): عفستي (: [الأرشيف]

المعتفس

07-21-2022, 03:19 AM

مستمتع بإجازتي ..صح خربت وماسافرت بس عادي أهم شي مافيه دوام
كنت ناوي اقضيها فكالفورنيا اشمعنى كالفورنيا والله مدري بس أحبها فيسي وينه ابو سن
مع اني ماعمري سافرت برا
بس ماسكه معي إلا أسافر لها
حتى مدري اذا كتابتي لها صح كالفورنيا والا منقص والا مزود حرف :461:
المهم اني باروحها اذا الله احياني

السنة ذي كلها كانت عصيبة لكنها انتهت الحمدلله بنصري كالعادة
وكان باقي شوي من أثار حربها علي..وقلت آخذ فترة راحة شهر شهرين من كل شي وأسترخي..بس لني بطل حسيت اسبوع فترة كافية وكثيرة بعد علي

اللي قهرني فيني الأيام اللي فاتت والسبب الرئيسي اللي خلاني افكر ابعد عن كل شي

اني تلخبطت فنفسي وضيعتني

يعني اول.. مااعرف صدقي من كذبي برا النت وداخل النت
الأيام الأخيرة صرت اعرف كذبي من صدقي وهذي مصيبة بالنسبة لي والله

الزبدة إني أعدت ضبط مصنعي
وكلش تمام الحين

المعتفس

07-21-2022, 12:41 PM

http://3.bp.blogspot.com/_xuSNlOZvAcs/TKIEhblJ6II/AAAAAAAAACs/JQuLLQKPi9g/s1600/Untitled-3+copy.jpg

-أعتقد أني وجدت كنزي.

المعتفس

07-22-2022, 01:27 AM

فحي يكثرون به المجانين قبل البارح
طلبت من بوفية ومشيت بالسيارة مسافة بسيطة ووقفت عشان آكل بعيد عن درب السيارات وفمكان مظلم شوي
الا واشوف مجنون أعتدت على شوفه بنفس ترسيمته غتره وعقال على سروال وفنيلة..بس هالمرة مهو لابس فنيلة"مفصخ"معه ثلاث قوارير مويه وواضح مع حرارة الجو إنها باردة حيل ..حط الشماغ والعقال على جنب وصب القوارير على راسه وجسمه وثم رسم بشماغه وراح.
وآنا آكل ومركز عيوني عليه

شوي الا ويضرب واحد على القزازة بقوة..فجعني :m1:
طلع مجنون ثاني بس عنده نسبة عقل شوي
وأشر لي بيده وفهمت انه يبي فلوس ..فتحت الدريشه الا ويفطس ضحك
ويتكلم بس مافهمت كل كلامه ..بس لما قام يأشر لي على المحل اللي كان المجنون الاول يغتسل فيه فهمت إنه يضحك عليه
وفهمت بعد منه إنه يقول لي في الحي اربع مجانين غير المجنون ابو القوارير<مسوي طالع منها :m1:
قسم فطست ضحك
وضحكي مو على مرضهم ..الله يشفيهم ويرفع عنهم ولا يبلانا
الظاهر إن الانسان طالما فيه نسبة عقل ولو بسيطة فعنده نزعة إنه يشوف نفسه أفضل من غيره ..وهذا اللي ضحكني
والبلا مهو في الجنون البلا في العقل
إلا طبعا من رحم ربي

تذكرت شطر للشاعر سداح يقول:من يشتم المجنون ماهو بصاحي
وبيت لسعد علوش
العقل نعمه لكن أحيانا يسبب الانتكاس
يشوفك إن العقول اليوم ماقل وندر

وصباح المجانين:131:

المعتفس

07-23-2022, 03:32 AM

منهمكة في تثبيت قناعها
وأنا منهمك في إظهار نفسي مغفل صدق أنه وجهها الحقيقي
كلانا في "حفلة تنكرية"
والعفسة بريئة من هذه الحفلة

المعتفس

07-27-2022, 09:03 AM

..إشادتِك نجمة شرَف في سمائي
.........تِفْرِح مثِل ُفرْجَه بعَد موقفٍ حَرْج

......والشعْر مايخلْى مِن الببّغائي
.........وساق ٍسليمه فيه لايْغيظها العُرْج

...شاعر رجِل وآخر خفيف وْنسائي
..... شعرٍ شعور وْشعر بس تقْفيَةْ هَرْج

...أسرج أصيلة فوق رِجْم انزوائي
............ لالبّسوا مستشعره للبقَر سُرْج

معتفس

المعتفس

07-28-2022, 06:05 AM

فيني شوفة نفس فظيعة .. بس مع اللي مااتقبلهم أو فيهم شوفة نفس
بس أنا أدبلها..يعني فوق مايشوفون نفسهم أشوف نفسي زيادة
فيه ناس يشوفون ذا الشي عادي وانتصار لنفسك ..لا مو عادي إن جينا للجد
وهذا مو خلق المسلم ..بس عجزت أتخلص منها أو ع الاقل أكون أكثر مرونة وتقبل لهم
خلوكم من كلامي ذا كله وارجعوا معي لكلمة فظيعة اللي فبداية كلامي
كلمة "فظيعة"
فظيع معناها كما جاء في المعاجم اللغوية ..رديء أو شنيع أو قبيح الزبدة كلمة مهي زينة وتقال للذم
لكن مع مرور الزمن والعصور أصاب هالكلمة تطور دلالي وخرجت من معناها الدلالي
من الذم للمدح وصاروا يقولون فلان فظيييييع على انهم يمدحونه
تماما مثل أكثر عاداتنا وتقاليدنا ..انسلخت من مدري ويش الحقيقي مع التطور والتحضر وصرنا نمدح اشياء كنا نذمها سابقا..واقصد العادات والتقاليد اللي اثنى عليها ديننا موالعادات الفاشلة
زي يقول لك النظرة الشرعية عندنا عيب
يابوي سر امها انت وبنتك والله لاتشرفني لا انت ولا بنتك ولا قبيلتك كلها
استغفرالله بس مسوين ارجل من الرسول عليه الصلاة والسلام
وعادات ثانية ماتمت للاسلام بصلة
انا وش كتبت فوق هع
اذكر اني انقز من رصيف سالفه لسالفه بس وش كتبت بالضبط مدري
ومابي اراجع كلامي

المعتفس

07-28-2022, 06:49 AM

^
ياليتني راجعت..كان لحقت أعدل قبل ينتهي وقت التعديل

المعتفس

07-29-2022, 02:18 PM

https://al-marsd.com/article/160759/%D9%85%D8%AD%D9%84%D9%8A%D8%A9/%D8%B4%D8%A7%D9%87%D8%AF-%D9%85%D9%88%D8%A7%D8%B7%D9%86-%D9%8A%D9%82%D8%AA%D8%B1%D8%AD-%D9%83%D8%AA%D8%A7%D8%A8%D8%A9-%D9%85%D8%AE%D9%84%D9%88%D8%B9-%D9%81%D9%8A-%D8%A8%D8%B7%D8%A7%D9%82%D8%A9-%D8%A7%D9%84%D8%B1%D8%AC%D9%84-%D8%A5%D8%B0%D8%A7-%D8%AE%D9%84%D8%B9%D8%AA%D9%87-%D8%B2%D9%88%D8%AC%D8%AA%D9%87

أتفق وبشدة

المعتفس

07-29-2022, 03:03 PM

مانمت من امس مع ان دوامي مسائي وجاي الصبح
ومابقى شي على دوامي اليوم
عسى ما اجيب الطعه في الشركه اليوم
عاد يدورونها علي والله

المعتفس

08-02-2022, 01:51 PM

رجعت أكمل إجازتي بعد ماقطعتها عشان زميل في العمل صار عليه ظرف وداومت عنه وخلصت الحمدلله
الحين رجعت لفترة النقاهة والاسترخاء
فبالي أشياء كثيرة ودي أسويها

المعتفس

08-04-2022, 01:12 PM

..‏.....الجمْع طرح وْضرب الايام قسمه

.........وبعض الألم آلذِّ لي مْن السلامه

المعتفس

08-06-2022, 09:21 AM

من أقرب قصائدي لقلبي قصيدة "شرس تروضني طرف ابتسامه"
هالشطر كان دايم أحطه عنوان مدوناتي..والله يذكر ذيك الحمامه بالخير

.......نوحي حمامه وانا مثلك ابانوح
.............والذيب مايْعيبه عوا ياحمامه

بي جرح من خمسة عشرعام مفتوح
................غديت منّه سُخْريَه للنعامه

قولي من أنت ؟آقول:جسمٍ بلا روح
.......وانا الذي جت طعنته من حسامه

وانا اللي إن همِّش فماهوب ممسوح
.............وانا ضيا ناسه وناسه ظلامه

طبعي غموض وْمشيتي كلها وْضوح
........شَرِس ..تروِّضني طَرَف ابتسامه

..في عالم الاوهام لي دوح وصْروح
...........وفْعالم الواقع لي أثقل غمامه

......كل ما لمحت لْغادتي بارق يْلوح
.........سوّى فخدّ الشعْر حزني علامه

....واللي نفث من روحه فآدم الروح
................مامرِّني يبكيك يابو دلامه

..أقسى من الدمعة على قبر مذبوح
............وامر من دهْس العدو للكرامه

المعتفس

08-08-2022, 10:36 AM

الأيام ذي اللي يحاول يزعلني احسه معطيني هدية والا متجمل بي خخخخ
اي والله

جالس اختبر نفسي واحاول ارجعها زي قبل وتقريبا نجحت ومن هذا المنبر اشكر كل اللي حاولوا يزعلوني :m1:
والله يامضت أيام خربتها بيدي ولساني واصابعي ..مره كنت انفعل بسرعه
بس الحين رجعت زي قبل
يعني رجعت هادي بس هدوء مستفز ويقهر..نفس هذا يعني >:m2:

خخخخ

المعتفس

08-08-2022, 05:28 PM

https://encrypted-tbn0.gstatic.com/images?q=tbn:ANd9GcS5BeTUaPjzDGxKVJ1kmzjUv67-S6siUbDKYQ&usqp=CAU

وضعي الآن

المعتفس

08-10-2022, 11:19 AM

اللي يسمع ويشوف مصايب غيره تهون عليه مصايبه
خصوصا لما يقارن نفسه بأم

https://youtu.be/EHOi1jBwmsM

المعتفس

08-12-2022, 08:09 AM

بعْض المحبه تجيب الضغط والسكَّر
وبعْض المحبه تِخفَّف عنْك الاوجاعِ

ياصَدْع راسي ي راسي بسِّك تْفكِّر
جايع وهالحب ماهو كفْو لاشباعي

مادامها وِصْلت اليا باب متْسكِّر
فْعَرفت للدَّخْلهَ وْباعْرِف لمطلاعي

فامان هجري مدامك صرت تتنكَّر
أغليك بس الغلا مايلويِ ذْراعي

معتفس

المعتفس

08-14-2022, 06:02 PM

اخس شي في الحياة يوم يطفى جوالك شحن وتشحنه فترة
وبعدين تجي وتكتشف انك ماانت مركب الشاحن صح وللحين صفر:418:

المعتفس

08-14-2022, 11:41 PM

محادثة لي مع رانيا في الخاص

أنا :أنا ما أؤمن إني أرد بعقل على شياطين
رانيا :من العقل احيانا اننا ما نرد بعقل

حبيت ردها حيل^

كبيرة يارانيا(:

المعتفس

08-16-2022, 01:38 AM

...............ممرَّات الحياه اللي سَرَنِّي
...................على جرَّة خُطاهن جَرجَرنِّي

.............أمِدِّ "لْفِلمهن " نظرة خشوعي
..................... لَ منهن سَمَّعَنِّي وْفَرِّجَنِّي

............لهمسه "للأمومه" قَبْل لاارقد:
..............وليدي اكبر.. وِشيل الحمْل عنِّي

............لأفاعي فِشْجَرة تَحْرِس ثمَرْها
....................وْليال فْزاويَة خوف اخْنِقَنِّي

..............لمِشايِخْة الخديعه بالشريعه
......................لهذا الطِّفْل مِتْلبِّسْه جنِّي

.......لكرهي المدرسه لاجحاف فقري
.................وْدروسٍ في البشر مافقَّهَنِّي

....................لأوَّل ماصدَف عدنان لينا
...................لْنهايه كفَّها بْدمع مْتَحنِّي

....لْمراهَقْتي وِرَسْم قْلوب واسْهُم
................وِنَقْش الإm في لوحات فنِّي

..............لِحِلْمٍ كان "ينفث" بي خياله
........قَبِلْ لااصحى بصفعة [حسْن ظنِّي]

......... لأسامي أصدقاي فْغير عصري
..................... وِصفحاتٍ فِسِجني حررنِّي

............(لْ أَنا العَبْدُ الذي خُبِّرْتَ عنْهُ)
..................(لْ أَلا أَبلِغ أَبا مَخزومَ عَنّي)

.....(لْ فَما هِبتُ الفَرَزدَقَ قَد عَلِمتُم)
..............(لْ أَخالِدَ لَو سَأَلتِ عَلِمتِ أَنّي)

......(لْ وَلُقِّبْتَ المُسَدَّسَ وَهوَ نَعْتٌ)
...............(لْ وَما نيْلِ المطالب بالتَّمَنِّي)

.................لأوَّل [عيد ميلاد] لْقصيدي
....................فِليله مات فيها بَعْض مِنِّي

................لْتأَبط شر قلبٍ غصْب عنَّه
................. رأى بَعْض التأني من التَّدَنِّي

..........عجول إن حوَّطَت طُهْره أسِنَّه
..........................يغير بْيالثاراتي وْيِثنِّي

.................لأوَّل مابزَغ نجْم لْشبابي
........................إلين أحلام أمي حَقِّقَنِّي

............لأوَّل آخري مْن الشَّطْر هذا:
..................[كُثُر ماهي اصْقَلَنِّي غَرِّبنِّي]

..........أقول أحيان ياطوبى لمثلي
........واصيح أحيان وين اشباهي عنِّي؟

........ولاالقى لي شبيه إلا [قصايد]
................خذن منِّي كثر ماهي عطَنِّي

...........كثُر ماني أحس اني أبوها
...................أحس اني وَلَدْها بالتَّبَنِّي

.....خُلِقت مْن الحجار آشق "مائي"
......................وأنهار -الحجار يْفَجِّرنِّي

المعتفس

المعتفس

08-17-2022, 12:54 PM

مالي حظ
كنت اسأل رانيا عن التصويت في الجولة الثانية للمسابقةوقالت لي مافيه
وتوقعت الجولة الثالثه فيها
قسم ناوي اقيم الجميع صفر من عشرة الا نايف ووفا كنت باعطيهم واحد من عشرة ..عشاني احبهم شوي
وطبعا الجميع مبدعين بس تصويتي مجرد عنصرية مع معيضة اللي اخر شي كرشتني من الفريق :m1:

بس طلعت معيضه ومافيه تصويت اصلن

المعتفس

08-19-2022, 03:44 AM

https://i1.sndcdn.com/artworks-000105159766-zv6st3-t500x500.jpg

فتاحي ألبي وخيدي منو شي ناره
مهما فتلتي مافي متلي بالحاره

المعتفس

08-20-2022, 04:02 AM

.........كآبه في كآبه في كآبه

......ونفس الأسئله من دون إجابه

..فِراسي العاديات الضّبْح غارت

....وْفِصدري طَعْن لِسْيوف وْحِرابه

..إلى من جات من لحمي ودمي

....سكوتي صعْب والأصعب أَجابِه

........وانا رغْم انكساري داخليًا

...........مُمَثِّل بارع فْدور الصلابه

......وِدمْع الفارس المغوار شعرًا

....... عَوِي والْعَوْي ماعاب الذيابه

....قصيدي ياقصيدي ياقصيدي

.......ووش يعني يشوفونا بْغرابه؟!

....نعيش أغراب من عادك تِتَأتئْ

.......وطوبى لْمثلنا فْعصْر التَّشابُه

المعتفس

المعتفس

08-21-2022, 10:18 PM

مع اني مداوم الحين ومكروف بس احس فراغ جواي
قررت اسلي نفسي . واشتركت مع النصابين حق تدوال الاسهم اللي في النت .. واتصلوا علي ..وجالس اطقطق عليهم واحاول اعشمهم وانصب عليهم رغم ان النصب عليهم شبه مستحيل..بس باجرب
أفكر اعطيهم طعم مبلغ واجرجرهم بعدها..بس المشكلة اخاف يرضون ويقنعون في الطعم ويسحبون علي بعدها ويروح علي المبلغ:m1:
حلو هالشعور في التفكير ..من زمان ماشغلت مخي :m1:
زي لعبة الشطرنج..بس خصمك في الشطرنج فيه مجال تقابله بعدها
هذولا النصابين لااا مافيه مجال
بس حطيتهم فراسي
زي ماكنت احط فراسي المعالجين الروحانيين النصابين واكرههم فنفوسهم
مو عاد يكرهون نفوسهم بمعنى الكلمة
اقصد يعني احسسهم انهم ضيعوا وقتهم مع واحد فاضي

المعتفس

08-22-2022, 08:46 PM

https://www.marnys-ksa.com/wp-content/uploads/2021/02/marnys-l-carnitine-mnv800sads.jpg.webp

كالعادة ..أجيب لكم أشياء مجربها على نفسي وعلى الكثير غيري
قبل أنصحكم فيها
اللي قادر يشتريه ..لايبخل على نفسه ..فوائده كثيرة
خصوصا أصحاب الوزن الزائد واللي يبون يبنون عضل

وهنا شرح مفصل عنه ..ومين االي يستخدمه ومين اللي مايستخدمه

https://youtu.be/G9qrl8ds5PE

دمتم سالمين

المعتفس

08-23-2022, 02:47 AM

.....عزمي قوي بس المشاعر رقيقه
....أدنات نسناسٍ يمرجح غصِنْها

............يامن بيدِّك أمْر كل الخليقه
....ألطف بروح تْغَرَّبت في وطنها

..........ماعادت حْبال القرابه وثيقه
وحتى الصداقه صدْق روَّح زمنها

......ماحولي إلا مْزَوِّد الضيق ضيقه
......وناسٍ عِطِرْها مايسَتِّر عفنها(:

.............حثالةٍ لو من قبايل عريقه
......بجنح باعوضه خفوقي يزنها

معتفس

المعتفس

08-25-2022, 06:31 AM

كم أحترمني
أحترمني كثييييييير بشكل مااتصوره
مع إني مااحبني
بس الحب مو شرط للإحترام
يحدث أن نحترم أعداء لنا

المعتفس

08-31-2022, 07:26 PM

اشتقت أسمع ضحكتي من جِناني
كثْراشتياقي لْموت شعري وِحسِّي

المعتفس

08-31-2022, 08:24 PM

على طاري" الكآبه" و"أدويتها "والأرق" والليل
نفثْتِ "اللي.. لها بين.. المحاني "صوله" وْجوله
فراسي للهجوس اسمع مثِل دبْك لْحوافر خيل
ومن "أجداثها" قامت.. لها" أحلام".. ""مقتوله

المعتفس

09-01-2022, 12:43 PM

ياربي لك الحمد رجعت لي الكوابيس
يوووووه زمان عنها
البارح اربع كوابيس ورا بعض والله
كابوسين أسود اففففف رعب والله خصوصا لما اصحى احسه حقيقي ورعب مابعده رعب بس رعب بلذة وفرح مدري كيف اشرح لكم
الكابوس الثالث ناس مسكوني ويبون يعذبوني قدام اهلي
قلت لهم وانا ابكي لاتعذبوني قدام اهلي عذبوني بعيد عنهم واقتلوني بعد اهم شي مو قدام اهلي ..بس قهر صحيت قبل يعذبوني
وجهي يقهر وانا ابكي في الحلم كريييييييه
بعدها تحمست انام ..والبارح بس النوم مايعاند معي رهن اشارتي مع ان مافيني نوم حطيت راسي الا واشوفني فقضية كبيرة مايصلح اتكلم عنها

صحيت على الفجر بابتسامتي ونشاطي وبصدر شرح
ومسكت معي اسافر بريدة حبيبتي وهذاني فيها
اليوم يوم الفله والوناسه

عقبالكم

المعتفس

09-01-2022, 07:43 PM

https://vid.alarabiya.net/images/2022/08/31/8f0ea815-af18-4b5a-8f20-d88aaa3523a4/8f0ea815-af18-4b5a-8f20-d88aaa3523a4_16x9_1200x676.PNG?width=372&format=jpg

عليكم لعنة الله

المعتفس

09-01-2022, 09:02 PM

......لو فيِّ غِلْظ الفرزدق فِيِّ رقَّة جرير
.......ولااوجع من دْموع كان الشِّعْر منتوجها

.......كم في مواقع تواصلنا مِقَدِّي ضرير
............ويأجوجها من أمام وْخلف مأجوجها

....واذاانكر اصوات خلق الله صوت الحمير
........ماانكر من العوْجَه اللي تجْهر بْعوجها

.............مهجَّنين الديانه غافلين الضمير
.........استجْمَموا في الذنوب وآمنوا موجها

......... صار لْعُفون البشر تُبَّع وِنجْم وْزئير
.................وْعُقَّالنا اليوم سُخْريَّه لمرجوجها

...والياطغوا البربر فْماني بموسى النصير
............والناس حُرَّه.. فِممشاها وِفِفْروجها

...............لكنَّها غيرة المسلم وِطبعه يغير
.............اليا عثا الدود في الأمَّه وِفِمروجها

المعتفس

09-02-2022, 09:51 PM

ودي أسولف لكم عن عشبة شوك الجمل
أو عشبة العاقول
لها أكثر من إسم ..بس هذي أشهر إسمين لها
بس مافيني حيل أكتب
ابحثوا عنها ..يجوز يجي فبالكم تجربوها
طعمها قريب لليانسون..وباختصار تنقي الجسم من السموم

المعتفس

09-02-2022, 10:45 PM

طفلة ٍ في روحها غنـْجة كـــلام

تسحرك فـي مــزحها وفـْجـدّها

المعتفس

09-03-2022, 05:29 PM

ههههههههههه مب صاحي انت صدقني ،

^
ليش ياوفا:m1:
مكبرين سالفة حبي الكوابيس انتم ومستغربين وتفكروني استهبل
والسالفة عادية زي اللي يحبون يلعبون العاب الموت والرعب في الملاهي
بس هم يدفعون فلوس وانا مجانا على فراشي
خوف إثارة مو الخوف ذاك اللي مدري شسمه
دام الكوابيس مطاردات وحيوانات وقتل فعادي دامه انا
لو انه فاحد يقرب لي كنت باقول لك ماحبها ..يعني زي مثلا موت قريب لي
هذي مااحبها

المعتفس

09-04-2022, 02:38 PM

الناس المختلفة والمتميزة بشيمها وأخلاقها من سوء حظي ماأصادفهم
كل يوم ولا أسبوع ولا شهر ..يستغرق الأمر سنين ويمكن عمر حتى أصادفهم
وإذا صادفتهم وعشت معهم فترة تبعدهم ظروفهم عن المنطقة اللي أنا فيها
يظل بينا تواصل من بعيد ..بس التواصل اللي من بعيد مايجبر كسر فقدي لهم
ولكن تستمر الحياة على قولة سلفر
رئيسي المباشر بينقل وهذا آخر اسبوع له معنا
هذا سبب كل كلامي اللي فوق
وهو شاعر معروف على مستوى الساحة
اول مره صراحة اشوف شاعر فيه خير..ومايعني كلامي إن الباقي مافيهم خير

لا اقصد يعني اول مره اتعرف على شاعر فيه خير العادة كلهم من جنبها
واكيد فيه شعراء فيهم خير بس من سوء حظي ماعرفتهم
لحد يقول حتى انت مافيك خير ..انا ماني شاعر
انا مجرد شخص يكتب شعر أحسن من كثير من الشعراء بس مو شاعر
اذا قلت عن نفسي شاعر لكم الحق تتكلمون
والله يافيني غصة عليه
ودي افقع وجهه قبل ينقل بس احبه
فيني حرة مدري كيف اطلعها
يارب يجي ذاك اللي يخرب المنتدى وينزل موضوع وماتحذفه رانيا
وتخلينا رانيا ناخذ راحتنا فشتمه وسبه
على الاقل حلال فيه السب ومهما تتجاوز معه فكلامك تحس يستاهل

المعتفس

09-04-2022, 03:24 PM

حابب تفرغ طاقتك ب اي شئ ’ صح صعبه لمن تحب شخص يروح وتآخذة الحياة . شعور بشع اتفق بس كذا الحياة ي آخ مش دائما تجمعك مع الطيبين او اللي ترتاح لهم نفسك تعوذ ب الله وادعي ل رئيسك وعيش اللحظات لانها اخر شئ بتكون واكيد راح تتواصل معه ومرات ممكن توجبه انت

^

هلوو ريفا

قلعته ي شيخه خليه يروح
شعور وقتي انتهى بعد مااكلت قطعة من طورطه:m1:
ي شيخه ليته راح من زمان دام فيها كيك مجوعتنا هالشركه :m1:
استغفرالله بس

المشكلة ندمت اني كتبت ردي وماعاد يتعدل
ومتأكد بعد إنك حتى انتي متندمة الحين من تعاطفك معي ولو يمديك تعدلين التقييم او تحذفينه ماترددتي :m1:

المعتفس

09-06-2022, 11:21 PM

ياكثر ما أكتب وأمسح
تبا وحبا للمعتفس

المعتفس

09-08-2022, 03:14 PM

كثير اعرف أزواج تطلقوا قريب ولهم فترة مهي قصيرة مع بعض ومنهم أقارب
بس مااقدر أسألهم وش شعوركم وكل شي فلمح البصر انتهى بينكم
انا مااعرف
بس احسه شعور صعب
لأني أنا كائن تعودي
صح وقت العناد اجازي العناد بعناد وظاهري بايعك بريال و ماتعني لي شي
بس صراحة فداخلي غير ..هذا مع الناس اللي عاشرتهم
اجل كيف لو إنه مع زوجة

الله لايحطني فموقفهم..ويعوض المطلقين والمطلقات بأفضل من طلاقئهم
وأكيد الخيرة فيمااختاره الله

المعتفس

09-11-2022, 01:23 AM

《كَئِيبه》 لِيلِةٍ صَحَّتْ 《نِزَارِي》

............."تِشِبِّ زْقارِتِي وْتِفْتَحْ "زِرَارِي"

...على" شوكٍ" تِجِرِّ القلْب 《ذِكْرى 》

........"لِأَوْجَعْ مِنْ طَعنْ" [حَدِّ الشِّباري]

.....لِلِيلَةْ" وَأْد" أَحْلامِي" وْطُمُوحِي"

......."لِلِيلهْ" مَاحْشِمَتْ "شيب انتظاري"

..مَ جيت "لْعِرْسَها" " وِلْحَتْفِيِ" إلَّا

.........مَخَافَةْ شَمْت 《فِئران المجاري》

..........فِعِزْ مااسْمَعْ "تَهَانِيهُمْ تَعَازِي"

...............[بِبَسْمَاتِي]أسَتِّرْ[ إنكساري]

...........مَ كَنِّي أَحْتِرِقْ وَجْدٍ وِغِيره

........... وْلاكَنَّ آحِسُّهُمْ[ يِسْبُون عاري]

.......هَنُوفٍ تَمْشِيِ" اسْتِحْيَا وَعِفَّه"

......... وَلَا [حَادَتْ عَنِ كْتاب البُخاري]

...........مَ غَيَّرْها "تَهَكُّمْهِن" عليها

...........(وَلا عَصْر انفتاح وْلا حَضَاري)

رواها الحِسْن وَاسْرَفْ لين فاضت"

...........سِحِرْ.. تَعْوي به ذْيَاب الغَداري

.......كأَنْها [لاجْلِسَتْ بين الصَبايا]

............[مَلِيكَهْ رَهْن اشَارَتْها جَوَارِي]

...وِكَنَّ "أسْهُمْ" دُوَاعِجْها" تِنادي:

............أَلَا هَلْ مِنْ..مُصِدٍّ إنْتِحَارِي؟؟

..لهاالله.. لَوْ لِنَا قُدْرَهْ على الصَّدْ

.......مَ طِحْتِ "فأَسْرهااتْصَلَّى بِناري

المعتفس

09-11-2022, 07:03 PM

نفسي يكون عندي شغف فشي
صح إني رياضي بس الرياضة عادة ..مو هواية
لاخلصت دوامي وطلعت أوفي أعيشه بعشوائية..صح أحاول ابسط نفسي
بس لخبطة
العشوائية هذي تحرمني من لذة الاستمتاع بالوقت

المعتفس

09-11-2022, 08:20 PM

:299:

^
كنت حاط ذا فتوقيعي
ووسوستبي نغم الله يقطع ابليسها
تقول هذا فيه قلة ذق وراسلتها ماردت علي
لايكون يسوي حركة وسخه وانا ماني بداري
ترى أنا حاطه عشانه رافع رجله زيي وانا اتمرن كيك بوكسنق ووجهه بشوش
عاد اذا تفهمونها شي ثاني فمدري
وخلص شلته من التوقيع لعيون نغم واللي يشوفونه قلة ذوق زيها

المعتفس

09-11-2022, 09:13 PM

المعتفس

09-11-2022, 09:37 PM

استغفرالله

المعتفس

09-11-2022, 09:38 PM

الحمدلله

المعتفس

09-11-2022, 09:38 PM

لا إله إلا الله

المعتفس

09-11-2022, 09:39 PM

الله أكبر

المعتفس

09-11-2022, 09:39 PM

سبحان الله

المعتفس

09-12-2022, 03:01 AM

وردةٍ تلفت عيون الانتباه
تنفتح وِتْميل بس لطلتي

المعتفس

09-12-2022, 05:14 PM

النت باستثناء المنتدى ذا صرت أحسه زي الحمامات اللي على خطوط السفر يوقف عندها النقل الجماعي ..مايوقف الا عند اوسخ حمامات
الكلام والخرابيط اللي مكتوبه ورا باب الحمام ماتقاومه لازم تقراه حتى لو ماتبي تقراه وتشوفه
هذا اللي يصير لي لما أشوف عناوين الاخبار اللي فقوقل..ماادخل عليها بس غصب أكمل قراءة العنوان..أشياء تفشل والله
ونفس الشي اللي يطلع لي في اليوتيوب
بابحث عن طريقه الحين تخلي الاخبار كلها ماتطلع لي
وباشوف حل لليوتيوب
انا غشيم وجاهل فهالامور

المعتفس

09-12-2022, 07:24 PM

^
على طاري النقل الجماعي ..وبما اني تنقلت فيه اول خمس سنوات توظفت فيها ..قبل اشتري سيارة والله يفتحها علي باقول لكم قصتين
قصة قطعت قلبي ..وكنت أفكر الافلام والمسلسلات والقصص اللي أسمعها يبالغون فعقوق الوالدين ..لين شفتها بعيوني وحضرت عليها

القصة الثانية تحزن وتضحك فنفس الوقت:m1:

القصة الأولى جيت لمحافظة صغيرة فيها مكتب نقل جماعي صغير ابي اسافر للشرقية حول الساعه ٧ الصبح ..ومكتب النقل يفتح الساعة ٨ الصبح
أمام المكتب من اليمين مصلى صغير على شكل مربع،رافعينه للأعلى بثلاث بلكات تقريبا والجهه اللي تطلع الناس منها وتدخل مفتوحه مو مقفلينها

لفت انتباهي فيه شايب كبير ورجال فنص عمره جالسين على البلك ومنزلين رجلهم تحت ويتكلمون مع بعض
وانا واقف بعيد عنهم واحتري المكتب يفتح عشان اقص تذكرتي
ولما جات الساعة ٨ وفتح المكتب ..قام الرجال اللي فنص عمره بسرعة عشان
يقص تذكرته وطلع من الفتحه اللي مافيها بلك
وانا احتري الشايب بما انه جا قبلي يقطع تذكرته وبعدين انا اقطع تذكرتي
تفاجأت إن الشايب نزل من على البلك ولف يبي المكتب ومشى من جهه فيها بلك الا يوم تعركل وتشقلب قدام عيني..بطيحه ماانسى صوتها
رحت له ركض الا وعلى طول اقومه بشويش وافحص سيقانه الا والقاها تنزف ومجرحه..انتبه لنا اللي كان جالس معه وراح المكتب وجا يركض
ويقومه معي ويعتذر له يقول معليش نسيتك..هالما دققت فوجه الشايب لقيت عيونه زي عيون العمي ..الا والرجال الثاني يقول لي تراه أعمى ومايشوف..قومناه ومسحنا سيقانه وطببناها باللي نقدر عليه ..وحاولت اوديه المستشفى رفض..اللي حزني أكثر إني أعرف الجروح المؤلمة في الجسد
وجروح سيقانه كانت مؤلمة وهو صابر ولا حتى تأوه أو قال أح..كل كلامه بسيطه ياولدي ماعليك ..بعد مارفض يروح المستشفى جاني الرجال اللي كان جالس معه ..وحكى لي سالفة الشايب..قال هذا الشايب أبو فلان وفلان وفلان ..ناس معروفه وتجار كبار
اذا فيه مناسبات يجيبون أبوهم من الطايف عشان يطلعون قدام الناس انهم كويسين وبارين فابوهم ..واذا خلصت المناسبة جوا واحذفوه عند النقل وهو زي ماتشوف أعمى وكبير سن
تقطع قلبي زيادة ..معقول فيه ناس كذا
الرجال اللي يكلمني رايح الرياض
وانا وجهتي للشرقية
والشايب للطايف
فقررت اغير وجهتي واسافر مع الشايب للطايف اوصله
لكن اللي شغال في المكتب ..لنه يعرفني من كثر مااتردد عليه حلف ورفض
ووعدني انه يكلم سواق النقل الجاي انه يهتم فيه زي ابوه لين يوصله للطايف..عييت وعييت وجلس يحلف بالأيمان إن ماعليه خوف..وصدقته لني اعرفه فيه خير ومايكذب..جت رحلة الشايب قبل رحلتي
ونزل السواق بنفسه بعد ماكلمه اللي في المكتب ومسك بيد الشايب وطلعه الباص ..وركبه عنده قدام ..تطمنت عليه شوي واستودعته الله
وراح فطريقه
وانا انتظرت رحلتي للشرقية لين جات وسافرت
بس اوسخ واقبح رحلة مرت علي فحياتي
والله لايوفق عياله

السالفه الثانية مافيني حيل اكتبها

المعتفس

09-14-2022, 12:25 AM

القصة الثانية
طالع من الشرقية لمحافظة على طريق الغربية ..بس ماكان فيه رحلة الا من الرياض لجده اذا ماخانتني الذاكرة ..فكان لازم اروح من الشرقية للرياض واحجز من الرياض لها بما إنها على طريق جدة والغربية
وصلت الرياض وحجزت وانتظرت فصالة الانتظار مقابل باب الخروج اللي يطلع للباصات
لفت انتباهي شايب سوداني وزوجته العجوز جالسين يسولفون مع بعض
وجالسين فنفس مكان انتظاري يعني رحلتهم معي ويضحكون كنهم كتاكيت :m1:
شكلهم يحبون بعض مره<يارب مو هو اللي صكهم عين :m1:
المهم نادوا وحان وقت رحلتنا طلعوا معي في الباص وركبوا قدام ..فمحل العوايل
وانا طبعا جلست فاول كراسي العزاب في اليسار والمكان هذا يسهل لي مني اشوفهم..كان وقت الرحلة متأخر ناموا الناس الا انا صاحي وانا الوحيد اللي بينزل فهالمحافظة..والسوداني وزوجته اسمع شخيرهم واصل لعندي هع
المهم وصلت ونزل السواق يفتح شنطة الباص اللي فجانبه الأيمن عشان يعطيني شنطتي وعطاني الشنطة وركب الباص ومشى
كان محطة النقل مقفلة ..وانا مضطر انتظر فيها للصبح عشان مااتصل على احد وهو نايم الوقت مهو مناسب لاتصال
بعدها بشوي وبعد ماطلع الباص الكبري الا واشوف السوداني طالع من دورة المياه ولما شاف الباص يمشي على الكبري قام يركض ويصارخ يناديه يبي يلحقه ويبيه يوقف
ويلحق مين بس :m1:
الباص خذا اللفه وتوكل على الله:m1:
والعجوز الزوله نايمه ..على شخيرها مو لو يتصل عليها..لو تتفجر جنبها قنبله ماصحت :m1:
خليت الشايب يكمل ركض وانا جلست فمحلي ومدري والله ليومك ذا وش صار عليه
وماكان بإمكاني أساعده بشي..كيف بس باوقف الباص؟
وحتى لو حبيت اضيفه عندي ..انا بنفسي غريب وفي الشارع وراح انتظر في المحطة للصبح
خليته على وجهها يركض وبيركض لين يتعب ومهو مستفيد شي
ويستاهل
مفروض يعلم السواق انه يبي دورة المياه عشان ينتظره
مدري كيف نزل وماحسينا فيه :m1:

المعتفس

09-15-2022, 12:52 AM

اضحك على نفسي
شريت لي كتاب من حوالي ٣ شهور
قلت باحاول اصير زي ذولا اللي يقرون ويحبون القراءة يمكن أصير شغوف فيها
رحت يومها مكتبة جرير ..ولني كثير النسيان ودايم اضيع اغراضي
اشتريت كتاب عنوانه (كن يقظا)
قلت فاسبوع راحتي باقراه
ويوم يجي اسبوع راحتي ماتجيني نفس اقرا اعوذ بالله
فقلت ياولد انت حق مطاعم ..خذه معك في الوقت اللي تطلب فيه الأكل ووانت تنتظر اقرا
وبرضوو ماجتني نفس اقرا بالعكس وانا طالع دايم انسى آخذ عود اسنان
فصرت اقطع من الغلاف واسوي به عود لاسناني لين خلص الغلاف هع
وكملت على شوي من الورق بس الغلاف الخلفي باقي زي ماهو
الحين حرام مررره مايشجع احد يقراه
تقول ماكله فار :m1:
فقررت أخلي القراءة لاهلها

المعتفس

09-15-2022, 01:10 AM

احس الببسي اعظم اختراع
وسبحان الله قدرت اقطع الدخان ولاقدرت أقطعه
اتركه فترة بس ارجع له

عاد لني اجهز نفسي لبطولة متواضعه على مستوى النادي رحت المستشفى
افحص فيتاميناتي ..واشيك على تغذيتي رغم ان عندي خبره لاباس بها فمجال التغذية..عاد قلت للدكتورة انا اشرب ببسي ..تبسمت وكن بابتسامتها تقول لي لعن ابو من لامك في الببسي :m1:
وحاولت تحذرني منه بكلام كلنا نعرفه عن الببسي..
قلت ان شاءالله ابطله

المعتفس

09-15-2022, 07:04 PM

من الصبح وانا رح وتعال رح وتعال
ومنشغل وانتظر

وآخر شي صدمتني سيارة دجاجة الوطنية :m1:
رجع علي سيارتي ريوس وماانتبه لي وانا محشور لين صدمني
نزل يتعذر المصري..قلت له معك تأمين قال لي إيه
قلت اجل توكل على الله يستر عليك سيارتي انا باصلحها

ماعاد والله فيني حيل انتظر نجم لو اخسر اللي وراي ودوني
راح يومي كله انتظار ومعاد فيني انتظر
واهم شي الباب الخلفي باقي ينفتح

بس الود ودي صدمتني سيارة غير دجاج الوطنية
مدري ليش احسها عيب وقويه فحقي

المعتفس

09-15-2022, 09:58 PM

فيه ناس ياخي يحسسونك وانت تتكلم او تتعامل معهم انهم مشاهير او شخصيات سوت شي للامة
وتواضعوا عشان يتصورون معك
وتواضعهم مو لله ..تواضعهم ينتظرون منك تفخيمهم مو تقديرهم حق قدرهم
يذكروني فعامل بوفية والله كان فحارتنا

كان يضبط لنا السندوتشات ويجلس يتأملنا واحنا ناكل ..يحب كذا يشوفنا واحنا ناكل مبسوطين من طبخه
هذول نفس الشي ..يحبون يشوفون فوجيهنا انبهارنا انهم سولفوا او تعاملوا معنا

ونصيحة لكل يتيم ومسكين ومحروم وفقير فذي الدنيا ماتلذذ فعيشته
اذا تبي تحس بنعيم الدنيا واللي يغنيك عن كل احساس وشعور جميل
جرب ولو مره تحسس هالعينة من الناس انهم ولا شي
وانك غير مبالي فيهم
واجلس تفرج عليهم واستمتع واطرب وانبسط
اقول قولي هذا واستغفرالله لي ولكم
ولا عدوان الا على الظالمين
رفعت الجلسة

المعتفس

09-16-2022, 02:58 AM

لو اقول لكم فلوتاب وبنادول نايت تسبب لي أرق زيادة

تصدقوني؟

المعتفس

09-16-2022, 03:31 AM

ماجاني نوم

جالس آخذ فرة على المدونات
المشكلة حركات الورعان باقي فيني اللي يدخل مدونتي ويعطيني لايك ادخل مدونته واعطيه لايك واللي مايدخل ماادخل انا :m1:
عجزت اخليها تروح مني :m1:
وتوني طالع من مدونة خابت ظنوني..لفت انتباهي اسمها انقليزي
عاد هي غيرته من كم يوم
وجا فبالي اغير نكي انقليزي ويارب نفسي تطاوعني واقدر
طفشت مني وفنفس الوقت ماقدرت علي

المعتفس

09-16-2022, 03:36 AM

امش ياعنوان مدونة الولهان :m1:

المعتفس

09-16-2022, 08:36 AM

المرتوي وش دخّله في الظوامي؟؟
تــبّــت أيــاديّــه وتـــبّـــت لـســانه

سقها على ماتشتهي ي انسجامي
حــتى ولــو إنّ الـعــواقــب إدانــه

المعتفس

09-16-2022, 02:12 PM

والله يامخي يحتاج غسيل وبستم بعد
اعوذ بالله ..اتجهز لبكره وللسفر على بالي الأحد ودوام
مع اني مصلي الجمعه
مدري كيف صار فبالي ان اليوم السبت
قاموا يطقطقون علي بس زين نبهوني

المعتفس

09-16-2022, 04:26 PM

https://i.pinimg.com/736x/93/fe/5e/93fe5e208856a3ff1c61a91f35fefe06.jpg

المعتفس

09-17-2022, 12:52 AM

..الضيقه اللي تنزل وتطلع أمواس
.............بِمْعوِّذات كْتاب ربي رجيمه
ياليت ماالله حط بي قلب حساس
.............أقل كلمه ترتكب بي جريمه
..شاعر واهيم فْكل وادي بهوجاس
...ظامي واحاسيسي على الناس ديمه
وصح الله لْسانك مَ تروي بيِ يْباس
.................غنيمةٍ مامن وراها غنيمه
..يالغالي اللي جابك الشوق عسَّاس
.............لك قيمه وْحبك بليَّات قيمه
..ماعاد يجذبني وَلا شي في الناس
............لاشكْل زين وْلا خصالٍ كريمه
..سواسِيَه عندي النَّحاسه والالماس
..............مايْهمني ذا ذيب والا بهيمه
...أهم شي مادام في الصدْر أنفاس
.....مااطيح من عيني ولاارضى هزيمه

المعتفس

09-17-2022, 07:10 AM

https://youtu.be/x6vKAu9CqF8
يحليل العمه
أهم شي فلتها قبل تموت
الله يرحمها وسبحان الخالق الرزاق

المعتفس

09-17-2022, 07:06 PM

https://youtube.com/shorts/BAdv2g1rXZQ?feature=share

الله
ابي زيها
حسيت براحة الشعور وانا اتفرج اجل كيف لو اجرب

المعتفس

09-25-2022, 03:04 PM

عسى من راعه التيه وسنينه
تضمه لااسترق نظره سكينه

المعتفس

09-26-2022, 01:50 AM

أؤمن بتلبس الجني بالإنسي مثلما أؤمن بتلبس الإنسي بالفراغ

المعتفس

09-26-2022, 03:13 AM

شخصيته ماهي استعارة لو اسمه مستعار

المعتفس

09-26-2022, 07:32 AM

صباحي جميل جمل الله صباحاتكم

المعتفس

09-26-2022, 07:36 AM

يالربع معي ابيات بنكهة الكبدة والملوح :m1:
مدري تعرفون الملوح والا لا :m1:

اي والله جالس اطفح قبل شوي وهي تدندن فراسي
كلاسيكيه قح

هاكم

مدام صليت الفجِر في جماعه

وفي ذمة اللي تحْت رجلي بسطها

وْنَوْرانِيَةْ الأذكار حولي مناعه

.........فْبنات آوى فاشلاتٍ خططها

واللي كتبْه الله لي من بضاعه

.......ماخاف محْدٍ غيري بْيلتِقطْها

.وَلاالوليد وْفي رصيدي قناعه

.........وْناسٍ أبدِّلْها وناس آخَرِطْها

المعتفس

09-28-2022, 10:28 AM

ثكلتك أمك. تجوع الحرة ولا تأكل بثدييها.
قالها قديما الحارث بن سليل الأسدي للزباء بنت علقمة الطائي، وللتاريخ.

المعتفس

10-02-2022, 08:21 PM

٣ اسابيع مضت من اجازتي
باقي اسبوعين
فليتها وباقي بافلها

المعتفس

10-03-2022, 03:19 PM

تأمل الاطفال اللي من ٣ ل٤ سنوات وهم يسولفون مع بعض
بدون يحسون إني أشوفهم كفيل بتعديل مزاجي مهما كان سيء
مع إني وانا أتاملهم أسرح عنهم واتذكر طفولتي واقول كيف كذا مرت السنين بسرعة وكبرت
أحس إن كل السنين اللي فاتت مرت كنها غفوة

المعتفس

10-04-2022, 08:56 AM

لازال فيه ناس يحكمون في المنتديات على الشخص من رمزيته ونكه

واهم شي مصدقين انهم الحلوين /الحلوات اللي حاطينهم رمزية لهم:m1:

لحظه فطست

تذكرت شي والله خخخخخخخ
يحليلها ذيك البنت نسيت اسمها
منزل قصيدة ف احدى المنتديات ..واعجبتها مرره
عاد قامت تمجد في القصيدة وتمدحها بس خربتها اخر شي
تقول معليش سامحني والله نفسي ماتطاوعني اكتب اسمك ليش اخترت الاسم ذا خخخخخخ
حسستني ان نكي عورة يومهاخخخخخ
استغفرالله
ولا زلت صامل :m1:

المعتفس

10-04-2022, 09:12 AM

^
بس فيه والله نكات ورمزيات نقدر نحكم من خلالها على اخلاق الشخص< ماعاد عرفنالك :m1:
الا والله فيه
زي اللي يخرب المنتدى تذكرون نكه اللي انا قليل تربية او حول هالمعنى
وبرضو اللي رمزياتهم خادشه للحيا

المعتفس

10-05-2022, 05:36 PM

ههههههههههههه،
اصلا يحصل لها تكتب اللقب تبعك ي صاحب الروح الجميلة اخونا

^
الله يرفع قدرك
وماعليك زود:198:

المعتفس

10-05-2022, 05:41 PM

اخيرا حملت لعبه:m1:
اعجبتني

حملت كيرم هع
ونستني
بس للحين مااعرف احرك المضرب
العب من النص
بس بديت اهدف :m1:

المعتفس

10-05-2022, 06:00 PM

اخخخ ياربي متت ههههههههههههههههههههه وهي صادقة أجل معتفس وشاعر بعد مايجي مايجي ، غير النك لـ عاشق الليل ولا العاشق المجروح و اذا ع الرمزية خلها علي اضبطك بوحدة انما ايييه :)

^
جاتك داعسه من اقصاها تشرشح :m1:

اما العاشق المجروح..وش رايك بعد احط رمزية واحد ياكل اظافره والا ماسك على راسه وحزين عشان يضبط على النك والا نازله من عينه دمعه
تخيلي بس اشارك بالعاشق المجروح احس مخكره النك وعيب
ولو يدرون اخوياي ان نكي كذا ماعاد سلموا علي وبيعدوني الفنجال :m1:
اما عاشق الليل هع
هذا مايصلح اسم عضو يصلح اسم منتدى:m1:

واصلن مااحب الليل

مو يعني مااحبه ان الحب عذاب الشباب واتعذب فيه ومدري ويش
بس كذا نفسي اليوم كله نهار وحرررر والله

نورتي المدونه يا ام لسان:ff1 (6):

المعتفس

10-06-2022, 09:46 PM

جالس اتعلم هندي
مو البارح قلت لكم حملت لعبة كيرم
هالقيت أكثر اللي فيها هنود
اصلن الكيرم والشطرنج لعبة هندية في الأصل
المهم إني حبيت وحده هنديه
وش الجمال وش الشعر وحاطه نقطه بين عيونها
شكلها هندوسية وبادعوها للاسلام بس بعدين
على بالي بس اللي في الافلام بيض
من البارح وانا وهي تحدي ماعاد تلعب مع احد غيري
بس مشكلتها ماتعرف انقليزي
وغشاشه
انا اروح قوقل عشان اترجم كلامي لهندي وهي تلعب بعد ماينتهي وقتي
مفروض هي بعد اذا انتهى وقتي تخلي وقتها ينتهي لين ارجع والعب
بس لما احط فيس معصب
تصدقون
تنزل حبوبي عشان ترضيني
شوفوا الحب

المعتفس

10-13-2022, 12:25 AM

الظاهر إني أول واحد دخل هنا بعد عطل المنتدى
المشكلة اني دخلت هنا بالغلط..على بالي سجلت دخول في المنتدى اللي جنبنا
شوي الا أشوف اسم عبير على مواضيع قديمه
والمشكله باقي على بالي اني في المنتدى اللي جنبنا
تصدقون
جتني بكيه لما شفتها هع
قلت المسكينه جايه تشارك هنا <وللحين مو منتبه خخخ
شوي الا اركز الا واسمها احمر
وماخبرها حمرا هناك
بعدين بديت استوعب اني فمنتدى غلاك
هذا والله على ما أقول شهيد
وسننتنتضن الإزاعة المحلية إلى آزاعة الببسي سي
والله يا أثر ماعندي سالفة
مسوي اني جريء واتعرف على الناس بسرعة واعرف اسلي نفسي واخلق لنفسي مكان راحه مهما كانت الظروف اثاريني خرطي بسم الله عليني
جالس في المنتدى ذاك فزاوية أخجل من العروس في يوم خدرها
مرررره ماااش
راح زمان يوم كانوا يسموني الاخطبوط وكل شوي تجيني دعوات وعقود احتراف بالملايين عشان احرك لهم المنتدى
انا قتلت هماما وامرؤ القيس
هل تراني قتلت كليبا أيضا؟
كأن هذه الحرب كلها نشبت ضدي<بصوت ضباع
يارجل
أحس قلبي ينبض فيدي قسم
الوكاد إني مدري ويش لكن ولكن كذا مو معبره
لااااااااااااكن كذا أحسن
ولااااااااااااكن
مدري من اللي يقول
البشاره ماورا وجهي بشاره
بشروني كان عينتوا بشير
شفت اسم هناك ضايقني صراحه
هذي كل السالفه

المعتفس

10-13-2022, 10:01 PM

من لعبة الأسئلة

سؤال وش أكثر شي يستفزك؟

وكان الجواب

في النت اللي يعنني تصور لنا منظر"ما"وهي تبي تورينا يدها واظافرها
وبرا النت كل الصفات تستفزني

ياخي برا النت ماعاد صار شي يعجبني وادنى شي يستفزني
وصلت لمرحلة ضيدان بن قضعان الشاعر لما قال انه وصل لمرحلة حتى قصايد خلف بن هذال ماعاد تعجبه..ماله دخل الشعر بس مجرد تشبيه
واكثر شي يضايقني لما اشوف ناس تتودد لي وتتعشم فيني اني بكره باواعدها ونطلع سوى ونتكي سوى وكشتات واخر شي اسحب عليهم
احس كل شي متكرر فحياتي
مافيه جديد
ومما لاشك فيه اني اعرف السبب
وهو اني ففترة من حياتي تشبعت صداقه وحب ولا في الخيال ومن ناس نادرة ..ومدري هالناس اوصلوني بعدهم لمرحلة الإكتفاء من أي علاقة
أو إنهم أفسدوا علي قلبي وصار غير صالح بعدهم لأي علاقة
مهو صالح إلا لعلاقة على الماشي
ترى اكتب وانا ماسك خط سفر لحد يدقق على التعبير والاملاء

المعتفس

10-15-2022, 04:15 AM

اللهم ارحم كل ميت مات على الاسلام

المعتفس

10-15-2022, 07:54 AM

اقتنعت الحين ان الدراسة اللي سووها على القطط وقريتها من فترة صحيحة اللي تقول القطط ناكرة جميل او شي زي كذا يعني تشوف انه من حقها عليك انك تراعيها وتأكلها
هافيه قطوه كان دايم اعطيها اكل..ويوم من الايام لقيتها والده اربعه تحت درج العمارة وكنت مهتم فيها..صح تخاف مني وتتوحش علي ومهي اليفة بس تعرفني ..المهم مدري وش طرالها ونقلت عيالها فنفس حوش العماره
وصارت كل ماتشوفني تجيني بس من بعيد لبعيد
وانا لازلت مهتم فيها وفعيالها لين كبروا شوي ثنين طبعا ماتوا شكلهم.
ماعاد شفتهم من زمان باقي معها ثنين بس
صاروا عيالها نفس امهم يجوني من بعيد لبعيد واذا امهم مهي فيه احرس عليهم من القطاوة الكبار عشان ماياكلون اكلهم واحذفهم
عاد والله كان امهم دايم بعد ماتاكل تجلس تناظر فيني بحنية وتغمض
شوي ثم تفتح وتغمض شوي ثم تفتح على بالي تقولي شكرا بهالحركه والله
المهم غبت شهر ونص
ووالله ان طول المده ذي افكر كيف بيكون لقانا ..جا فبالي زي مقطع اللي ربت اسد وبعدين ودته الغابه ولما جت الغابه جا حضنها
والا اقل شي قلت بيجوني جري لاشافوني
ويوم جيت ليتني ماجيت هع
قسم ان كني جدار ..ولااهتموا لي حتى
اثاريها ماتقولي شكرا فيها نوم بعد الوجبه خخخخ
استغفرالله عسى هالكلام مايضيع الاجر علي
بس حبيت اثبت لكم بالتجربة ان الدراسة صحيحة

المعتفس

10-16-2022, 06:17 PM

باقي ٣٣ دقيقه وينتهي دوامي

المعتفس

10-16-2022, 09:40 PM

ترقيت أبشركم (:

ياربي لك الحمد

المعتفس

10-16-2022, 09:53 PM

مبرووووووووووك كلولوووووشش ’هات الحلاوه عيل ,
^

يبارك فعمرك وفا ..وعقبالك
اخبر اللي يترقى الناس يسووله حفلة وحلويات ويعشونه مو هو اللي يهدي ويوزع ومدري يمكن هو يهدي ويوزع
والله نسيت من اللي يهدي المترقي والا الناس
ولاتلوميني لانسيت ..من زمان ماترقيت :m1:
وابشري بالحلاوة لاجيت الامارات وعد (:

المعتفس

10-17-2022, 12:12 AM

يبارك فعمرك عيوق ونغم وشكرا على الذوق

المعتفس

10-17-2022, 06:25 AM

يبارك فعمرك عبير وكلك ذوق

المعتفس

10-17-2022, 12:40 PM

يبارك فيك ريفا ويسعدك

وحبيت ارد على مباركاتكم هنا
عشان اسوي زي برنامج حدث في مثل هذا اليوم:m1:

وارجع للصفحة

المعتفس

10-19-2022, 01:11 AM

استغفرالله

المعتفس

10-19-2022, 01:32 AM

نغم استري على ماواجهتي
ممداني اعدل:m1:

المعتفس

10-19-2022, 02:19 AM

هذا الاسبوع ظريف ..ماداوم لحالي فقسمي
معي واحد يساعدني

المعتفس

10-19-2022, 10:27 AM

والله اني اليوم بغيت اموت اكثر من مره وانا رايح الدوام من كثر ماتغفى عيني وتميل السيارة .. ذا الاسبوع من بدايته للحين مجموع ساعات نومي يمكن توها تكتمل 10ساعات وفوق هذا ملوز وفيني سخونه
المهم وصلت الدوام ونزلت امشي ..والامن يفكروني سكران خخخ
مشيتي تحذف على الجوانب ..عمري ماحسيتني كذا
بس حظي مع خوي فقسمي ..قال لي رح ارقد في المسجد وانا باراقب القسم ويادق عليك اذا جت الادارة ..واروح واخذت لك احلى ٣ ساعات نوم
قسم ردت لي العافية بس اللوز طولت وانا احب اعالج نفسي
بدون المسكنات والمضادات اللي ضررها اكبر من نفعها
عشان كذا طولت

المعتفس

10-19-2022, 11:03 AM

والله لو لي سلطة عليكم وعلى الشعب لااخليكم تسوون تمارين رياضية غصبن عنكم والا اعاقبكم
الرياضة احلى شي في الحياة ومنفافعها النفسية والجسدية لاتحصى
ومااشوف احد له عذر انه مايسوي رياضه دام مافيه اعاقه كاملة فجسده
انا اكثر واحد في الحياة ماعنده وقت
ومع هذا اخترع لها وقت ياقبل الدوام او بعده
ومو لازم تكثف التمارين..خذ لك تمرين او تمرينين ..مع النط بالحبل اذا ماعندك سير مشي

وش هالحياة اللي انتم فيها..قهوة شاهي كوفيهات افلام مسلسلات
واللي يقهرني فيكم كشتاتكم ..احسكم تاكلون بفرح وانتم كاشتين
تقهرون كنكم ماتعرفون الاكل
كرهتوني في الكشتات والله

المعتفس

10-19-2022, 02:52 PM

نصيحة لكم عيالي الحلوين والله نصيحة من قلب صادق
جيلكم هذا منفتح حيل وعلى قدر انفتاحه بتكون الاحتمالات في الوقوع في الخطأ
ولاتتساهلون في الاخطاء .. بعض الاخطاء تكلفك ضياع عمرك كله
ويكون الخطا معك فحاضرك وكل مستقبلك ..وين مارحت تلقاه قدامك الين تموت

لاتصدق اللي يروجوا له ان كل خطأ يمكن تجاوزه ..كل خطا ممكن الله يغفره الا الشرك بس مو كل خطا يمكن تجاوزه

قال ويش ..اول ماتصحى كلم نفسك وانت تشوف وجهك في المراية وقول انا سعيد انا مدري ويش انا وانا ويمكنني تجاوز كل شي
وش هالنصب
اذكر كتاب قريته مع اني قبل اقراه كنت مقتنع انه كذب سالفة المراية

يقولون الاثنين اللي اتوقع انهم علماء نفس فكتاب اتوقع ان اسمه
خرافات او شي كذا

يقولون اصلن طريقة النظر في المراية وعلاجها النفسي كذب وتذكرك فكل اللي يألمك

وش هذا الكلام بربكم؟
اسوي لي طعه وجريه ومصيبه وبعدين بكل بساطه اتأمل في المرايه واقول يمكنني تجاوزها :m1:
ماهكذا مدري ويش والله
بتقول لي حركة المراية مدري وش تسوي في العقل الباطني وتخليه اوكيييييي واصير سعيد فحياتي واتجاوز كل الم

العقل الباطني والتخاطب معه ممكن يفيد ويحسن من أدائك وشخصيتك
بس عمره مايمسح غلطه كبيره سويتها فحياتك
وفيه اغلاط صدقني ..ماتحس انها كبيرة الا بعد ماتكبر
فلاتفسد الجاي من حياتك ..وخلك دايم اصيل حتى في اخطائك
المشكلة اني انصحكم وانا البارح كتبت تدوينة اني شكلي باقتل ناس
بس استحيت وحذفتها
حسيتني كبيت العفش وانا ماحب اكب عفشي
بس والله ملخبط البارح ومتعب لاخر حد واللي زاد الطين بله
تمرنت سكوات بعد ١٢ ساعه دوام ب٢٥٠ كيلو
نرجع للاخطاء

مدري مين يقول

ليت الزمن يرجع وانا اعدل اخطاي
وامشي طريقن ماجهلته من اول
لو قلت لك كم راح كم ظل كم جاي
تحس باللي في ضميري تجول

ويسعد مساكم

المعتفس

10-20-2022, 07:59 AM

https://pbs.twimg.com/media/Efgws2gXgAAYQ-j.jpg

إيه

لاتضحك على اللي لاتكلم يجيب العيد
رح اضحك على اللي كلمته مايبرهنها

المعتفس

10-26-2022, 02:30 PM

آهخ ليه تقتل المتعه يالمعتفس ليه
كنت داخله بكل حماس وانطلاقة لفعالية العضو الغامض
ع اساس يسألون ويستكشفون مين
وربي بدون مبالغه كتبت بس رد واحد وهو يجي بكل هدوء يقول المجهول بنت
وهي وحده تحط في جميع ردودها استفهام وتعجب بعدين كتب شاهستا
صدمني ماشاءالله تركيزك يخوف ونفس الوقت حقدت عليك يالمعتفس وعلى علامة التعجب ههههه
ليه عرفتني ع طول اهخ احس ماتهنيت بالفعاليه ماعطاني فرصه اخذ
واعطي مع الاعضاء قهررر على الاقل مثلت انك ماتعرفني مو من اول رد عرفتني
وبعدين كل الناس تحط استفهام وتعجب مو بس انا> مغبونه وربي ههههههههههه

اظن انا اسرع فعاليه مرت على تاريخ البشريه ، الجوهره بتنصدم هههههههههههههههههه

^
من مدونة "شاهستا"عيوق:m1:
والله معليش:m1:
وماتوقعت ان أحد شاف ردي قبل اعدله اللي قلت المجهول بنت
وبغيت اخليه بدون تعديل عشان تستمتعون وتستمتعين بس خمتني النذاله فجأه وعدلت :m1:
ومااذكر وش قلت بالضبط فردي اللي عدلته ..بس مو فكل ردودك تعجب أكثرها
والاستفام بس صرتي تحطيه الأيام الاخيرة ونادرا<بيجننها:m1:

وايه كل الناس يحطون علامة تعجب ..وفيه عضو وعضوه ينافسونك فيها
بس عاد كيف عرفت انه انتي بالذات فاكيد للحاسه المعفوسيه دور :m1:

المعتفس

10-30-2022, 12:41 AM

كان يعجبني ان محد يعرف صدقي من كذبي ولامزحي من جدي
ودايم مشبوه ومتهوم
بس اليوم صراحة مااعجبني هالشي فيني وتضايقت
زعلت ناس ماودي يزعلون مني

المعتفس

10-30-2022, 01:54 AM

استغرب من اللي عنده خدامه ويخليها تشيل اسطوانات الغاز والاشياء الثقيلة
لي جيران كذا ..اشوف الخدامه تسحب باغراض ثقيلة وهو واقف يتفرج والا يسولف مع واحد
المشكلة فيهم ناس متعلمة ومناصب
مدري كيف يقبلونها
والله لو انها اثيوبية ومعضلة ماارضى تعتل اسطوانات غاز والا السلم الخشبي الثقيل
ومو سالفة دين والا يعنني ..بس احس هالشي يعيب الرجل
يعني لو لقى وحده من جنسيته تسحب فاسطوانة غاز والا سلالم الا يسوي فيها بطل ويحاول يفزع لها..بس الخدامة لا مهي انسانه
تلقاه يقول خلها تحلل راتبها ..والا لعينة وتستاهل
حتى لو لعينة ياخي مايصير
ان شاءالله يعجلون باسطوانات الغاز الخفيفة ..سمعت ان فيه نوع جديد بينزل خفيف ..ومدري يمكن انه نزل
انا للحين عندي الاسطوانة الثقيلة اللي وهي معباه وزنها ٣٥كيلو
وهي فاضية على مااذكر ١٨ كيلو..
ان شاءالله ينزلونها اذا ماانزلت ويخف الحمل عنهن
وماني فاضي صراحه كل ماشفت خدامه باغراض ثقيله كلمت جيراني انه مايصير
العقول والاطباع تختلف ..ومثل هالنوعية من الرجال فيهم شوفة نفس عشان كذا احاول مااتعرف عليهم ولااحتك فيهم
ودايم اللي فيه شوفة نفس ماتسلم لانصحته من المشكله معه وليته يصمل بمجرد مايندبغ جاب لك الشرطه وماني فاضي

المعتفس

10-30-2022, 04:50 AM

.....هبِّي عليْ يانسمة الليل من غرب
..............ياعل تمطر من عيوني غمامه

....مِحتاج يَغْسِل قلبه الهايم الصَّب
......................ياعل ماتبقى لحبه علامه

.........ياصاحبي قل للغلا دامه انكب
............ ان الجمل مايْشوف حدبة سنامه

.....لوفي يِدِك رزقي وصدّيت في درب
....................ماتنحني للي يصدّون هامه

..............ماهو بقاتلني مفارق ولا حب
..................قلبي معاك ورافقتْك السلامه

..........الشك لامن دب في حب يخرَب
................والظلم له ظلْمات يوم القيامه

...واللي حفَظ يوسف وهو داخل الجُب
...............شفت آخرتْك بْعين زرقا اليمامه

............لكنّه القلب وْغبي طبْع هالقلب
....................مايقتنع حتى يذوق الندامه

المعتفس

المعتفس

10-30-2022, 06:57 AM

الاخوان والاخوات اللي يستخدمون المسكنات بكثرة
أو لهم كبار في السن يستخدموها لآلام العظام والمفاصل
لازم يسوون تحليل لوظائف الكلى إذا ماسووه من قريب
المسكنات تدمر الكلى
يجيك واحد ظهره يوجعه ويروح لدكتور ويصرف له كورس علاج مسكنات
وبعد مايخلص العلاج يرجع له الألم وعلى طول يقول الدكتور ماينفع وبعدها بكم يوم يروح لدكتور ثاني ويصرف له أدوية وبرضو مسكنات ويخلص الدوا ويروح لدكتور ثالث وهكذا..
المشكلة فيه اطباء مايسوون لك تحليل وظائف كلى مع إنك قايل لهم انك استخدمت مسكنات قبل..او أحيان المريض مايقول لهم

وهذي أسرع شي يدمر الكلى..لاتقول وسوسه ومدري ويش هذي كلى
وياويلك لو تتساهل فيها وباقول لك ليش
لنه لاسمح الله اذا ارتفع عندك نسبة الكرياتينين وصارت مزمنة بدون علمك
معناتها كليتك تعرضت لقصور واذا تعرضت لقصور مستحيل تشفى من هالقصور الا بقدرة قادر ..مالها علاااااااج فاااهم؟
وبعد القصور ممكن تتعرض لضمور ولفشل
تخيل تصير تتأثر وانت ماتدري من أي أكل فيه بروتين
وانت ماشاءالله تتغدى كبسه وتتعشى كبسه وفوق هذا مسوي كييف قهوة
وشربك للمويا قليل ..حتى اللي يكثرون قهوة ويحسون شربهم للماي قليل انصحهم يسوون تحليل لوظائف الكلى من فترة لفترة
وباقي ماسكه طب معي طرالي شي ثاني
النفسية إيه النفسية ي نفسية
تتحسس ي مسكين من أي شي وتزعل وتكدر خاطرك
ويجيك واحد يقول لك ياخي لاتتحسس شف انا وفلان وعادي الوضع
وتبدا تقارن بين نفسك وبين نفس اللي حولك..ومع الايام تتحول هذي المقارنة لاكتئاب ويجي فبالك ان هالتحسس مرض نفسي وتبدا رحلة البحث عن علاج في المصحات النفسية والأدوية ..وخذها مني يالحساس
ماراح يشفيك لاعلاج ولا دكتور ..لأن هذا التحسس فيك مهو مرض
هذي سمة من سمات شخصيتك جبلت عليها ومخلوقه فيك
فحاول قد ماتقدر تهدا وتسترخي، والناس والمواقف اللي تضايقك تتجنبها إذا حسيت إنك ماراح تعرف تسلك لهم..رغم إني افضل إنك تواجه دايم حتى لو كل مواجهة تضايقك ..ولاتعيش تخبي راسك مثل النعام لاخافت
خاف بس وانت رافع راسك وارضى بواقعك
لازم تتأقلم وتتعايش مع حالتك..وابعد عن المنبهات لانها تهيج عليك الحساسية النفسية وانتبه لاكلك وهالله هالله في الرياضة
كلامي هذا كتبته بماء الذهب صدقوني
واحس باقي فيني طب وودي ادهر بس يكفي طولتها بس كيفي مدونتي وانا حر
توني مجدد اشتراكي في النت
تخيل ادفع فلوس وماسولف، اجي اكتب احبك واتبكبك شوي في المدونة واطلع ..مااحب اسوي كذا
ودي اسولف لكم عن الصمغ العربي وفوائده للكلى بس ماعاد فيني
تقدرون تبحثون عن فوائده في النت بأنفسكم

وصباحكم جميل و معفوسي يارب

المعتفس

10-30-2022, 10:37 PM

عندنا ورع صغير ١٧ سنه صابه فشل كلوي كامل والسبب يخلط الملونات مع الكودرد او البايسن لكن مدري كم شهر له يشربها
^

بعد اذنك أخ وليد
حبيت احط تقييمك هنا عشان الناس تستفيد
واظنك تقصد بالملونات ..النكهات الفراولة ومدري ويش
وماخفي أعظم والله

شكرا لك

المعتفس

10-31-2022, 08:13 AM

عينيِ تْسوي لروس الناس إشاعه مَقْطَعِيَّه(:
وقلبي يْحَلِّل نوايا قْلوبُهُم باهْوَن وسيله(:

حزمي بن سعد

المعتفس

11-02-2022, 11:39 PM

من الذكريات الجميلة اللي احبها فهالمنتدى هالقصيدة
اللي صار عليها هواش من تحت لاتحت بدون احد يحس:m1:
https://g-lk.com/vb/showthread.php?t=2638
تضحكني مو على اللبس اللي صار
بس كان معي شلة ايام كان عندي حساب فتويتر لناس يتابعوني من منتديات ثانية وجلسوا يطقطقون علي
يقولون ياولد انت منكوب توك قلت بسم الله في المنتدى وجديد وصارت لك مشكله..غير طقطقات كثير ماتنقال
الله يذكرهم بالخير ويستر عليهم

وهذا الموضوع ..لما خلتنا رانيا انا ومتأمل بنات :m1:
https://g-lk.com/vb/showthread.php?t=17857

انا لاشفت رانيا مبسوطه ورايقه ..مو انبسط بس المنتدى
انبسط حتى وانا برا المنتدى..واحس يومي كله جميل..ومو بس رانيا والله
اي طيب وطيبه انبسط لاشفتهم مبسوطين
وكثير هنا اللي افرح لاشفتهم بخير ومبسوطين والا رجعوا بعد انقطاع
حتى لو مابيني وبينهم ذيك المعرفة ولا غاب ودي ارسل له ..بس استحي
او اخاف يقول يرمي وجهه علي.. واكيد طبعا مهو الكل عشان اكون واقعي

وهذي اول مسابقة فعليه اشارك فيها مع معيضه(كيان) الله يفشلها :m1:
عشان كذا كنت دفش وارد على كل واحد يرد عليها :m1:
https://g-lk.com/vb/showthread.php?t=18898
وصراحة كنت متحمس مرررره
بس آخر شي كرشتني :m1:
واحلى شي في الموضوع انها كرشتني فعز حماسي ..بس مالومها :m1:
واحد يقول لك كل شي عليك ..وانا علي بس احمسك كيف ماتكرشه ؟:m1:
ونذالتها بعد رهيبة.. لانها وافقت في البداية ان كل شي عليها وبعدين غيرت رايها وكرشتني :m1:

وفيه بعد ردود حلوة ورسايل مع احباب قلبي متأمل ونايف
وتقاييم للكنق الساحر الساخر طليطل..خسارة ان التقاييم تروح من المنتدى
بس مخزنها فمخي ودايم استرجعها

ورسايل زوار وخاصه وردود مع كيان وروشان وطقاقه ووفا ..احب ارجع لها
كل مانفست ..عسى تغير مودي ..وصراحه انها اذا ماضحكتني وانا منفس اقل شي تخليني ابتسم

الله يسعدهم..ويسعدكم جميعا
ويسعد مساكم وجميع أوقاتكم:241:

المعتفس

11-03-2022, 04:02 AM

اللهم إني أعوذ بك من قهر الرجال
ولسان الفاجرة
وبلوى العاهرة

المعتفس

11-04-2022, 08:47 AM

المفروض بكره آخر دوام لي
بس بقدرة قادر صار اليوم
يعني اداوم الليل واطلع بكره الصبح
يفرق معي هاليوم ..وينفعني فخطوط السفر

ياربي لك الحمد

المعتفس

11-04-2022, 09:20 AM

يقول ناصر الفراعنة:
ليس عيبا إن خدعني بمكره كل هيس
لن مايفهم فطبع الهيوس الا الهيوس

المعتفس

11-04-2022, 05:27 PM

من السهل على الإنسان أن يقلد صوت الحمار ، ولكن من الصعب أن يكون له القدرة على التحمل والصبر”

أبله" عفت"

المعتفس

11-04-2022, 10:37 PM

https://g-lk.com/vb/showthread.php?t=1221&page=1897

قتلني رد نايف :m1:

المعتفس

11-04-2022, 10:40 PM

احب لعبة الاسئلة حيل بس مشكلتي ماعاد عندي اسئلة
وصرت اتفشل لن مره جمعت سافانا أكثر اسئلتي فيها طلعت عن الاكل :m1:
وش تعشيتوا ووش فطرتوا .. الخ
فماصرت اجي الموضوع مثل قبل واذا جيت اقول يارب سافانا مهي فيه
ومايمديني اخلص دعوتي الا وهي على الصفحه :m1:
زمان كان عندي اسئلة حريقه بس مدري وين راحت

المعتفس

11-05-2022, 02:05 AM

تلاحظون معي ان اللي يسجلون فمنتدى ويبدون فيه بحماس وقوة
مايطولون فيه ؟
خصوصا اللي اول مايجي يفتح مدونة
مو بس فهالمنتدى ..فكل المنتديات
الا في النادر

المعتفس

11-05-2022, 04:06 AM

https://encrypted-tbn0.gstatic.com/images?q=tbn:ANd9GcRm0zcYQ_tPqyXCGt72wc9PV6n8In_Co XapLQ&usqp=CAU

بالجد والعمل يحقق الأمل
وفارس الصغير يصبح البطل
بالجد والعمل يحقق الامل
وفارس الصغير الفتى الشجاااع يصبح البطل
النحلة الصغيرة..تطوف الزهور
وتجمع الرحيق لتصنع العسل
وأول الصباح ..تجد الطيور
وعشها الجميل تبنيه بالعمل
بالجد والعمل
يحقق الأمل
وفااااااارس الصغييييييير
الفتى الشجاااااااااااع
يصبح البطل ل ل ل ل

المعتفس

11-06-2022, 09:32 PM

توالت علي الأخبار السيئة من الشهر اللي فات
وصار كل مايدق جوالي أحس قلبي ينقبض عوذه
و خليته فترة صامت بس ماقدرت اخليه صامت على طول بحكم ان عندي اتصالات مهمه

وتوي أفهم معنى قول الشاعر:

من كثر مامالت علينا المقادير
قلوبنا حتى الصفير ايخرشها

اكيد يقصد رنة الجوال
ظلمته

المعتفس

11-06-2022, 10:42 PM

أكره شعور الجوع اللي يرافقه انسداد شهية
أحسه يلعب فنفسيتي

المعتفس

11-07-2022, 03:40 AM

ضحكت اليوم كثير وانبسطت
ماكان ناقصني الا انام بدري

المعتفس

11-07-2022, 05:21 AM

من لعبة الأسئلة..شاهستا تسأل

مهارة تطورت لديك في الفترة الأخيرة؟

المعتفس يجاوب
صرت ماهر في الحقران أكثر من قبل(:

المعتفس

11-07-2022, 06:32 AM

https://g-lk.com/vb/showthread.php?p=669334#post669334

كيف اقنعه بس:m1:

المعتفس

11-07-2022, 09:55 AM

مدري اللي انعقد مخي ولا لساني
اطلع واجي كل شوي اباكتب شي فبالي ماعرفت أكتبه

مصيبه اذا حتى الكلام العامي صار صعب علي

علي علي بطل فليد< يمكن تضبط الاعدادات لاقلتها :m1:

ماااااش ماضبطت

المعتفس

11-08-2022, 11:31 AM

والله ياني نقدت على نفسي قبل شوي
ماسكه إنقاذ
الظاهر اني مصدق اني قراندايزر:m1:
طلعت من النادي متوجه للبقالة ابي زبادي
ماحصلت مواقف عند البقاله وقفت بعد البقالة بشوي ونزلت
هافيه شايب معه عجوز وقف السيارة والموقف مرتفع شوي.يعني لازم يربط الهاندبريك والا تدحدر
وتو العجوز حطت رجلها في الارض وبدت تدحدر السيارة يمكن ثانية وانا اصرخ باعلى صوتي السياااارة تدحدر السيارة تدحدر
من الخرشه العجوز على طول طلعت السيارة وقفلت الباب ورجعت راسها على المرتبه وتناظرني على جنب :m1:
والشايب مسكين يطالع فيني ماقال شي عطاني على نيتي ربط الهاند بريك وخلص
وعادي حتى لو دحدرت شوي بيمديه كان يربط الهاند بريك ..
هاااامشيت بعدها متجه للبقاله
الا تعرفون سيارة الألبان الدنه ..مرتفعه صح
ها توه يتحرك الا فيه أسلاك نازله من لوحة البقاله و نشبت في الدنه من فوق
ويوم تحرك بدت اللوحه تنسحب معه
واجيكم ركض بصيااااااااااح
هييييييه هيييييه وقفففف
العالم كلها تناظر لي ماتدري شسالفه
من قوة الصياح طلعوا اللي في البقاله:m1:
عاد عرفوا ان الاسلاك نشبت في السياره وفكوها منها وراحت السياره فحالها
تفكروني سكت ؟:m1:
رحت للمحاسب واللي شغالين في البقاله انتم ليش تخلون الاسلاك طايحه
خطر ومدري ويش
والسواق كيف ماانتبه لها وليش وياخي
ووالله لو مانتبهت له كان طاحت اللوحه وتخيل فيه احد يمشي تحتها
كان طاحت عليه وا وا

اذيتهم قسم فعيشتهم

شفت فوجيههم انهم تمنوا ان اللوحه طاحت ولا ابتلشوا فيني قسم:m1:
وتوي استرجع الاحداث وانقد على نفسي
مدري علامي طاير ومسرع هع

المعتفس

11-08-2022, 01:17 PM

يالبى دانيار فتح مدونة
بس والله اول ماجت عيني على الورد اللي حاطه على بالي جح لين دققت عليه:m1:

افرح لما اشوف ناس من غير الجنسيات الخليجية معنا ومو رسميين زي الكتاب

يذكروني بمصري كان معي زمان فمنتدى رهييييب مره
للحين اتذكر رد المصري على موضوع لواحد يسأل كيف اسوي في التفكير قبل النوم

رد عليه عمر اللي هو المصري يقول

عندك اليوم كلو فكر فيه زي منت عاوز
ماحبكتش تفكر الا لما قيت تنام :m1:
والله انه صادق واننا احنا اللي نمرض نفسنا بنفسنا
ويالبى قلبه وكله المصري ذاك
والله يسعده وين ماكان

المعتفس

11-08-2022, 01:52 PM

https://youtu.be/Qqw8_quQUXE

من روائع سعد علوش
مفروض تدرس والله حتى لو انها نبطي خصوصا في الزمن ذا

المعتفس

11-08-2022, 08:17 PM

قال رجل للأديب جورج برنارد شو : أنت تكتب من أجل المال و أنا أكتب بحثاً عن الشرف
فرد عليه برنارد شو : صدقت ..كل منا يبحث عمّا ينقصه.

المعتفس

11-09-2022, 10:26 AM

ياخي لما اشوف خال لابس نظارة طبية أحس فيه شي غلط فوجهه
الشمسية تضبط عليهم بس الطبية لا
مع حبي للخوال طبعا

المعتفس

11-09-2022, 10:32 AM

قدامي أيام سودا ومنيله بنيله
والعاده إذا قدامي أيام سودا أنا اللي أعجل بها اختصارا للوقت
انا مخلوق يكره حتى انتظار المصايب وأحب أبادرلها دائما

المعتفس

11-09-2022, 10:59 AM

https://youtu.be/SV0AGUx1UYM

يامال الجنة

المعتفس

11-09-2022, 11:20 AM

https://z.nooncdn.com/products/tr:n-t_400/v1587378349/N36552009A_1.jpg

"خادم البيتين"، والدار ..الدما
في وريدي دام ينبض بي وريد

المعتفس

11-09-2022, 01:13 PM

https://encrypted-tbn0.gstatic.com/images?q=tbn:ANd9GcQDTU0_kadcf6DgUjxAQ16bXg5EPkNEW UuYtA&usqp=CAU

والله مو عشان اللي فبالي بالكم :m1:
بس تونس والله

فيه صورة ثانية لقيتها

https://encrypted-tbn0.gstatic.com/images?q=tbn:ANd9GcQTsmjh1An3MHwjencDE406yydopcpAJ Ebmig&usqp=CAU

خخخخخخخخ

المعتفس

11-09-2022, 04:06 PM

تقول أبعاد التركي

مدينة الغربة والأحلام خرقا

المعتفس

11-10-2022, 12:49 AM

سحبتها نومة تعب وتوي اصحى من شوي

فانني شي مهم كان لازم اسويه
الله يقطع نظام نومي ويومي

ماراح اسامح نفسي

المعتفس

11-10-2022, 05:22 AM

الحي لاصارت أحاسيسه أموات
على هله ..لازم تسوق التعازي

:

محمد بن الذيب فرج الله عنه

alwafa

11-10-2022, 09:19 AM

المعتفس

11-10-2022, 01:37 PM

،’

.
.

https://g-lk.com/up/do.php?img=12637 (https://g-lk.com/up/)

تم اختيار مدونتك كمدونة ملكية لهذا الاسبوع , :445:

10 نوفمبر 2022
16 ربيع الثــاني 1444

إدارة مجتمع غلاك

:401:
.
.

الله أكبر
مدونتي اتسبتت
ومن وفاء صخصين
دي لازم لها ركعتين شكر ي قدعان

متشنكر أوي ي ست الكل:رحيق:

المعتفس

11-10-2022, 05:44 PM

يوووه مصيبه
نسيت اودي سيارتي يصلحوها وبكره جمعه مقفلين ولازم اسافر بكره
والظاهر ماعاد يمديهم

اعوذ بالله

المعتفس

11-11-2022, 03:52 AM

هذا وانا مواضل من ١١ الليل البارح
لين ١١ اليوم
ونمت وصحيت قبل شوي
احس مفلل نوم الحين
نومي يقهر

المعتفس

11-11-2022, 05:41 AM

الجاثوم ي عيالي
إذا صار يتنقل معكم من ديره لديره
ومن بيت لبيت فانتبهوا لانفسكم..العاقبة قد تكون خطيرة

وخصوصا اذا شغلتم القران او رقيتم أنفسكم وهو لازال يجيكم..لنه يبي يوهمكم انه مايتأثر من القرآن حتى يضعف ايمانكم بالله ويفقدكم الثقة بالقران وتبطلون ..بينما هو يتأثر لكنه يقاوم ولو استمريتوا راح يضغف وينهار ويختفي من حياتكم . ف اتتيهوا لهالنقطة

مالي شغل فكلام علم النفس عنه ..وحتى علماء الدين الجاثوم شي غير واضح لهم ..لكنهم ينصحون بالرقية وكلامي سابقا مايخالفهم

فهالله هالله في الرقية دائما حتى لو مايجيك وحصن نفسك

لاتقول ماقلت لك

المعتفس

11-11-2022, 07:33 AM

ريح راسك من العالم المتموجة
اللي يوم تحسسك انك اقرب قريب لها ويوم تحسسك انك ذابح لها شخص يعز عليها

اسحب عليها على طول ي سنايدي قبل تسحب عليك ترى الحياة فرص
الا اذا تبي تكون لها طبيب نفسي..فعاد هذي شي ثاني
الخيار خيارك

المعتفس

11-11-2022, 02:13 PM

أعتقد إنه موضوع نفسي، لأن كل شخص يوصفه بأكثر شيء يبث في نفسه الرعب، وماراح يروح طالما مو قادر يواجه مخاوفه

^
عن الجاثوم
هلا بك بتول وباعتقادك
ونورتي وشرفتي المدونة

المعتفس

11-11-2022, 05:45 PM

أول ماجيت للنت ..جيت على طول من الحارة على الشاتات والمنتديات
مااعرف شي ودلخ

كنت ارسم للناس شخصيات فخيالي من صورهم الرمزية ونكاتهم واسلوبهم
وحتى الوان خطهم وكشختهم..أتخيلهم حاجه ماحصلتش

الين شفت كثير منهم على ارض الواقع.. بعدها صحى خيالي الواسع من غيبوبته
مااقول فخلقة الله شي..سبحانه أحسن خلقه

بس شفتوا رمزيتي؟
لو أحطها في الحقيقة جنبهم طلع ملك جمال بينهم
وطبعا ماقول هذا الكلام من حلاة وجهي

بس ابيك تصحى أخي المواطن

المعتفس

11-11-2022, 06:48 PM

^
تبون تتخيلون الناس تخيلوهم كراتين

المعتفس

11-11-2022, 07:10 PM

نـشـوم عن ذكــر الـغــرام وعـلـومـه
ونرجـي قـدرنـا يجـمـع قـلـوبٍ شْتات
والـلــي حـيـاتـي تبتـغـيـه وتـشـومــه
يكفينـي منـه الحـب لـو بعـض نظـرات

أسيرة الصمت

المعتفس

11-13-2022, 10:28 AM

جبهتي كلها جروح ورقبتي وظهري رايحه فيها
بالله من اللي دعا علي فيكم يعترف
والله ماقوله شي
بالعكس بامدحه بقصيده وبيصير من المقربين
ماشاءالله دعوته وحده بوحده
اهم شي ابيه يدعي علي دايم مع اول دوام لي
دكتور الشركة عطاني يومين راحه ..ولو اطلع المستشفى اتوقع اقل شي يعطوني اسبوع :m1:

السالفة ياطوال العمار جيت من السفر البارح عشان دوامي اليوم
فكان عندي تمرين ..هاخلصت تمرين
ورحت بالعب بطن واطاله اختم بها ..هافيه الحديده حق العقلة
اللي الناس تتعلق فيها بيدها وتلعب ظهر
انا بالاضافة للظهر ..احب اعلق رجولي فيها مو يدي وانزل راسي لتحت
والعب بطن واستطاله للظهر
هالمشكلة قد غدرتبي وطاحت فيني بس الحمار حمار مايفهم
بس لما طاحت فيني ذيك المرة طاحت وانا بس بوزن جسمي
وصرت احط تحتها اذا جيت اتمرن فرش وبطاطين ومخاد عشان اذا طحت مااتعور

وكان ماتطيح ثابته ..حتى اني امسك الطاره ال٢٠ كيلو وهي ثابته
البارح قلت يارجال مهي طايحه ومايحتاج احط تحتها شي ..واجيكم اعلق رجولي وشلت الطاره ال٢٠ كبلو
يعني وزن اضافي على وزن جسمي
ممداني اخلص ٥ عدات الا وانا طايح وانا ماسك الطاره الحديد
جبهتي صفقت في الطاره الحديد وعاد هي مهي ملسه فيها فتحات
ومع الطيحه وانا ماسك الطاره طاحت على اصابعي :m1:
مورمه الحين ):
غير كذا رقبتي وظهري ..قسم صرت زي قوطي الببسي لما تدعسه هع

احلى شي ..اني اول ماطحت نقزت بسرعه واخذت وضعية الدفاع وتقدمت بسرعه مجهز لكماتي اباهجم افكر حرامي دخل علي وضربني :m1:
والله ماكنت مستوعب زي الحلم سريييييع
ولما تأكدت ان مافيه احد على طول رحت جلست في الزاوية وشوي وابكي :m1:
نزفت ومسحت الدم بس الجروح كثيره وفيه دم متجمع

وطبعا حاط فبالي اني اداوم ..اغطي الجروح واداوم ..عندي قناع البسه محد بيشوف..عشان مابي خويي يشتغل لحاله في القسم
الشغل كثير وهو كبير في السن حنيت عليه

المهم تعشيت ونمت ..وكان ظهري ورقبتي ماتألمني كثير ..مازاد الألم الا لما صحيت ..بالقوة التفت وانحني ):
صحيت وداومت ولابس القناع كني عجوز مبرقعه
بس مدري شلون ارتفع القناع شوي وانا اكلم خويي وشاف الجرح
قلت له خفيف وحلف الا اشيل القناع
ولما شلته حلف اروح الدكتور عشان يطلعني..لن عندنا مواد كيميائية
وخطر على الجرح
رحت الدكتور عطاني يومين اجازة وشكلها اذا ماكفت باطلع اي مستشفى
يمددوا لي..وخل خويي يتحمل :m1:

المعتفس

11-13-2022, 06:30 PM

من كتاب حديث المساء:
الناس نوعان :نحل وذباب
النحل لايقع إلا على الرحيق
والذباب لايقع إلا على قذارة

المعتفس

11-14-2022, 02:59 AM

https://youtube.com/shorts/PqrhU-k2_KI?feature=share

قل للدلوخ

المعتفس

11-14-2022, 12:30 PM

https://youtu.be/OZX774-0ewA

:m1:

المعتفس

11-15-2022, 12:16 AM

يارب أنام

المعتفس

11-15-2022, 01:35 AM

ناوي ان شاءالله اشتري سنجاب هالشهر

ياهذا

https://postcdn.haraj.com.sa/userfiles30/2022-11-14/900x761_9B5D9ED5-F39B-4678-8801-78339DD54E15.jpg/700/webp

ياهذا ..الطائر

https://postcdn.haraj.com.sa/userfiles30/2022-04-20/627x1080-1_-6260548c30535.jpeg/700/webp

المعتفس

11-16-2022, 11:00 AM

سعيد جدا لافتتاح رفيقة الدرب "لمعة الماسه "مدونة

المعتفس

11-18-2022, 03:03 AM

......ياعِشِق مامال عن عِرْف وأصول

...............يابَعَد من هو لاحاسيسي قرا

.........السنين عْجاف والمحزم خِتول

...............والصَّبِر ثوبه من الصَّبْر اهترا

.......والحياه حْظُوظ والحظ الكَسول

................مقبرة صاحِبْه والشكوى عَرا

............والفقِر كم ذَلَّل عْيال الاصول

.................والغنى عَيَّش حثالاث اوْمَرا

ويش اقول وويش اقول وويش اقول

..............والله انِّ العُمْر من رحتي اقفرا

.............ياوجود اللي بلا قوه وحول

..................والبَحَر قدْمه، وعدوانه ورا

المعتفس

المعتفس

11-24-2022, 10:22 PM

أكثر شي ونسني فأيام كورونا
الخمس الشهور الآجازة براتب عن العمل

والرد اللي على تغريدة بن حمري

https://pbs.twimg.com/media/ESo9N-HWAAAVWAw.jpg

المعتفس

11-24-2022, 10:23 PM

الصورة كبيرة معليش ماعرف اصغرها^

المعتفس

11-25-2022, 05:32 AM

أصبحنا وأصبح الملك لله

المعتفس

11-26-2022, 05:27 AM

هذا سر تميزي بينكم

https://www.nestle-family.com/sites/site.prod1.nestle-family.com/files/styles/medium/public/2019-05/Nesquik%20Chocolate%20powder%20tin.png?itok=jIrIv4 g6

المعتفس

12-02-2022, 09:34 PM

أشعر بأن جيناتك القمرية تتمدد في دمي

المعتفس

12-04-2022, 03:13 AM

لا تحسب إن النور يازين مني
وجهي ترى يعكس لك النور منك
مثـل القمـر والشمس كنّك وكنّـــي
أعكس شعاعــك وأسهـر الليـل عنك

^
آخر مرة سمعت هذه الأغنية قبل أكثر من ١٣ سنة
لكنها الميلوديمانيا يا دفشتي الحلوة"اشتغلت بعد كلمتك اليوم "

الزبدة

الشمس نورها حقيقي
والقمر نوره غير حقيقي
إن منت عليه بنورها استضاء
وإن لم تمن طمسته تحت ستار ظلامها

فهمتِ؟

المعتفس

12-05-2022, 12:15 AM

هذا تحليل من روشان "فاليريا"
مالحقت على تحليل شخصيتي ووعدت في الموضوع اذا ممداها بترسله خاص

............

سلام عليكم
بما اني عطيت كلمة لازم اوفي
اخذت لفه ع التحليلات و شفت اني اتفق مع الاغلب بنسبة 70 بالمئة
الموضوع تقفل قلت م بطول اكثر
مع اني كنت ابغى اعرف عنك اكثر من مدونتك و كلامك عشان احلل مزبوط
تحليلي حيكون مكس بين اللي متفقه معاهم فيه و باللي انا شفتو ولا انذكر

اول شي انت داخلك طيب و حنون جدا رغم انو هالجانب م يبان اللي بعد الاعياد و الطعات بس الكل يشهد انك م تحب يشوف احد زعلان وتعتذر لو كنت غلطان ولا تكابر
متسرع و عصبي بس تهدا بسرعة
صريح ولا انكر هالشي بس احيانا احس تجامل لانك م تبغى تكسر بخاطر احد
اسلوبك منهج لمادة الاستفزاز لو تبغى تستفز احد والله راح ينحرق مدري اذا هالشي انت متعمدو ولا انت كذا حقيقي بس الله يعين اعدائك
واثق جدا و حلوة الثقه مع انو احيانا مو بمحلها بس تضحكني هي و الغرور معطيه جمال لشخصيتك المدحدرة
كنت احسبك انطوائي و طلعت العكس او ممكن تغيرت شخصيتك عن اول ممكن اختلف مع الناس بس الهدوء و الانطوائية كانت تليق اكثر عليك و معطيتك جاذبية
اشوف فيك شخص قد الثقه و المسؤولية عفوي و متصالح مع نفسو م يتهمو المظاهر و الفشخرة
عزيز نفس وعصامي وذكي م ينضحك عليه بسهولة تكره الاستغباء و التفاهة
و م تثق باحد بسرعة
فيك غموض و محافظ ع خصوصيتك و هالشي بصراحة مرا حلو و اهنيك عليه فاصل بين المعتفس و الشخص اللي برا المنتدى و محد عارفو
هجومي احيانا و اذا عصبت م تشوف شي ترمي كلام و تخربها و زي م تجي تجي و بالاخير تستوعب و تعدل الوضع
تتعلم من اخطائك لاني احس انك مجروح او مكوي من شي و تخاف تكرر الغلطة
فيك خفة دم و مزوحي جدا و عندك مشكلة انك تمزح مع الكل و مو الكل يتقبل هالشي و مزح الشباب و البنات عندك واحد دفش
و احس نقاط ضعفك كبار السن مدري ليه
بختمها باعتراف :
كنت احس انو شخصيتك تتغير ع حسب الشخص بس بعد تحليلاتهم تاكدت انك شخص بشخصية وحدة و ع نمط واحد عايش و مو متقلب زي م كنت افكر

وبس و يمكن اكون غلطانه باشياء بس اللي م يعرفك يجهلك

............

اعجبتني اسلوبك منهج لمادة الاستفزاز :m1:
وفطست ضحك لما اقرا منسجم الا والقى دفش خخخخخ
قسم حسيتني صدمت فجدار براسي
هي عادي بس ماتوقعت تقولها احس فاجأتني :m1:

المعتفس

12-17-2022, 08:31 AM

بعض الأعضاء الجدد من دون ذكر اسماء
مسوين جو للمنتدى وأحب أتأمل ردودهم وتصرفاتهم واكثر شي مركز عليه هل عندهم غلطات إملائية أو لا < بو طبيع :m1:
أحسهم جايين من الماضي
هذا يذكرني بعضو من سنين طويلة كان معي
وهذي تذكرني بعضوة..
سبحان الله شخصياتهم طبق الأصل من شخصيات راسخة فمخي من سنين..اللهم النكات الفرق

حتى ميولهم وحلطمتهم ومزحهم نفس الشي

المعتفس

12-17-2022, 08:42 AM

قديمي جديد

ماضحَّكَه من على الشرفه
تراه نفس الذي بكَّاه

يِقَلِّب سْنينه بْطرفه
وْيقرا بقاياه من دنياه

"خفوق مِتْهالك"، وْ"حِرفه"
متْجذِّرٍ سِحْرها من آه

ماتْنفَّس الشِّعْر واحْتَرْفه
لوما غرامٍ دخل مرماه

شخصيِّتَه غير عن حَرفه
وِحرْفه أصدق رَجِل خاواه

كل انتماءاته.. لْغُرفه
أشياءَهاآعز من أعضاه

يجْهَلْه أقرب من يْعَرفه
وْمايعْرفَه زين إِلَّا اعداه

المعتفس

12-21-2022, 11:56 PM

سرى الليل وانا اكتب وامسح

المعتفس

12-22-2022, 09:42 AM

قال لي واحد فدفعتي اول ماتوظفنا المدراء زي السيارة الكبيرة
واحنا سيارات صغار ..لاشفت تريله تمشي اتجاهك بتصدمك وانت معك يارس
لازم توخر صح ؟ قلت تشبيهك غلط هذولا ناس مو سيارات يعقبون اوخر عنهم.
الحين صاحبي الحكيم اعلى مني بثلاث مراتب
وانا لازلت يارس تناطح تريلات ولافي امل اتوب واتعلم :m1:

المعتفس

12-22-2022, 01:19 PM

نطلع بحكمة وهي أن الرخّامه احياناً ممتازه , الدم الحار والمهايط وعدم مسح الجوخ تخليك تلقم تقييم سيء نهاية السنة
^

والله ياخي كلها مهي بزينة لا الرخامة ولا الدم الحار. .
وخيرنا من تغاضى بطريقة ماتهين كرامته ..لكن بعض ربعنا يوصلونها لحد الكرامة
زي مثلا يجيك رئيسك ويهاوشك فشغلة غلط فيها موظف تحت إدارتك قدام اللي أنت تترأسهم ويرفع صوته عليك.والا تقول له كلام ويكذبك

هذي مافيها تغاضي .. ويصير لازم اخليه عبرة لغيره حتى لو اخسر وظيفتي
ولابو الترقية وزيادة الراتب اللي بتجيني بسكوتي عنها
والأمثلة كثيرة أخي

سعدت بك وشرفت مدونتي ربي يسعدك

المعتفس

12-23-2022, 11:46 PM

لو كل وابِل ينفضه غيم سُقيا
مااحس و انا اشوفهاالقلب مفلوج
فرقا بعَدْها لامجالٍ للقيا
أهْوَن من مْصادف حبيبه معا زوج

المعتفس

12-25-2022, 07:21 PM

لي شهر ونص ماداومت من لما طحت على رقبتي بالشئلوب
كان سكليف
واليوم اول يوم..بس كويس ان دوامي اول يوم ليل
عووووووووو

المعتفس

12-25-2022, 10:55 PM

بلغني من احدهم هنا في الخاص
انه شاف واحد فمنتديين مسجل بنك المعتفس ووراه كلمه وسخه ويحظرونه
ومايدري هل هي مصادفة والا قاصدني
قلت مدري سبق وسووها
فحبيت انوه أعزائي
مو عشان يعني انتبهوا تراه مهو انا..لاااا
بس عشان اذا هو فعلا قاصدني
فشوفوا يعني وش كثر انا مدري ويش وميه ميه

المعتفس

12-27-2022, 09:04 PM

سبق وكلمتكم ياشطار عن فوائد إل كارنتين في الصفحات اللي ورا
وشرح عن فوائده الكثيرة في مقطع على ما اتذكر
بس سعره غالي ٢٣٠ ريال تقريبا عندنا يكفيك لمدة شهر
كنت باشتريه ذا الشهر بس استكثرته وقلت خله يولي
بس لمااستخدمته فشهر العجيب إنه زاد عندي نسبة العضل
واحترقت الدهون بدون برنامج غذائي ولا مكملات
حتى الدكتورة قالت لي خلاص لاتنزل الدهون اكثر من كذا
ولاتضخم ..قلت فيه مضرة ..قالت لا بس كذا كويس ولامانع من انك تحرق شي بسيط بس دامك مااراح تدخل بطولات..قلت انا ماني
راعي بطولات ..ماني ناقص الا اتعرى واستعرض:m1:
واصلن وانا مسوي رياضي وزحمه وجباتي ماتتعدى ثلاث وجبات في اليوم
رغم انه مفروض تكون أكثر لأن رياضاتي كله عنيفة
ومو هذا اللي باكلمكم عنه
من فترة بسيطة اسولف مع صديق طبيب مصري عن ال كارنتين
فقال لي عندنا فمصر نوع ارخص من عندكم بس مو شرب انبولات زي عندكم وسعره ٤٠ ريال
ومضاف له زنك وفيه واحد من معارفه استخدمه وكان عنده مشاكل في الانجاب وسبحان الله زوجته احملت بعد استخدامه
ومايدري هل هي مصادفه أو منه
بس الاكيد إن ال كارنتين مفيد للانجاب زي مالزنك مفيد ايضا
المهم اني بعد مشقة تحصلت على ٤ علب ب ١٢٠ ريال بس من مصر
وباجربها هالفترة . وبعد شهر باسوي فحص وباشوف النتايج
اذا طلع نتيجته زينه باقول لكم تشوفون لكم اي احد جاي من مصر وتطلبون منه يجيب لكم معه
يكون ارخص لكم
بس قبل اي شي سووا فحوصات واسألوا الطبيب اذا مافيه مضره منه عليكم
ودمتم سالمين

المعتفس

12-28-2022, 05:02 AM

اذكر زمان سمعت ان المرحومة الشاعرة عابرة سبيل
فيه ناس اتهموها انه رجال ومتنكر بشخصية مرة
بس لما مل من شخصية الشاعرة حب يقتل شخصية عابرة سبيل
بقصيدة ترى الذبايح واهلها ماتسليني
قصيدة الوصاة ..معروفة
ومن هالناس اللي اتهموها الشاعر ضيدان وواحد مطيري نسيت اسمه
عاد انا يومها ماصدقتهم
بس اعجبتني الفكرة وجا فبالي اسوي شاعرة وبعدين اموت اقل شي في المنتديات :m1:
واشوف وش يصير بعد موتي وكذا
ومن يحبني ومن يتقرب مني ومن خروف :m1:
هاكتبت باسم نجود الشمري قصيدتين او ثلاث مااذكر
بس حسيت اني تأثمت فناس واجد:m1:
وبرضو مليت بسرعه
وجا فبالي اوريكم وانا بنت :m1:
شوفوني اعرف اتقمص شخصية بنت والا لا ؟
فيه واحد فاول رد كنه كفشني
يقول تدل على شاعر لايستهان به
ومدري يمكن انه يخاطب المؤنث والمذكر بنفس الصيغة
وطبعا لحد يشره..هذا من الماضي ولها فترة وبدايات طيشية
مع احترامي واعتذاري لكل اللي ردوا علي مع انه فات الاوان :m1:
المنتدى ذا كان فيه شعراء مجانين

https://chamil.xplainer.net/showthread.php?t=262621

المعتفس

12-28-2022, 05:09 AM

^
ممداني اتقمص في الردود ادري
ان شاءالله القالكم اللي فيها ردود واجد وانتقادات

المعتفس

12-28-2022, 06:49 AM

ماتسلك معي الامور المعقدة والحرجة الا اذا حملت نفسي لها بكراهية وواجهتها
اكذب عليكم لو اقول اني احمل نفسي عليها وانا متفائل بخير
أجيها متوقع أسوأ شي ممكن يصير وابيه يصير بسرعة واخلص
بس احط فبالي ان طيحتي فيها لازم تكون مشرفة
وسبحان الله كل شي يسلك وتمشي الامور على أحسن مايكون

المعتفس

12-29-2022, 01:37 AM

اليوم جاتني معلومة جديدة علي وجربتها
بما ان دوامي اخر ليل وشغلي ثلاثة ارباعه ميداني فعز البرد
والبارح صراحة بغيت اموت
هاجاتني معلومة تقول ادهن رجولك تكرمون بفازلين ولف عليها نايلون
الكيس اللي يغطون فيه الصحون والاكل
وثمن البس الشراب والجزمة
وادعسسسس ياسنايدي
ادعسسسس حتى لو تفرفر في القطب الجنوبي يخسي البرد
ها والله جربتها ومااقول لكم اني ماحس ببرد
مع ان اليوم ابرد من امس
امس هالوقت ٩ الدرجة الحين ٨
وماني بردان زي امس
يعني بردان بس مايقارن بامس
فجربوها
بس فيه حاجه
احس اني بازحلق خخخخخ:m1:
فيه شي غلط احسه فرجلي

المعتفس

12-29-2022, 08:06 AM

صدقوني اخواني الافندمين
التطبيل نفس التطبير في الفعل
وحتى سبحان الله نفس الوزن في النطق
سواء الفعل أو الكلمة
اللهم الفرق آخر حرف
وسعيد أخو مبارك

المعتفس

12-29-2022, 10:24 PM

يافلسفه للطهر يالمقبل الصاد
ياواحدن من عيب جيله منزه

يالغامض الشفاف يالساخر الجاد
فكل حالاتك مميز ورزه (:

اشتقت لك شوق العقيمين لاولاد
لكن حبل وصلي ردى البخت جزه

المعتفس

12-29-2022, 10:30 PM

المعتفس

12-29-2022, 10:48 PM

غلطان .. ماكل من أعْجبْه يعجبني
ولاكل من جا يصاحبني يصاحبني
اختار ربعي مثل ماختار انا هدومي
يعني وجودك ل هَمَّشته "تجنبني"

المعتفس

12-31-2022, 01:39 AM

ترى قفلت الملف وافكر اقفل الرسايل الخاصه والتقييم لو يتقفل قفلته بعد هع
ومهو لاثقل ولا مدري ويش
بس انا من النوع اللي يتمادى فيها ويشجع غيره يتمادى ويصرقع
ويمكن نجيب العيد..فحبيت اقفل هالباب بعد تحذيرات الادارة العامة

ولن صراحة نفسي خايسة ومجرد التحذير ممكن يخليني اترك المنتدى وممكن اسوي سالفه
وانا حابكم وحاب المنتدى وماودي افقدكم
المشكلة اني ابي الناس اذا سويت شي غلط تحذرني بكلام حلو على مزاجي خخخخ
قسم مريض قد شفتوا احد كذا :m1:
الزبدة عشان كذا قفلت ملفي
والا كلكم على العين والراس وتشرفون اللي يراسلكم
والخوف مني لا اخطي واجركم لخطا..الخوف مو منكم:m1:

دمتم

المعتفس

12-31-2022, 11:48 PM

على اني ادري إن ظاهري في النت وبرا النت شرير وشايف نفسي
وحاد طبع
لكني تفاجات هنا فتحليل اغلب اللي حللوا شخصيتي فموضوع حلل شخصية العضو
يقولون اني رحووووووم مره مره وطيب ..عاد انا والله العظيم انصدمت
اعرف نفسي اني ماسويت شي عشان يقولون كذا
الا وفا ..وفا يمكن شافت مني موقف خلاها تقول كذا بس من طيبها وحسن ظنها والا مو شرط

هاعاد انا قلبتها شخوصي..قلت افا
برستيجك وتوب القساوة اللي من زمان ماشي عليه فصخوك منه
وش شافوا
هاجلست اراجع نفسي وش سويت انا
ولني استحيت اسأل ..بس مااستحي من طقاقه طمرت عليها
وقلت وفا اعرف ليه قالت كذا ..بس انتم وش شفتم؟
والا بس شفتوا وفا قالت كذا وقلدتوها؟

ردت طقاقه وقالت لا قلت طيب وش شفتي انتي
لدرجه ان طقاقه حست انها غلطت علي لما قالتلي طيب وروحوم
وحسيتها تراضيني خخخخخ :m1:
قامت ذكرت لي اشياء ماتعمدتها ولاخطر فبالي ان تحليلها كذا..وقالت اكيد الباقي شافوا اشياء زي ماشفت انا
وصراحه قالت لي كلمه انبسطت منها
مااذكر شقالت بالضبط بس قالت بما معناه
(يجاملك واحد ثنين مو اكثرنا نجمع انك طيب ورحوم)
قلت فنفسي الحمدلله
الطيب والرحمة صفات حميدة اذا هي كانت فعلا فيني
وزين ان فيه ناس تشوفني كذابدون اسوي واقول للناس زي اللي صاجينا كل شوي يقولون انا مشكلتي رحمتي وطيبتي ..اقلقتوا امنا ياخي

المهم اني طلعت بفائدة وإيمان بمقولة
(لاتتحدث عن نفسك كثيرا،دع افعالك هي التي تتكلم عنك)
١١:٤٥من ليلةالاحد في الدوام

اخوكم //الطيب الرحوم معتفس باشا هع:m1:

المعتفس

12-31-2022, 11:59 PM

سبحان من أبدع فْكلْ شي تصويره

.........قدْرَتْه ماتِعتِرف بابواب منصكَّه

......بقاء مُلْك الملوك فْحُكْم تدبيره

...........إن شاء بيْعَمِّرَه وان شاء بيْدكَّه

.من رحْمتَه يَطْعِم القسِّيس في ديره

..وْلا انْخسْفت الارض بالمُلحِد رغَم شَكَّه

........ لادَرِّ ذنبي من عْيوني أساريره

.......... والخوف فتَّت بِبَرقه قلبٍ بْلُكَّه

.......بْدُعاء ذو النون أتْرجَّاه تطهيره

...........القبْر مُظلم وأَظلم منْه هالسِّكَّه

........... آسآله بْحق تهليله وتكبيره

..........لااموت إِلَّا فسجده في حرم مكَّه

....من له مية رحمه وْماينقطع خيره

......... ماتلحقَه في جزيل المَدَّه الشّكَّه

..ومن مالقى في الدُّعااطمئْنانٍ وْديره

............من غربة العمْر لامنجا ولافكَّه

المعتفس

المعتفس

01-02-2023, 03:55 AM

اليوم اول ايام اوفي ..تعبت الاسبوع اللي فات تعب شديد
راح اكثر وقتي نوم اليوم ..بس متقطع ..لكن أخذت كفايتي
وحاليا اتجهز للتمرين
احب التمرين فهالوقت..سكووووووون
طبعا في النادي المتواضع اللي مسويه فشقتي
وهو تقرييا متكامل ..لن المنطقه اللي انا فيها مافيها نادي
احلى شي فهالوقت اني احسني فجزيرة لحالي
مااسمع الا قربعتي بالاوزان وانفاسي مع التمرين
اتذكر شفت فلم زمان لواحد ضاع في البحر ورماه البحر على جزيره
وقام يخترع لنفسه اشياء ومعدات تساعده على البقاء حي
انا ماني بعيد عنه..اعيش نفس الشي وصح ان حياتي أسهل ماديا
لكنها اصعب معنويا
لكن لامجال لمدري ويش

المعتفس

01-02-2023, 10:55 AM

يخضر وهمي فيك كل ماذكرتك
واضحك وغير الوهم ما..أضحك لشي

المعتفس

01-02-2023, 01:10 PM

كان صباحا جميلا
بذرت بذرة قبل ثلاثة أيام
ومن حينها وأنا أترقب بداية ظهور ساقها
بس انفجعت صراحة وقد ماانفجعت انبسطت
على طول طلعت من البذرة بووووم وردة
بدون حتى مراحل نمو
حتى اني استحيت ومدري ليش استحيت
يمكن لني يوم بذرتها كنت فتحدي مع نفسي
والدعوى ماتستاهل

بس الزراااااعة شي جميل
لكن ماعاد بازرع نوعية هالبذور
واصلن ماحب الورد

المعتفس

01-03-2023, 03:00 AM

ياربي لك الحمد حتى ترضى

المعتفس

01-03-2023, 03:20 PM

هذا موقف ماانساه والله

على طريق الرياض مكه قبل حلبان فمطعم نسيت اسمه
ملحوس بس شخصيه ومو مبين عليه
يوم جابوا له النص شوايه مع الرز
سوى زحمة وصجه يقول ان الدجاجه تتحرك في الصحن
يعني باقي حيه
لدرجة فيه عاملين ٢ من كثر مالحس مخهم جلسوا يراقبون الدجاجه تتحرك صدق والا لا :m1:
مدري وش صار عليه
انا اول ماشبعت ونويت اقوم اغسل شفته وسمعت صجته كان جالس قريب مني..وقمت غسلت وطلعت وهو باقي مسوي صجه
ماكان عندي وقت ورايح اعزي
بس كل ماشوف دجاجه والا نص فصحن يطري علي

الله يسعده ويرفع عنه ابتلاءه

المعتفس

01-04-2023, 04:09 AM

الحب والعشق كذبة دنيئة إن لم يخالطهم رحمة أمومة وأبوة

فيه قصتين خلتني أطلع بهذا الاستنتاج الغير قابل للنقاش
القصة الأولى أعرف صاحبها معرفة شخصية
أخذ وحده عن حب وكان صاحب منصب ومال لكن قدر الله
إنه يصير عليه حادث ويتشوه ويتعوق..زوجته ماصبرت عليه أكثر من سنة ..صارت تعامله بكره ..يقول لي والله اني اشوف فعيونها انها تتمنى موتي .. ومالومها لو تقرفت مني بس تقدر تتقرف مني بدون تسمعني كلام مو زين
أخينا بعد ماخسر منصبه حب يتمسك فيها باللي باقي له
من مال ..الين صار ياخذ مصروفه منها ببخل ..وتهاوشه بعد عليه حتى اذا صرفه فشي ضروري
رغم انه مابقت دولة في العالم قبل يتعوق الا وسفرها
وعمره ماقصر معها فشي وكان معيشها ملكة
وهي كان معروفه قبل يتعوق بحبها الجنوني له
قال جنوني قااااال

في الطرف المقابل
برضو زوجة تشوه زوجها بعد حادثه وخسر وظيفته
وهذا مااعرفه ..بس اعرف ناس يعرفونه معرفة شخصية
يقولون هي اللي تدخله الحمام وتغسل له وتركبه بجهد السيارة
وتعامله برحمة الام والأب لولدهم المعوق

فالسؤال ياصديقي العاشق ياللي حبيبتك غزاله ومدري كيف عيونها وخصرها ورقبتها
لو احترق وجهها وتشوه كل جسمها وتعوقت هل باقي بتحبها نفس الحب والا لا
ونفس الشي يالعاشقة ..حبيبك اللي شفته حمرا وعارضه كنه صابغة بصبغة جزم من سواده وزود وسامته
هل اذا تشوه وتعوق وخسر ماله باقي بتكتبين فيه وتحبينه ؟
خصوصا اذا عرفتي انه صارمايقدر يتحكم في البول والبراز؟
الله لايبلانا ويرفع بلاءه عن كل مبتلى

كلامي هذا طبعا يعم كل المحبين حتى اللي مو متزوجين

المعتفس

01-04-2023, 08:17 PM

صحيت على أحلى بشارة

يارب لك الحمد

المعتفس

01-05-2023, 04:18 AM

الرجل او المرأة ماينعرف معدنهم الحقيقي الا اذا وقع الطرف الثاني في مصيبة ، وخصوصا في حال المرض والفقر

^

كلام سليم رانيا

المعتفس

01-05-2023, 05:11 AM

اعجبني سداح العتيبي
لما أخذ شطر بندر بن سرور اللي يقول
قولة هلا لمن لايودك مهونه
ضمن هالشطر من ضمن قصيدته وقال بعده

أنا على المغرور طايش ومغرور
يظف وجهه واقفل الباب دونه
لو علته تصعب على كل دكتور
عندي دوا يصلح لشكله ولونه

بالضبط

سداح شاعر كلاسيكي خطير

هو اللي قال
الادمي لا سرق قلب آدمي ثاني
هو من هل النار والا من هل الجنه ؟

وهو القائل

من ليلة البارح وحابسني الضيق
عسى صباح اليوم يطلق سراحي

وايضا

قامت تمون عيونك السود
ومابيني وبينك ميانه
هالبيت حكااااااااايه
ايه وش بعد
اييييييه

تفضلي من غير مطرود
القلب مغلق للصيانه

و
قضينا وباحكام القضا تقنع العقال
وكلن عن الثاني سحب روحه بروحه
ومدري وش يقول

وبعدين يقول
ولي عين مستوره ولي عين مفضوحه

وانتي تقولين جده غير
وانتي بعد غير عن جده

وسداحياته الجميلة أكثر واكثر