السلام عليكم


شكراً لكم على حسن ضيافتكم

و أرجو أن تكون أول خطوة لي هنا موفقة

و تحوز على إعجابكم و مباركتكم ..

و أرجو أن لا تمانعوا بأن تكون منثورة باللغة المحكيّة .


أختكم : قارورة



(( عِنب الوصال ))



هْناك ..

تنتظرني أناي !

و أنا هنا .. معي

أنتظر بقاياي !

أدوّر نِفَسْ .. و انفاسي تعِّبَتني

أفكّر أخنقني ..

أسجِنِّي

أفرّقني ولا أجمَعنِي

بين الشي و الشي .. شيٍّ كبير

من كبره صار .. ولا شي يكتِبني

أعافر .. في بحر حلم راكد

كل موجه خيال .. و انا موجي جَزْره محال

حتى إيديني أطول من هالخيال ..

بس استحيت أقطف .. عنب الوصال

قال : حامض ؟

قلت : لا .. حالي بزيادة

و ان زاد الحلا يقولون مشكوك بأمره

يقولون مو حلال ..

قال : اخذيلك رشفة ..

و اعترَتني رجفة ..

أحسنلي أروح هناك ..

و المّ شملي بأناي

نتعافر مع مرايه .. و نتصارع مع رواية

نرسم الحلم بأناقة .. وَهَم ماله نهاية

كل الحكاية ..

م البداية سؤال : تقدر تكمل الدرب معاي ؟!

قال / عندك شك ؟!

قلت : مو إنتَ ريَّال ..

فِتل شاربه و عقد الحاجبين : طبعاً .. ما فيها كلام !

ابتسمت له و قلت : و دامك رَيَّال .. ما بتقدر تكمّل معاي !

دربي طويل .. و انفاس الرجال قصيرة .. ما تحمل أحلامي الكبيرة

و لا تقدر تشيل نص حزني .. و لا ربع هَمّي .. و لا بتفهم المكتوب .. باوراقي القديمة

ثلثين اللي قلته كلام .. و ثلثين اللي قلته ظنون ..

و ثلثين على ثلثين .. ما تستوي قصة ..

يمكن اللي استوى .. على نار البعد

شوية اوهام

..