مجتمع غلاك

مجتمع غلاك (https://g-lk.com/vb/index.php)
-   القصص والروايات والمسرح " يمنع المنقول" (https://g-lk.com/vb/forumdisplay.php?f=107)
-   -   رواية العم احمد الفصل السادس (https://g-lk.com/vb/showthread.php?t=15631)

ابو الملكات 10-14-2021 05:37 AM

رواية العم احمد الفصل السادس
 
بسم الله الرحمن الرحيم
وبه نستعين
رواية العم احمد
الفصل السادس
وصل العم احمد مع الاسرة الى الفاشر اليوم التانى حوالى الساعة الثالثة يعني العصر نسبة لتعطيل اللوري فى الطريق انزله اللوري امام البيت داخل الاشلاق وتجمع نسوان الاشلاق وبعض زملائه الموجودين فى الاشلاق طبعاً العم احمد كان يوم بيتغدا مع دا ويوم بيتعشى مع داك ويحكي ليهم عن الخالة سعيدة وامه وابوه واخوانه واخواته عشان كدا نسوان الاشلاق عرفن الخالة سعيدة قبل وصولها من كلام العم احمد عنها ؟ وجاء الليل وانقطعت الرجل وجلس العم احمد وسطهن فى السرير وجات علوية ونامت جنب العم احمد وشال ياسر فى كرعيه وابتدء العم احمد بالسؤال اها يمة ابوى كيف ان شاء الله كويس وان شاء الله الرطوبة خلته شوية انتي يمة ليه ما عملتي ليهو الدخان ؟ تضحك الام هوى ابوك براهو اباهو قال يعني كيف يقعد فى حفرة الدخان وهو راجل بس الحمدلله حسع كويس جارنا الشفيع ولده خالد كان فى مصر وجاب ليهو حبوب سمحة حسع كويس يحمد الله سيده اها الوصية فى الذمة ابوك قال ليك طارق ولد عمك ود الفادني جارنا ابوه قال ولده عاوز اختك حليمة وهو شغال مدرس فوق مدرسه الهدي حقة الاولاد الجمبنا دى قال ليك انت رايك شنو موافق ولا لا ؟ ويرد العم احمد يمة فى الاول والاخير الراى راى حليمة وبعدين حليمة يادوب فى سنة اولى ثانوي يعنى دايرة سنتين تانى ؟ ردت امه الحاجة زينب لالا هو قال يتزوج وهي تواصل الدراسة حتى تكمل الثانوى حتى ولو من البيت ؟ ويسال العم احمد طيب يمة حليمة رايها شنو ؟ والله ياولدى حليمة قالت الكلام البيقولو احمد هى موافقه عليه اها الراى رايك انت ؟ ويرد طيب خلاص انا بشوف وبكتب ليها جواب واعرف منها كل شى اها بشير عامل شنو مع السنة الاخيره فى الثانوى ؟ ترد الام كويس يحمدلله وهو كمان قال اكلمك ؟ ويسال العم احمد خير يمة ؟ وترد قال هو بعد الشهادة عاوز يشتغل ما عاوز يقرء جامعة عشان يساعدكم انت وابوك وعاوز يقدم للكلية الحربية وقال ليك بسرعة ارسل ليهو جواب برايك والله ياولدى كان داير رايى انا خليه يشتغل ابوك خلاص ما بيقدر تاني للشغل ؟ ويرد خلاص يمة الفيها خير ربنا يسويها ويسال اها عثمان عامل شنو يمة ؟ وترد هوى اخوك عثمان دا ما فى زول بيقدر عليه غيرك انت سامعاهو قال عاوز يدرس فى تصليح الطيارات ؟ ويضحك العم احمد ويقول ليها يعنى عاوز يدرس هندسة طيران طيب مالوا يمة ؟ الام برى ياولدى اخوك شليق وهو فى الواطة ما قاعد ساكت كمان يمشى فى السماء ؟ ويهدى العم احمد روع الوالدة ويقول ليها يمة بيشتغل مكانيكي زى مكانيكي بتاع السيارات يعنى ما بسافر فى الطيارة وهنا اطمنت امه اها الله يعدل طريقه وطبعاً الاميرة الصغيرة علوية نامت قبيل ؟ ويسال العم احمد اها يمة اخبار ناس البلد ياولدى البركة فينا وفيكم جدك مبارك خالي اخو امي الله يرحمه بس ورده الليلة وبكرة مات الاعمار بيد الله ونفيسة جارة خالتك دى الله يرحمها جابوها المدنية عندها وجع فى بطنها يومين وسلمت روحها الله يرحمهم جميعاً ؟ اها يمة تاني الحصل شنو ؟ ترد ولد جارتنا صفية وقع من اللوري وكسر يده لكن الحمدلله جبروها ليهو عند الحاج حمد البصير وحسع كويس اها بنت عمتك نفيسة اتزوجها ود خالها والهادي ود الباقر جارنا سافر يقرء فى مصر ؟ خلاص يمة نوموا وان شاء الله بكرة الصباح نتكلم ونكمل الونسة واسمع اخبار ناس الحلة كلهم وناس البلد يلا تصبحوا على خير
اصبح الصباح والعم احمد قاعد منتظر صحبو الهادي عشان امبارح قال ليهو بكرة الصباح انا بجيب الخروف الاول عشان غداء الجماعة طبعاً زملاء العم احمد اتفقوا بان يضبحوا خروف للغذاء ويوم الجمعة خروفين وذلك بمناسبة وصول اولاده ؟ وجاء الهادي ومعه الخروف شايله الحماري دخل الهادي وسلم على ناس البيت والعم احمد سقى الخروف موية وطوالى الهادي قلع الجلابية وقعد بالسروال والعراقي والله اكبر وضبح الخروف طبعاً بيت العم احمد مكون
من دردر وراكوبة للضيوف وطبعا توجد بيوت من الطوب وهي الى ضباط الصف من امباشى وفوق وبعد شوية جن جارات الخالة سعيدة لمشاركة فى عمل الغذاء طبعاً رجالهم من بالليل كلموهم بالذهاب من بدرى لمساعدة اهل العم احمد جيران العم احمد فى الاشلاق جوه للفطور لقوا المرارة واللحم جاهزة فطروا مع العم احمد وصحبو الهادي ؟ بعد تقطيع الخروف والفطور ذهب العم احمد وصحبو الى السوق لشراء لوازم الغداء من رغيف وسلطات وهلم جر ؟ وقامت الحاجة زينب وقالت لجارات الخالة سعيدة يا بناتي انا بعمل ليكم الكمونية ؟ قامت واحدة قالت لها لاو الله ياخالة انتى تقعدي ساكت انحنا نسوان الاشلاق علينا كل شى انتى وخالتنا ام سعيدة وكمان دى عمتى اخت ابوى جاتنا زيارة تقعد معاكن بس اقعدن عاينن لينا ساكت رضخت الحاجة زينب للامر وشالت ولد ولدها ومعها الحبوبة علوية ومشت مع اختها والضيفة للراكوبة قعدن يتونسون والخالة سعيدة قاعدة وسطن اميرة حلفن ما تعمل معاهن حاجة وهاك ياونسة طبعاً الخالة مبهورة من الشافتو فى القطر وكمان فى اللورى وهي جاية الفاشر خضار وطيور وحيوانات ؟ وجاء العم احمد وصحبو من السوق وطوالى مشوا بيت صحبو اخذوا ليهم نومة من تعب المشى للسوق والضبيحة وكان الغداء ولمة وآخر ونسة وجماعة فى كوشتينة كومكان وجماعة وستي ودا كلوا برا تحت شجرة الهجليج الكبيرة والشجرة سعيدة بهذة اللمة ترمي عليهم ثمرها اللالوب وكان يوم جميل ورائع وطبعا بكرة الجمعة والكرامة فى بيت الرقيب عثمان لانه كبير والناس بكرة كتيرة ولازم بيت كبير ويوم السبت العم احمد بينزل العمل خلاص الاسبوع انتهى وان شاء الله لو كان فى العمر بقية نكمل

ابنة القمر 10-14-2021 06:23 AM

شكرًا لأطروحاتك المميزة
تقديري .. :11:

عبير 10-14-2021 09:19 AM

رد: رواية العم احمد الفصل السادس
 
قصة جميلة
سلمت اناملك

عمر 10-14-2021 07:35 PM

رد: رواية العم احمد الفصل السادس
 
الله يقويك على القصه الرائعة

عتب خرساء• 10-14-2021 07:42 PM

رد: رواية العم احمد الفصل السادس
 
تسلم يمناك

رآنيا 10-16-2021 08:42 PM

رد: رواية العم احمد الفصل السادس
 
الله يقويك ويعطيك العافية
وشكرًا لك ولجهودك المميزة في المنتدى :2g39:

~


الساعة الآن 09:27 PM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by Advanced User Tagging (Lite) - vBulletin Mods & Addons Copyright © 2024 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~

This Forum used Arshfny Mod by islam servant