عيش مجنون ... والعقل خله للمناسبات الكبيره ،،،،،،،،،،،،،
 

بسم الله نبدا مدونتنا الجميله

اتمنى مايصب هنا ينال اعجابكم
ويرسم البسمه على براطمكم

الجميله

سأودون او سؤدون
اي وحده صح فيهم ؟

المهم على حسب المستلم بالراس يكون التدوين

احيان المستلم هاوي ابيات قصيره
احيان حكم
احيان واكثر شي يكون مستقعد للنساء
احيان قصص هبله من اللي صارتلي زمان
احيان مقاطع يوتيوب


لكن ماعندي اي مستلم بالراس راعي خواطر
اذا كنت من حقين
اسدل الليل غيومه وجاء الموج باشواقه

ماهي عندي الامور هذي

كل اللي عندي اغلبه كلام فاضي

يعني تقدر تقول وناسه وشي من هيدا الحكي :97:


تشرفنوني بمتابعتكم :ff1 (198):

رد: عيش مجنون ... والعقل خله للمناسبات الكبيره ،،،،،،،،،،،،،
 

:33:

هذا يذكرني بواحد لئيم اعطاني سيارته وامبير البنزيم
فل وهو بالاساس عطلان وثابت ع الفل
اعطيته سيارتي واخذت سيارته
وهو يلوحلي بيده نفس الفيس هذا
وقطعت السياره بنزيم واكلت هوى لين لقيت برج اتصال
ودقيت منه بوسط جبال وجو الفزاعه بجراكلهم

عشان القط برج للجوال واتصل
تمرمطت طلعت جبل ياكبره
نشف ريقي وارجولي تعطلت
امشي ومن حالها ترخي

مايعرف قيمة برج اتصال واحد الا اللي
طاح بوسط جبال مثلي وهو متحمس للقنص

ترانا بنعمه لا تتذمرزن

رد: عيش مجنون ... والعقل خله للمناسبات الكبيره ،،،،،،،،،،،،،
 

ياليتني بجيبك ريال مقطوع
يبقى معك مايقبله اي دكان

٨
٨
٨

اصدق ماقيل بالحب :write:

رد: عيش مجنون ... والعقل خله للمناسبات الكبيره ،،،،،،،،،،،،،
 

سافانا

الله يسعدك على الاطراء اللذي هو جميل :33:

رايق

خشمك يالامير :1554:


الا على فكره متى تتفعل التقييمات عندي

رد: عيش مجنون ... والعقل خله للمناسبات الكبيره ،،،،،،،،،،،،،
 

ليا هوى والهوى يهوى
كيف الهوى ياهوى يهوى

احترت مابينهم سهوى
اهواه ولا اتركه يهوى


:33:

رد: عيش مجنون ... والعقل خله للمناسبات الكبيره ،،،،،،،،،،،،،
 

يا عرب:1554:

اللي يعرف رقم مفسر احلام يرد بسرعه لايبخل علينا :33:

رد: عيش مجنون ... والعقل خله للمناسبات الكبيره ،،،،،،،،،،،،،
 

الحب هو اكتفاء انثى
ووفاء رجل

رد: عيش مجنون ... والعقل خله للمناسبات الكبيره ،،،،،،،،،،،،،
 

ابن الهيثم

خشمك يالامير:33:

رد: عيش مجنون ... والعقل خله للمناسبات الكبيره ،،،،،،،،،،،،،
 

فاقد علاجن لروحي ليا جاها نزيف
هو صحيح انسان لكن على هيئة دوا

رد: عيش مجنون ... والعقل خله للمناسبات الكبيره ،،،،،،،،،،،،،
 

سمو المجد:10ل0: :150:

<<< التقييم عطلان



صدق من قال الزكمه علة الرخوم
تخلي الواحد مثل النفاس ماغير منسدح

رد: عيش مجنون ... والعقل خله للمناسبات الكبيره ،،،،،،،،،،،،،
 

يامعشر الغزلنجيه والحبيبه كلكم كووووووم
واللي يحب متزوجه ويغار عليها من زوجها كووووووم ثاني

يا اهبل هذا دافع مهر جالس يصرف على البيت يودي ويجيب

ياصديق خلي ولي:33:

رد: عيش مجنون ... والعقل خله للمناسبات الكبيره ،،،،،،،،،،،،،
 

دخلت عند اخوي بغرفته واخذت يد السوني
وحطيت مقطع باليوتيوب وحطيت السماعات على اذنيي الجميلتين

فجأه دخل علي اخوي قال انا مخالط
قلت مخالط وش .... ادري انه مخالط واحد مصاب بكورونا
لكن قلت عسى ولعلا يقول مخالط غنم ولا بعير ان شاء الله اي شي

المهم قال مخالط مصاب بفايروس كورونا
من الوسوسه لوهله قصيره جاتني كل اعراض كورونا

تعوذت من الشيطان
وقلتله بسرعه روح سويي المسحه

اليوم الصبح نسيت الموضوع ومريته
قلت يالله مشينا
قال ويييييييين ياعمي طلعت النتيجه ايجابيه
ياويحي

من جد قال اي والله
قلت ارم المفتاح
رماه ومسكته بمنديل يوم وصلت الباب جاتني صطوه وتوكلت ع الحي اللي مايموت
ومسكت المفتاح بيدي >>>> بدون تصفيق

المهم بكره الساعه ثنين موعدي بروح اسوي المسحه

مو هذا موضوعنا


موضوعنا ... ادعولي :(

رد: عيش مجنون ... والعقل خله للمناسبات الكبيره ،،،،،،،،،،،،،
 

الحر الاشقر
رايق
سافانا
خفايا روح
امبراطورة البحر

الله يسلمكم ويسمنكم يارب


رجعنا للجوال اللي مايعطي تقييمات

المهم ابشركم النتيجه سلبيه
ولله الحمد

اليوم بروح لخياط وبخيط الكمامه بجغودي
واخليه يحطلي سحاب بنص الكمامه عشان الاكل وكذا

لين ماتنقشع هالكورونا

:ff1 (198):

رد: عيش مجنون ... والعقل خله للمناسبات الكبيره ،،،،،،،،،،،،،
 

الحب هو

عفن القلوب الطامعه
و
جنة القلوب الصادقه
:170:

رد: عيش مجنون ... والعقل خله للمناسبات الكبيره ،،،،،،،،،،،،،
 

اخوي رايق

كان فيه مدير مستقعدلي ع الفلكه
يعرف انه الفرش باليد مايجيب نتيجه
يجمعلي حق الاسبوع كله
والحصه السادسه يوم الاربعاء ينفذ حكم الفلكه
الويكند اقضيه وانا اعرج



:17733:




مره طلعت مصر وكان خوينا سابقنا بكم يوم
وزبط الامور ولحقناه

المهم خويي اللي سبقنا تعرف على واحد مصري هناك
بعد ماجلسنا كم يوم
خوياني اثنين يبون يصرفون المصري في هذا اليوم ضروري
ومستحين منه

قلت انا بدق عليه الحين واخليه يجي وبنطلع بنروح نفرفرلين الصبح
لاشق النور تراني بجيب الفطور واجي

قالوا تم

المهم ويجي الرجال واطلع معه
قلتله شوف انتا مامعك سياره والوقت بدري
ومستحيل اقضيها تكاسي
لكن ابيك تستاجر سياره ونطلع قال تم

يوم استاجرنا سياره قلتله اسمع ابي اشوف نظام الغرزه ع الواقع
زبطلي حاجه

المهم ويدق ويدق ماحد يرد عليه
بعد ثلاث ساعات ردوا عليه

قالوله ع الساعه وحده بالليل
قلت كلمهم العشا بنجيبه معانا
قالو تم

يوم جات الساعه ثنعش
وامر سوبرماركت واقش فشافيش وبساكيت ومن كل شي
ونمر مطعم مندي واخذ ذبيحه كامله

المهم

وتوجهنالهم الطريق اللي رحنالهم كله رعب
دخلنا مع حاره عشوائيه والخلق تطل وترمي كلام طول ماحنا نمشي
بعدين عدينا من مزرعه شكلها يخوف
بعدين من عند مقابر
ومشينا مسافه
اخر شي بغيت اغمض خلاص الليله باينه من اولها من الطريق

وانا التفت للمصري قلتله امان ياباشا قلي امان

ويوم وصلنا بمكان حوالينه شجر

ووقفنا عندهم ويطلعون اثنين اشكالهم بغت تسببلي توحد
ضخام واشناب ولابسين جلابيات
لو الواحد يصقعني بوقس براسي امكن يطيره من بين متوني

اول ماشفتهم قلت في نفسي يالله اني دخيلك
ونخش واحصل اربع جالسين اخس من الاثنين اللي استقبلونا
واهلن ياياشا واهلن ياباشا وانا اقول في نفسي الله لايحيي هالاشكال

ونحط العشا
ونتعشى وبعد العشا يزبطون الشاهي وجلسنا نسولف

وضعهم ماعجبني
قام واحد وروح عنا مسافه
جات رساله لخويي شوي وقام وراحله وقعدوا ابو كم دقيقه
ورجعوا سوى مع بعض
قلت اها عز الله اني رحت عشوة سكارى
شوي قام واحد ويلحقه واحد


المهم جو وجلسوا ووناسه وضحك وعلى جوهم
شوي الا جابوا البيره والارقيلات

وانا اقول في بالي جاك الفرج وطوق النجاة
قدمولي بيره وارقيله
قلتلهم مالي فيها نهائيا
ولزموا علي قلت شوفوا انا جاي بشوف الغرزه ع الواقع لاني ماشوفها
الا بالافلام وحبيت اشوفها من باب الفضول

بعدين قلتلهم انا ماقدر اشرب بيره او ارقيله

قالوا جاي مصر ورايح لغرزه ومالك في البيره ولا الارقيله
قلت اسمعوا
انا مدير شركه ماليه كبيره بالسعوديه
والشركه دخلها بمئات الملايين
ومن شروط الشركه اني اسوي تحليل سموم كل اسبوعين
لان الموقع حساس ووضعي مهم

على طول نقز واحد قلي وبتاخذ كم
قلتله على حسب انا اشتغل معهم بالنسبه ويكسب كثير
واعطيهم من الصواريخ اللي خليتهم يفتحون افميهم صح
وامسكبهم طريق ابو حدريه رايح جاي

قلت اسمعوا بصراحه انا حبيتكم وايغا افتح مشروع بمصر
والحين لقيت الناس المناسبه لانكم ناسبتوني

فغروا
قالوا بتفتح ايه
قلت والله مادري انتوا اهل البلد وبتفهموا بالشي اللي يمشي سوقه

اربعه منهم قالوا كابريه بس مممكن ك سعودي ماتوافق
قلت انا اهم شي عندي الارباح


وادخل معاهم بتفاصيل الكباريه
والارباح وشغالين حسابات
والعالم انبسطت

قلت اسمعوا مليون وخمسمية الف ريال تسويلنا كباريه محترم<< ركزوا على محترم

العالم تناقزت قالوا تسوي احسن كابريه فيك يامصر

واتفقنا وزبطنا الامور
والسته خلاص عاشوا مرحلة الثراء

ويباركون لبعض
بس قلتلهم بشرط تتركوا هذي الاماكن
قالوا نولع فيها ياباشا

قلت حلو الحين الانسحاب جا وقته

طبعا المصري اللي انا جاي معاه ذيب
عرف اني جالس اصروخ عليهم وكان ساكت

وانا قلتلهم بمشي
ويوصلني لين السياره وانا اقولهم بكره عازمكم بكزنو الليل
العالم انبعجت من الوناسه قالوا وش اللي طايح علينا

واول ماركبنا السياره
ومشينا وانا وجهي يقلب والمصري يقولي بتهرق صح
قلت ايه جالس اكذب عليهم مدري كيف جاتني الفكره

قلت تعال يوم سحبك اول واحد وش قلك

يوم نادى خويي قاله السعودي يلزمنا ودي فرصه ونبغا نقلبه يعني نسرقه
والسياره يبغون المسجل حقها
ومش راح نعور صاحبك قصدهم علي

وكانوا ناوين الردى

المهم ع الساعه تقريبا اربعه قلتله وصلني للشقه
يوم وصلت الشقه ادق ادق ماحد يرد
واطلع واخذ تاكسي وعلى فندق وانام نومه اليمه
الليله باينه من اولها
ويوم صحيت وادق على واحد منهم
وازيك وماعرفتني وهلا وسهلا
قلت خلاص بعد شهر بجيب الفلوس ونبدى المشروع
وارفعه فوووووق بالتعشيم واجيبه على زقمه
يالله فيم مايخطيك
معشيكم وجايبلكم فشافيش وناوين علي
وسب انا وياه

ومن هالمكالمه والسفره ملها اتصالات وتهديد
وانا حاس بغينتهم ومنبعج من الوناسه
كل شوي يدق علي واحد من السته
وتهديد احس اني فعلا غبنتهم
لاهم اللي سرقوني
ولا هم اللي فتحوا الكابريه

رد: عيش مجنون ... والعقل خله للمناسبات الكبيره ،،،،،،،،،،،،،
 

كنت احسب ان قليلي بعينك كثير
واثر اللي اسويه مايفرق معك

رد: عيش مجنون ... والعقل خله للمناسبات الكبيره ،،،،،،،،،،،،،
 

قمريه غردت بالصوت
وفرغت سمها فيه

وشرفتني لكاس الموت
منهو يجيب الدوا ليه

رد: عيش مجنون ... والعقل خله للمناسبات الكبيره ،،،،،،،،،،،،،
 

يابنت ياللي عليك الشال
اسود كما الكحل بعيونك


والله وتبدل علي الحال
واصبحت يابنت مجنونك

رد: عيش مجنون ... والعقل خله للمناسبات الكبيره ،،،،،،،،،،،،،
 

مجتمع غلاك عليكم نور
مادام خلي يلاعبكم

حلفت لابني عليكم سور
وسبع مدافع تحرسكم
:16g7:

رد: عيش مجنون ... والعقل خله للمناسبات الكبيره ،،،،،،،،،،،،،
 

من يفقد اعصابه على ادناة ماجاه
تأكد ان نفسه حزينه كتومه
لاتسأل اللي منغبن عن نواياه
قدر ظروفه وان زعل لاتلومه
ولاتحرجه ولاتحده على اقصاه
ولاتجرحه ولاتفّرح اخصومه*
واضح ولايحتاج فتره وتقراه
جالس ونظراته تقول امحرومه
قلبه جريح وخانه الوقت واعياه
بتهاجمه اجل تحمل هجومه
لاتقول وش علمه ولاتتبع اخطاه*
ادخل وسط قلبه وتعرف علومه
تجيه رايق وانت تجهل خفاياه
وتشيًن اخلاقه ،،، وتنبش همومه
ياخوي من صمته تبان المعاناه
يمكن لو لحاله ،، يشقق هدومه
هذا يقضي ليلته بالمحاتاه
يوم انت مديها بسبعين نومه
اركد ترى التهميش واللامبالاه
بالشخص كنك بايعه بأي سومه*
تراها مستويه معه جاه من جاه
شجاع لكن طايحاتن عزومه
هذا قبل لو تعرفه ماتعداه
من طيب راسه من جمايل سلومه
شوفه زمان المهزله وين وداه
وداه للوحده وغيبّ نجومه
اليا نطق في قلبك تقول عزاه*
ماهو على بعضه ولاهو بيومه
يضحك دقيقه وان ذكر جور دنياه
يسرح مع اوجاعه برفقة حلومه
يرجع يفكر في نصيبه وبلواه*
تقول طيرٍ عاد من عقب حومه
ياصاحبي لاتنشده عن سواياه
ماضي حزين وبيناتن ارسومه*
ان ماقدرت بوقفتك تمسح ابكاه
طالبك طلبه لاتنبش علومه*
ارفع يدينك واترك الامر لله
ابيك تدعيله بنفسن رحومه
ولاجاك ملقوفن يبحث خفاياه
اللي على العالم يسدد اسهومه
لاتضعفه دام الشجاعه بيمناه
قله يبي ربك يفرج اهمومه .
.

رد: عيش مجنون ... والعقل خله للمناسبات الكبيره ،،،،،،،،،،،،،
 

منظمة الصحه العالميه تدعوا البشريه للاستعداد لوباء جديد

باقي بس يوزعون كروت دعوة
والله كانها دعوة لحفل زواج

الوكاد هي واضحه خلاص

عن نفسي انا كنت بشتري يخت فرنسي
وجزيره صغيره بس هونت
واشتريت لي قطعه ارض وبدون صك كمان
لاوكمان العمال يبنون بعد صلاة العشاء عشان البلديه

لاحد يخسر عمره لين نشوف النهايه
الله يخارجنا

رد: عيش مجنون ... والعقل خله للمناسبات الكبيره ،،،،،،،،،،،،،