مجتمع غلاك - رواية العم احمد الفصل الخامس

بسم الله الرحمن الرحيم
وبه نستعين
رواية العم احمد
الفصل الخامس
مضت الثلاثة شهور والعم احمد وهو يجهز فى البيت وكان فى الشهور الماضية كل اسبوع او اسبوعين يكتب جواب الى اخيه بشير ويساله عن الاسرة الوالدة والوالد والمولود والصغيرة الحبوبة علوية واحوال حليمة وعثمان وهو ويساله بان يسال الخالة سعيدة عن ما تحتاجه فى البيت قبل وصولها ؟ وجاء تلغراف للعم احمد من ابوه يخبره ان اولاده وامه وخالتو وطبعاً الحبوبة الصغيرة علوية بقطار الاثنين القادم ؟ وطلب العم احمد منحه اجازة لمد اسبوع من اجل ان يسافر الى نيالا ويحضر زوجته وكان العم احمد قد ارسل تصاريح السفر ومبلغ من المال للحاج سعد ابوه قبل عشرين يوم مع زميله الذى كان مسافر اجازة سنوية ؟ تحرك العم احمد من الفاشر صباح السبت وكان وصوله نيالا اليوم التاني صباحاً ونزل عند ابن عمه الذى يعيش فى نيالا مع اسرته ويعمل فى التجارة وكان قد ارسل له رسالة قبل اسبوع يخبره بقرب وصول الجماعة من امدرمان ومن حسن الحظ كان جار ابن عمه يعمل فى السكة حديد وبعد صلاة العشا ؟ سال ابن عمه جاره بتين القطر بيصل ؟ قال له ان شاء الله بكرة فى الليل يعنى زى الساعة تمنية مالك تسال مسافر ولا شنو ؟ لا ابداً دا ود عمي عسكري فى الجيش فى الفاشر اولاده جاين بقطر بكرة ؟ وقام الجار سلم على العم احمد تاني عشان اول قايلوا واحد من اصحاب ابن عمه جاء يصلي معاهم ؟ وحلف الجار لازم تشربو شاي قبل الذهاب للبيت ولكن العم احمد مانع وماكان من الجار لا ان حلف طلاق وقال ليهو المفروض تتعشو معنا بس انا عارف ود عمك بينوم بدري عشان كدا قلت شاي وتمشوا وضحك العم احمد وابن عمه وجاره الظريف وذهبوا لشراب الشاى ومن حظهم كان فى لقيمات جاهزة مع شاي الحليب المقنن حاجة ما تخلص ؟ وبعد العودة للبيت قال العم احمد الى ابن عمه شوف ياخوي انا تاني ما عاوز عشاء خلاص بس طلع لى العنقريب برا قدام باب الديوان وبكرة ان شاء الله لو ربنا حيانا بمشي معاك السوق عشان كمان انا عاوز لى حاجات فى واحد قال اشتري ليهو من نيالا وفي صباح اليوم التاني ذهب واشترى حاجاته
بعد صلاة المغرب ؟ قال العم احمد الى ابن عمه انا بمشي قدامك وبصلي العشا فى المحطة وانت تعال لاحقني بعدين ؟ قال ليهو ابن عمه ياخي انت شفقان كدا مالك القطر يجي تمنية ويمكن كمان يتاخر شوية ؟ قال العم احمد يازول انا بقعد فى المحطة ان شاء الله لبكرة وضحك الاثنين ؟ وكان فى واحد صديق ابن عمه عنده عربية واصلو ماشى المحطة وركب معه العم احمد ؟ وهناك لاقى العم احمد جار ابن عمه ورحب به ودخلو معه جوه المكتب وكلم الفراش يجيب شاى من برا للعم احمد ؟ وكانت ساعات الانتظار قاسية على العم احمد بتين القطر يصل ويشوف اهلوا ؟ وجات اشارة بان القطر تحرك من المحطة الاخيرة ويصل فى حدود الساعة تسعة ونص ولم تمضى ربع ساعة حتى حضر ابن عمه ومعه ابنه البالغ من العمر سبعة اعوام والمسمى سعد على عمه ابو العم احمد الحاج سعد والعم احمد قاعد على جمر الانتظار بتين يصل القطر ومرة مرة تلقاه سارح والجماعة فى الونسة وهو ولا هنا بعد نص ساعة جات البشارة القطر خلاص قرب يصل المحطة ولم تمضى عشر دقائق والمحطة اتملت ناس ناس بتبيع وناس منتظرين اهلهم زى العم احمد كدا واخيراً وصل القطار والدنيا ليل ؟ والعم احمد قلبه يدق ويعاين فى ركاب الدرجة التالتة ومعه ابن عمه وابنه ؟ وفجأة سمع العم احمد صوت يعرفه جداً انها الخالة سعيدة احمد تعال نحنا هنا خالتى اهو داك احمد وطبعا الخالة سعيدة ما شافت ابن عمها العايش فى الغرب بس سمعت بيهو ساكت ؟ طلع العم احمد القطر وسلم على امه والخالة سعيدة وخالتو واخته الحبوبة علوية ؟ وطبعاً سبب تعلق العم احمد باخته علوية راجع الى حبوبتة ام امه وكانت تحبه شديد وتمنع بنتها من ضربه وهو صغير وسبحان الله علوية تشبه حبوبتها شبه شديد وهذا سر المحبة ؟ وطوالى شال الغالى ياسر وترك ابن عمه واثنين من عمال المحطة ارسلهم جار ابن عمه عشان ينزلوا العفش وكانت هناك عربية ابن عمه واقفة رفعوا العفش وطوالى على البيت وهناك زوجة ابن عمه كانت مجهزة كل شى طبعاً زوجة ابن العم ليس من العائلة غريبة اسقبلتهم بكل ترحاب وهاك ياونسة ؟ وقالت للخالة سعيدة والله البلد دى احسن من اى مكان تاني وناسها طيبين والحمدلله العيشة رخيصة ؟ وبعد العشا العم احمد شال ولده قال ليهم برقدوا معاى ؟ امه قالت كدي قول بسم والله تشيلوا لامن تفتر خليه حسع مع امه ترضعوا وضحك العم احمد ؟ واصبح الصباح ومشى العم احمد الى السوق لعمل الحجز فى اول لوري مسافر فى المساء الى الفاشر وفى المساء ودع العم احمد ابن عمه وجاره بتاع السكة حديد وركبت امه وخالتو والخالة سعيدة قدام مع السواق ام الحبوبة علوية رفضت تركب معاهم قالت بس مع اخوها احمد فوق فى اللوري ان شاء الله لوكان فى العمر بقية نكمل