة ❥
 

هنا يوم جديد ،
ابدأه بدعواتي لنفسي قبل كل شي ،،
تاركه تلك الخيبه جانباً ،، الله كفيل بجبرها..

رد: حكــاية قصيــرة ❥
 

في حياتي ما بكيت عشان عميلة الا اليوم
مقهورة عليها .. جلست لوقت متأخر انتظر طلبها يتم لكن ما تم


:359:

رد: حكــاية قصيــرة ❥
 

احسني اركض ركض ..
ودي امي ترجع و البيت بشكل جديد و مرتب. ..
كل يوم تقول صوري لي و اقول لا لما تجين تشوفين ..
امي لها غايبه عننا ثلاث شهور .. كانت بتطول اكثر بس عجزت تصبر
يارب لا تحرمني منها :11:
يارب أنجز اكبر قدر ممكن من الترتيب و لا اتفشل معها ...
اليوم يجي الكنب الجديد .. و برتب غرفتها

وفيه أشياء كثير بتخلص منها قبل تجي لأنها لو جات ماراح تخليني خخ
امي تحب اكتناز الأشياء، ، في صدد ممكن احتاجه :ff1 (7):

رد: حكــاية قصيــرة ❥
 

على كثر الضغط .. الا اني مستغربه من نفسي اني قادرة اتحمله
صحيح اعصب ،، بس ما اعصب الا على الأشياء التافهه ..
اللي ما توصل لمستوى الجهد اللي ابذله.


يعني لما اتفق مع الشغاله في البيت ما ارجع من الدوام الا انك مسويه هذي المهام ..
ارجع و اكتشف انها بس سوت نص اللي قلته .. طيب ليه ؟ مافهمتيني !


او يجيني سؤال تافهه و بسيط من وحده من البنات عن إجراء معين
هي تسويه كل يوم بدون مبالغه.. تجيني و تقول لازم نسوي كذا !!


انا اعصب عليهم و ما اعذرها.. لأنهم ما قدرو الجهد اللي ابذله
سواء الجهد حتى احافظ على هدوئي ،، أو احافظ على مستوى الخدمه
او الجهد اني احاول أنجز اكبر قدر ممكن من المهام اللي عندي
و المهمات متفرغه و يبيلها دقه و مراجعه ..


هذي الشهرين من أثقل الشهور .. و حبي للمكان ساندني

دايم ادعي يارب كون معي .. :11:
و اكيد و واثقه انه معي .. لانه مخليني ثابته و هاديه..

رد: حكــاية قصيــرة ❥
 

امي جات و انا ما شفتها ، و بروح الدوام و انا ما شفتها :292:
يارب تصحى قبل اروح :296:

رد: حكــاية قصيــرة ❥
 

كبرت و لازلت زي الأطفال انام فجأة في اي مكان اكون فيه
اللهم الحين قدرت اسيطر و ادخل غرفتي من بدري عشان لو جا النوم اكون في سريري ..


اذكر مره و انا في الجامعه كنا معزومين عند بيت خالتي
كبس النوم و نمت في المكان اللي انا فيه ..
دخلت وحده من الحريم في الغرفه اللي كنت نايمه فيها ..
استغربت هذا كبري و نايمه و الناس متجمعين :ff1 (185):


و موقف و انا أصغر يمكن كنت في المتوسط او الثانوي ..
مجتمعين خالاتي و خوالي و فجأه و انا نايمه وسطهم ..
كنت من النوع اللي اتكلم و انا نايمه .. فجأة ما يسمعون الا "البقر البقر "

وش كنت احلم فيه ما ادري خخخ


و انا الان مقهورة ليه نمت أمس و ما قدرت استنى امي زي خواتي :209:

رد: حكــاية قصيــرة ❥
 

مره جاتني عميلة ، تشتغل مديرة موارد بشريه و مدربه ..
جلسنا انا وياها نتكلم عن سلوك بعض الموظفات ، وتعلمني كيف اعدلها ..
و من الكلام جلست تتكلم عني .. قالت انتي يجي منك بس مو معطيه نفسك فرصه ..

قالت انتي ما تعطين رايك في شي ، قلت ايه ما احب ..
يعني للادارات العليا قصدها .. يعني خطط و تطلعات و كذا ..

قلت لها انا احس نفسي مو متحدثه جيدة ،، قالت بالعكس .
بس عندك مشاكل ممكن هي تقلل ثقتك بنفسك
و الا انتي تعرفين تتكلمين.. عدلي المشاكل و تضبط امورك ..


و اليوم كان عندنا اجتماع .. و دايم كنت أخاف لما يجي دوري و اقول وش عندي ..
اليوم لا ،، جلست اتكلم و اقول وش عندي و وش خططي ..

عرفت اني فعلا متحدثه جيده ، بس احتاج تشجيع :183:


بس و شكرا :ff1 (56):

رد: حكــاية قصيــرة ❥
 

انا فخورة بنفسي ، و كل شي سويته لبنتي ..
اليوم اول يوم دراسي لها ثاني ثانوي ..
و مدرستها سوت مبنى خاص بالموهوبين ، و نقلت فيها
تعتبر اول مدرسه اهليه خاصه بالموهوبين ..


اول مره انضمت فيه لموهبه كانت ثالث ابتدائي ..
و ذيك الفتره محد كان يقولي على موهبه كنت دايم ابحث لها عن معاهد
و ادخلها دورات في مجالات مختلفه تناسبها ..
الين بالصدفه لقيت موقع موهبه .. في البدايه ما كنت اعرفه
و لا كنت اعرف انها شي كبير و تابع للدوله ..
سجلتها فيه و بديت مشوارها من ثالث ابتدائي .
كانت في ذاك العمر تدخل اختبارات للقدرات و هي ما تعرف اليه الاختبارات هذي ..
بس الحمدلله اجتازت من اول مره و بدينا الرحله ..
و خلال هذي السنوات تطورت كثير بفضل الله ..

كنت دايم و لازلت ارسم لها طريق النجاح و التميز ، و ربي ساعدني


و اليوم اول يوم دراسي .. و مرحله جديدة مختلفه
اتمنى لها التوفيق و النجاح ..

رد: حكــاية قصيــرة ❥
 

https://j.top4top.io/p_2794smpno0.jpg




انا الان احاول اعبر لانسانه احبها ، عيد ميلادها الأسبوع الجاي
و كنت انتظر هالمناسبه عشان اعبر عن حبي و امتناني ،،

انسانه حبوبه ، لطيفه بشكل ملفت ،، روحها حلوة ،، معطائة بحب ..

انا جالسه ادور كلام يليق بهذا الحب و الامتنان ،،
صح انا عبرت لها بشكري و امتناني لوجودها جنبي بالجوال ..
لكن احس ما يكفي ،،


عطاءها يخليك تستحي من نفسك و انك مقصر ..


و يارب اطلع بكلام حلو